KARAKI 44
E Karabaia Tibwaai Nei Raaba
A A REKE n te kangaanga mwaane aikai. A riai ni birinako bwa mwina a tiringaki. Bon aia tibwaai tibun Iteraera ao te aine ae e buokiia aei bon Raaba. E maeka Raaba n te auti ae mena i aon oon Ieriko. Ti na noria bwa bukin tera ngkai a a reke n te kangaanga mwaane aikai.
A nang tauraoi tibun Iteraera n rinanon te Karaanga are te Ioretan nakon te aba ae Kanaan. Ma imwain anne, e kanakoia ana tibwaai Iotua aika uoman, ao e tuangia ni kangai: ‘Naako nora te aba ao kaawana ae Ieriko.’
Ngke a a roko tibwaai aikai i Ieriko, ao a a nakon ana auti Raaba. Ma iai ae tua taekaia iroun uean Ieriko ni kangai: ‘A roko uoman tibun Iteraera ngke bong bwa a na tuoa te aba.’ Ngke e ongo aei te uea ao e kananako nakon Nei Raaba bwa a na tuangnga ae kangai: ‘Kaotinakoia mwaane akana n am auti!’ Ma e a tia ni karabaia tibwaai Raaba i aon taubukin ana auti, mangaia are e taku: ‘A roko mwaane n au auti ngke bong, ao I aki ataia bwa a nako mai ia. A a tia n nako ngkae e a moanna n roo, imwain kainakin mataroan te kaawa. Ngkana kam kawaekoai ngkami, ao a na bon reke iroumi!’ Mangaia are a a nako n rimwiaki.
Imwin nakoia ao e kawaekoaa Raaba n nako taubukin ana auti ma n taku nakoia tibwaai aikai; ‘I ataia bwa e na anganingkami Iehova te aba aei. Ti a tia n ongo bwa e kaoraa ngkoa Taari are Uraura ngke kam kitana Aikubita, ao ti ongo naba aromi n tiringia uea ake Taion ao Oka. I a tia n akoi ngkami, mangaia are berita nakoiu bwa kam na manga akoai. Kamaiua tamau ma tinau, ao mwaneu nako ma tariu nako.’
A berita tibwaai akekei bwa a na boni karaoa anne, ma e riai ni karaoa te bwai teuana Raaba. A taku tibwaai akekei nakoina; ‘Anaa te kabae aei ao katinetinea n am winto, ao botaki ma am koraki nako i nanon am auti. Ao ngkana ti a oki rikaaki ni buakana Ieriko, ao ti na nora te kabae aei n am winto, ao ti na aki tiringia kaaini batam.’ Ngke a a oki rikaaki tibwaai aikai nakon Iotua, ao a kaongoa baike a riki ni kabane.