Bon Te Akoi Ae Rianako Rikira Bwa Ana Bwai Iehova
“Bon ana bwai Iehova ngaira.”—I-ROM 14:8.
1, 2. (a) Tera kakabwaiaara ae rine? (b) Baikara titiraki aika ti na rinanoi?
Bon te kakabwaia ae rine te mwioko are a anganaki te natannaomata ae Iteraera ngke e kangai Iehova nakoia: “Kam na riki iai ba bon au aomata mai buakoia botanaomata ni kabaneia.” (Te Otinako 19:5, BG) Iai naba ni boong aikai te kakabwaia ae rine nakoia kaain te ekaretia ni Kristian ngkai ana bwai Iehova ngaiia. (1 Betero 2:9; Te Kaotioti 7:9, 14, 15) Bon te mwioko ae ti kona ni kakabwaiaaki iai n aki toki.
2 Irarikini kakabwaiaara ae rine, bon te mwioko naba rikira bwa ana bwai Iehova. Tao a bae n iango tabeman i bon irouia ni kangai: ‘I kona ni karaoa ae e kantaningaia mairou Iehova? E na ribaai ngkana I bure n te taina? E kona n iraeaki inaomatara ngkai ti riki bwa ana bwai Iehova?’ A bon riai n iaiangoaki raoi aeka n tabeaianga aikai. Ma e kangai moa te titiraki riki teuana ae tau n iangoaki raoi: Baikara kakabwaiaara n rikira bwa ana bwai Iehova?
E Kairiri Nakon te Kakukurei Rikira Bwa Ana Bwai Iehova
3. E kanga ni kakabwaiaaki Nei Raaba n ana motinnano are e na toro iroun Iehova?
3 A kakabwaiaaki aomata ake a riki bwa ana bwai Iehova mani baika riiriki nakoia? Iangoa rongorongon te kabekaau ae Nei Raaba ae maeka i Ieriko rimoa. Akea te nanououa bwa e bae n tia ni kaikawaaki neiei n taromauriaia antia kaaini Kanaan aika kammaira. Ma ngke e ongo taekan aia tokanikai I-Iteraera mairoun Iehova, e a ataia iai neiei bwa Iehova bon te Atua ae koaua. Ai ngaia are, e a aki tabe ma ruanikaini maiuna ni kamanoaia ana aomata te Atua ake a rineaki ao e anga mwiokoni maiuna nakon taai aika imwaina i nanoni baia. E taekinaki ae kangai n te Baibara: “Tiaki e atongaki bwa e raoiroi naba Nei Raaba are te kabekaau n ana mwakuri, ngke e butimwaeiia raoi taan uarongorongo ao e kaokiia n te kawai teaina?” (Iakobo 2:25) Iangoi kakabwaiaan neiei ngke e a ira buakon taromaurian te Atua ae itiaki irouia tibun Iteraera, ae te botannaomata ae reireiaki n Ana Tua te Atua n aaro aika tatangira ao n te kaetitaeka ae riai. Ai korakorara kukurein neiei n te aro are e a tinanikui aroaroni maiuna ake rimoa! E mare ma te I-Iteraera ao e kaikawaa natina te mwaane ae Boati bwa e na riki bwa ana aomata te Atua ae rianako.—Iotua 6:25 BG; Ruta 2:4-12 BG; Mataio 1:5, 6.
4. E kanga ni kakabwaiaaki Ruta n ana motinnano ae te toro iroun Iehova?
4 E motinnanoia naba Ruta ae te I-Moaba bwa e na toro iroun Iehova. Ngke e ataeinnaine ao tao e bae n tia n taromauria Kemoti ao atuaia I-Moaba riki tabeman, ma e a ataa te Atua ni koaua ae Iehova ao e a iein ma te I-Iteraera are e roko ni katanna i abana. (Wareka Ruta 1:1-6, BG.) Rimwi riki, ngke e a moana mwanangana Ruta n okira Betereem ma buun tarini buuna ae Oreba ao tinani buuia ae Naomi, ao e a kaumakiia ateiaine aika uoman aikai Naomi bwa a na okiri mwengaia. E na aki bebete irouia te maeka i Iteraera. Ni koauana, e ‘oki rikaaki Oreba nakoia ana koraki ma antina,’ ao Ruta e aki. E maiuakina ana onimaki ao e ataa raoi ae e kan riki bwa ana bwai. E taku nakon Naomi: “Tai butiai ba N na kitaniko, ma n rikaki man irakim n ri mwim: ba ike ko nako iai, ao I a nako iai; ao ike ko wene iai, ao I a wene iai: am koraki au koraki, ao Atuam Atuau.” (Ruta 1:15, 16, BG) Ibukin ana motinnano Ruta are e na toro iroun Iehova, e a kakabwaiaaki n ana Tua te Atua are e a tia ni kataui baika okoro ibukia aine aika mate buuia, aomata aika maiu ni kainnano ao aika akea abaia. E namakina te kukurei neiei, kamanoana, ao mweraoina i aani bain Iehova.
