Iai Te Nano Ni ‘Kakaantaninga’ Iroum?

“Ai bati ra te raoiroi ma tangiran te Atua ae e riai iroumi, ngkami aika kam kantaninga ma ni bareka rokon ana Bong te Atua!”​—2 BETERO 3:11, 12, BK.

1, 2. Ti na kanga ni kabwarabwaraa ‘te kakaantaninga’ ni kaineti ma ana bong Iehova?

IANGOIA bwa aongkoa iai te utu teuana ae a kariariaa rokoia aia iruwa bwa a na katairiki ma ngaiia, bwa e a tabe n uakaan te tai are a nang roko iai. E tabetabe neiere te buu te aine ni kababanei raoi bwaai ake a riai n tauraoi ibukin ana amwarake, ao teuare buuna ma natina a ibuobuoki ni baarongai raoi bwaai i nanon te auti. A bane n ingainga nanoia kaain te utu aei. Eng, a bane n ingainga nanoia ni kariariaa rokoia aia iruwa, ao ni kaantaningaa naba te uaia n itamwaomwao ao ni katairiki n amwarake aika kakangkang.

² Ngkai Kristian ngaira, iai naba te bwai ae ti kariariaa ae kakawaki riki. Tera te baenne? Ti bane ni kariariaa “ana Bong [Iehova].” Ti riai n teimatoa ni karokoa rokon te bong anne ni karaoa nanon are e taekinna ni kangai te burabeti are Mika: “N na kariaria Iehova; N na kaantaninga Atuani maiuu.” (Mika 7:7) E nanonaki n aei bwa ti na aki mwamwakuri? E aki. E a boni karuonako te mwakuri ae riai ni karaoaki.

3. Tera te aroaro ae riai ni bwainaki irouia Kristian ni kaineti ma are e taekinaki n te 2 Betero 3:11, 12, BK?

³ E buokira te abotoro Betero bwa e na reke iroura te aroaro ae riai i nanon ara tai ni kariaria ngke e kangai: “Ai bati ra te raoiroi ma tangiran te Atua ae e riai iroumi, ngkami aika kam kantaninga ma ni bareka rokon ana Bong te Atua!” (2 Betero 3:11, 12, BK) Taraia, bwa bon taeka ni mimi taeka aikai, ao e bon aki titiraki iai Betero. N ana reta aika uoua ake a kairaki koreaia iroun taamnein te Atua, ao e kabwarabwaraa iai aroaroia Kristian aika a na riai ni kaakaraoi. E kaungaia naba bwa a na teimatoa ni kabatiaa “te raoiroi ma tangiran te Atua.” E ngae ngke e a tia ni bwaka nako 30 te ririki imwin taekinan kanikinaean “tokin aonaba” iroun Iesu Kristo, ma a riai Kristian n teimatoa ni kamarurungia n taui baangia. (Mataio 24:3) A riai ni “bareka rokon ana Bong” Iehova.

4. Tera ae e reitaki ma ‘barekan rokon ana bong Iehova’?

⁴ Te koaua bwa ti aki kona ni ‘bareka’ ana bong Iehova kioina ngkai ti aki “ata rokon te bong arei ma te aua” are e na roko iai Iesu Kristo ni motiki taekaia ana kairiribai Tamana. (Mataio 24:36; 25:13) E kabwarabwaraa te boki teuana bwa te weabe ibukin te taeka ae “barekia” nanona, “ienikuria, ao e kaan nanona ma ‘ingaingannano, mwamwakuri, kaatuuan te iango i aon te bwai teuana.” Mangaia are e kaumakiia taan onimaki Betero bwa a na “bareka” rokon ana bong Iehova. A kona ni karaoa aei ngkana a teimatoa n ururingnga n aia iango. (2 Betero 3:12, BK) Kioina ngkai e a rangi n uakaan “ana bong Iehova are kakanato are kakamaku,” ti riai ngkanne ni bwaina naba te aeka n iango ane raoiroi anne.​​—Ioera 2:31.

