A Aikoa Maaka te Toki
NGKE e a uakaan 1980, a a moanna ni koaua raoi Gary ao Karen bwa e a kaan tokin te aonnaba. Ai ngaia are a kitana te kaawa ae bubura nakon te tabo teuana i tinanikuna n tabo aika mwawaawa ao a iangoia bwa a na karekei bwaai ni kabane aika a kainnanoi i bon irouia n akea te boobwai ke tera riki, bwa a aonga ni maiu.
Ibukini karekean te rabakau ae a kainnanoia, a kabooi booki, a irii reirei ma reirei ni maroro ao a taetae n aron aia kona ma aomata aika bati. A karaoa aia onnaroka ibukin unikan aroka aika kakanaki ao 50 kaai aika uaa aika rinano. A kaikoi koraan aroka ao bwaai ni mwakuri. A reireinia aron te ununiki ao kateimatoaan raoiroin te amwarake. A reireinaki iroun raoraoia temanna aroni karaoan te iriko maiu ma kateimatoaan raoiroina. E reirei naba Karen aroni kinaakin aroka ma wakaani kaai aika kakanaki n te buakonikai, bwa a aonga ni kona n amwarake iai ngkana a bane ake a a tia ni katauraoi. E reiakina aroni karaoan te bentiin Gary man te aroka ae te corn, karaoan te titobu ae te biti ae aiana te kai ao katean te auti ae e aki kainnanoa te iti ke te ran man te tabo teuana.
E taku Karen: “Ibukini karawawata aika riiriki n te aonnaba, I a namakinna bwa e a kaan tokin aia waaki aomata.” E kabwarabwaraa ni kangai Gary: “N aroia rorobuaka tabeman, I kakorakoraai naba ni kataia ni katoka te nanonnaba, te Buaka i Vietnam ao te babakanikawai. Ma e waekoa ni bwara nanou bwa n taraana, a a bane aomata n toua te kawai are a kona iai ni kamaunaia i bon irouia.”
E taku Gary: “E a reke mwaawan au tai n te tairiki teuana, ao I a anaa te Baibara ni warekia mani Mataio nakon Te Kaotioti. I manga wareki riki mwakorona teutana imwin teutana i nanon aua te tairiki imwina. I taku nakoni Karen n te kanimaua n ingabong: ‘Ti a maeka ngkai i nanoni kabaneani boong. E nangi waekoa ni kaitiaka te aonnaba te Atua. Ti riai ni kakaaeia te koraki ake a na kamaiuaki.’” A nakon te Aro teuana ma teuana Gary ao Karen n ukeriia aomata ake a kani katauraoiia imwain te toki.
E aki maan, ao a a kawaraki n aia auti iroun temanna Ana Tia Kakoaua Iehova, ao e a moanaki te reirei n te Baibara. E ururing Karen ao e taku: “I rangi ni kimwareirei, ibukina bwa e a kabwarabwaraaki raoi nakoiu kanoan te Baibara. I a kamani kakaaea te koaua ibukin te toki, ao n tokina I a kunea. Bon iai te kantaninga ni koaua ibukin taai aika a na roko, ma ae tamaroa riki, I a moana au iraorao ma Tamau are i karawa, ae te tia Karikiriki, ao Atuan te iuniweeti.”
E taku Gary: “E a reke irou te bae rangi ni manena ni maiu. Bwa n te tai are I moana au reirei iai n te Baibara, ao I aki kona ni katokia. I wareki taetae ni burabeti n te Baibara, I neneri raoi koaua ibukini kakoroani bukia, ao I a kakoauaa raoi bwa e na waekoa ni karaoa ana mwakuri te Atua. I iango ni kangai, ‘A riai aomata ni katauraoiia, tiaki ibukin te kangaanga, ma ibukin te maiu ae tangiria te Atua ibukira.’” E a reke te iango ae koaua iroun Gary ao Karen ibukin taai aika a na roko. N oneani mwin raraomaeakinan tokin te aonnaba, a a kakoauaa raoi bwa e na kamaunai kangaanga aika karawawataa te botannaomata te Atua, ao e na manga kaoka te aonnaba nakon te bwaretaiti.
Tera ae a karaoia ngkai Gary ao Karen 25 tabun te ririki imwina? E taku Karen: “I teimatoa ni karikirakea tangiran Iehova ae te Atua ao onimakinana, ao I kataia ni buokiia tabemwaang bwa a na karaoa naba aei. Ti uaia n ibuobuoki i marenara ni kateimatoa ara utu bwa e na korakora ao ni katiteuanaaki n taromauria te Atua. Ti kataia ni bairei raoi ara tai, ao ti kakorakoraira ni kateimatoa maiura ae bebete, bwa ti aonga ni kaatuua iangoaia aomata nako ma baika a kainnanoi.”
E reitia ni kangai Gary: “I katoatai n tatataro ibukin Ana Tautaeka n Uea te Atua bwa e na roko ni kabebeteia aomata aika mirion ma mirion. N taai ake I uataboa iai rongorongon Ana Tautaeka n Uea te Atua ma tabeman riki, I tataro bwa N na kona n angan tao temanna te aomata te kantaninga man te Baibara. I nanon te maan ae raka i aon 25 te ririki, e a tia n akoai Iehova ni kaekai au tataro. I kakoauaa ma Karen bwa e na waekoa ni karokoa te bitaki ae korakora Iehova nakon te aonnaba, ma ti aikoa maaka te toki.”—Mataio 6:9, 10; 2 Betero 3:11, 12.
[Taamnei n iteraniba 9]
A kukurei ngkai Gary ao Karen ni buokiia aomata nako ni karekea te kantaninga man rongorongo aika n te Baibara