Tera Ae E Na Kaotaraeaki N Rokon Ana Bong Iehova

“E na roko ana bong Iehova n ai aron te tia ira; . . . ao e na kabuekaki te aonnaba ma bwaina nako.”​—2 BETERO 3:10.

1, 2. (a) E na kanga n toki te waaki ae buakaka ae ngkai? (b) Baikara titiraki aika ti na rinanoi?

E KATEAKI te waaki ae buakaka ae ngkai i aon te iango ae kewe, are a kona aomata n tautaekana te aonnaba aio n te aro ae nakoraoi n akea ana kairiri Iehova. (Taian Areru 2:2,3) E kona n teimatoa te bwai ae e aanaki i aon iango aika kewe? Ni koauana, e bon aki! Ma, ti riai n aki tataninga ni karokoa e roko n tokina ana aonnaba Tatan ni bon oin ana waaki. N oneani mwin aei, e na boni kamaunaaki iroun te Atua n te tai ae e a tia n namatia. A nang kaotiotaki raoi ana tangira ao ana motikitaeka te Atua n ana mwakuri nakon te aonnaba ae buakaka aei.​—Taian Areru 92:7; Taeka N Rabakau 2:21, 22.

² E korea ae kangai te abotoro Betero: “E na roko ana bong Iehova n ai aron rokon te tia iraa, ike e nangi mauna iai karawa n te rurunga ao a na waanako bwaini karawa ma aonnaba n te kabuebue ae korakora, ao e na kabuekaki te aonnaba ma bwaina nako.” (2 Betero 3:10) Tera nanon “karawa” ao te “aonnaba” aika taekinaki ikai? Baikara ‘bwaai’ aika a na waanako? Ao tera ae nanonna Betero ibukin te “aonnaba ma bwaina nako” ake a na “kabuekaki”? Ti kona ni buokaki bwa ti na tauraoi nakoni baika kakamaaku ake a na roko n te tai ae imwaira n ataakini kaekaan titiraki aikai.

Taiani Karawa ma Aonnaba Ake A na Maunanako

3. Baikara taiani “karawa” ake e mwaneweaki n te 2 Betero 3:10, ao a na maunanako n te aro raa?

³ N angiin te tai, te taeka ae “karawa” e kaikonakaki n te Baibara ibukini waaki n tautaeka aika a korakora ake a tautaeka i aon te botannaomata. (Itaia 14:13, 14; Te Kaotioti 21:1, 2) E tei taiani “karawa [ake] a na maunanako” ibukin aia waaki n tautaeka aomata i aon te botannaomata aika aki karinea te Atua. Kamaunaakia n te “rurunga” ke “n te karongoa ae rangi ni korakora,” n ai aron ae e taekinaki n te rairai teuana, e kona ni kaotaki iai waekoani kamaunaakia taiani karawa aikai.

4. Tera te “aonnaba,” ao e na kanga ni kamaunaaki?

⁴ E tei te “aonnaba” ibukia aomata aika a ianena mairoun te Atua. Te aonnaba ae ai aron aio are n ana bong Noa, e kamaunaaki n te Ieka n ana babaire te Atua. “E kawakinaki karawa ma te aonnaba ae ngkai ibukin te ai, n te taeka naba anne, ao a kawakinaki ni karokoa te bong ni motikitaeka ao bongini kamaunaaia aomata ake a aki karinea te Atua.” (2 Betero 3:7) A kamaunaaki aomata ni kabane ake a aki karinea te Atua n rokon te Ieka n te tai ae tii teuana, ma te kamaunaaki ae nang roko e na riki teutana imwin teutana n tain “te rawawata ae korakora.” (Te Kaotioti 7:14) E na kairiia taan tautaeka n te aonnaba aio te Atua ni moan iteran te rawawata anne, bwa a na kamauna “Baburon ae Kakannato” ni kaota iai ribaakia Aaro aika a kabekaau irouna. (Te Kaotioti 17:5, 16; 18:8) Ni kabanean iteran te rawawata ae korakora, ae te buaka are Aremaketon, a na bane ni kamaunaaki iai ana aomata Tatan iroun Iehova.​—Te Kaotioti 16:14, 16; 19:19-21.