Bwabwaina “te Raoiroi” Ngkai Ko Kakaantaninga

5. Ti na kanga ni kaotia bwa ti ‘bareka rokon ana Bong Iehova’?

⁵ Ngkana ti “bareka” kamaiuara n ana bong Iehova, ti na riai ni kaotiotia n arora aika “raoiroi ma tangiran te Atua.” Te taeka ae “raoiroi” ti kona ni kauringaki iai ana kaungaunga Betero aika kangai: “Ao ngkai natin te ongeaba ngkami, ao kam na tai katotong aroni kaibabaru ake a mena n ron nanomi ngkoa: ma kam na raoiroi n aroaromi ni maeka ni kabane, ni kakairi iroun Teuare raoiroi are weteingkami; ba e koreaki ae kangai, Kam na itiaki ba I itiaki Ngai.”​—1 Betero 1:14-​16.

6. Tera ae ti riai ni karaoia ngkana ti kan teimatoa n raoiroi?

⁶ Ngkana ti kan itiaki, ti riai n teimatoa ni kawakina itiakin rabwatara, ara iango, aroarora, ao itiakira n te aro n taamnei naba. Ti katauraoira raoi imwain “ana Bong [Iehova]” ni kawakina itiakira n tatabemanira nako, ngkai ti a riki bwa taani kaotiota te ara ae Iehova? E na boni kangaanga kawakinan itiakira ni boong aikai, kioina ngkai e a rikirake ni buakaka te aroaro i aon te aonnaba. (1 I-Korinto 7:31; 2 Timoteo 3:13) Iai te kaokoro ae ti namakinna n aroarora ma aroaro aika bwabwainaki ni kabuta te aonnaba? Ti riai n raraoma ngkana akea te kaokoro ae ti namakinna. E kona n riki aei e ngae ngke a raraoi riki aroaroni maiura nakoia kaain te aonnaba, ma ni koauana a rikirake ni bubuaka? Ngkana ngaia aei ae riki, ti riai ni waekoa ni karekea te kaantaninga ae raoiroi ibukin kaetan ara kairua bwa ti aonga ni kakukureia te Atua.

7, 8. (a) E na kanga ni bua mairoura taraakin ae e kakawaki riki bwa ti na teimatoa ni kaakaraoa ae “raoiroi”? (b) Baikara mwakuri aika kainnanoaki ibukin kaetana?

⁷ E taekinna bwa temanna te taokita bwa ibukina bwa e a kona ngkai ni matakuakinaki te bwaitingako n te Internet ao a aki kona n noriko aomata ngkana ko mataku iai, tabeman ake a aki kona ngkoa ni mataku iai, a noria ngkai, bwa a “rangi ni mwaiti aanga ike a a kona iai n rekereke ma te wene ni bure.” Ngkana ti ukoukori bwaai aika bubuaka n te Internet, ti a bon aki ira nanon ngkanne ana kaetieti te Baibara are ti na “tai ringa te bwai teuana ae kamwara.” (Itaia 52:11) Te koaua bwa ti “bareka rokon ana Bong [Iehova]”? Ke ti a manga kakiriariaa te bong anne n ara iango, ao n iangoia bwa e ngae ngkana ti kabaarekai ara iango ni bwain te maiu aei, ma e na bon reke naba ara tai ibukin kaitiakara? Ngkana arona bwa e a tia n reke ara kangaanga ae aekakin aikai, moan te kakawaki bwa ti na waekoa ni butiia Iehova bwa e na ‘katannakoi matara man noran te bwai ae akea manena, ao e na kamaiuira n ana aro’!​—Taian Areru 119:37.