5. Tera ae ko a tia n noria irouia aomata aika kakaonimaki n toro iroun Iehova?
5 Tao ko bae n ataiia aomata tabeman ake a a tia ni kakaonimaki n toro iroun Iehova i nanon tatabebwi te ririki imwini katabuani maiuia. Titirakinia bwa a kanga ni kakabwaiaaki ngkai a toro irouna. E ngae ngke akea ae na akea ana kangaanga, ma bwaai ni kakoaua aika rangi ni mwaitikurikuri ake a reke iroura aika ti kona n nori, a kaota boutokaan ana taeka te tia areru aikai: “E a kabaia te botanaomata ae Atuana Iehova.”—Taian Areru 144:15, BG.
Ana Kantaninga Iehova Aika Riai
6. E aera ngkai ti riai n aki maaku ngkana ti aki kona ni karaoa ae kantaningaia Iehova mairoura?
6 Tao ko a tia n iangoia bwa ko kona ni karaoa ae e kantaningaia mairoum Iehova. E kakai reke namakinan ae ko a rawawata n iangoan ae ko a riki bwa ana toro te Atua, ni maiuakinan ana tua, ao n taetae ibukin arana. N te katoto, ngke e kanakoaki Mote bwa e na taetae nakoia tibun Iteraera ao uean Aikubita ao e namakinna bwa e aki tau n taetae. Ma e atataiaomata te Atua n te bae kantaningaia mairouni Mote, bwa e ‘reireinna arona.’ (Wareka Te Otinako 3:11; 4:1, 10, 13-15, BG.) Kioina ngke e butimwaea buokana Mote, e a namakina iai te kimwareirei ni kakororaoan nanon te Atua. N aron anne, e atataiaomata naba Iehova n te bae kantaningaia mairoura. E ota raoi n aroarora aika aki kororaoi ao e kani buokira. (Taian Areru 103:14, BG) E kaunganano te toro iroun te Atua ngkai taan rimwin Iesu ngaira ao ti aki taonakinako iai bwa a kakabwaiaaki aomata n te aeka ni maiu aei ao e kakukureia naba Iehova. E taku Iesu: “Nakomai nakoiu . . . ao N na motiki rawami. Amoa amou i aomi ao reirei irou bwa I nimamannei ao I nanorinano.”—Mataio 11:28, 29.
7. E aera ngkai ko kona n onimakina Iehova bwa e na buokiko ni karaoan ae kantaningaia mairoum?
7 E na katauraoa te kaungaunga ae ti kainnanoia Iehova n taai nako, tii ngkana ti onimakinna ibukini kakorakorakira. N te katoto, e teretere bwa anuan Ieremia te mamaamaa n taetae. Ibukin anne, e taku Ieremia ngke e mwiokoia Iehova bwa e na riki bwa Ana burabeti: “Akea ngai, te Uea ae Iehova! noria, I babanga taetae: ba te tei ngai.” E taku imwina riki: ‘N na aki manga taetae n arana.’ (Ieremia 1:6; 20:9, BG) Ma e ngae n anne, e boni kona Ieremia n tataekina te rongorongo ae aki bati n tangiraki man ana kaungaunga Iehova i nanon 40 te ririki. E okioki Iehova ni karaua nanona n taeka aikai: “I memena i roum ni kamaiuko ma n rawea maium.”—Ieremia 1:8, 19; 15:20, BG.
