E Tangiria Rebeka ni Kakukureia Nanon Iehova

Rebeka bon te aine ae tangira Iehova. Arani buuna bon Itaaka ae e tangira naba Iehova. E kanga ni kaitiboo Rebeka ma Itaaka? E kanga Rebeka ni kaotia bwa e tangiria ni kakukureia nanon Iehova? Ti na reiakina ae bati riki ibukin neiei.

Ana karo Itaaka bon Aberaam ao Taara. A maeka n te aba ae Kanaan, ike a maeka iai aomata aika a aki taromauria Iehova. Ma e tangira natina Aberaam bwa e na mare ma te aine ae taromauria Iehova. Ngaia are e a kanakoa ana toro are Erietera bwa e na kakaaea buun Itaaka n te tabo ae arana Aran, ike a maeka iai tabeman ana koraki Aberaam.

E a mwananga Erietera ma tabeman ana toro Aberaam. Bon te mwananga ae rangi n abwabwaki mwanangaia. A kairiia tengauni kamero ake a uotii amwarake ao bwaintangira. E na kanga n ataia Erietera bwa antai te aine ae e na rineia ibukin Itaaka? Ngke e a roko Erietera ma tooro ake tabeman i Aran, a motirawa i etan te mwanibwa bwa e ataia ae a na waekoa n roko aomata n te tabo anne ni karekea iai te ran. E tataro nakon Iehova ao e taku, ‘Ngkana I tuanga te teinnaine temanna bwa e na karekea te ran ibukiu, ao ngkana e karekea ibukiu ao ibukia naba au kamero, ao N na ataia iai bwa aio te aine ae ko rineia.’

Imwina ao e a roko te teinnaine ae Rebeka n te mwanibwa. E taekinaki n te Baibara bwa e rangi ni botonnaine. Ngke e butiia neiei Erietera bwa e na karekea nimana te ran, ao e kaeka ni kangai neiei: ‘Ngaia. N na karekea te ran ibukim ao teutana ibukia am kamero.’ Iangoia! A kainnanoa te ran ae bati kamero aika a bora n taka, ngaia are e riai Rebeka n okioki nakon te mwanibwa n itia te ran. Ko nora aron ana mwakuri korakora ae oti n te taamnei aei?— E rangi ni mimi Erietera n aron Iehova ni kaekaa ana tataro.

E anganaki bwaintangira Rebeka aika rangi ni bati ma n tamaroa iroun Erietera. E kairiia Erietera ma tooro ake tabeman neiei nakon aia auti ana utu. E kabwarabwaraa Erietera bukini kanakoana nakon te tabo anne iroun Aberaam, ao aron Iehova ni kaekaa ana tataro. A kukurei ana utu Rebeka ao a kariaia bwa e na mare ma Itaaka.

Ma n am iango, e kukurei Rebeka ni mare ma Itaaka?— E ataia Rebeka bwa e kanakoaki Erietera iroun Iehova nakon te tabo anne. Mangaia are ngke e a titirakinaki Rebeka irouia ana utu bwa e kukurei n nako Kanaan ao ni mare ma Itaaka, ao e kaeka ni kangai, ‘Eng I kukurei n nako.’ N te tai naba anne, ao Rebeka e a iranaako naba Erietera. Ngke a roko i Kanaan ao e a mare ma Itaaka.

E kakabwaiaaki Rebeka iroun Iehova ibukina bwa e karaoa ae e tangiria Iehova bwa e na karaoia. Imwin ririki aika bati e a bungiaki Iesu man ana utu neiei! Ngkana ko katotonga Rebeka ao ni kakukureia nanon Iehova, e na boni kakabwaiako naba.