“Raou Ngkami”

“Raou ngkami, ngkana kam karaoi baika I tuangngkami.”​—IOANE 15:14.

1, 2. (a) Baikara rikiaia raoraon Iesu aika kakaokoro? (b) E aera ngkai e rangi ni kakawaki bwa ti na iraorao ma Iesu?

A KAKAOKORO rikiaia mwaane ake a tekateka ma Iesu n te ruu are i eta. Bon taan akawa Betero ao tarina are Anterea. Bon te tia riko taekiti ngkoa Mataio ao e riribaaki ana mwakuri aei irouia I-Iutaia. A bae ni kamani kinaa Iesu man uarerekeia tabeman n aron Iakobo ao Ioane. Tabeman riki n aron Natanaera, tao a a tibwa kinaa i nanon tii tabeua te ririki. (Ioane 1:43-50) Ma e ngae n anne, aomata ake a bane n roko i Ierutarem n tairikin te Toa ae te Riao ae rangi ni kakawaki, a kakoauaa raoi ae Iesu bon te Mesia ae beritanaki ae Natin te Atua ae maiu. (Ioane 6:68, 69) Ni koauana, a riai n tia n namakinna bwa a tangiraki n ongoraeia n ana taeka aikai: “I atongngkami ba raou; ba I kaoti nako imi bwaai ni kabane ake I ongo iroun Tamau.”​—Ioane 15:15.

² Ana taeka Iesu ake e taekin nakoia ana abotoro ake a kakaonimaki, a boni kaineti riki nakoia Kristian aika kabiraki ni kabane ni boong aikai ao nakoia naba “tiibu tabemang” ake raoia. (Ioane 10:16) Ti kona ni karekea te kakabwaia ae te riki bwa raoraon Iesu n aki ongeia bwa tera rikiara. Moan te kakawaki bwa ti na iraorao ma Iesu bwa ngkana ti riki bwa raoraona, ti a riki naba bwa raoraon Iehova. Ni koauana, ti aki kona ni kaania Iehova ngkana ti tuai ni kaanira moa ma Kristo. (Wareka Ioane 14:6, 21.) Ma tera ae ti riai ni karaoia bwa ti aonga n riki ao n teimatoa n raoraona Iesu? Imwaini maroroakinan te reirei ae kakawaki anne, ti na nenera ana katoto Iesu n arona n riki bwa te rao ni koaua ao n nora reireiara mani baika a taekin ao ni karaoi taan rimwina imwin iraoraona ma ngaiia.

Ana Katoto Iesu n Rikina Bwa te Rao ni Koaua

3. Tera ae rangi ni kinaaki iai Iesu?

³ E korea ae kangai te Uea ae wanawana are Toromon: “A bati raon te aomata ae kaubwai.” (Taeka N Rabakau 14:20) E oti man taeka akanne mamaaraia aomata aika aki kororaoi bwa a boto aia iraorao ni baika a kona ni karekei, ma tiaki ni baika a kona n anganako. Akea te tai ae e kaotiota iai te aeka ni mamaara anne Iesu. E aki anaaki nanona ni kaubwain ke kakannaton te aomata. E koaua bwa e tangira te rorobuaka ae te tia tautaeka ae kaubwai Iesu ao e kaoa bwa e na riki bwa te tia rimwina. Ma e tua Iesu nakon te mwaane anne bwa e na kabooi nako ana bwai ni kabane ao n tibwai nakoia akana maiu ni kainnano. (Mareko 10:17-22; Ruka 18:18, 23) E kinaaki Iesu tiaki ibukin reitakina ma aika kaubwai ao ni kakannato, ma bon ibukin ana iraorao ma aika mangori ao aika riribaaki.​—Mataio 11:19.

4. E aera ngkai e kona n taekinaki bwa a kakairua naba raoraon Iesu?

⁴ Ni koauana, bon aomata aika a kakairua naba raoraon Iesu. Iai taai tabeua are e a kabwaka iai Betero n iangoi bwaai n aron iangoaia iroun te Atua. (Mataio 16:21-23) A kaotiota te nano ni kan rietata Iakobo ma Ioane, ni butiian Iesu nakoaia aika kakannato n te Tautaeka n Uea. A un abotoro ake tabeman riki n aia mwakuri uakanne, ao e a riki te un ike e a reitinako kauntaekaan te kani kakannato. Ma e ngae n anne, e taotaona nanona Iesu ni kataia ni kaetii aia iango raoraona ao e aki kakai un.​—Mataio 20:20-28.

