“Iaiangoia Bwa Tera Aromi Ae Riai”!
“Kioina ngkai a nangi waanako baikai, iaiangoia bwa tera aromi ae riai. Kam riai n riki bwa aomata aika kam itiaki n aroaroni maiumi ao ni karaoi mwakuri ibukin tangiran te Atua”!—2 BETERO 3:11.
1. E aera ngkai ana kauoua n reta Betero bon te kaumaki ae roko raoi n taina nakoia Kristian ake n ana bong?
NGKE e korea ana kauoua n reta ae kairaki koreana rinanon te taamnei te abotoro Betero, ao a a kaman nanomwaaka ni kaaitarai bwainikirinaia kaain te ekaretia ni Kristian, ma e aki kamamaraaki ingaingan nanoia ke ni kawaeremweaki rikirakena. Ngaia are e a manga kabongana te anga teuana te Riaboro, are e a tia ngkoa n totokanikai iai n taai aika bati. N aron ae e kaotaraeaki irouni Betero, e kataia Tatan ni kabuakakaia ana aomata te Atua rinanoia taan reirei ni kewe aika “korakora i nanoia te kani wene ni kimoa” ao “a kataneiaaki nanoia n te mataai.” (2 Betero 2:1-3, 14; Iuta 4) Ngaia are e a riki ana kauoua n reta Betero bwa te kaumaki ae ringa te nano ibukini kateimatoaan te kakaonimaki nakon te Atua.
2. Tera ae kaatuuaki riki n 2 Betero mwakoro 3, ao baikara titiraki aika ti riai n titirakinira iai?
2 E korea ae kangai Betero: “I taku bwa e eti bwa N na kakaungaingkami n arou ni kakauringingkami ngkai I mena moa n te rabwata aei ae ai aron te umwanrianna, ngkai I ataia bwa e a kaan roko taini buutan umwau n rianna aei . . . Mangaia ae N na kekeiaki mwaaka n taai nako, bwa kam aonga ni kona ni kauringingkami ni baikai i bon iroumi, imwin nakou.” (2 Betero 1:13-15) Eng, e ataia Betero bwa e a kaan ana tai ni mate, ma e tangiria bwa a na ururingaki ana kauring ake a roko raoi n taia. Ao ni koauana, a a riki bwa kanoan te Baibara ao ti a bane ni kona ni warekia ni boong aikai. E rangi ni kakaongora riki nakoira ana kauoua n reta Betero mwakorona 3, kioina ngkai a kaatuuaki iai taekani “kabaneani boong” n te waaki ae ngkai ao kamaunaani karawa ma aonnaba ni kaikonaki. (2 Betero 3:3, 7, 10) Tera ana reirei ni kairiri Betero ibukira? E na kanga ni buokira ni karekea akoara iroun Iehova maiuakinan ana reirei ni kairiri?
3, 4. (a) Tera ana taeka Betero are kauekea te iango, ao tera te kauring are e anga? (b) Baikara baika kakawaki aika tenua ake ti na rinanoi?
3 Imwin taekinani kamaunaan ana waaki Tatan, e mwanewea ae kangai Betero: “Iaiangoia bwa tera aromi ae riai. Kam riai n riki bwa aomata aika kam itiaki n aroaroni maiumi ao ni karaoi mwakuri ibukin tangiran te Atua”! (2 Betero 3:11, 12) E teretere ngkanne bwa e aki kateia bwa te titiraki, ma e anga te kibuntaeka ae kauekea te iango, ma ni kautimata. E ataia Betero bwa bon tii te koraki ake a kakaraoa nanon Iehova ao ni kaotiotii aroaro ake e kukurei iai te Atua, aika a na kamaiuaki n rokon te ‘bong ni karekekai.’ (Itaia 61:2, BG) Ngaia are e a manga kangai riki te abotoro: “Ngkami aika kam tangiraki, kioina ngkai ai kaman iai iroumi te atatai aei, kam na kawakiningkami bwa kam kaawa n iraraang n aia kairua te koraki aika akiako [aika taan reirei baika kewe], ao n tokina kam na bwaka man aromi n teimatoa.”—2 Betero 3:17.
