KARAKI 38
Tibwaai Aika 12
NORI ngkanne uaanikai aika a uouotii mwaane aikai. Nora te kurebe ae bubura amwina aei. A tangiraki uoman aomata ibukin amoakina. Ao nori biku ma bamkuranete. A reke iia uaanikai aika raraoi taraaia aikai? Man te aba are Kanaan. Uringnga are Kanaan bon te tabo are a maeka ngkoa iai Aberaam, Itaaka ao Iakoba. Ma e mwaing ngkoa Iakoba ma ana utu nako Aikubita ibukin te rongo. Ngkai tao ai 216 te ririki imwina, ao a a manga tabe ni kaokaki rikaaki tibun Iteraera iroun Mote nako Kanaan. A a roko n te tabo teuana n te rereua ae arana Kateti.
A maeka aomata aika buakaka n te aba ae Kanaan. Mangaia are e a kanakoia tibwaai Mote aika 12 ao e tuangia ni kangai: ‘Kakaaea bwa iraman aomata aika a maeka n te tabo anne, ao tera aron korakoraia. Noria naba bwa e raoiroi te tano iai ibukin te ununiki ke e aki. Ao uringnga n uoti rikaaki uaanikai tabeua.’
Ngke a a oki tibwaai nako Kateti, ao a tuanga Mote ni kangai: ‘E tamaroa te aba arei.’ Ao ibukin kakoauana a kaotii uaanikai tabeua ake a uoti. Ma a taku tibwaai ake 10 mai buakoia: ‘A totoa aomata ake a maeka iai ao a aintoa. Ti na kamateaki ngkana ti na kataia n taua te aba.’
A maaku tibun Iteraera ngke a ongo aei ao a taku: ‘E raoiroi riki ngke ti mate i Aikubita ke n te rereua. Ti na bae ni kamateaki n te buaka, ao a na riki buura ma natira bwa taenikai. Ti na rinea ngkai ara tia kairiri ae e na onea mwin Mote, ao ti na oki nako Aikubita!’
Ma a onimakina Iehova tibwaai ake uoman ao a kataia ni karaui nanoia aomata. Araia bon Iotua ao Kareba. A taku: ‘Tai maaku. Bon raora Iehova. E na bebete tauan te aba iroura.’ Ma a aki ongo aomata. Irarikin anne a kan tiringia naba Iotua ao Kareba.
E kakorakoraki unin Iehova iai, ao e a tuanga Mote ni kangai: ‘Akea aomata ake a raka aia ririki i aon 20 aika a na roko i Kanaan. A a tia n nori kakai ake I karaoi i Aikubita ao n te rereua, ma a bon teimatoa naba n aki onimakinai. Mangaia are a na tiotio nako n te rereua i nanon 40 te ririki ni karokoa maten te kabanea n aomata mai buakoia. Ma a na tii roko n te aba ae Kanaan Iotua ao Kareba.’
Warekaia Iteraera 13:1-33; 14:1-38.