5, 6. (a) E aera ngke e teimatoa n iraorao Iesu ma angia abotoro? (b) E aera Iesu ngke e katoka ana iraorao ma Iuta?

⁵ Tiaki nanona bwa e teimatoa n iraorao ma mwaane aika aki kororaoi aikai Iesu ibukin ana kamona ae rangi n riao, ke e aki ataia ae a aki kororaoi. Ma n oneani mwin anne, e rineia bwa e na kaatuua riki iaiangoan aroaroia ao nanoia aika raraoi. N te katoto, a matu Betero, Iakoba ao Ioane ao a aki boutokaa Iesu ngke e aitara ma te kangaanga ae rangi ni karuanikai. E ota raoi bukini bwaran nanon Iesu irouia. Ma e ngae ngke e koaua anne, e nori nanoia bwa a raoiroi bwa e kangai: “E boni konamaki te tamnei, ma e mamara te iriko.”​—Mataio 26:41.

⁶ Ni kaitaraan anne, e boni katoka ana iraorao Iesu ma Iuta Itekariota. E ngae ngke e teimatoa Iuta ni kaotiota te iraorao n aroarona, ma e bon ataia Iesu bwa e a tia raona ae rangi ni kaan ngkoa ma ngaia aei ni kariaia kabarekaan nanona. Ibukina bwa e a tia n raona te aba Iuta, e a riki bwa ana kairiribai te Atua. (Iakobo 4:4) Mangaia are, e a kamani kanakoa Iuta Iesu ngke E taekina Ana iraorao ma nikiraia abotoro ake 11 aika kakaonimaki.​—Ioane 13:21-35.

7, 8. E kanga Iesu ni kaota tangiraia raoraona?

⁷ E aki kaatuua iaiangoan aia kairua raoraona aika kakaonimaki ni koaua Iesu ma e karaoa te bwai ae te kabanea n tamaroa ibukia. N te katoto, e tataro nakon Tamana bwa e na kawakinia n taini kataakia. (Wareka Ioane 17:11.) E kaota naba nanoangaaia Iesu n tabeakinani mamaaran rabwataia ae tiatiania. (Mareko 6:30-32) Ao e ingainga naba tiaki tii n tuangia baike e iangoi ma n ongorana naba irouia ao n otana n te baere a iangoi ao n namakin.​—Mataio 16:13-16; 17:24-26.

⁸ E maiu ao e mate Iesu ibukia raoraona. E koaua bwa e ataia ae e riai n anga maiuna n te aro ae eti i aan te tua, ni kakororaoan ana kaetieti Tamana ibukin te kaetitaeka ae riai. (Mataio 26:27, 28; Ebera 9:22, 28) Ma e bon anga maiuna Iesu bwa kaotan ana tangira. E taku: “Akea te tangira iroun te aomata, ae korakora riki nakon ae te anga maiuna i bukiia raona.”​—Ioane 15:13.

Tera Aroia Taan Rimwin Iesu ni Kaineti ma Ana Iraorao ma Ngaiia?

9, 10. Tera aroia aomata ni kaineti ma tituaraoin Iesu?

⁹ E tituaraoi Iesu n anganako ana tai, ana tangira ao ana bwai nako. Ibukin anne, a a kaaniaki riki nakoina aomata ao ni kukurei ni karaoa naba anne nakoina. (Ruka 8:1-3) Ni kaineti ma baike a a tia n riki nakon Iesu e a kona iai ni kangai: “Kam na anganga, ao ane kam na manga anganaki; ane a na anga nakoni banibanimi aomata te baire ae raoiroi, ae ibe, ae takaruru, ae takaburinako. Ba e na manga baire te aba nako imi n te baire are kam babaire iai.”​—Ruka 6:38.

