Titiraki Mairouia Taani Wareware
Ngkai e katabua taromauriani bouannanti Iehova, e aera e aki katuuaaea Aaron ngke e karaoa te kao te tei ae te koora?
E urua ana tua te Atua ni kaineti ma taromauriani bouannanti Aaron, ni karaoan te kao te tei ae te koora n aron ae oti n Te Otinako mwakoro 32. (Te Otinako 20:3-5) Ibukin anne, “E bati n un Iehova nakon Aaron ni kani kamatea: ao [Mote e] tataro naba i bukin Aaron n te bong arei.” (Te Tua-Kaua 9:19, 20, BG) E “rangi ni mwaaka” ana tataro ni kakorakora te aomata ae raoiroi ae Mote ibukin ana bure Aaron? (Iakobo 5:16) Eng, e taraa n ae e kaekaaki ana tataro Mote iroun Iehova ao e aki katuuaaea Aaron ibukin te tataro ni kakorakora anne, ma iai riki bukina aika uoua ae e aki katuuaaeaki iai.
Teuana bukina ae kona n iangoaki, e kaineti ma aroaron Aaron ni kaotiota te kakaonimaki i nanon te tai ae maan. Ngke e mwiokoaki Mote bwa e na nako n tei i matani Barao ao ni kaotinakoia I-Iteraera mai Aikubita, ao Iehova e rinea Aaron bwa e na raona Mote bwa te tia taetae ibukina. (Te Otinako 4:10-16) A ongeaba mwaane aika uoman aikai ao n tei i matan uean Aikubita n taai aika bati, ni kaaitarai karawawata ibukini matoatoan nanoni Barao. Ma e teimatoa ni kakaonimaki Aaron ni beku ibukin Iehova ni menana i Aikubita.—Te Otinako 4:21.
Iangoa naba bukini karaoan te kao te tei ae te koora iroun Aaron. E mena Mote i aon te Maunga are Tinai 40 te bong. Ngke “a noria aomata ba e iremwe Mote n ruo man te maunga,” a kairoroa Aaron bwa e na karaoa te bouannanti ibukia. E ira nanoia Aaron ao e karaoa te boua ae te kao te tei ae te koora. (Te Otinako 32:1-6, BG) Ma e teretere n ana mwakuri Aaron ake imwina bwa akea nanona ni boutokaa te mwakuri n taromauri bouannanti. E taraa ni konaaki ni kairoroana. N te katoto, ngke e a karokoa n tokina ae kamimi kaetan te kauntaeka ibukin taromauriani bouannanti Mote, ao a bane tibun Rewi ma Aaron n tei n ninikoria n ana itera Iehova. A kamateaki tenua tenga taan taromauri bouannanti ake ngaiia boton raoi te waaki aei.—Te Otinako 32:25-29.
E tuangia aomata Mote imwin anne ni kangai: “Kam bure n te bure ae ababaki.” (Te Otinako 32:30, BG) Ngaia are tiaki tii Aaron ae korakora bukinana n te mwakuri ae bure aei. E kakabwaiaaki ma aomata aika mwaiti man ana nanoanga ae korakora Iehova.
Imwin rikin te kangaanga ni kaineti ma te kao te tei ae te koora, e a tua Iehova bwa e na riki Aaron bwa te ibonga ae rietata. E taku Iehova nakoni Mote: “Ko na karini kunnikai ake a tabu i aon Aaron; ao kabiria, ma n tabuia, ba e aonga ni karaoa nakoana n ibonga nako Iu.” (Te Otinako 40:12, 13, BG) E teretere ngkanne bwa e kabwaraaki ana bure Aaron iroun Iehova ni kabwakana anne. E kakaonimaki Aaron ni boutokaa te taromauri ae koaua ma nanona, ao tiaki te tia taromauri bouannanti ae karitei ngaia.