KARAKI 17

Bwebwee Aika Kaokoro

A RANGI ni kaokoro ataeinimwaane aika uoman aikai kee? Ko atai araia? Te tia kaeman bon Etau, ao ane kawakinia tiibu bon Iakoba.

Etau ao Iakoba bon natin Itaaka ma Rebeka aika bwebwee. E rangi n taatangira Etau tamaia ae Itaaka ibukina bwa e bwaati ni kaeman, ao e uouota konana nakon te mwenga bwa te amwarake. Ma moan te tatangiraki Iakoba iroun Rebeka, ibukina bwa e nimamannei ao e rangi n rau.

E boni maiu naba Aberaam are tibuia, ao ti kona n iangoa aron Iakoba ni kan ongongora irouna karakinan Iehova. E mate Aberaam ngke e a koro 175 ana ririki, ngke ai 15 aia ririki bwebwee aikai.

Ngke e a koro 40 ana ririki Etau, ao e a mare ma ainen Kanaan aika uoman. A rangi n nanokawaki Itaaka ao Rebeka, ibukina bwa aine aikai a aki taromauria Iehova.

N te taina ao e a rangi n un Etau n te bwai teuana iroun tarina are Iakoba. Te tai aei are e nang kakabwaiaa iai natina are te karimoa Itaaka. Ibukina bwa e ikawai riki Etau nakon Iakoba, e kariaa Etau bwa e na kakabwaiaki. Ma e a tia Etau n anga rimoa riaina ni kakabwaiaki nakon Iakoba. Ngke a moani bungiaki naba, ao e taku te Atua bwa Iakoba ae e na karekea te kakabwaiaki. Ao aio te bwai ae riki. E anga te kakabwaia Itaaka nakon natina are Iakoba.

Imwina riki, ngke e a ataa aei Etau, ao e a un iroun Iakoba. E rangi n un n te aro are e a taekinna bwa e na tiringa Iakoba. Ngke e ongo aei Rebeka, ao e a rangi n raraoma. Mangaia are e a tuanga buuna ae Itaaka ni kangai: ‘E na rangi n aki raoiroi ngkana e a manga mare naba Iakoba ma ainen Kanaan.’

Anne are e a wetea iai natina Itaaka ae Iakoba ma n tuangnga ni kangai: ‘Tai mare ma ainen Kanaan. Ma naako nakon ana auti tibum are Betuera i Aran. Ko kona ni mare iai ma natin Raban temanna.’

E ongo ana taeka tamana Iakoba, ngaia are e a moana naba mwanangana ae abwabwaki n te tai arei, nakoia ana koraki ake a maeka i Aran.

Karikani Bwaai 25:​5-11, 20-34; 26:​34, 35; 27:​1-46; 28:​1-5; Ebera 12:​16, 17, BK.