4 Kioina ngkai Betero bon temanna mai buakoia ake a a ‘kaman iai irouia te atatai,’ e a ataia iai bwa ni kabaneani boong ao a riai riki Kristian n tantani bwa a aonga n teimatoa ni kakaonimaki. Rimwi riki, e kabwarabwaraa raoi bukina te abotoro Ioane. E a kaman nora karenakoan Tatan mai karawa ao e “korakora unna” nakoia “ake a kakairi n ana tua te Atua ao a mwiokoaki n te mwakuri ni kaotiota taekan Iesu.” (Te Kaotioti 12:9, 12, 17) A na bon tokanikai ana toro te Atua aika kakaonimaki aika kabiraki, n raonaki irouia “tiibu tabemwaang” aika kakaonimaki. (Ioane 10:16) Ma tera arora n tatabemanira nako? Ti na teimatoa ni kakaonimaki? Ti na buokaki ni karaoan anne ngkana ti kakorakoraira (1) ni karikirakei aroaro ake e kukurei iai te Atua, (2) n teimatoa n itiaki n te aroaro ni maiu ae riai ao n ara onimaki, ao n aki kabuakakaaki, ao (3) ngkana ti bwaina te iango ae eti ni kaineti ma kataaki. Ti na rinanoi baika kakawaki aikai.
Karikirakei Aroaro Ake E Kukurei Iai te Atua
5, 6. Baikara aroaro aika ti riai ni kakorakoraira ni karikirakei, ao bukin tera bwa e kainnanoaki ‘kabaneani korakorara’ iai?
5 E korea ae kangai Betero ni moan ana kauoua n reta: “Ibukin naba butimwaeani baikai, ao kam na kabanea korakorami n raona ami onimaki n te raoiroi, ao n raona ami raoiroi n te atatai, ao n raona ami atatai n te taubaang, ao n raona ami taubaang n te nanomwaaka, ao n raona ami nanomwaaka n tangiran te Atua, ao n raona tangiran te Atua iroumi n ami itangitangiri n tari, ao n raona ami itangitangiri n tari n te tangira. Bwa ngkana iai baikai iroumi ao a kabatiaaki, ao a na kawakiningkami n te aro ae kam na aki kona n taningaroti iai ke n aki uaa ni kaineti ma te atatai ae eti ibukin ara Uea ae Iesu Kristo.”—2 Betero 1:5-8.
6 Ni koauana, ti riai ni ‘kabanei korakorara’ n uataboi mwakuri aika a na buokira ni karikirakei aroaro ake e kukurei iai te Atua. N te katoto, e kainnanoaki te kakorakora ni kaakaeani botaki ni Kristian, te wareware n te Baibara ni katoabong, ao kateimatoaan am babaire ibukin te ukeuke n reirei n te Baibara i bon iroum. Ao e bae ni kainnanoaki naba iai te mwakuri korakora ao te babaire ae nakoraoi bwa e aonga ni katoatai ara Taromauri n Utu n te tairiki ae baireaki, ao e na kakukurei ma n uaana. Ma ngkana ti taneiai ni kakaraoa nanon ara kaetieti, e a bebete ngkanne kateimatoaan aroaro aika raraoi aikai, ai moarara riki ngkai ti a karekei kakabwaia mai iai.
7, 8. (a) Tera ae a taekinna tabeman ibukin te Taromauri n Utu n te tairiki? (b) Ko kanga ni kakabwaiaaki n am taromauri n utu?
7 E korea ae kangai temanna te tari te aine ni kaineti ma te babaire ibukin te taromauri n utu: “Ti a kona iai n reiakini baika bati.” E taku temanna riki te aine: “Ni koauana, I aki tangiria bwa e na toki te reirei n te boki, bwa bon aei te botaki ae I rangi n tatangiria. Ma ngkai e a reke te tairiki ibukin ara Taromauri n Utu, I a ataia iai bwa e bon nori baika ti kainnanoi Iehova ao taai ake ti kainnanoi iai.” E taku temanna atun te utu: “E rangi ni korakora buokara n te Taromauri n Utu. E rangi n raoiroi ngkana ti kaangaraoa ara botaki nakoni baika ti kainnanoi ngaira aika taanga! Ti noria bwa e a nakoraoi riki iroura kaotiotan uaan te taamnei ae raoiroi, ao ti a rangi ni kimwareirei riki ngkai n ara mwakuri ni minita.” E taku temanna riki atun te utu: “A karaoi oin aia kakaae natira ao a bati iai reireiaia ao a unga naba iai. Ti kakoauaa raoi man te babaire aei bwa e bon atai tabeaiangara Iehova ao e kaekai ara tataro.” Titeboo am namakin ma aika taekinaki aikai ni kaineti ma te babaire ae rangi n tamaroa mairoun te Atua?
