Te Kangaanga ae Taabangaki ma Katokana

E nonoraki te rawawata n taabo nako, ao a bati aika a kaotiota te nanoanga ni buokiia te koraki ake a karawawataaki. N te katoto, a uatei i nanon aoa aika bati taani kuakua n onnaoraki ibukini buokaia aoraki ke aika ikoaki. A kakorakoraia naba ni kabebetei ke n totokoi karawawataaia aomata taan tiriai, bureitiman, taani karaotua ao taani mwakuri i aon taian amburanti aika baao ibukin anaakia aomata aika kainnanoa te ibuobuoki n te tai ae waekoa. E rangi ni korakora buokaia aomata aika a kainnanoa te ibuobuoki ni karaoan aeka ni mwakuri aikai, ma e a bon riaon ana kona te aomata ke te botaki teuana kamaunaan te rawawata ni katobibia te aonnaba. Ni kaitaraan anne, e kona te Atua ao e na boni karekea katokana ae taabangaki.

E noraki te taeka ni karaunano ni kabaneani bokin te Baibara ae kangai: “E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.” (Te Kaotioti 21:4) Iangoia bwa mwaitira aomata aika a na rotaki n te berita anne. E kateretereaki iai ana kantaninga te Atua are e na kamaunai rawawata nako. E na karaoa anne rinanoni kamaunaan te buaka mai aon te aba, te matenibaki, te aoraki ao te ribuaka, n ikotaki ma aomata nako aika bubuaka. Bon akea te aomata ae kona ni kakororaoa anne.

Te Bwai ae E na Karaoia Ana Tautaeka n Uea te Atua

E na kakoroi bukin ana berita nako te Atua rinanon te aomata ae te kauoman ni mwaaka n te iuniweeti ae Iesu Kristo are e a tia ni kautaki. E nang roko te tai are e na tautaeka iai Iesu bwa te Uea i aonnaba ni bane, n akea ae karitei nakoina. A na aki manga tautaekanaki botannaomata irouia ueea, beretitenti, ke taan tautaeka. N oneani mwin anne, a na tautaekanaki iroun te Uea ae tii temanna ao te tautaeka ae tii teuana ae Ana Tautaeka n Uea te Atua.

E na kamaunai aia tautaeka aomata nako te Tautaeka n Uea anne. E a kaman taekinaki ae kangai n te Baibara ngkoangkoa: “E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na tei matoa n aki toki.” (Taniera 2:44, BG) A na katiteuanaaki aomata i aonnaba ni bane i aan te tautaeka ae tii teuana ae raoiroi ae Ana Tautaeka n Uea te Atua.

Ni menan Iesu i aon te aba n rikina n aomata, ao a bati taai ake e tataekina iai te Tautaeka n Uea. E mwaneweia naba n te tataro ni katoto, ao e tua nakoia taan rimwina bwa a na tataro n aron aei: “E bia roko am tautaeka n uea. E na kakororaoaki nanom i karawa ao n te aonnaba naba.” (Mataio 6:10) Noria bwa e kaotia Iesu ae e irekereke te Tautaeka n Uea ma kakororaoan nanon te Atua i aon te aba, ao bon nanon te Atua bwa e na kamaunai rawawata ni katobibia te aonnaba.

E na karokoi kakabwaia ana tautaeka ae raoiroi te Atua aika a aki kona ni karekei nakoira aia tautaeka aomata. Uringnga bwa e anga Natina Iehova bwa te karea ni kaboomwi bwa a aonga ni kona ni karekea te maiu n aki toki aomata. A na ririkirake nakon te kororaoi aomata i aan ana kairiri te Tautaeka n Uea ae mwamwannano. Tera mwina? E na “oongaki te mate i Rouna n aki toki; ao E na kaoi rannimata te Uea ae Iehova mani maata ni bane.”​—Itaia 25:8, BG.