“A na Waanako Bwaini Karawa ma Aonnaba”

5. Baikara baika irekereke ni kaikonakani bwaini karawa ma aonnaba?

⁵ Baikara “bwaini karawa ma aonnaba” aika “a na waanako”? E kabwarabwaraaki n rikitinaren te Baibara bwa te taeka ae “bwaini” karawa ma aonnaba e nanonaki iai “moani booto n reirei,” ke “aaia.” E reitia n taekinna bwa te taeka anne e “kabonganaaki ibukini manin taeka n te taetae, ao a riki bwa aani ke boton te taetae.” Mangaia are “bwaini karawa ma aonnaba” ake e taekini Betero, a kaineti nakoni baika a boto mai iai aroaroia, aia iango, kawaia ao tiaia aomata ake e aki karineaki iai te Atua. A irekereke naba “bwaini karawa ma aonnaba” ma “nanon aon te aba,” ae e “mwamwakuri ngkai i nanoia natin te aki ongeaba.” (1 I-Korinto 2:12; wareka I-Ebeto 2:1-3.) E a taabangaki ngkai n ana aonnaba Tatan, te nano, ke te “ang” anne. A kairoroaki aomata iai bwa a na iango, a na karaoi aia babaire, a na taetae, ao ni karaoi mwakuri aika a kaotiota ana iango “te tia tautaeka ae mwaaka i aon te nano ae taabangaki n aron te ang,” ae Tatan ae e kainikatonga ao ni karitei.

6. E kanga ni kaotiotaki nanon aon te aba?

⁶ Mangaia are te koraki ake a rotakibuaka n nanon aon te aba a kariaia bwa a na kairaraangaki aia iango ma nanoia iroun Tatan, e ngae ngke a ataia ke a aki, ao ngkanne a kaotiota ana iango ao aroarona. Ao ibukin anne, a karaoa ae a tangiria n aki mutiakina nanon te Atua. A karaoi waaki aika aanaki n te kainikatonga ao te bangaomata, a kaotiota te nano ni karitei nakon te waaki ni kairiri, ao a kariaia kairan aroia n tangiran “ana kaibwabwaru te rabwata ma baika tangiri maata.”​—Wareka 1 Ioane 2:15-17.a

7. E aera ngkai e riai ‘kawakinan nanora’?

⁷ Ai kakawakira ngkanne ‘kawakinan nanora’ ni kaotiota wanawanan te Atua n rineaia raoraora, bwaai ni wareware, te kaakibotu ao kawaran taabo tabeua n te Internet! (Taeka N Rabakau 4:23) E korea ae kangai te abotoro Bauro: “Kam na tarataraingkami bwa e kaawa n iai temanna ae e na raweingkami bwa konana ni wanawanan aon te aba ao n te mwamwanaa te aba ae akea uaana, ae boto i aon aia katei nikawai aomata ao i aoni baike a boboto iai aia waaki kaain te aonnaba, ma tiaki ni kaineti ma Kristo.” (I-Korote 2:8) E a rangi ni kaumakaki te kaetieti anne ngkai e a uakaan ana bong Iehova ibukini ‘kabuebuena’ are a na waanako iai “bwaini karawa ma aonnaba” aika n ana waaki Tatan, ike a kaotaraeaki iai bwa a bon aki kona n teimatoa ni kaitaraa uran unin te Atua. Ti a kauringaki iai taeka aika ni Maraki 4:1, (BG): “E a kan roko te bong arei, e ura n ai aron te nenikanaiai; ao a na riki ba kaanga maange akana kainikatonga ni kabaneia, ma akana kakaraoi buakaka ni kabaneia: ao e na kabuokiia te bong are a kan roko.”

