Bwaina Te Ongeaba Ao Te Ninikoria N Aroni Kristo Ngkoa

“Kam na ninikoria, bwa I a tia ni kataea ana kai te aba.”​—IOANE 16:33, Te Nu Tetemanti n te Taetae ni Kiribati ae Ngkai, NTK.

1. Tera aroni kororaoin ongeaban Iesu nakon te Atua?

E KAKARAOA nanon te Atua Iesu Kristo n taai nako. Bon akea te tai teuana are e iangoa iai riaoan ana taeka Tamana are i karawa. (Ioane 4:34; Ebera 7:26) Ma e bon aki bebete te ongeaba irouna ibukini baike a riki nakoina i aon te aba. Ni moanakin ana mwakuri n uarongorongo Iesu, a kataia naba te koraki ake a riribaia n ikotaki ma Tatan ni kairia bwa e na onimakinia, ao a kairoroa, ke a kamwanea bwa e na kitana maiuna ni kakaonimaki. (Mataio 4:1-11; Ruka 20:20-25) A karika korakoran rawawatan ana iango Iesu taan ribaia aikai, ma korakain nanona ao marakin rabwatana. Ao n tokina, a bon tokanikai bwa a tiringnga i aon te kai ni kammaraki. (Mataio 26:37, 38; Ruka 22:44; Ioane 19:1, 17, 18) E rinanon aaro aikai ni kabane Iesu ao e teimatoa n “ongeaba ni karokoa te mate” n aki ongea karawawataana ae korakora.​—Wareka I-Biribi 2:8.

2, 3. Tera reireiara man aron Iesu n ongeaba e ngae ngke e kaaitara ma te karawawataaki?

² Ni baike a riki nakon Iesu i aon te aba, e a reireiaki iai aron te ongeaba i aan aaro aika kangaanga ake e tuai n aitara ma ngaai mai mwaina. (Ebera 5:8) Tao e taraa n ae akea riki te bwai ae riai n reiakinna Iesu ibukin te beku iroun Iehova. Bwa ni koauana, e a tia ni karekea ana iraorao ae rangi ni kaan ma Iehova i nanon te tai ae rangi ni maan, ao e a tia n riki naba bwa ana “tia makuri ae rabakau” te Atua ngke a karikaki bwaai. (Taeka N Rabakau 8:30) Ma e ngae n anne, nanomwaakana n onimaki ngkai te aomata ngaia n aki ongei karawawataana, e a kakoauaaki iai kororaoini kakaonimakina n te aro ae eti. E rikirake ni korakora ana onimaki Iesu ae Natin te Atua. Tera reireiara man te baere e riki nakoina?

³ E ngae ngke Iesu bon te mwaane ae kororaoi, ma e aki kataia ni kateimatoa kororaoin ongeabana i bon irouna. E bon tataroa buokana mairoun te Atua ibukin teimatoana n ongeaba. (Wareka Ebera 5:7.) Ngkana ti kan teimatoa n ongeaba, ti riai n nanorinano naba ao ni katoatai n tataroakina buokara mairoun te Atua. Ibukin aei, e a reireinia Kristian te abotoro Bauro ni kangai: “Kam na nanona te nano aei, ae mena naba i nanoni Kristo Iesu,” are “E kananorinanoa i bon Rouna, ao E ongeaba ni karokoa te mate.” (I-Biribi 2:5-8) E kakoauaaki ni maiun Iesu bwa a kona n ongeaba aomata, e ngae naba ngkai a mena i buakoia aomata aika buakaka. E koaua bwa e kororaoi Iesu, ma tera aroia aomata aika aki kororaoi n ai arora?

Te Ongeaba n Aki Ongea te Aki Kororaoi

4. Tera ae nanonaki ngkai ti karikaki bwa e na iai inaomatara ni karaoa ae ti tangiria?

⁴ E karika Atam ma Ewa te Atua bwa aomata aika wanawana ao n inaomata ni karaoa ae a tangiria. Iai naba iroura te inaomata ni karaoa ae ti tangiria kioina ngkai kanoaia ngaira. Tera nanon anne? Nanona bwa ti a kona n rineia bwa ti na karaoa ae raoiroi ke ae buakaka. N taeka riki tabeua, e a tia te Atua n anganira te inaomata n rineia bwa ti na ongeaba irouna ke ti na aki. Irian te aeka n inaomata ae kakawaki anne, boni kaekaani bukinara. Ni koauana, ara rinerine ibukin aroaroni maiura e boto mai iai maiura ke matera. A rotaki naba iai aomata aika ti kaan ma ngaiia.

