KARAKI 39

E A Uee Okon Aaron

NORI uee ma uaan te amon aika tawaa aika a riki i aon te oko aei ke te kai. Bon okon Aaron. Uee ma uaanikai aika tawaa aikai a riki i aon okon Aaron i nanon tii te tairikina! Ti na noria bwa bukin tera.

A a tia ni mwananga n te rereua tibun Iteraera i nanon te tai ae maan teutana ngkai. Ma iai tabeman aomata ake a aki kukurei bwa e na riki Mote bwa aia tia kairiri, ke e na riki Aaron bwa aia ibonga ae rietata. Tabeman aomata aika a iango n aron aei boni Kora, Ratan, ao Abiram, n ikotaki ma 250 riki mataniwin te botaki. A bane n roko ni kawara Mote ao a kangai nakoina: ‘E aera ngkai ko karietatako i aora?’

E taetae Mote nakon Kora ao naake a iranna ni kangai: ‘Uoti ami boora ni kabuoki ribano n te moaningabong ao karini ribano i nanoia, ao nakomai nakon ana umwa-n-rianna ae tabu Iehova. Ti na noria bwa antai ae e rineia Iehova.’

N te bong are imwina ao a a roko n te umwa-n-rianna ae tabu Kora ma raona ake 250. A bati naba ake a roko bwa a boutokaia mwaane aikai. E rangi n un Iehova, ao e taku Mote: ‘Kararoaa aia umwa-n-rianna mwaane aika buakaka aikai. Tai ringi naba aia bwai.’ A ongo aomata ao a kararoaia man aia umwa-n-rianna Kora, Ratan ao Abiram.

Imwina e taku Mote: ‘Ngkai kam nang ataia bwa antai ae e rineia Iehova. E na kaurea wina aontano n ongia mwaane aika buakaka aikai.’

Ngke e bon toki naba ngkekei ana taetae Mote ao e a bon uki naba aontano. A bwaka nako nanona Ratan ao Abiram ao raoia, n ikotaki ma ana umwa-n-rianna Kora ao ana bwai nako, ao e a manga in aontano. Ngke a ongo aomata tangia te koraki ake a mwaroonako i aantare, ao a tatakarua ni kangai: ‘Biiri, bwa mwina ti na manga mwaroonako naba!’

A boni mena naba n te umwa-n-rianna ae tabu Kora ma raona ake 250. Mangaia are e kanakoa te ai Iehova, ao a bane ni bue iai. Imwina e tuangaki natin Aaron are Ereata iroun Iehova bwa e na anai aia boora ni kabuoki ribano mwaane ake a mate, ao n ororei ni karaoa iai rabunan te baonikarea ae mmani. E na riki rabunan te baonikarea aei bwa te kanuringa nakoia tibun Iteraera bwa akea riki ae e riai ni karaoa te mwakuri n ibonga ibukin Iehova bwa tii Aaron ma natina.

Ma e kani katereterea raoi Iehova bwa e bon rinea Aaron ma natina bwa a na riki bwa ibonga. Mangaia are e tuanga Mote ni kangai: ‘Tuangia mataniwin nako aia baronga tibun Iteraera bwa a na uotii okoia. Ibukin ngkanne te baronga are Rewi, e riai Aaron n tei ibukia n uota okona. Imwina katikui oko aikai n te umwa-n-rianna ae tabu i matan te ati ni berita. Okon te aomata are I rineia bwa te ibonga a na bon riki mai iai uee.’

Ngke e a noria Mote n te ingabong are imwina, ao e a uee okon Aaron n ikotaki ma uaan te amon aika tawaa aika a riki i aona! Mangaia are ko a ataa ngkai bukin rikin uee i aon okon Aaron?

Warekaia Iteraera 16:​1-49; 17:​1-11; 26:10.