8. Ti na kanga ni kaotia bwa ti onimakina Iehova?
8 N aron are a kakorakoraaki Mote ao Ieremia iroun Iehova, e kona naba ni buokira bwa ti na karaoa ae e kantaningaia mairouia Kristian ni boong aikai. Te bwai ae rangi ni kakawaki iai bon onimakinan te Atua. E taekinaki ae kangai n te Baibara: “Ko na onimakina Iehova n nanom ni kabanea, Ao tai mwiokoa oin am ataibwai: Ko na ataia n nakonakom ni kabane, Ao E na kaeti kawaim.” (Taeka N Rabakau 3:5, 6, BG) Ti kaotia bwa ti onimakina Iehova ngkana ti karekea buokara n ana ibuobuoki are e katauraoia rinanon ana Taeka ao te ekaretia. Akea te bwai ae na tuka kakaonimakira nakon Iehova ngkana ti kariaia bwa e na kaira eueutani waera ni maiura.
E Mwannanoia Ana Aomata Iehova n Tatabemania Nako
9, 10. Tera te aeka ni kamanomano ae beritanaki n Taian Areru 91, BG?
9 Ngkai a iaiangoa aia motinnano tabeman bwa a na katabui maiuia nakon Iehova ke a na aki, tao a a tia n iaiangoa karuanikain aia bure, aki tauia nako iai, ao aki butimwaeaia iroun Iehova. E kakukurei bwa e katauraoa te kamanomano ni kabane Iehova ae ti kainnanoia ibukini kawakinan ara iraorao ae kakawaki ma ngaia. Ti na nora aroni kabwarabwaraan anne n Taian Areru 91, BG.
10 E moanaki ni kangai te areru anne: “Te aomata ae memena n te tabo ae raba ae ana tabo Teuare Moan te Rietata E na mamaeka n nun Teuare Moan te Mwaka. N na taekina Iehova ni kangai, Boni neu ni kamaiu ao au nono; Bon Atuau, ae I onimakinna. Ba E na boni kamaiuko man ana ao-ni-katatai te tia kamwaneia maan.” (Taian Areru 91:1-3, BG) Noria bwa e beritanna te Atua bwa e na kamanoia akana tangiria ao n onimakinna. (Wareka Taian Areru 91:9, 14, BG.) Tera te aeka ni kamanomano ae e nanonna? Eng, e kamanoia tabeman mai buakoia ana toro rimoa Iehova man ikoakin rabwataia n aaro tabeua, ibukini kateimatoaan te kanoa are e na kaoti mai iai te Mesia are e beritanaki. Ma e ngae n anne, a bati riki mwaane aika kakaonimaki ake a kabureaki, a kammarakaki ao n tiringaki n aaro n iowawa bwa a aonga n aki kakaonimaki nakon te Atua. (Ebera 11:34-39) A karekea te ninikoria are a kainnanoia ibukin nanomwaakaia bwa e kamanoi aia onimaki Iehova man ruanikaia n uruakini kakaonimakia. Mangaia are, e a kona n ota raoi bwa Taian Areru 91, BG bon te berita ibukini kamanoan te onimaki.
11. Tera “te tabo ae raba ae ana tabo Teuare Moan te Rietata,” ao antai aika kamanoaki iai iroun te Atua?
11 Bon te tabo ni kamanomano ibukin te onimaki n te aro ni kaikonaki “te tabo ae raba ae ana tabo Teuare Moan te Rietata,” are e taekinna te tia areru. I nanon te tabo aei, ao te koraki ake a maeka ma te Atua bwa kaanga ana iruwa, a na boni mano mani bwaai ni kabane ao mairoun naba te aomata temanna ae karuanikaia aia onimaki ao tangiran te Atua irouia. (Taian Areru 15:1, 2; 121:5, BG) Bon te tabo ae raba bwa a aki kona n ataia ake tiaki kaain te onimaki. E kamanoaki iai ana aomata Iehova ae kangai: ‘Bon Atuau Ngkoe ae I onimakiniko.’ Ti aki riai n raraoma n te aro ae riao ibukini buan akoara iroun te Atua rinanoni kamwaneara n ana bwai ni kamwane Tatan are “te tia kamwaneia maan,” ngkana ti teimatoa n tiku n te tabo ni kamanomano aei.