5. Tera te kabokorakora ae ti bane n rinanona ao ti na kanga ni kona n tokanikai i aona?

⁵ E aki bebete te ongeaba n taai nako ibukin rikiara ae te aki kororaoi. E bon aki bebete naba te ongeaba nakon ana tua te Atua n taai nako. E aitara naba Bauro ma te aeka ni kabokorakora aei. E korea ae kangai: “I nora te tua teuana i nanoni bwain rabatau, ba e buakana ana tua nanou, ao e tauai ba ana bwai ana tua te bure ae i nanoni bwain rabatau.” (I-Rom 7:23) Ni koauana, e rangi ni bebete te ongeaba ngkana akea irekerekena ma te anga boni ngaira, te maraki, ke te mwebuaka. Ma tera arora ngkana e a kauntaba nanora ni kan ongeaba ma “ana kaibabaru te rabata, ma aia kaibabaru maata”? A riki bwaai n anainano aika bubuaka aikai man aki kororaoira ao ai uana naba ma ana kariri “nanon aon te aba” ae otabwaninira, ao a rangi ni korakora aia katikitiki. (1 Ioane 2:16; 1 I-Korinto 2:12) Ngkana ti na rarawa nakoni baikai, ti riai ni ‘katauraoi nanora’ imwaini kaitaraan te kangaanga ae matoatoa ke te kariri ao ni kamatoai nanora n ongeaba iroun Iehova, n aki ongeia bwa tera ae na riki nakoira. (Taian Areru 78:8) A bati katoto man te Baibara ibukia te koraki ake a a tia n tokanikai ibukina bwa a boni katauraoi nanoia.​—Etira 7:10; Taniera 1:8.

6, 7. Kabwarabwaraa aron te ukeuke n reirei n te Baibara i bon iroura ni kona ni buokira ni karaoi ara motinnano ma te wanawana.

⁶ Te anga teuana ibukini katauraoan nanora, boni man ara taningamarau n ukeuke n reirei n te Baibara ao booki aika boto man te Baibara. Iangoia bwa aongkoa a riki nakoim baikai. Iangoia bwa aio am tairiki are ko na karaoa iai am ukeuke n reirei i bon iroum. Ko a bon tibwa tia n tataroa te taamnei ae raoiroi are mairoun Iehova bwa e na buokiko ni maiuakina reireiam man ana Taeka. Ko a tia ni baireia bwa ko na mataku n te taamnei teuana man te TV n te tairiki are imwina. Ko a tia naba n ongo ae a taekini bwaai tabeua aika raraoi ibukin te taamnei anne taan tiribure ao aomata riki tabemwaang, e ngae ngke ko bon ataia naba bwa iai i nanona mwakuri tabeua aika kammaira ao n tiritiri.

⁷ Ko iaiangoa ana reirei Bauro n I-Ebeto 5:3 ae kangai: ‘E na tai atongaki iroumi te wene ni bure, te kammaira nako ao te mataai ni kanibwaibwai, n aron ae riai irouia ake a itiaki.’ Ko uringa naba ana taeka n reirei Bauro n I-Biribi 4:8. (Warekia.) Ngkai ko tabe ni kananoa am iango i aon te kibu ae kairaki koreana aei, ko titirakiniko ni kangai: ‘Ngkana bon nanou bwa e na kairaki au iango ao nanou n aeka ni kamataku aikai, I toua ngkanne mwin ana katoto Iesu ni kaineti ma te ongeaba ni koaua nakon te Atua?’ Tera ae ko na karaoia? Ko na teimatoa ni mataku n te taamnei anne?

8. E aera ngkai ti riai ni kateimatoa te aroaro ni maiu ae rangi n tamaroa ao ana kaetieti Iehova?

⁸ Bon te kairua ngkana ti kamamaarai matoatoan nanora n nimti ana kaetieti Iehova bwa tao ti iangoia ae ti korakora n totokoi nako mwin te iraorao ae buakaka, ao ngkana tao e irekereke te iraorao anne ma waaki ni kamataku aika tiritiri ao ni kammaira. N oneani mwin anne, ti riai ni kamanoira ma natira mani kariri aika bubuaka ake a kaotiotaki iai aroaron Tatan. A mwakuri korakora te koraki ake a kamanena te kombiuta ibukin totokoan rotaki buakan aia kombiuta n taian virus aika rangi ni bubuaka ake a kona ni kabuai rongorongo, a tuka waakinakon ana mwakuri te kombiuta, a kona naba n taua taekan te kombiuta ao ni kamanena bwa a na urui kombiuta ake tabeua riki. Ngkana ngaia bwa a kawakinaki raoi bwaai akanne, mwaitira riki ngkanne riaira ni kawakinira mani baike e kamanenai Tatan ni kairaraangira iai?​—I-Ebeto 6:11.

