Bukini Manenani Maiura

N TE tai are I bungia iai natiu te mwaane ae Gary n te 1958, I a noria bwa iai ana kangaanga teuana. E ngae n anne, e otinako raoi taekan aorakina irouia taokita imwin tebwina namwakaina ao nimaua riki te ririki imwina a a kakoauaa raoi anne taokita ake a mwaatai n te aoraki aei mai Ranran. I rangi n nanokawaki bwa ruaiwa te ririki imwin Gary, I a bungia natiu te aine ae Louise are e reke naba irouna kanikinaean te aoraki anne aika a rangi ni kakaiaki riki nakon Gary.

A taetae ma te akoi taokita nakoiu ni kangai: “A kaai n reke irouia natim te aoraki ae kakaiaki ae te LMBB syndrome,a ae rangi ni kangaanga katokana.” N te tai anne, ao e aki rangi n ataaki te aoraki ae kakaiaki ae burenibwai rekena aei are e riki man te utu. Bwaai riki aika a kona n noraki bon rotakin te taratara are ko kona ni mataki iai, te marikarika, tabonibai ke taboniwae aika raka, iremwen rikiraken te ataei, te kangaanga ni kammwakurani bwain te rabwata aika kakaokoro n tii te taina, te tioka, te maraki ao tibun taian toma n ri ao te kirine ae bwaibwainnanti. Ngaia are bon te uota ae rangi ni kangaanga irou tararuaakia natiu. N te kakaae ae e a tibwa tia ni karaoaki, e katautauaki bwa e rotaki n te aoraki ae kakaiaki aei 1 mai buakoia aomata aika 125,000 i aoni Buritan, ma a bati ake a aki rangi ni kakaiaki irouia.

E RIKI IEHOVA BWA ‘NNERA NI KAMAIU AE RIETATA’

I maroro ma temanna Ana Tia Kakoaua Iehova tabeua te tai imwin au mare, ao I a ataia naba ngkekei bwa a reiakinai te koaua man te Baibara. Ma e bon aki kan ongora naba teutana teuare raou. I aki kona ni bobotaki ma te ekaretia teuana ibukina bwa ti aki toki ni mwainging nakon taabo tabeua ibukin ana mwakuri kaainnabau. Ma e ngae n anne, I teimatoa ni wareka te Baibara ao n tataro nakon Iehova. Ai karaunanora warekan ae bon “te ne ni kamaiu ae rietata Iehova, ae nen ane e kai nanona, Te ne ni kamaiu ae rietata ni bongin te rawawata,” ao e na bon “aki kitania akana [ukoukoria]”!​—Taian Areru 9:​9, 10, BG.

E aki rangi n raoiroi ana taratara Gary, ngaia are e a kanakoaki ngke onoua ana ririki nakon te reirei ae okoro n aonon Ranran mai maiaki are a maeka iai ataei n te kaawa n reirei. E aki toki n tarebooniai ni baike e tabeaianga iai ao I a kona ni buokia bwa e na atai ana boto n reirei te Baibara. Tabeua te ririki imwini bungian Louise, I taonaki n te aoraki ae kakaiaki ae te multiple sclerosis ao te fibromyalgia ae irekereke ma aorakini mwatireti. E okira te auti Gary man ana reirei ngke ai 16 ana ririki. E ngae n anne, e a rikirake ni buakaka ana taratara ao e a bon ataaki raoi bwa e mataki n 1975. N te 1977, e a nako mai rarikira kaainnabau.

Tabeua te tai imwin okin Gary, ti a kaai ni mwakuri ma kaain ara ekaretia aika tatangira, ao I a bwabetitoaki n 1974. I rangi ni kakaitau ngke e buokaki Gary iroun unimwaanen te ekaretia bwa e na kekeiaki ma te bitaki are riki nakon rabwatana ngke e roro n rikirake. A buokira tabeman taani Kakoaua ma ara mwakuri tabeua n te auti ao imwin tabeua te tai, a a kammwakuraki mani kabooaki niman mai buakoia irouia kaain te tabo ni mwakuri are e tabe ma te kamwengaraoi. Bon te kakabwaia karaoan aei nakoira!

E teimatoa Gary n rikirake i nanon te koaua ao e a bwabetitoaki n 1982. E korakora nanona ni kani moana ana auxiliary bwaiania. Ngaia are I a iangoia bwa N na raonna n te mwakuri anne ao ti waakinna i nanon ririki aika bati. E bon rangi ni kukurei Gary bwa imwina riki e a titirakinaki iroun ara mataniwi n te aono ae uarereke ni kangai: “E aera ko aki regular bwaiania? Bon anne te taeka ni kaungaunga are e kainnanoia Gary ao e bon rineaki nako iai n 1990.