12. Baikara kangaanga aika karuanikaia ara iraorao ma te Atua?
12 Baikara kangaanga aika karuanikaia ara iraorao ae kakawaki ma te Atua? E mwanewei tabeua kangaanga mai buakoia te tia areru n aron, “te aoraki ae kamamate ae nakonako n te ro, Ma te aoraki ae e bora te mate iai ae kamatea te aba n te tawanou.” (Taian Areru 91:5, 6, BG) E a tia “te tia kamwaneia maan” ni kamwaneia aomata aika bati ni karinan te nano ni kani karaoi oin nanoia ibukin tangiran te inaomata. (2 I-Korinto 11:3) A kamwaneaki tabemwaang irouna rinanoni karikirakean te nanonrang, te nanorieta ao te mataai ni kanibwaibwai. Ma iai naba tabemwaang ake e mwamwanaiia rinanon aeka ni karioiango nako n aron te nanonnaba, te ewarutin ao Aaro aika kewe. (I-Korote 2:8) Ao a bati ake a burebureaki bwa a na mwane n te bwai ni kamwane ae te wene ni bure. Titeboo aroaro aikai ma te aoraki ae kamamate ae e a tia ni kairiia mirion ma mirion bwa e na bua tangiran te Atua irouia.—Wareka Taian Areru 91:7-10, BG; Mataio 24:12.
Arom ni Kamanoa Tangiran te Atua Iroum
13. E kanga Iehova ni kamanoira mani kangaanga aika karuanikaia marurungin ara onimaki?
13 E kanga Iehova ni kamanoia ana aomata mani baika a kona ni karuanikaia te onimaki? E taku te tia areru: “E na mwiokoia ana anera i bukim, Ba a na kawakiniko i nanoni kawaim ni kabane.” (Taian Areru 91:11, BG) A kairira anera i karawa ao a kamanoira bwa ti aonga ni kona n tataekina te rongorongo ae raoiroi. (Te Kaotioti 14:6) Irarikia anera, a kamanoira unimwaanen te ekaretia mani mwamwanaakira n iango aika kewe rinanoni kabotoan aia reirei man te Baibara. A kona naba n anga te ibuobuoki nakoia aomata n tatabemania nako aika kabokorakora ma aroaroia aomata n te aonnaba aei. (Tito 1:9; 1 Betero 5:2) E katauraoi naba amwarake n taamnei “te toro ae kakaonimaki ma ni wanawana” ibukini kamanoara man te reirei ae te ewarutin, anaakin nanora nakon tangirani kaibwabwarun te rabwata, uaiakinan te kaubwai ma te kani kakannato, tangirani baika karuanikai aika bati riki ao kariri. (Mataio 24:45) Tera ae e a tia ni buokiko bwa ko na rarawa nakoni bwaai tabeua mai buakoni baika karuanikai aikai?
14. Ti na kanga ni kamanena te kamanomano ae katauraoia te Atua?
14 Tera ae ti riai ni karaoia bwa ti aonga n teimatoa n tiku n ana “tabo ae raba” te Atua are ti kamanoaki iai? Ngkai ti aki toki ni kamanoira mani baika karuanikaia rabwatara n aroni kabuanibwai, taani kamwarua ke aoraki nako, ti riai naba n teimatoa ni kamanoira mani baika karuanikaia ara onimaki. Mangaia are, ti riai ni katoatai ni kamanena raoi te kairiri ae katauraoia Iehova rinanon ara boki nako, bobotaki n te ekaretia ao bwabwaro. Ti bia ukera buokara mairouia unimwaane n te ekaretia. Ao ti kakabwaiaaki naba irouia tarira ma mwaanera aika Kristian n aroaroia aika kakaokoro ake a kaotiotii. Ni koauana, ti buokaki bwa ti na wanawana ni bobotakira ma te ekaretia.—Taeka N Rabakau 13:20, BG; wareka 1 Betero 4:10.
15. E aera ngkai ko kona ni kakoauaa raoi bwa e na kamanoko Iehova mani bwaai nako aika kona ni kabuaa akoam irouna?
15 Ti aki riai n nanououa bwa e kona ni kamanoira Iehova mani bwaai nako aika kona ni kabuaa akoara irouna. (I-Rom 8:38, 39) E a tia ni kamanoa te ekaretia man Aaro aika iai mwaakaia ao tautaeka aika kairiribai ae n angiin te tai tiaia, boni karaureakira ma Atuara ae tabu ao tiaki tiringakira. E a tia n noraki koauan ana berita Iehova aei: “Bon akea te kai-ni-buaka teuana ae karaoaki n ekiko nako ae na tokanikai.”—Itaia 54:17, BG.
Antai ae Anganira te Inaomata?