“E na Kabuekaki te Aonnaba ma Bwaina Nako”

8. A na kanga ni “kabuekaki” aonnaba ma bwaina nako?

⁸ Tera are e nanonna Betero ngke e korea ae “e na kabuekaki te aonnaba ma bwaina nako”? Te taeka ae “kabuekaki” e kona naba n rairaki bwa “kuneaki” ke “akea rabunana.” E nanonna Betero bwa n tain te rawawata ae korakora, ao e na kaaki rabunani bwaai nako Iehova aika n ana waaki Tatan, ni kaotaraea iai kaitaraana ma Ana Tautaeka n Uea ao e bon tau ni kamaunaaki. E taetae ni burabetinaki te tai anne n Itaia 26:21, (BG) ni kangai: “E oti nako Iehova mai nanon ana tabo ba E na kareke kaiia kaain aonaba i bukin aia bure: ao e na kaota naba te raraa are i nanona aontano, ao e na aki manga rabunia ana aomata aika kamateaki.”

9. (a) Tera ae ti riai n rarawa nako iai, ao bukin tera? (b) Tera ae ti riai ni karikirakea, ao bukin tera?

⁹ N ana bong Iehova, a nang kaotiota anuaia ni koaua te koraki ake a tia n rekenako n ana waaki ao nanon te aonnaba aika bubuaka ao ni bon ikamamate i marenaia. Ni koauana, e kona n ae bati aekakini kaakibotu aika tiritiri aika taabangaki ni boong aikai ake a kataneiaaki iai aia iango aomata aika mwaiti imwain te tai are e nang katea iai baina temanna ‘n ekinako baia raona nako.’ (Tekaria 14:14, BG) Ai kakawakira ngkanne bwa ti na rarawa nakoni bwaai nako n aroni birim, booki ni wareware, takaakaro n te viteo ao a bati riki ake a kona ni karekei iroura aroaro aika rangi n ribaaki iroun te Atua, n aron te nanorieta ao tangiran te tiritiri! (2 Tamuera 22:28; Taian Areru 11:5) Ti riai ni karikirakea uaan te taamnei ae raoiroi mairoun te Atua, bwa aroaro aikai a na bon aki kona n rotaki ni kabuebuen ana bong Iehova.​—I-Karatia 5:22, 23.

“Karawa ae Boou ao te Aonnaba ae Boou”

10, 11. Tera ae nanonaki ni “karawa ae boou” ao “aonnaba ae boou”?

¹⁰ Wareka 2 Betero 3:13. “Karawa ae boou” bon ana Tautaeka n Uea te Atua i Karawa, are e tei n 1914 n tokin “aia tai botannaomata ae baireaki.” (Ruka 21:24) E kaainaki Ana Tautaeka n Uea te Atua aio irouni Kristo Iesu ma raona n tautaeka ake 144,000, ake angiia mai buakoia, a tia ni karekei kaniwangaia i karawa. N te boki ae Te Kaotioti, te koraki aika a rineaki aikai, a kaikonakaki bwa “te kaawa ae tabu ae Ierutarem ae Boou bwa e ruo mai karawa mairoun te Atua, ao e katauraoaki bwa kaanga te tia mare te aine ae katamaroaaki imwaini buuna.” (Te Kaotioti 21:1, 2, 22-24) N aron ae e boto te tautaeka n Iteraera ngkoa mai i Ierutarem, a na riki te Ierutarem ae Boou ma Buuna bwa te tautaeka n te waaki ae boou. E “ruo mai karawa” te kaawa ae tabu n arona n tabeakina te aonnaba.

¹¹ E kaineti te “aonnaba ae boou” nakon te botannaomata ae boou ake a tia ni kaotiota nanoia n aantaeka nakon ana Tautaeka n Uea te Atua. E na noraki nakoraoin te bwaretaiti n taamnei ake a kukurei ngkai ni kaainna ana aomata te Atua ngkana e mena n te tabo ae riai ae tamaroa ae te “aonnaba ni kabutaa are e na roko.” (I-Ebera 2:5) Ti na kanga n riki bwa kaain te waaki ae boou anne?