⁸ A teimatoa n iri nanon ana kaetieti te Atua angiia Ana Tia Kakoaua Iehova aika ataei ao kaara ibukin te aroaro ni maiu ae riai, ao a kararoaa ana mwakuri te aonnaba aei ae kani karaoan ae kammaira. A teimatoa n “raoiroi” kioina ngkai a ataia bwa a kakawaki taai aikai ao ibukin naba ana kauring Betero are, “e na roko ana bong te Uea n ai aron te tia ira.” (2 Betero 3:10) E kakoauaki man aia mwakuri nako, bwa a boni “bareka rokon ana Bong [Iehova].”a

Mwamwakuri ni Kaotiota “Tangiran te Atua” Ngkai Ko Kakaantaninga

9. E na kaungaira tangiran te Atua nakon karaoan tera?

⁹ E rangi ni kakawaki “tangiran te Atua” iroura ngkana ti na teimatoa n ururinga ana bong Iehova. E irekereke “tangiran te Atua” iroura ma karineana ao aei ti a kairaki iai bwa ti na karaoi mwakuri aika a kakukurei i matana. E kakorakoraa tangiran te Atua te kakaonimaki nakon Iehova. E tangiriia “aomata ni kabaneia ba a na kamaiuaki, ma ni karekea atakin te koaua.” (1 Timoteo 2:4) E “aki tangira maten temanna, ma a na bane aomata n rairi nanoia.” (2 Betero 3:9) Mangaia are, e aki ngkanne kaungaki nanora n tangiran Atuara, bwa ti na kakorakoraira ni buokia aomata bwa a na ataa Iehova ao ni kakairi naba irouna?​—I-Ebeto 5:1.

10. Bukin tera ngkai ti riai n tararuaira raoi man “te mamanaki n te kaubwai”?

¹⁰ E na raonaki maiura n tangiran te Atua, ngkana ti ukoukora moa Uean te Atua. (Mataio 6:33) E reitaki ma aei iaiangoan raoi bwaikorakin te maiu aei n te aro ae riai. E kauring Iesu ni kangai: “Tarataraingkami, ao kawakiningkami man te mataai ni kanibwaibwai ni bane: ba tiaki maiun te aomata maitin ana bwai nako.” (Ruka 12:15) E ngae ngke e kangaanga namakinan ae ti a moanna ni kamatakiaki n tangiran te mwane, ma ti wanawana riki ngkana ti ataia ae e kona ni “karibwaa ana taeka” te Atua, te iango n “raraomaeakini bwain aon te aba, ma te mamanaki n te kaubwai.” (Mataio 13:22) E boni kona naba ni kangaanga karekean bwaai aika kainnanoaki ibukin te maiu. A mwaiti aomata n aaba tabeua aika a iangoia bwa ngkana a kani maiu raoi riki, a riai ni kitania moa kaain aia utu ao ni mwaing nakon te aba ae kaubwai riki i nanon ririki tabeua. A a tia naba n iangoa aei ana aomata te Atua. Ngkana a mwaing nakon te aba teuana, a kona ngkanne ni karekei bwaai ibukiia aia utu aika booureirei riki aika kakamanenaki ni boong aikai. Ma tera ngkanne ae kona n riki nakon marurungia n te itera n taamnei kaain aia utu ake a tiku imwiia, aika tangiraki irouia? E kona n reke irouia tangiran bwaai n taamnei ae te bwai ae a kainnanoia ibukin kamaiuaia n ana bong Iehova, ngkana e aki karaoa te kairiri ae riai atun aia utu ni mwengaia?

11. E kanga te aomata temanna are e kitana abana ibukin kakaaean ana mwakuri ni kaotia bwa e kakawaki riki tangiran te Atua nakon tangiran te kaubwai?

¹¹ E reiakina te koaua irouia Ana Tia Kakoaua Iehova man te Baibara i Tiaban, temanna te aomata ae kitana Biribin ibukin kakaaean ana mwakuri. Ngke e a reiakina te mwioko ibukin atun te utu man te Baibara teuaei, e a ataia ngkai bwa e boni kainnanoaki bwa e na buokia kaain ana utu bwa a aonga n riki bwa taan taromauria Iehova. (1 I-Korinto 11:3) E rangi ni matoatoa nanon neiere buuna are e tiku imwina n rawa nakon te koaua are e a tibwa reke iroun teuaei, ao e kukurei riki bwa e na kakaoki mwane teuaei nakoia, nakon are e na oki n reireinia kaain ana utu koaua aika a boto i aon te Baibara. Ma e ngae n anne ao e a oki rikaaki nakoni mwengana teuaei kioina ngkai e a nora waekoan birin te tai ao riain buokaia kaain ana utu aika tangiraki irouna i aoni bwaai n taamnei. E kakabwaiaki mwin ana mwakuri teuaei, kioina ngke e karaoa ana kairiri ma te taotaonaki n nano ao te tangira. Imwin tabeua te tai, a katiteuanaki kaain te utu aei n te taromauri ae koaua ao e a kabwanina ana tai neiere buuna n te mwakuri ni minita.

