E Onimakina Iehova Nei Raaba

Ti na iangoia bwa aongkoa ti mena n te kaawa ae Ieriko. E mena te kaawa aei n te aba ae Kanaan, ike a maeka iai aomata aika a aki onimakina Iehova. E maeka n te kaawa aei te aine ae arana Nei Raaba.

Ngke te teinnaine ae uarereke Nei Raaba, ao e ongoraei karakinan aroni Mote ni karaurea Taari ae Uraura ao ni kairiia tibun Iteraera ni kaotinakoia mai Aikubita. E ongoraea naba karakinan aron Iehova ni buokiia tibun Iteraera bwa a na tokanikai n te buaka ni kaaitaraia aia kairiribai. E a ongo ngkai ae a maeka tibun Iteraera n umwanrianna i rarikin Ieriko.

N te tairiki teuana, ao a mwananga nako Ieriko uoman tibun Iteraera bwa a na karaba n tuoa te kaawa. A nakon ana auti Nei Raaba. E butimwaeiia neiei bwa a na rin n ana auti ao n tiku iai. N te tairiki anne, ao e a ataia uean Ieriko bwa a mena taani karaba n tutuo n te kaawa ao a nakon ana auti Nei Raaba. Ngaia are e a kanakoia mwaane te uea bwa a na kakaaeia naakai. E karabaia taani karaba n tutuo aika uoman aikai Nei Raaba i taubukin ana auti ae borababaua, ao e tuangia ana aomata te uea ni kangai: ‘A roko ikai taani karaba n tutuo ma a a tia ni kitana te kaawa. Ngkana kam nako n rimwia ngkai ao a na reke iroumi!’ Ko ataia bwa bukin tera ngkai e kamanoia taani karaba n tutuo Nei Raaba?— Ibukina bwa e onimakina Iehova ao e ataia bwa e na bon angania tibun Iteraera te aba ae Kanaan.

Imwaini kitanan ana auti Nei Raaba irouia taani karaba n tutuo, ao a berita bwa e na kamaiuaki ma ana utu ngkana e a uruakaki Ieriko. Ko ataia bwa tera are a tuangnga bwa e na karaoia?— A taku: ‘Anaa te roobu ae uraura aei, ao katinetinea n am winto. Ngkana ko karaoa aei, ao a na bane ni kamaiuaki te koraki aika a mena n am auti.’ E karaoa raoi te baere e tuangaki Nei Raaba irouia taani karaba n tutuo. Ko ataia bwa tera ae riki imwina?—

Tabebong imwina, ao a mwaati tibun Iteraera ni katobibia te kaawa n aki kakarongoa. I nanon onobong, ao a mwaati ni katobibia te kaawa teuana te tai n tebongina. Ma n te kaitiua ni bong, ao a mwaati itiua te tai ni katobibia te kaawa. Imwina ao a bane n tatakarua. E a kabwakaaki oon te kaawa ni katobibia iroun Iehova. Ma e tiku n aki bwaka te auti are e tinetine ni wintona te roobu ae uraura! Ko kona n nora taamneina?— E a kamaiuaki Nei Raaba ma ana utu!

Tera reireiam mairoun Nei Raaba?— E onimakina Iehova Nei Raaba ibukina bwa e a tia n reiakini baika bati aika kamimi ibukina. Ko riai naba ngkoe n reiakini baika bati aika kamimi ibukin Iehova. Ko onimakina Iehova n aron Nei Raaba?— Ti ataia bwa ko onimakinna!