8 Tai kariaia baika aki kakawaki bwa a na tuka te taromauri n utu. A taekina ae kangai te tanga ni mare teuana: “Iai te bwai ae e kuri ni katokira mani karaoan ara ukeuke n reirei i nanon aua te wiki n nako ni katoaa tairikin te Kaabong, ma ti aki kariaia bwa e na tukira.” Ni koauana, tao n taai tabetai ko bae ni bita am babaire. Ma e ngae n anne, motinnanoia bwa ko na aki katibanakoa am tai n Taromauri n Utu n te tairiki, i nanon teuana te wiki!
9. E kanga Iehova ni kateimatoa Ieremia, ao tera reireiara man ana katoto?
9 E riki bwa te katoto ae tamaroa ibukira te burabeti are Ieremia. E kainnanoa kateimatoaan ana onimaki mairoun Iehova ao e rangi ni butimwaeia. E a karekea nanomwaakana n uarongorongo nakoia aomata aika rarawa, man te bwai ane katauraoaki anne. E taku: “Ana taeka Iehova . . . kanga te ai ae ura ae kainaki i nanon riu.” (Ieremia 20:8, 9, BG) E buokia naba bwa e na nanomwaaka n taai aika karawawata ake a a roko ni korakoraia ni kamaunaakin Ierutarem. Iai iroura ni boong aikai Ana Taeka te Atua ae tabwanin raoi. Ngkana ti taningamarau n ukeuke n reirei iai ao n iango n aron ana iango te Atua, ti na katotonga iai Ieremia n nanomwaaka ni karaoa ara mwakuri ni minita ma te kimwareirei, n teimatoa ni kakaonimaki i aani kataaki ao n teimatoa n itiaki n aroaroni maiura ao ara onimaki.—Iakobo 5:10.
Teimatoa n ‘Aki Baareka ao n Aki Kabuakakaaki’
10, 11. E aera bwa ti riai ni karaoa ara kabanea ni kona bwa ti aonga n teimatoa n ‘aki baareka ma n aki kabuakakaaki’ ao tera ae kainnanoaki mairoura ibukin anne?
10 Ngkai Kristian ngaira, ti ataia bwa ti a maeka ngkai n tain te toki. Ngaia are ti aki mimi n onraken te aonnaba aei ni baika e ribai Iehova n aron te mwangainrang, te wene ni bure ae kammaira ao te tiritiri. E kona ni kakimototoaki ni kangai ana waaki ni kamwane Tatan: ‘Ngkana a aki kona ni kakamaakaki ana toro te Atua, tao a kona ni kamwaraeaki.’ (Te Kaotioti 2:13, 14) Ngaia are ti riai ni mutiakina raoi ana kaumaki ae tatangira Betero aei: “Kekeiaki mwaaka bwa n tokina ao ane kam na noraki [iroun te Atua] bwa akea baarekami ao akea buakakami ao kam rau.”—2 Betero 3:14.
11 Titeboo te taeka ae “kekeiaki mwaaka” ma are n ana moani kaumaki Betero ae irekereke ma ‘kabanean te korakora.’ E mataata ngkanne bwa Iehova are ngaia ae e kaira Betero rinanon taamneina bwa e na taekin taeka aikai, e ataia ae ti riai ni kakorakoraira bwa ti aonga n teimatoa n ‘aki baareka ao n aki kabuakakaaki,’ ao n aki rotakibuaka ni kammairan ana waaki Tatan. E irekereke ara kakorakora ma kawakinan nanora bwa a na aki taonakinako n tangiran baika bure. (Wareka Taeka N Rabakau 4:23; Iakobo 1:14, 15.) E irekereke naba anne ma teimatoara n nene ni kaaitaraia aomata ake a mimi n aroaroni maiura ni Kristian ao ake a ‘taetae ni kabuakakaira.’—1 Betero 4:4.
12. Tera te karaunano ae ti noria n Ruka 11:13?
12 E rangi ni kangaanga iroura kakaraoan ae riai, kioina ngkai ti aki kororaoi. (I-Rom 7:21-25) Ti kona ni kantaningaia bwa ti na tokanikai tii ngkana ti onimakina Iehova are e tituaraoi n anganga taamneina ae raoiroi nakoia akana butiia ma nanoia ni koaua. (Ruka 11:13) Rinanon te taamnei anne, a rikirake iai iroura aroaro aika karekea akoara iroun te Atua ake a na buokira ni kaaitarai kaririakira ni maiura. Irarikin anne, e buokira naba ni kataakira aika tabe n rikirake ngkai e a uakaan ana bong Iehova.