¹⁰ E koaua bwa a kataia tabeman n iraorao ma Iesu tii ibukini baika a kona ni karekei mairouna. A kitana Iesu aomata aikai, ake bon tiaki raoraona ni koaua ngke a aki ota raoi n te baere e taekinna. N oneani mwin are a na onimakina Iesu ngke a aki ota n te baere e taekinna, a waekoa ni motiki nanoia n te aro ae kairua ao a katinanikua. Ni kaitaraan anne, a boni kakaonimaki ni koaua abotoro. A aki toki ni kataaki n aia iraorao ma Kristo, ma a karaoi aia kabanea ni kona ni boutokaia n taai aika raraoi ao aika bubuaka naba. (Wareka Ioane 6:26, 56, 60, 66-68.) N ana kabanea n tairiki Iesu i aon te aba n rabwatana n aomata, e a kaota korakoran tangiraia raoraona ngke e kangai: ‘Boni ngkami aika kam memena ma Ngai ni kaririakiu.’​—Ruka 22:28.

11, 12. E kanga Iesu ni karau nanoia taan rimwina, ao tera aroia iai?

¹¹ Bon imwin naba are e kamoamoaia taan rimwina aikai Iesu ibukini kakaonimakia ni koaua, ao a a manga kitanna. A a tia ni kariaia maakan te aomata bwa e na taonaanako tangirani Kristo irouia, ma e a manga kabwaraa naba aia bure Iesu. E kaoti nakoia imwini matena ao mangautina, ao e karaui nanoia n arona n iraorao ma ngaiia. I rarikina, e angania mwiokoaia ae tabu ae karekeaia taan rimwina mai buakoia “botanaomata ni kabaneia,” ake a na riki bwa taani kaotioti ibukina “ni karokoa tabon aonaba.” (Mataio 28:19; Mwakuri 1:8) Tera aroia taan rimwini Kristo nakon te mwioko aei?

¹² A karaoa aia kabanea ni kona taan rimwini Kristo ni kabutaanako rongorongon te Tautaeka n Uea. E a waekoa ni butanako aia reirei i Ierutarem, ibukini boutokaaia rinanon te taamnei are raoiroi are mairoun Iehova. (Mwakuri 5:27-29) E aki kerikaaki nanoia n ongeaba n ana tua Iesu ibukini karekeaia taan rimwina, e ngae naba ngke a kakamaakaki bwa a na tiringaki. Tao tii tatabebwi te ririki imwin reken ana tua Iesu irouia, ao e a kona te abotoro Bauro ni korea ae e a tia n tataekinaki te rongorongo ae raoiroi “i aonaba ni kabane aika i aani karawa.” (I-Korote 1:23) Ni koauana, a kaota kakawakin te iraorao ma Iesu taan rimwina aikai!

13. A kariaia taan rimwin Iesu bwa a na rotaki n ana reirei n aanga raa?

¹³ A kariaia ake a a riki bwa taan rimwin Iesu bwa a na rotaki anuani maiuia n ana reirei. E nanonaki ibukia aomata aika bati, karaoani bitaki aika korakora n anuaia ao kateia. Tabeman mai buakoia taan rimwini Kristo ake a boou, boni mwaane ngkoa aika wewene ma raoia ni mwaane ke aine aika wewene ma raoia n aine, taani wene ni kimoa, taan nim kamanging, ke taan ira. (1 I-Korinto 6:9-11) A riai ni bitii aroaroia tabeman riki nakoia ake e kaokoro aia reeti ma ngaiia. (Mwakuri 10:25-28) Ma e ngae n anne, a bon ongeaba iroun Iesu. A kaaki aomataia nikawai ao a karina te aomata nabangkai. (I-Ebeto 4:20-24) A rikirake n taneiai ma “ana iango Kristo,” ao a ota ma ni kakairi n arona n iaiango ao n ana mwakuri.​—1 I-Korinto 2:16, BK.

