E Karabaia Raaba Taani Karaba n Tutuo

Ngke a nakon te kaawa ae Ieriko taani karaba n tutuo aika tibun Iteraera, a tiku n ana auti te aine ae arana Raaba. E a ataa anne uean Ieriko ao e kanakoia tautia nakon ana auti Raaba. E karabaia neiei taani karaba n tutuo aika uoman i taubukin ana auti, ao e kanakoia tautia nakon te tabo teuana. E taku nakoia taani karaba n tutuo: ‘N na buokingkami ibukina bwa I ataia ae e tei Iehova n ami itera, ao kam na kataenikaia te aba aei. Taiaoka berita nakoiu bwa kam na kamaiuia au utu.’

A taku nakekei nakon Raaba: ‘Ti berita bwa akea kaaini batam ae e na ikoaki.’ Ao a taku naba: ‘Kabaea te kabae ae uraura aei n am winto, ao a na kamaiuaki am utu.’

E karuoia taani karaba n tutuo Raaba n te roobu man ana winto. A birinako nakoni maunga ni karabaia iai i nanon tenibong imwain okia nakon Iotua. Imwina ao a rinukan te Karaanga ae Ioretan tibun Iteraera ao a katauraoiia bwa a nang taua te aba. Ieriko bon te moani kaawa are a kataenikaia. E tuangia Iehova bwa a na mwananga ni katobibia te kaawa anne teuana te tai ni katoabong i nanon onoua te bong. N te kaitiua ni bong, a mwananga ni katobibia te kaawa itiua te tai, ao ibonga a katangi aia buu ao tautia a kabanei takaruaia. Akea bwa e a bwaka oon te kaawa! Ma e aki bwaka ana auti Raaba are mena i aon te oo. A kamaiuaki Raaba ma ana utu ibukina bwa e onimakina Iehova neiei.