Titiraki Mairouia Taani Wareware

E aera ngke e uni Mote irouia natin Aaron ake Ereata ma Itama imwini mateia tariia aika Nataba ao Abiu, ao e kanga ni kerikaaki unna?​—Nakoaia Ibonga 10:16-20.

Teutana te tai imwini katean te nakoa n ibonga ibukin te mwakuri n te umwanrianna ae tabu, ao Iehova e kamateia natin Aaron ake Nataba ao Abiu ibukin aia bure ni kareanakin te ai ae aki kariaiakaki i matan te Atua. (Nakoaia Ibonga 10:1, 2) Ao Mote e tuangia natin Aaron ake a maiu bwa a na aki tanginiweneia tariia ake a mate. E aki rangi ni maan imwin anne, e maraki nanoni Mote iroun Ereata ao Itama ibukina ngke a aki kana te koti ae te karea ni kabwarabure. (Nakoaia Ibonga 9:3) E aera ngke e karaoa anne Mote?

E kaotaki n tuua ake e anganaki Mote iroun Iehova bwa e riai te ibonga are angakarea ni kana te karea ni kabwarabure anne ni katawanangin te umwa ni botaki. Ni karaoan anne, e iangoaki iai bwa a kabwaraaki aia bure te koraki ake a angakarea. Ma ngkana e uotaki teutana te raraa ibukin te angakarea nakon te Tabo ae Tabu ae moan ruun te umwa ni botaki, e na aki kanaki iai te karea anne, ma e na kabuekaki.​—Nakoaia Ibonga 6:24-26, 30.

E iangoaki bwa imwini kangaanga ake a riki n te bong anne, ao e a noria Mote bwa e riai ni kakororaoaki nanon ana tua ni kabane Iehova. Ngke e a ataia Mote bwa e a tia ni kabuekaki te koti are te karea ni kabwarabure, ao e titirakina Ereata ma Itama ma te un bwa bukin tera ngkai a aki kana te karea anne n aron tuangakia, ibukina bwa e tuai uotaki te raraa anne nako matan Iehova n te Tabo are Tabu.​—Nakoaia Ibonga 10:17, 18.

E kaekaaki ana titiraki Mote iroun Aaron bwa a tia ni karaoa tabeia ibonga ake a maiu i aan ana kariaia. Ni kaineti ma tiringaia natina ake uoman, e bae n tia n iangoia Aaron bwa tao e riai ke e aki kanakin te karea ni kabwarabure n te bong anne iroun te ibonga temanna ae raoiroi mataniwin nanona. Tao e namakinna naba bwa e a tia n aki kukurei Iehova irouia ibukini kanakin te karea ni kabwarabure, e ngae ngke a aki bukinaki raoi n te kairua are a karaoia Nataba ma Abiu.​—Nakoaia Ibonga 10:19.

E a moamoa riki, tao e a mataata Aaron bwa a riai n taratara raoi kaain ana utu bwa a na karaoa ae kukurei iai te Atua n te bong are a moani karaoa iai nakoaia n ibonga, e ngae ngkana e rangi n uarereke ae a na karaoia iai. E ngae n anne a a tia Nataba ao Abiu ni kamatauningaa aran Iehova, ao e a urarake unna nakoia. Mangaia are tao e a iangoia Aaron bwa a riai n aki manga ira buakon te angakarea ae tabu kaain te utu n ibonga ake a kuneaki ni bure.

E taraa n ae e butimwaea ana kaeka tarina Mote bwa e taekinaki n tokin te kibu aei: “Ao ngke e ongo Mote, ao e kariaiaki te aro arei i matana.” (Nakoaia Ibonga 10:20, BG) E teretere raoi bwa e rau nanon Iehova n ana kaeka Aaron.