Te Iraorao ma Kristo ni Boong Aikai

14. Tera are e beritanna Iesu bwa e na karaoia n “tokin te waaki ae ngkai”?

¹⁴ A bati mai buakoia Kristian n te moan tienture aika a kinaa raoi Iesu ke n tia n noria imwin utina. E mataata bwa e tuai n reke iroura te kakabwaia ae okoro anne. Ma ti na kanga ni kona n riki bwa raoraoni Kristo? Te anga teuana, boni man ongeabara n te kairiri ae ti anganaki iroun te toro ae kakaonimaki ae wanawana, are e kaainaki irouia tarin Iesu ake a kabiraki rinanon te taamnei aika a teimatoa ni maiu i aon te aba ngkai. E berita Iesu bwa n “tokin te waaki ae ngkai,” ao e na mwiokoa te toro ae kakaonimaki aei bwa mataniwin “ana bwai nako.” (Mataio 24:3, NW, 45-47) Ni boong aikai, angia mai buakoia ake a kakorakoraia n riki bwa raoraoni Kristo, bon tiaki kaain te botaki ae te toro ae kakaonimaki. Ma tera aron rotan aia iraorao ma Kristo n aroia nakon te kairiri are a anganaki iroun te toro ae kakaonimaki?

15. Tera kanikinaean te aomata bwa tao e na mena i buakoia tiibu ke kooti?

¹⁵ Wareka Mataio 25:31- 40. E taekinia ake a kaaina te toro ae kakaonimaki Iesu bwa tarina. N te kabotau are ni kaokoroaia tiibu ma kooti, e katerea iai Iesu bwa e iaiangoi arora nakoia tarina bwa ai bon arora naba nakoina. Ni koauana, e taekinna bwa te kanikina ae e na kona ni kaokoroa te tiibu mai buakoia kooti, boni man aroaron te aomata nakon ‘ae moan te mangori i buakoia tarina akekei.’ Mangaia are, te anga ae moan te kakawaki are a kaotiotii iai nanoia ni kan iraorao ma Kristo te koraki ake a kantaningaa te maiu i aon te aba, boni man aroia ni boutokaa te toro ae kakaonimaki.

16, 17. Ti na kanga ni kaotiota ara iraorao nakoia tarini Kristo?

¹⁶ Ko na kanga ni kaota arom n iraorao nakoia tarini Kristo ngkana ko kantaningaa te maiu i aon te aba i aan Ana Tautaeka n Uea te Atua? Ti na rinanon aanga aika tii tenua. Te moan, boni man uataboan te mwakuri n uarongorongo ma nanora ni kabane. E tua Kristo nakoia tarina bwa a na tataekina te rongorongo ae raoiroi ni katobibia te aonnaba. (Mataio 24:14) Ma e ngae n anne, a noria nikiraia tarini Kristo aika i aon te aba ngkai bwa e rangi ni kangaanga kakororaoan te mwioko anne n akean aia ibuobuoki raoia aika tiibu tabemwaang. Ni koauana, ngkana a katabetabeia tiibu tabemwaang n taai nako n te mwakuri n uarongorongo, a a boni buokiia iai tarini Kristo ni kakororaoa mwiokoaia ae tabu. A rangi ni kakaitau n te mwakuri n iraorao aei Kristo ao te toro ae kakaonimaki ae wanawana.

¹⁷ Te kauoua n anga ae a kona iai tiibu tabemwaang ni buokiia tarini Kristo, boni mani boutokaan te mwakuri n uarongorongo n te mwane. E kaungaia taan rimwina Iesu bwa a na karekeia raoraoia rinanon “te kaubwai ae mamana te aba.” (Ruka 16:9) E aki nanonaki n aei bwa ti kona ni kabooa ara iraorao ma Iesu ke Iehova. Ma n oneani mwin anne, ngkana ti kabonganai ara bwai ni boutokaa Ana Tautaeka n Uea Iehova ao te mwakuri ae karaoaki n te ekaretia i aon te aba, ti a kaota iai koauan ara iraorao ao ara tangira tiaki tii n ara taetaenikawai, ma “n te makuri ao n te koaua.” (1 Ioane 3:16-18) Ti kabonganai ara mwane ni boutokaa iai te mwakuri ibukin te Tautaeka n Uea ngkana ti katabetabeira n uarongorongo, ti angamwane nakon te kateitei, kateimatoaan tamaroan ara tabo n taromauri ao ngkana ti angabwai ibukini buokan te mwakuri n uarongorongo ni katobibia te aonnaba. E ngae ngkana tao e uarereke ke e bati ae ti anga, ma ni koauana, a kukurei Iehova ao Iesu n te bwai ae ti anga ma nanora ni kukurei.​—2 I-Korinto 9:7.