12. Bukin tera ngkai ti riai ni karimoaa tangiran bwaai n taamnei i nanoni maiura?

¹² E kona ni kabotauaki aroarora ma aroia aomata aika mena i nanon te auti ae urarake. E riai bwa ti na biriaitua moa i nanon te auti ae urarake aei ae i aoni kawaina n ingu nako, ibukini kamanoan nako ara bwai? N onean mwin anne, tiaki e kakawaki riki bwa ti na rawei maiura ao maiuiia kaain ara utu, ao tabeman riki ake a mena i nanon te auti? Eng, e a kaania tokina te waaki ae buakaka ae ngkai are a nang kabuanibwai iai maiuiia aomata aika mwaiti. Ngkai ti a ataa aei, ti bon riai ngkanne ni karimoaa tangiran bwaai n taamnei iroura, ao ni katabeira ma tataekinan rongorongon te Tautaeka n Uea ma te ingaingannano ao ni kaatuua riki iangoan kani kamaiuaia aomata.​—1 Timoteo 4:16.

Ti Riai n ‘Aki Kabarekaira’

13. Tera arora ae ti riai ni mena iai ngkana e a roko ana bong Iehova?

¹³ E taekina ae kangai Betero ngke e kamataata kakawakin te kariaria: “Ngkami aika kam tangiraki, ngkai kam kaantaningai baikai, ao kam na kakorakoraingkami ba kam aonga n noraki ba kam raoi, [iroun te Atua] ao akea baarekami, ao akea ae kam konaki ni kabuakakaki i matana iai.” (2 Betero 3:14) Irarikin ana kaungaunga Betero ibukin te maeka n itiaki ao tangiran te Atua, e katereterea naba kakawakin norakira iroun Iehova, bwa aomata ngaira aika kaitiakaki n raraan Iesu ae kakawaki. (Te Kaotioti 7:9, 14) E kainnanoaki te aomata bwa e na onimakina ana karea Iesu ao ni katabua maiuna ao ni bwabetitoaki naba ibukin te beku iroun Iehova.

14. Tera ae irekereke ma te ‘aki-baareka’?

¹⁴ E kaumakira Betero bwa ti na kabanei korakorara bwa ti aonga n noraki bwa akea ‘baarekara.’ Ti teimatoa ni kawakina itiakin aroarora ni Kristian ao aron taraakira bwa ti na aki kabarekaki ni bwain te aonnaba? Ngkana ti nora te memea i aon ara kunnikai, ao nanora te kani kanakoa naba n te tai anne. Ngkana e memea kunnikaira ae ti tatangiria, ti boni bae n iangoia bwa e na babane raoi te memea anne n nako. Ti namakina naba aekakin aei ngkana arona bwa e a memea kunnikaira ni Kristian ibukin aroarora aika kairua?

15. (a) Bukin tera ngke a tuangaki tibun Iteraera bwa a na karaoi eteteni maninganingani kunnikaiia? (b) Bukin tera bwa a kaokoro ma aomata ana toro Iehova ni boong aikai?

¹⁵ A tuangaki tibun Iteraera bwa a na karaoi “etete ni maninganingani kunnikaiia” ao a na “kanima te karai ae te buru ma eteteni maninganingaia nako.” Bukin tera? Ibukina bwa a aonga n ururinga ana tua Iehova, man tou mwiia, ao “n tabuaki ba ana aomata” te Atua. (Warekaia Iteraera 15:38-​40) Ngkai ana toro Iehova ngaira ni boong aikai, ti kaokoro ma te aonnaba ibukina bwa ti tou mwin ana tua te Atua ma ana reirei aika kakawaki. N aron anne, ti kateimatoaa itiakin aroarora aika riai, ti karinea te raraa ae tabu, ao ti kararoaira man taromaurian boua n aekaia nako. (Mwakuri 15:28, 29) A mwaiti aomata aika a karineira kioina ngkai ti kakorakoraira ni kawakina itiakira.​—Iakobo 1:27.