Tao a kona n titiraki tabeman ni kangai: ‘E aera te Atua ngkai e aki kamani karaoa te bwai teuana mai imwaina? Tera ae e taningaia?’ E kona Iehova ni kamani karaoa te bwai teuana ni kamaunai ke n totokoi iai rawawata ni kabane. Ma n oneani mwin anne, e a tia ni kariaia waakinakon aei, bwa tiaki n ae e bangaomata ma bon ibukini kakabwaiaia n aki toki natina aika n te aonnaba. A boni bae ni kariaia kaaro aika tatangira bwa a na rinanon te kangaanga natiia, ngkana a ataia ae karaoan aei a na reke iai kakabwaia aika teimaan. N aron anne, iai bukina aika riai ae e kariaia iai Iehova bwa a na rawawata aomata n te tai ae kimototo, ao a kabwarabwaraaki bukina aikai n te Baibara. A irekereke ma baikai, te inaomata ni karaoa ae ko tangiria, te bure, ao te titiraki ibukin riain Iehova n tautaeka. E kabwarabwaraaki naba n te Baibara bwa e a tia ni katauaki te anera ae buakaka bwa e na tautaekana te aonnaba i nanon te tai ae tianaki.a

E ngae ngkai ti aki kona ni kabwarabwarai bukina ni kabane n iteraniba aika tii tabeua, ma iai uoua koaua aika kona n anganira te kantaninga ao kaungaan nanora. Te moan: E na kakabwaiaira Iehova n te aro ae bati riki nakon rawawatara ni kabane ake ti a tia n rinanoi. Irarikina, e karaui nanora te Atua ni kangai: “A na aki uringaki baike rimoa, ao a na aki manga rin n te nano.” (Itaia 65:17, BG) E na kamaunai n aki toki nanokawaki ni kabane aika korakora te Atua ao rawawata ake a reke mani kariaiakan te buakaka n te tai ae kimototo.

Te kauoua: E a tia te Atua ni bairea te tai ae aki kona ni bitaki ibukini katokan te rawawata. Uringnga bwa e titiraki ngkoa te burabeti ae Abakuka bwa ai tii maanra Iehova ni kariaia te tiritiri ao te iowawa, ao Iehova e kaeka ni kangai: “E boni ngae te Mi-ni-burabeti n tataninga te tai are e na motikaki bukina . . . ao e na aki baenikai.”​—Abakuka 2:3, BG.

[Kabwarabwara ae nano]

[Te Bwaoki n Iteraniba 5]

Kiibu Aika Kaotii Taai Aika A na Roko Aika Kakukurei

E NA AKEA RIKI TE BUAKA:

“Mai, nori ana makuri Iehova, Aika uruani bwaai i Rouna i aonaba. E katoki buaka, ao tokina tabon aonaba.”​—Taian Areru 46:8, 9, BG.

A NA MANGAUTI AIKA TANGIRAKI IROURA:

“A na boni mangauti akana raoiroi ma akana aki raoiroi.”​—Mwakuri 24:15.

TE AMWARAKE IBUKIA AOMATA NAKO:

“Ane e na bati te uita i aon te aba i aon taubukini maunga.”​—Taian Areru 72:16, BG.

E NA AKEA RIKI TE AORAKI:

“Ane maeka iai e na aki kangai, I aoraki.”​—Itaia 33:24, BG.

A NANG AKEA AOMATA AIKA BUAKAKA:

“A na teweaki nako akana buakaka mai aon te aba, Ao a na taekaki taani bure mai nanona.”​—Taeka N Rabakau 2:22, BG.

E NA TAABANGAKI TE KAETITAEKA AE RIAI:

‘Noria, ane e na uea Kristo Iesu ma ni kaeti raoi taeka, ao a na tautaeka tooka ni motiki raoi taeka.’​—Itaia 32:1, BG.

[Taamnei n iteraniba 5]

E na katoki rawawata ni kabane ake tao ti a tia n rinanoi Ana Tautaeka n Uea te Atua