18. E aera ngkai ti riai n ongeaba n te kairiri ae boto man te Baibara ae ti anganaki irouia unimwaane n te ekaretia?

¹⁸ Te katenua n anga ae ti kona iai ni bane ni kaota koauan ae raoraoni Kristo ngaira, boni man ongeabara n te kairiri ae a anganira unimwaane n te ekaretia. A rineaki unimwaane aikai rinanon te taamnei are raoiroi i aan ana kairiri Kristo. (I-Ebeto 5:23) E korea ae kangai te abotoro Bauro: “Kam na iri nanoia ami tia kairiri, ao kam na ri aan aia taeka.” (Ebera 13:17) N tabetai, ti kona n namakinna bwa e kangaanga te ongeaba n te kairiri ae boto man te Baibara ae a anganira unimwaane n ara ekaretia. Ti bae n ataa aki kororaoia, ao aei are ti a kona ni kairaki iai bwa ti na bwaina te iango ae kairua ni kaineti ma aia reirei. Ma e ngae n anne, e teimatoa ni kukurei Kristo ae Atun te ekaretia ni kamanenaia mwaane aika aki kororaoi aikai. Mangaia are, arora ae ti karaoia nakon aia kairiri, e na bon rotaki iai aron ara iraorao ma Kristo. Ngkana ti tarariaoi aia kairua unimwaane ao ni kimwareirei n ongeaba n aia kairiri, ti a kaota iai koauan tangirani Kristo iroura.

Te Tabo ae Ti Kona ni Kuneia Iai Raoraora Aika Raoiroi

19, 20. Tera ae ti kona n noria n te ekaretia, ao tera ae ti na rinanona imwina?

¹⁹ E teimatoa n tabeakinira Iesu tiaki tii rinanon aia tararua taani kawakintiibu aika tatangira, ma rinanon naba karekeaia tinara, mwaanera ao tarira n te onimaki n te ekaretia. (Wareka Mareko 10:29, 30.) Tera aroia am koraki ngke ko moana am iraorao ma kaain ana botaki Iehova? Bon te kantaninga bwa a boutokaa am kekeiaki ngkai ko tabe ni kaaniko ma te Atua ao Kristo. Ma e kauring Iesu bwa n tabetai ao “ana kairiribai te aomata ana utu.” (Mataio 10:36) Ai karaunanora ataan ae i nanon te ekaretia ao ti kona ni karekeia te koraki ake ti na rangi ni kaan riki ma ngaiia, nakon ake bon oini mwaanera ma tarira!​—Taeka N Rabakau 18:24.

²⁰ E karekeia raoraona ni kaan aika bati Bauro, n aron ae e kaotaki n anuana n inga ni motikan ana reta nakon te ekaretia i Rom. (I-Rom 16:8-16) E motika ana katenua n reta te abotoro Ioane n taeka aikai: “Anga ara inga nakoia raora akanne n atong araia nako.” (3 Ioane 14) E teretere n aei, bwa e karikirakei ana iraorao aika teimatoa aika bati naba teuaei. Ti na kanga ni kakairi n ana katoto Iesu ao taan rimwina ake rimoa, ni karikirakean ao kateimatoaan te iraorao ae kakukurei ma tarira ao mwaanera n te onimaki? E na rinanoaki kaekaan te titiraki aei n ara kaongora ae imwina.

Ko na Kanga ni Kaeka?

• Tera ana katoto Iesu are e kateia n rikina bwa te rao ni koaua?

• Tera aroia taan rimwin Iesu ni kaineti ma arona n iraorao?

• Ti na kanga ni kaotia bwa bon raoraoni Kristo ngaira?

[Taamnei n iteraniba 23]

E kukurei Iesu n te baere a iangoia ao n namakinna raoraona

[Taamnei n iteraniba 25]

Ti na kanga ni kaotiota korakoran nanora ni kan riki bwa raoraoni Kristo?