Katauraoi Imwain Ana Bong Iehova ae Kakannato

12. E aera bwa e na kakubanrou nakoia kaain te aonnaba rokon ana bong Iehova?

¹² A a kaman taekinna Bauro ao Betero bwa e na roko ana bong Iehova n ai aron “te tia iraa,” ae e waerikiriki n te aro ae e aki kantaningaaki. (Wareka 1 I-Tetaronike 5:1, 2.) E ngae ngke a teimatoa Kristian ni kantaningaa rokon te bong anne, ma a na kubanako naba ngkana e karina n roko. (Mataio 24:44) E na kakaiaki riki rotakia kaain te aonnaba aei nakon ae a na tii kubanako. E korea ae kangai Bauro: “Bwa n te tai are a kangai iai [ake a ianena mairoun Iehova]: ‘Iai te rau ao iai te mweraoi!’ ao e na rina ni bwakariia te kamaunanakoaki, n aron rokon aririn te aine ae bikoukou, ao e na akea aia anga ni birinako ma iai.”​—1 I-Tetaronike 5:3.

13. Ti na kanga n rarawa ni mwamwanaakira n takaruaean ae “Iai te rau ao iai te mweraoi!”?

¹³ Takaruaean ae “Iai te rau ao iai te mweraoi!” e na riki bwa teuana aia kewe taimonio, ma a na bon aki kona ni mwamwanaaki iai ana toro Iehova. E korea ae kangai Bauro: “Kam aki mena n te rotongitong, bwa tiaki ai aroia taan iraa ngkami ake a na kauiaaki n te bong arei, bwa natin te oota ao te ngaina ngkami ni kabane.” (1 I-Tetaronike 5:4, 5) Ngaia are ti bia teimatoa n tiku n te oota ae raroanako man rotongitongin ana waaki Tatan. E korea ae kangai Betero: “Ngkami aika kam tangiraki, kioina ngkai ai kaman iai iroumi te atatai aei, kam na kawakiningkami bwa kam kaawa n iraraang n aia kairua te koraki [aika taan reirei baika kewe i nanon te ekaretia ni Kristian] aika akiako, ao n tokina kam na bwaka man aromi n teimatoa.”​—2 Betero 3:17.

14, 15. (a) E kanga ni karineira Iehova? (b) Baikara taeka aika kairaki koreaia rinanon te taamnei aika ti riai n iaiangoi?

¹⁴ Noria, e aki tii tuangira Iehova bwa ti na ‘kawakinira’ ao ai akea naba te bwai ae e kona ni karaoia riki. N oneani mwin anne, e boni karineira n arona n akoira ni kariaia bwa e na ‘kaman iai iroura te atatai’ ibukini baika a na riki nakon taai aika imwaira.

¹⁵ Ma e kananokawaki bwa a a tia tabeman n nanokokoraki ibukini kakawakin taiani kauring ke n aki mutiakina riain te teimatoa n tantani. A bae ni kangai: ‘Ti a tia n ongongo te aeka ni kauring anne i nanon tatabebwi te ririki.’ E ngae n anne, a riai n ururingnga te koraki akanne bwa n taekinan anne, a kaotia iai bwa a nanououa tiaki tii iroun te toro ae kakaonimaki ma bon Iehova naba ma Natina. E taku Iehova: ‘Teimatoa n tataninga.’ (Abakuka 2:3, BG) E taekina naba ae ai aron anne Iesu: “Teimatoa n tantani, bwa kam aki ataa te bong are e na roko iai ami Uea.” (Mataio 24:42) Irarikin anne, e korea ae kangai Betero: “Iaiangoia bwa tera aromi ae riai. Kam riai n riki bwa aomata aika kam itiaki n aroaroni maiumi ao ni karaoi mwakuri ibukin tangiran te Atua, ao ni kariariaa rokon ana bong Iehova ma n ururingnga!” (2 Betero 3:11, 12) Akea te tai ae a aki mutiakina iai kakawakin taeka aikai te toro ae kakaonimaki ma ana Rabwata n Tautaeka!

