KARAKI 43

E A Moana Te Kairiri Iotua

E KAN nako naba Kanaan Mote i rarikia tibun Iteraera. Mangaia are e tuatua ni kangai: ‘Iehova, kariaia bwa N na rinanon te Karaanga are te Ioretan, n nora te aba ae raoiroi.’ Ma e taku Iehova: ‘E a tau! Tai manga taekina riki anne!’ Ko ataia bwa bukin tera ngkai e taekina anne Iehova?

E kaineti aei ma te bwai are e riki ngkoa ngke e orea te bwaa Mote. Uringnga are a aki karinea Iehova iai ngaia ma Aaron. A aki tuangia aomata are bon Iehova ae e karekea te ran man te bwaa. Ibukin aei ao e tua Iehova bwa a na aki roko i Kanaan.

Mangaia are tabeua te namwakaina imwin maten Aaron, ao e a tuangaki Mote iroun Iehova ni kangai: ‘Kaira Iotua ao kateia i matan Ereata are te ibonga ao i mataia aomata. Ao ikanne are ko a tuangia naba aomata ni kabane bwa e nang riki Iotua bwa te tia kairiri ae boou.’ E karaoa are e tuangaki Mote iroun Iehova, n aron ae ko noria n te taamnei.

Imwina e tuangaki Iotua iroun Iehova ni kangai: ‘Kakorakorako ao tai maaku. Ko nang kairiia ngkai tibun Iteraera nakon te aba ae Kanaan, are I a tia ni beritanna nakoia, ao N na memena iroum.’

Imwina ao e a tuangaki Mote iroun Iehova bwa e na tamwarakea taubukin te Maunga ae arana Nebo n te aba ae Moaba. I eta n te tabo arei ao e kona iai Mote n nora nanon te Karaanga are te Ioretan ma te aba are tamaroa are Kanaan. E taku Iehova: ‘Aio te aba are I berita bwa N na angania natin Aberaam, Itaaka ao Iakoba. I kariaia bwa ko na noria ma ko na aki roko iai.’

E mate Mote i aon taubukin te Maunga are Nebo ngke ai 120 ana ririki. E bon teimatoa naba korakorana, ao e raoiroi naba ana taratara. A rangi n nanokawaki aomata ao a tang ibukin maten Mote. Ma a kukurei bwa e a reke Iotua bwa aia tia kairiri ae boou.

Warekaia Iteraera 27:​12-23; Te Tua-Kaua 3:​23-29; 31:​1-8, 14-23; 32:​45-52; 34:​1-12.