A Bia Kakorakorako Kataakim Nako
13. Tera ae kona ni buokira n nanomwaaka ngkana ti aitara ma kataaki ni maiura?
13 Ti na boni kantaningai kataaki aika kakaokoro ngkai ti maiu n te waaki ae buakaka ae ngkai. Ma n oneani mwin ae e na bwara nanom, e aera bwa ko aki iangoi kataaki aikai bwa te anga teuana ibukini kamatoaan tangiran te Atua, ao kakorakoraan onimakinana ao ana Taeka iroum? E korea ae kangai te tia rimwini Kristo are Iakobo: “Tariu, kam na rangi ni kimwareirei ngkana kam kaaitara ma kataaki aika kakaokoro, ngkai kam ataia bwa e karekea te nanomwaaka ami onimaki ae kataaki n te aro aei.” (Iakobo 1:2-4) Uringnga naba ae ‘Iehova e ataa aroni kamaiuaia aomata ake a tangiria, man te kataaki.’—2 Betero 2:9.
14. Ko na kanga ni kakorakoraaki n ana katoto Ioteba?
14 Iaiangoa ana katoto natin Iakoba ae Ioteba, are kabooakinako bwa te toro irouia tarina. (Karikani Bwaai 37:23-28; 42:21) E uruaki ana onimaki Ioteba n te mwakuri ae rangi n ribuaka aei? E maraki nanona iroun te Atua ngke e kariaia rotakina ni baika bubuaka? E mataata kaekaan anne n Ana Taeka te Atua bwa e bon aki! Ma irarikin anne, tiaki anne tokini kataakin Ioteba. Imwina riki, e a uaraoaki bwa e kataia ni karaoa te mwakuri n tautau ao e kabureaki. Ma e bon teimatoa naba n nene tangiran te Atua irouna. (Karikani Bwaai 39:9-21) E kariaia bwa e na kakorakoraaki ni kataakina, ao ibukin anne e a rangi ni kakabwaiaaki iai.
15. Tera reireiara man ana katoto Naomi?
15 Ni koauana, a kona kataaki ni kananokawakira ke ni karawawataira naba. E bae naba n namakina aron anne Ioteba n tabetai. A bon namakina naba anne ana toro te Atua tabeman aika kakaonimaki. Iangoa Naomi are e mate buuna ao natina mwaane aika uoman. E taku: “Kam na tai aranai ba Nei Naomi, kam na aranai ba Nei Mara [ae ai aron ae “Nei Maai”], ba E arona te aro ae bati ni maai nako iu Teuare Moan te Mwaka.” (Ruta 1:20, 21, BG, ftn.) Bon te bae riiriki ao e kai ota te aba n ana namakin Naomi aei. N aron naba Ioteba, e aki bua onimakinan te Atua iroun neiei ao ana iraorao ma ngaia ke kakaonimakina. Ao ibukin anne, e a kakabwaiaaki iroun Iehova te aine ae rangi n tangiraki aei. (Ruta 4:13-17, 22) Irarikin aei, e nang katoki karawawata aika riki mairoun Tatan ao ana waaki ae buakaka, n rokon te aonnaba ae Bwaretaiti. “A na aki uringaki baike rimoa, ao a na aki manga rin n te nano.”—Itaia 65:17, BG.
16. Tera arora ae riai ni kaineti ma te tataro, ao bukin tera?
16 N aki ongeia bwa baikara kataaki aika ti aitara ma ngaai, ma e tauraoi te Atua ni kateimatoaira n ana tangira. (Wareka I-Rom 8:35-39.) E ngae ngke akea tokin Tatan ni kataia ni kabwarai nanora, ma e na boni konaaki ngkana ti teimatoa ni bwaina “te iangoraoi” ao ni ‘kamarurungira n tataro.’ (1 Betero 4:7) E taku Iesu: “Mangaia are teimatoa n tantani, ao katoatai ni kakorakora n tataro ni bubutii bwa kam aonga n tokanikai ni birinako mani baika nangi roko ni kabane, ma n tei i matan Natin te aomata.” (Ruka 21:36) Noria bwa Iesu e mwanewea te taeka ae te “kakorakora n tataro ni bubutii,” ae te aeka n tataro ae nako raoi man te nano. Ni kaumakara iroun Iesu bwa ti na kakorakoraira n tataro ni bubutii, e a katereterea iai bwa bon aio raoi te tai ae ti riai n teimatoa ni kakaonimaki ao n ingainga n tei i matana ma Tamana. Bon tii te koraki ake a karekea akoaia aika a na kantaningaa kamaiuakia n ana bong Iehova.
