KARAKI 40

E Orea Te Bwaa Mote

E A NAKO 10 te ririki, 20, 30, ni karokoa ai 39 te ririki! Ao tibun Iteraera ake a bon ririanna naba i nanon te rereua. Ma e tararuaia ana aomata Iehova i nanon ririki aikai. E kaakamwarakeia n te manna. E kairiia n te boua ae te nang n te ngaina ao te boua ae te ai n te tairiki. Ao ni kabane ririki aikai a bon aki roko n te mane aia kunnikai ma n tibu waeia.

Ai bon te moan namwakaina aei imwin koron aia ka-40 n ririki ni kitana Aikubita. A a manga kaembwa naba tibun Iteraera i Kateti. Aio aia tabo are a mena ngkoa iai ngke a kanakoaki tibwaai ake 12 bwa a na tuoa te aba are Kanaan, e a kaania 40 te ririki n nako. Mwanen Mote are Miriam e mate i Kateti. Ao e a manga riki naba te kangaanga n te tabo aei n aron are mai mwaina.

A aikoa kona ni kunea iai te ran aomata. Mangaia are a ngurengure nakon Mote ni kangai: ‘E raoiroi riki ngke ti mate. E aera ngkai ko kairira nako mai Aikubita nakon te tabo ae rangi ni buakaka aei ae akea te aroka ae e kona n riki iai? Akea te uita, akea biiku, akea kureebe, ao akea bamkuranete. Ao akea naba te ran ni mooi.’

Ngke a nako Mote ma Aaron nakon te umwa-n-rianna ae tabu bwa a na tataro iai, ao e taku Iehova nakon Mote: ‘Botiia aomata. Imwina ao ko a taetae naba nakon te bwaa arei i mataia ni kabane. E na reke mai iai te ran ae bon tau ibukia aomata ma aia man ni kabane.’

Mangaia are e botiia aomata Mote ao e taku: ‘Ongora ngkami aika kam aki onimakina te Atua! Ti na katiinakoa ngkai te ran ngai ma Aaron, man te bwaa aei ibukimi?’ Imwina ao e a orea te bwaa Mote uatai n ana kai, ao e a tiinako naba te ran ae korakora mai iai. E tau raoi te ran ibukia, bwa a bane ni mooi iai aomata ma aia man.

Ma e un Iehova iroun Mote ao Aaron. Ko ataa bukin unna? Ibukina bwa a taku Mote ma Aaron bwa a na katiinakoa te ran man te bwaa. Ma ni koauana bon Iehova ae karaoa anne. Ao ibukina bwa a aki taekina te koaua Mote ma Aaron ni kaineti ma aei, e taku Iehova bwa e na katuuaia. E taku, ‘Kam na aki kairiia au aomata nako Kanaan.’

N te tai naba arei ao a a kitana Kateti tibun Iteraera. Imwin riannaia teutana ao a a roko n te Maunga are Ora. E mate Aaron i taubukin te maunga aei. Ai bon 123 ana ririki n te tai are e mate iai. A rangi n nanokawaki tibun Iteraera, ai ngaia are a a tanginiwenea Aaron aomata ni kabane i nanon 30 te bong. E a riki natina are Ereata bwa aia ibonga ae rietata kaain te baronga are Iteraera.

Warekaia Iteraera 20:​1-13, 22-29; Te Tua-Kaua 29:​5, Neemia 9:21.