9. E aera ngkai ti riai ni kamatoai nanora n ongeaba iroun Iehova ni katoa bong?

⁹ N angiini bong nako, ao ti bon riai n rineia n te aro teuana bwa ti na karaoi bwaai n aron ae e kukurei iai Iehova ke ti na aki. Ti riai n ongeaba iroun te Atua ao ni maiuakin ana boto n reirei aika rine bwa ti aonga ni kamaiuaki. Ngkana ti tou mwin ana katoto Kristo ibukin te ongeaba ‘ni karokoa matera,’ ti a kaotia iai bwa ti onimaki ni koaua. E na kakabwaiaira Iehova ngkana ti kakaonimaki ni maiura. E berita Iesu ni kangai: “Ane nanomwaka ni karokoa te toki ao e na kamaiuaki.” (Mataio 24:13) E mataata bwa e kainnanoaki n aei karikirakean te ninikoria ni koaua n aron are e kaotiotia Iesu.​—Taian Areru 31:24.

Iesu Bon te Katoto ae te Kabanea n Tamaroa Ibukin te Ninikoria

10. Baikara kangaanga aika ti kona n aitara ma ngaai ao tera arora iai?

¹⁰ Ibukina bwa ti otabwaniniaki n aroaroia kaain te aonnaba ao aia katei, ti a kainnanoa ngkanne te ninikoria n rarawa ni kabarekaaki irouia. A kaaitara Kristian ma karawawataaki ni kaineti ma te aroaro ni maiu ae riai, aroia n reitaki ma aomata, te mwane ao te Aro aika a kona ni kairiia bwa a na kitani kawain Iehova aika raraoi. A bati aika a kakaitaraaki irouia kaain aia utu. A karikirakea riki tebonakin reiakinan te ewarutin botaki n reirei n aaba tabeua, ao a a bati riki aika a butimwaea te koaua ae akea te Atua. Ngkai Kristian ngaira, ti aki kona n tii kakeai bongani kangaanga aika ti aitara ma ngaai. Ti riai ni karaoa te bwai teuana ngkai naba, bwa ti aonga n rarawa ao n te aro anne ti a kamanoaki iai. E kaotaki nakoira arora ae ti kona n tokanikai iai man ana katoto Iesu.

11. Ti na kanga ni karekea te ninikoria ae korakora riki man iaiangoan ana katoto Iesu?

¹¹ E tuangia taan rimwina Iesu ni kangai: “Ami bwai i aon te aba te rawaawata; ma kam na ninikoria, bwa I a tia ni kataea ana kai te aba.” (Ioane 16:33, NTK) E rarawa n taai nako Iesu nakon ana kariri te aonnaba. Akea te tai ae e a tia ni kariaia iai waakin te aonnaba bwa e na tukia mani kakoroani bukini mwiokoana ae tataekinan te rongorongo ae raoiroi ke ni kairia bwa e na kamangori ana kaetieti ibukin te taromauri ni koaua ao te aroaro ae riai, ao ti riai n rarawa naba ngaira. E taekina ae kangai Iesu n ana tataro ibukia taan rimwina: “Tiaki ana bwai te aba ngaiia, n ai arou ngkai tiaki ana bwai te aba Ngai.” (Ioane 17:16) Ti kona ni karekea te ninikoria ae ti kainnanoia ibukin teimatoara ni kaokoroira ma te aba, ngkana ti ukeuke n reirei n ana katoto Kristo ibukin te ninikoria ao n iaiangoia.

Reiakina te Ninikoria Mairoun Iesu

12-14. Anga katoto n aron Iesu ni kaotiota te ninikoria.