Teimatoa ni Katabetabeko ni Beku Ibukin Iehova
17. Ngkana e kangaanga te uarongorongo n am tabo, ko na kanga ni buokaki n aia katoto aika raoiroi burabeti ake n taai ake a karakinaki n te Baibara?
17 A kakorakoraaki ara onimaki n uataboani mwakuri aika irekereke ma ara taromauri. Ti a kauringaki iai ana taeka Betero aikai: “Iaiangoia bwa tera aromi ae riai. Kam riai n riki bwa aomata aika kam itiaki n aroaroni maiumi ao ni karaoi mwakuri ibukin tangiran te Atua”! (2 Betero 3:11) E rangi ni kakawaki riki i buakoni mwakuri akanne tataekinan te rongorongo ae raoiroi. (Mataio 24:14) Ni koauana, iai taabo tabeua ake e kangaanga iai te uarongorongo, tao ibukin te aki bwerengaki ke te kakaaitara ke tao tii ibukin ae a kaatuui riki aia iango aomata n tabeaiangaia ae katoabong ni maiuia. A boni kaaitara naba ana toro Iehova n taai ake a karakinaki n te Baibara ma aeka n aroaro akanne. Ma e ngae n anne, a bon aki bwara nanoia ma a teimatoa ‘n nanako’ n tibwaa te rongorongo mairoun te Atua. (Wareka 2 Rongorongo 36:15, 16, BG; Ieremia 7:24-26) Tera ae buokiia n nanomwaaka? A iaiangoa mwiokoaia n aron ana iango Iehova, ao tiaki n aron aia iango aomata. A iangoia naba bwa bon te mwioko ae rangi n rine uouotan aran te Atua.—Ieremia 15:16.
18. Tera aron rotakin karietataan aran te Atua n taai aika imwaira man tataekinan te Tautaeka n Uea?
18 Iai naba mwiokoara ae tataekinan te ara ae Iehova ma ana kantaninga. Iangoa aei: N tokin ara mwakuri n uarongorongo, a na aki kona n taekinna taan ribaa te Atua bwa e tuai man taekinaki nakoia taekan te Atua ma ana kantaninga, ngkana e a karokoa ana bong are kakannato. Ni koauana, n aroni Barao are rimoa, a na ataia ae bon Iehova ae kaaitaraia. (Te Otinako 8:1, 20; 14:25) N te tai naba anne, e nang karineia ana toro aika kakaonimaki Iehova ni kamatataan raoi bwa taan tei ibukina ni koaua ngaiia.—Wareka Etekiera 2:5; 33:33.
19. Ti na kanga ni kaotia bwa ti kani kamateraoa ana taotaonakinnano Iehova?
19 N raabanen ana kauoua n reta Betero ao e korea ae kangai nakoia raona n te onimaki: “Iangoa naba ana taotaonakinnano ara Uea bwa kamaiuami.” (2 Betero 3:15) Eng, ti bia teimatoa ni kamateraoa raoi ana taotaonakinnano Iehova. N te aro raa? N arora ni karikirakei aroaro aika e kukurei iai te Atua, n teimatoa ‘n aki bareka ao n aki kabuakakaaki,’ ni bwainakin te iango ae riai ni kaitaraakira ni kataaki, ao ni katabetabeira n ara mwakuri ibukin te Tautaeka n Uea. Ni karaoan aei, ti a karekei iai kakabwaia aika akea tokia aika irekereke ma “karawa ae boou ao te aonnaba ae boou.”—2 Betero 3:13.
Ko Uringnga?
• Ti na kanga ni karikirakei aroaro aika e kukurei iai te Atua?
• Ti na kanga n teimatoa n ‘aki bareka ao n aki kabuakakaaki’?
• Tera reireiara mairoun Ioteba ao Naomi?
• Bukin tera bwa bon te mwioko ae rine uataboan te mwakuri n uarongorongo?
[Taamnei n iteraniba 17]
Tera ae kona ni buokingkami buumwaane ni karikirakei aroaro aika e kukurei iai te Atua iroum ao n ami utu?
[Taamnei n iteraniba 18]
Tera reireiara man aron Ioteba ni kaaitarai kataaki?