KARAKI 46
Oon Ieriko
E KANGA ni bwaka oon Ieriko? E taraa n ae e boomiaki te oo aei. Ma akea taiani boom n taai akekei; ao akea naba taiani katii. Ma bon ana kakai naba teuana Iehova! Ti na noria bwa e kanga n riki aei.
E kangai ana taeka Iehova nakon Iotua: ‘Ko na mwaati ma kaain am taanga ni buaka ni katomimia te kaawa. Katomimia te taina ni katoa bong i nanon onobong. Uota naba te ati ni berita n ami tai ni mwaati. A riai n rimoan te ati itiman ibonga ao ni katanga aia bu.
N te kaitibong ao kam riai ni mwaati ni katomimia te kaawa itua te tai. Imwina ao katanga ami bu ni kamaanna, ao tuangia bwa a na bane n takarua n aron te takarua n tain te buaka. Ao a na mrara oon te kaawa!’
A karaoa are a tuangaki Iotua ma aomata iroun Iehova. Ngke a mwaati, ao a bane n aki kakarongoa. Akea naba temanna ae taetae. Te bwai ae e tii ongo te aba, bon tangin te bu ao mwakaikain waeia. A rangi ni maaku ana kairiribai te Atua ake i Ieriko.Ko nora te kabae ae uraura ane e tinetine n te winto anne? Antai winton ana auti? Eng, e a tia Nei Raaba ni karaoa tuangana irouia tibwaai ake uoman. A bane ni mena ana utu i nanon ana auti ni mamataku ma neiei.
Ngke a a tia taani buaka ni mwaati ni katomimia te kaawa itua te tai n te kaitibong, ao a a katangi bu ao n tatakarua, ao e a tii ingu nako naba te oo. Imwina e taku Iotua: ‘Tiringia kaaina ni kabane ao kabueka te kaawa. Kabueki naba bwaai ni kabane. Ma kawakina tii te tirewa, te koora, te burati ao te biti, ao karinna n te nne ni mwane n ana umwa-n-rianna Iehova.’
E taku Iotua nakoia tibwaai ake uoman: ‘Naako nakon ana auti Nei Raaba, ao kaotinakoa ma kaain ana utu.’ A kamaiuaki Nei Raaba ma kaain ana utu, n aron are a beritanna nakoina tibwaai akekei.