Iai korokoro aika uoua ake e a tia n rinanoi Gary nakoni bebeena bwa teuana n 1999 ao te kauoua n 2008, ma e a tabe n ririkirake riki ni kakaiaki aorakin Louise. E boni bungiaki ni mataki ao ngke I noria bwa iai naba rakan taboniwaena, I a bon ataia naba bwa e reke irouna te aoraki ae kakaiaki ae te LMBB syndrome. E kaotaki imwini karaoan tutuo bwa e a rangi ni kangaanga aorakina bwa a rotaki naba bwain nanon rabwatana aika bati. E rinanoni korokoro aika kangaanga i nanon ririki aika bati n ikotaki naba korokoro aika nimaua ibukin ana kirine. E reke naba iroun Gary te aoraki ae te tioka.

Ibukina bwa e a ataia Louise bwa iai kangaanga ake e na kona ni kaaitarai ngkana arona bwa e kainnanoaki te korokoro, e a moantaai ni mamaroro ma taani korokoro, taani kamatu ao ai mataniwi n te oo n aoraki ni kabwarabwarai ana motinnano ni kaineti ma rawana ni karinraraa. Ibukin anne, e a rangi n nakoraoi ana reitaki ma taan tararuaia ni kabane ibukin ana kangaanga.

IAI MANENANI MAIURA

Ti karaoi mwakuri aika bati ni mwengara ibukin taromaurian Iehova. Imwaini kamanenaani bwaai ni kukune aika boou, I aki toki ni kabatiaa au tai ni wareware nakon Gary ao Louise. Ao ngkai man CDs, DVDs ao rawerawe man te atureti ae www.pr418.com, ti a bane ni kona n ongoraei kaongora ibukin te reirei man te Baibara ni katoa wiki n taai aika kakaokoro, ao ti a kona n anga ara taeka ni kaungaunga ni bobotaki ni Kristian.

N tabetai e kamatenikunai ana kaeka Gary, ao ngkana e na anga ana kabwarabwara n Te Kuura ni Kataneiai Ibukia Taan Uarongorongo, e a kona n anga ni bon oin ana taeka. E rineaki bwa te tabonibai n te ekaretia n 1995 ao e rangi n tabetabe n taai nako n te Tabo n Taromauri ni butimwaeia kaain te ekaretia ao n ibuobuoki ma te bwai ni katangitangi ibukin te anene.

A toa ma Gary n te mwakuri ni minita tabeman taani Kakoaua, ike a kokokia n angiin te tai n ana wheelchair ibukin aorakina ae te borii. E a tia ni buokaki iroun temanna te tia Kakoaua bwa e na waakina te reirei n te Baibara ma are e kan ongora. E a tia naba Gary ni kaungaa temanna te Kristian ae e a maan n aki irira te mwakuri ni minita i nanon 25 te ririki. A a iriri bobotaki ni Kristian naakai ngkai.

E reireinaki Louise ni korooti ngke ruaiwa ana ririki iroun tibuna te unnaine ao I a kaai n reireinna ma te tia tararuaia temanna n te waewae. Ibukina bwa e teimatoa tangiran te waewae n te bai irouna, e a korootinii burangketi aika kirimatamata ibukia kaain te ekaretia aika ataei n ikotaki naba ma kaara. E karaoi naba kaati aika kaunganano taekaia ake e kanimwi i aona taamnei aika uarereke. A rangi n tangiraki kaati aikai irouia naake a anganaki. E reireinna naba kabonganaan te taibi ngke ai tebwi tabun ana ririki. E a kona n reitaki ngkai n taai nako ma raoraona rinanon te internet mani kabonganaan te kaombiuta ae okoro ae kona n taetae. E bwabetitoaki Louise ngke 17 ana ririki. Ti kimwareirei n auxiliary bwaiania ni karaoani mwakuri n uarongorongo aika okoro. E kamatenikunai naba kiibu Louise n aron Gary ni kaota iai onimakinan ana berita nako te Atua ibukin te aonnaba are “a na kaureaki iai mataia akana mataki,” ao “ane maeka iai e na aki kangai, I aoraki.”​—Itaia 33:24; 35:​5, BG.

Ai kakaitaura ngaira ibukini koaua aika n ana Taeka Iehova ake e kairi koreaia! A kororake nanora n te kakaitau ibukin aia boutoka ae tatangira kaain ara ekaretia ma ngke arona bwa a aki, ti na bon aki kona ni karaoi mwakuri aika bati. Ao ae moamoa riki, e a rangi ni manena maiura man ana ibuobuoki Iehova.