16. Tera te aroaro ae ti riai n rarawa nako iai, ao bukin tera?

¹⁶ Ni koauana, bon te ‘toro ae buakaka’ ane e iangoia bwa e kiriaria rokon te Toka. (Mataio 24:48) Te toro ae buakaka anne boni kaain te koraki are e kabwarabwaraaki n te 2 Betero 3:3, 4. E korea ae kangai Betero: “Ni kabaneani boong ao ane a na roko taani kakaniko,” ake “a na waaki n aron ae boraoi ma are a tangiria,” ni kakanikoia aomata ake a ongeaba n teimatoa ni kantaningaa ana bong Iehova. Eng, a bon tii tabe ma aroaroia ke oin nanoia taani kakaniko aikai nakon riki are a na boutokaa Ana Tautaeka n Uea te Atua. Ti bia aki karikirakea te aki ongeaba ao te aroaro ae karuanikai aei! Ma ti riai n ‘iangoa naba ana taotaonakinnano ara Uea bwa kamaiuara’ n teimatoara ni katabetabeira n tataekina rongorongon te Tautaeka n Uea ao te mwakuri ni karekeia taan rimwini Kristo, ma n aki rangi n raraomaeakin taai ke boong ake a motikaki, ake e tau mwia Iehova ae te Atua.​—2 Betero 3:15; wareka Mwakuri 1:6, 7.

Onimakina te Atua ae Reke te Maiu Mairouna

17. Tera aroia Kristian aika kakaonimaki nakon ana kaumaki Iesu are a na birinako mai Ierutarem, ao bukin tera?

¹⁷ Imwin ninian Iuta n ana taanga ni buaka Rom n 66 C.E., a toua mwin ana kaumaki Iesu Kristian ake a kakaonimaki, are a na birinako man te kaawa ae Ierutarem n te tai are e moan reke iai angaia. (Ruka 21:20-23) E aera ngkai a moantaai ao ni waekoa ni karaoa anne? Bon akea te nanououa, bwa a kawakina ana kauring Iesu i nanoia. Ni koauana, a kantaningaia Kristian bwa e na irekereke aia motinnano ma te rawawata, n aron are e a kamani kauringia Iesu. Ma n te tai naba anne, a a ataia bwa e na aki kaaki taekaia ana toro aika kakaonimaki Iehova.​—Taian Areru 55:22.

18. A kanga ana taeka Iesu ake n Ruka 21:25-28 n rota arom n iaiangoa te rawawata ae korakora ae nang roko?

¹⁸ Ti riai naba n onimakina raoi Iehova, bwa bon tii ngaia ara tia kamaiu n rokon te rawawata ae te kabanea ni korakora mai buakon ake a na rotaki iai te botannaomata ma ngkoa ni karokoa ngkai. Tabeua te tai imwini moanakin te rawawata ae korakora ma imwain ae e karokoa ana motikitaeka Iehova i aoia nikiraia te botannaomata, ao ane a na “tong ibukini kororakeni maakuia ma kantaningaani baika a na riki n te aonnaba ni kabutaa.” E ngae ngke a na bon rurubenebene ni maaku taan ribaa te Atua, ma a na bon aki maaku ana toro Iehova aika kakaonimaki. Ni kaitaraan anne, a na boni kimwareirei n ataakin ae e a kaan roko kamaiuaia.​—Wareka Ruka 21:25-28.

19. Tera ae e na rinanoaki n te kaongora ae imwina?

¹⁹ Eng, ai boni kamimira te tai ae na roko ae imwaia te koraki ake a teimatoa ni kaokoroia ma kaain te aonnaba ao “bwaini karawa ma aonnaba”! N aron ae e na kabwarabwaraaki n te kaongora ae imwina, ti riai ni karaoa ae bati riki nakon ae tii te rarawa nakon te buakaka ngkana ti kani karekea te maiu. Ti riai ni karikirakei aroaro aika kakukureia Iehova ao ni karaoi mwakuri aika boraoi ma nanona.​—2 Betero 3:11.

[Kabwarabwara ae nano]

Ko Kona ni Kabwarabwaraa?

• Baikara baika a tei ibukin . . .

‘karawa ma aonnaba’ aika ngkai?

“bwaini karawa ma aonnaba”?

‘karawa ae boou ao aonnaba ae boou’?

• Bukin tera bwa ti onimakina raoi te Atua?

[Taamnei n iteraniba 13]

Ko na kanga ni ‘kawakina nanom’ ao n teimatoa ni kaokoroko ma kaain te aonnaba?

[Taamnei n iteraniba 14]

Ti na kanga ni kaotiotia bwa ti ‘iangoa naba ana taotaonakinnano ara Uea bwa kamaiuara’?