Ti Riai n ‘Aki-kabuakakaki’

16. Tera ae irekereke ma kawakinara bwa ti na ‘aki kabuakakaki’?

¹⁶ E taekinna naba Betero bwa ti riai n noraki bwa ‘akea kabuakakara.’ E na kanga n reke anne? E kona n taekaki nako te memea ma e aki kona n taekaki nako te kabuakaka. E kaotaki man te kabuakaka bwa iai te kairua ae noraki. E kaungaia Kristian ake i Biribi te abotoro Bauro ni kangai: “Karaoi bwaai ni kabane n aki bangantaeka ma n aki kauntaeka; ba kam na aki bubure ao kam na nimamanei, ao kam na riki ba natin te Atua aika akea ami buakaka i buakon te roro ae bwaoua ae buakaka, aika kam noraki i buakoia ba oota kaanga itoi i aon te aba.” (I-Biribi 2:14, 15) Ngkana ti toua mwin te taeka ni kaungaunga aei, ti na kararoaira iai ngkanne ma te ngurengure ao te kauntaeka ao ti na beku iroun te Atua ma te nano ae itiaki. Ti na kaumakaki bwa ti na karaoa aei ibukin tangiran Iehova ao kaain rarikira i nanon ara tai n tataekina “euangkerion uean te Atua.” (Mataio 22:35-​40; 24:14) I rarikin anne, ti riai ni waakina nako tataekinan te rongorongo ae raoiroi, e ngae ngke akea otaia angiia aomata bwa bukin tera ngkai ti kukurei ni kabanei ara tai ni kani buokia aomata bwa a na reiakina taekan te Atua ao ana Taeka ae te Baibara.

17. Tera ae riai n reke i nanora ngkana ti kan karekea tibwangara n te ekaretia ni Kristian?

¹⁷ Kioina ngkai ti tangiria bwa ti na ‘aki kabuakakaki,’ ti riai ngkanne n tuoi raoi nanora ni bwaai ni kabane aika ti tatangiri. Ti a tia ni kitana te aonnaba ma ana mwakuri are karaoan bwaai aika a tangiri n aron are a kakorakora ibukin karekean te kaubwai ke te mwaaka. Ngkana ti kakorakoraira n uaiakina tibwangara n te ekaretia ni Kristian, ti bia kateimatoaa itiakin nanora ao ti bia kaungaki n taai nako n aron noran ana tangira Iehova ibukia aomata. E kaunganano norakia mwaane aika Kristian bwa a “tangira te nakoa ae kairan te Ekaretia” ma te kukurei ao te nanorinano ni kan toro iroun Iehova ao raoia n onimaki. (1 Timoteo 3:1 BK; 2 I-Korinto 1:24) Te koaua bwa mwaane ake a a tia ni katauaki n riki bwa unimwaane a na “kaamarakea ana nanai te Atua . . . n te aro ae a tae nangimi nako iai; ao tai tarataraia ngkai kaanga taan tauu aroia ami ekaretia nako, ma kam na riki ba taani kakairi nakon te nanai.”​—1 Betero 5:1-4.