16. Bukin tera bwa e aki kona n anganira te inaomata te aonnaba?
16 E na iraeaki inaomatara n rikira bwa ana bwai Iehova? Ni kaitaraan anne, e bon iraeaki inaomatara n rikira bwa ana bwai te aba. A riki n ianena kaain aonnaba mairoun Iehova ao a tautaekanaki iroun te atua ae ribuaka ae kaaungania aomata. (Ioane 14:30) N te katoto, e kabongana te kangaanga ma te kataumwane Tatan n ana waaki bwa e aonga n iraei inaomataia aomata. (Kabotaua ma Te Kaotioti 13:16, 17.) Iai naba mwaakan te bure ni mwamwanaiia aomata n tautoronia iai. (Ioane 8:34; Ebera 3:13) Ai ngaia are, e ngae ngke tao a beritana te inaomata te koraki ake tiaki kaain te onimaki ngkana a karikirakea te aroaro ni maiu ae kauntaba ma ana reirei Iehova, ane a na waekoa n ataia akana kakauongo nakoia bwa a toronaki n te bure ao te aroaro ni maiu ae kamaamaa.—I-Rom 1:24-32.
17. Tera te inaomata ae anganira Iehova?
17 N te itera teuana, e na kainaomataira Iehova mani bwaai nako ake ti kona n ruanikai iai ngkana ti mwiokoi maiura irouna. N aanga tabeua, titeboo ngaira ma te aomata are e mwiokoa maiuna iroun te tia korokoro ae mwaatai, are e kona ni kainaomataa man aorakina ae ruanikai iai maiuna. Iai aorakira ngaira ni kabane ae ruanikai iai maiura, ae rikiara ae te bure. Ti kona ni kantaningaa kainaomataara mani mwin te bure ao ni maiu n aki toki, tii ngkana ti mwiokoi maiura iroun Iehova ni kabotoi i aon ana karea Kristo. (Ioane 3:36) N aron ae ti kona ni karikirakea iroura mwiokoan te tia korokoro n ataan aroarona, e na rikirake naba onimakinan Iehova iroura, ngkana ti teimatoa n reiakina taekana. Mangaia are, ti teimatoa ni karaurau n ukeuke n reirei n ana Taeka te Atua bwa e na boni buokira bwa ti na tangiria n te aro are e na katoki maakura nako ngkai ti a riki bwa ana bwai.—1 Ioane 4:18.
18. Tera ae a na karekea ake a a riki bwa ana bwai Iehova?
18 E angania aomata ni kabane Iehova inaomataia n rinea ae a tangiria. E taekinaki ae kangai n ana Taeka: “Ko na rinea te maiu, ba ko aonga ni maiu, ngkoe ma am kariki; ba ko na tangira Iehova ae Atuam.” (Te Tua-Kaua 30:19, 20, GB) E tangirira bwa ti na kaotiota tangirana n arora n inaomata n rinea ae ti na toro irouna. N oneani mwin ae e na iraeaki inaomatara n rikira bwa ana bwai te Atua, e na boni kateimatoa kukureira.
19. E aera ngkai bon te akoi ae rianako rikira bwa ana bwai Iehova?
19 Ti aki tau n riki bwa ana bwai te Atua ae kororaoi ngkai bon taani bure ngaira. Ma e kona n riki aei tii man ana akoi ae rianako te Atua. (2 Timoteo 1:9) E korea ae kangai Bauro: “Ngkana ti maiu, ao ti maiu ibukin Iehova, ma ngkana ti mate, ti mate ibukin Iehova. Mangaia ae ngkana ti maiu ke ti mate, ma bon ana bwai Iehova ngaira.” (I-Rom 14:8) Ti na bon aki uringaaba ngkai ti motinnanoia bwa ti na riki bwa ana bwai Iehova.
Ko na Kanga ni Kaeka?
• Baikara kakabwaia ngkai ti a riki bwa ana bwai Iehova?
• E aera ngkai ti kona ni karaoa ae kantaningaia te Atua mairoura?
• E kanga Iehova ni katauraoa kamanoaia ana toro?
[Taamnei n iteraniba 11]
Titirakinia tabemwaang bwa a kanga ni kakabwaiaaki n rikia bwa ana bwai Iehova
[Taamnei n iteraniba 13]
Baikara aaro tabeua ake e katauraoa iai te kamanomano Iehova?