¹² E kaotiota te ninikoria ae korakora Iesu i nanon ana tai ni mwakuri ni minita ni kabane. E kabongana mwaakana ngkai Natin te Atua ngaia ao e aki maaku n “rin Iesu ni maneaban te Atua, ao e kabaneia ni kakioia ake a bobwai ma ake a kabobwai n te maneaba, ao E karangai aia taibora taan rai mane, ma kaintokaia taani kabo taobe.” (Mataio 21:12) Ngke a roko tautia ni katika Iesu n ana kabanea n tairiki imwaini matena, e ninikoria ni keerake ibukini kamanoaia taan rimwina ao e taku: “Ngkana kam ukoukorai, ao kanakoia moa uakai.” (Ioane 18:8) Tabeua te tai imwina, ao e tuanga Betero Iesu bwa e na karina ana kabaang ni nnena, ao ibukin anne e a kaotia Iesu bwa e boto ana onimaki iroun Iehova ao tiaki i aoni bwaai ni buaka n te aonnaba aei.​—Ioane 18:11.

¹³ E ninikoria Iesu ni kaotaraea akean aia tangira ao kairuan aia reirei taan reirei ni kewe ake n ana bong ni kangai: “A na reke kaimi, taani koroboki ma Baritaio, aika taani mamana-te-aba! ba kam bonota uean te Atua nakoia aomata.” E tuangia Iesu ni kangai: “Kam katuku bwaai aika bongana riki i buakon ana taeka te Atua, are te kaeti raoi taeka, ma te nanoanga, ma te onimaki. . . . kam teboka akun te mangko ma te raurau, ma a on nanoia n te babakanikawai ma te buakaka.” (Mataio 23:13, 23, 25) A na kainnanoa te aeka n ninikoria naba anne taan rimwin Iesu, ibukina bwa a na bwainikirinaki ao n tiringaki tabeman mai buakoia irouia mataniwi n Aaro aika kewe.​—Mataio 23:34; 24:9.

¹⁴ E ninikoria naba Iesu ni kaaitaraia taimonio. N te taina, ao e kaaitara ma te mwaane ae rangi ni korakora ae taniaki n te taimonio, n te aro are bon akea ae kona ni kabaea te mwaane anne n te taurekereke. E aki maaku Iesu bwa e kanakoia taimonio aika bati ake a a tautaekana maiun te mwaane anne. (Mareko 5:1-13) E aikoa angania Kristian te mwaaka are a na karaoi iai aeka ni kakai akanne te Atua ni boong aikai. Ma e ngae n anne, n ara tai n uarongorongo ao n angareirei ti riai naba ni buakana Tatan are e a tia ni ‘kamataki nanoia aomata ake a aki onimaki.’ (2 I-Korinto 4:4) N aron are e kaotaki n rongorongon Iesu, bon “tiaki bwain aon te aba ara kai ni buaka, ma a boni korakora iroun te Atua n uru noono” aika aia koaua aika kairua Aaro aika a taneiai iai. (2 I-Korinto 10:4) Ti reiakina ae bati man ana katoto Iesu ni kamanenaani bwaai ni buaka mairoun te Atua.

15. E boto i aon tera ninikorian Iesu?

¹⁵ E boto ninikoriani Iesu i aon te onimaki ma tiaki i aoni kaotiotan te aki mamaaku. Ao ai bon arora naba. (Mareko 4:40) Ti na kanga ni karekea te onimaki ni koaua? Ti a manga kairaki naba n ana katoto Iesu aei. E kaotiota ana atatai ae tabwanin raoi n te Baibara ao e onimakini raoi. E aki kamanena te kabaang ni koaua Iesu, ma bon ana kabaang te taamnei, ae Ana Taeka te Atua. E okioki ni boutokaa ana angareirei ni mwanewean te Baibara. E aki toki ni moana ana taeka n te aro aei: “E koreaki ae kangai,” ae nanona, n Ana Taeka te Atua.a

16. Ti na kanga ni kakorakoraa riki ara onimaki?

¹⁶ Ngkana ti na karikirakea te onimaki ae kona ni kaaitarai kataaki aika a riiriki nakoia taan rimwini Kristo, ti riai ni wareware ao n ukeuke n reirei n te Baibara ni katoa bong, n iriri ni bobotaki ni Kristian ao n iaiangoi koaua aika e boto mai iai te onimaki. (I-Rom 10:17) Ti riai ni kananoi naba ara iango ni baike ti a tia n reiakin, ao ni kariaia bwa e na rotii nanora. Bon tii te onimaki ae maiu ae kona ni kairira bwa ti na ninikoria ni mwakuri. (Iakobo 2:17) Ao ti riai n tataroakina te taamnei are raoiroi kioina ngkai te onimaki bon uaan naba te taamnei.​—I-Karatia 5:22.