Ti Riai ni Bwaina te “Raoi”

18. Tera aroaroia Ana Tia Kakoaua Iehova ae rangi n ataaki?

¹⁸ E tuangira Betero n ana kabanea n taeka bwa ti riai ni kaotiota te “raoi.” Ngkana ti na maiuakina te raoi, ti riai ngkanne ni karekea te raoi ma Iehova ao kaain rarikira. E katereterea kakawakin ‘kabatian ara i-tangitangiri’ i marenara Betero, ao kateimatoan te rau ma raora ni Kristian. (1 Betero 2:17; 3:10, 11; 4:8; 2 Betero 1:5-7) Ti riai n itangitangiri i marenara bwa e aonga n teimatoa te rau iroura. (Ioane 13:34, 35; I-Ebeto 4:1, 2) E nonoraki te tangira ao te rau iroura n tain te bwabwaro ibukia aaba aika kakaokoro. Iai temanna te mwaane ae te tia bwaakaukau n te marae ni waanikiba ae maraki nanona ngke a ibetutu kaain Ana tia Kakoaua Iehova i matana ngke a butimwaiia taan roko ni kaea te bwabwaro are boo i Costa Rica n te ririki 1999, n te aro are e a aki kona n noraki irouia aomata n ikotaki ma ana bwaakaukau. Ma e ngae n anne ao n te kauoua ni bong, e a nora te tangira ao te rau are a kaotiotia taani Kakoaua aikai n aroia ni butimwaiia taan roko ma te kukurei ae korakora e ngae ngke a aki kinaia raoi. N te kabanea ni bong, e a ira buakon te butimwaai te tia bwaakaukau aei ao e a tuatua bwa e kan reirei n te Baibara.

19. Bukin tera bwa e rangi ni kakawaki ukoukoran te raoi ma raora n onimaki?

¹⁹ E reitaki nanora n tangira ukoukorakin te rau i marenara ma tarira ao mwanera n taamnei, ma ingaingan nanora ni kaantaningaa ana bong Iehova ao ana berita ibukin te aonnaba ae boou. (Taian Areru 37:11; 2 Betero 3:13) Iangoia bwa aongkoa iai raora n onimaki ae kangaanga karekean te rau i marenara ma ngaia. Ti kona n noria n ara iango bwa ti uaia ni maeka ma te rau ma ngaia n te baretaiti? Ngkana iai te bwai i marenara ma tarira, ti riai ni waekoa n ‘raoiakina tarira.’ (Mataio 5:23, 24) E kakawaki karaoan aei, ngkana ti tangira te raoi ma Iehova.​—Taian Areru 35:27; 1 Ioane 4:20.

20. E riai ni kaotiotaki te nano ni ‘kakaantaninga’ n te aro raa?

²⁰ Ti “kantaninga ma ni bareka rokon ana Bong te Atua”? E kaotaki ingaingan nanora ni kariariaa tokin te buakaka, ngkana ti kateimatoai itiakin aroarora n te aonnaba ae kammaira ae ngkai. I rarikin anne, nanora ae korakora ni kariariaa rokon ana bong Iehova ao te maiu i aan ana Tautaeka n Uea, e kaotiotaki raoi n arora n tangira te Atua. Ao nanora ni kariariaa te maiu ni kukurei n te aonnaba ae boou ma n rau, e kaotiotaki rinanon ukoukoran te rau ma raora n onimaki ngkai. Rinanon te kawai anne, ti kaotia iai ngkanne bwa iai iroura te nano ni kariaria ao ti “kaantaninga ma ni bareka rokon ana Bong” Iehova.

[Kabwarabwara ae nano]

Ko Uringnga?

• Tera nanon ae ti na teimatoa ni “kaantaninga ma ni bareka rokon ana Bong te Atua”?

• E na kanga aron kaotiotan te nano ni ‘kakaantaninga’ ni kaineti ma aroarora?

• Bukin tera bwa e rangi ni kakawaki ‘tangiran te Iehova’?

• Tera ae ti riai ni karaoia bwa ti aonga n noraki iroun Iehova bwa ti ‘raoi, akea baarekara ao akea kabuakakakira’?

[Taamnei n iteraniba 9]

E kaotiotataki te nano ni ‘kakaantaninga’ rinanon kaakaraoan ae raoiroi

[Taamnei n iteraniba 10]

Bon te aro ni kakamaiu tataekinan rongorongon te Tautaeka n Uea

[Taamnei n iteraniba 12]

Ti bia ukoukora te raoi ma aomata nako i nanon ara tai ni kariariaa rokon ana bong Iehova