17, 18. E kanga temanna te tari te aine ae te roro n rikirake ni kaotiota te ninikoria n te tabo n reirei?

¹⁷ E a tia temanna te roro n rikirake ae te tari te aine ae Kitty n namakina aron reken te ninikoria man te onimaki ni koaua. E a kaman ataia neiei man uarerekena bwa e riai n aki “maamaa n te euangkerio” n te tabo n reirei, ao e rangi ni kan tataekina te euangkerio n te aro ae uaana nakoia raona n reirei. (I-Rom 1:16) E katoa ririki neiei ni motinnanoia bwa e na karababaa tataekinan te euangkerio nakoia aomata nako, ma e tabwarabwara ni karaoia bwa e aki ninikoria. Ngke ai tebwi tabun ana ririki neiei, ao e a bibitii ana tabo n reirei. E taku: “N te tai aei, ao N nang kabooi mwin taai ake I a tia n aki karaoi iai.” E tataro Kitty bwa e na anganaki te ninikoria are e kaotiotia Kristo, te wanawana ao te tai ae riai ibukini karaoan aei.

¹⁸ N te bong are e moanaki iai te reirei, ao a tuangaki ataei bwa a na kaotii araia temanna imwin temanna. A taekin aia Aaro ake a kaikawaaki iai tabeman mai buakoia ataei, ao a kaotia naba bwa a aki katoatai n iriri n aia taromauri. E noria Kitty bwa aio ana tai are e a tia n tataroakinna. Ngke e a roko ana tai, e taetae ma te aki nanououa ni kangai, “Boni ngai temanna mai buakoia Ana Tia Kakoaua Iehova, ao e boto man te Baibara kairirau ni kaineti ma te taromauri ao te aroaro ni maiu ae riai.” Ngke e waakinaanako ana kakarabakau neiei, ao ataei tabeman a mata ni kakanikoa. Ma tabeman a kakauongo raoi ao a titiraki imwina. E kateaki Kitty bwa te banna ni katoto ae tamaroa iroun te tia reirei ibukin aron te aomata n tei ibukin ana onimaki. E rangi ni kimwareirei Kitty bwa e a tia n reke reireiana man ana katoto Iesu ibukin te ninikoria.

Kaota te Onimaki ao te Ninikoria Are E Kaotiotia Kristo

19. (a) Tera ae irekereke ma reken te onimaki ni koaua? (b) Ti na kanga ni kakukureia Iehova?

¹⁹ A ataia naba abotoro bwa e riai ni boto ninikoriaia ni mwakuri i aon te onimaki. A onnonia Iesu ni kangai: “Karaka riki ara onimaki.” (Wareka Ruka 17:5, 6.) E bati riki ae nanonaki n te onimaki nakon ae tii kakoauaan ae iai te Atua. E irekereke naba iai karikirakean te iraorao ae kaan ma Iehova, ae titeboo ma ana iraorao te ataei ae uarereke ma tamana ae akoi ao n tatangira. E kairaki rinanon te taamnei Toromon bwa e na korea ae kangai: “Natiu, ngkana e wanawana nanom, Ao e kukurei nanou, ae bon nanou: Eng, e na kimareirei nanou, Ngkana a atong baika riai matanriam.” (Taeka N Rabakau 23:15, 16) N aron naba anne, e kimwareirei Iehova ngkana ti ninikoria n tei ibukini booto n reirei aika raraoi ao n ataan anne, e a rikirake iai ninikoriara. Mangaia are, ti bia kakairi n ana katoto Iesu n taai nako n tei n ninikoria ibukin te raoiroi!

[Kabwarabwara ae nano]

Ko Kona ni Kabwarabwaraa?

• Tera ae kona ni kateimatoaira n ongeaba e ngae naba ngkai ti aki kororaoi?

• E boto i aon tera te onimaki ni koaua, ao e na kanga ni buokira n ninikoria?

• Tera uaan ongeabara ao kaotiotan te ninikoria are e kaotiotia Kristo?

[Taamnei n iteraniba 16]

Ko ‘katauraoa nanom’ bwa ko na rarawa nakoni kariri?

[Taamnei n iteraniba 18]

N aron Iesu, ti kona ni kaota te ninikoria ae boto i aon te onimaki