A Urua Aia Berita

E taku Iehova nakoni Mote: ‘Ararake nakon te maunga. N na korei au tua i aoni baaba aika atibu ao N na anganiko.’ E ararakea te maunga Mote ao e tiku iai i nanon 40 te ngaina ao te bong. Ngke e mena ikanne, ao Iehova e korei Tuua Ake Tebwina i aoni baaba aika atibu aika uoua, ao e angani Mote.

Tabeua te tai imwina, a a iangoia tibun Iteraera bwa e a kitania Mote. A taku nakon Aaron: ‘Ti tangira temanna ae e na kairira. Karaoa atuara!’ E taku Aaron: ‘Anganai ami koora.’ E kaburoa te koora bwa e aonga n ran ao e a karaoa te bouannanti ae te kao te teei. Ao a taku aomata: ‘Bon Atuara te kao te teei aei are kairira ni kaotinakoira mai Aikubita!’ Ao a a taromauria te kao ae te koora aei ao a booa aia botaki ni kukurei. E bure anne? Eng, ibukina bwa a a tia ni berita bwa a na taromauria Iehova n tii ngaia. Ma a a urua ngkai aia berita.

E nora te bwai ae riki Iehova ao e taku nakoni Mote: ‘Naako ruuo nakoia aomata. A aikoa ongeaba irou ao a a taromauria te atua ae kewe.’ E ruo man te maunga Mote ma uotana baaba ake atibu ake uoua.

Ngke e a uakaan Mote ma te kaembwa ao e a ongongo aia anene aomata. Ao e noriia ni mwamwaie ao ni bobobaraaki nakon te kao te teei. E rangi n un Mote. E bouai i aontano baaba ake uoua ao a maeinikun. E waekoa n urua te bouannanti arei. Ao e taku nakon Aaron: ‘A kangaa n anaa nanom aomata aikai bwa ko na karaoa te bwai ae rangi ni buakaka aei?’ E taku Aaron: ‘Tai un. Ko bon atai aroia aomata aikai. A tangira atuaia ngaia are I karenakoi aia koora n te ai ao e a otinako naba te kao te teei aei!’ E bon aki riai ni karaoa anne Aaron. E a manga ararakea te maunga Mote ao e bubutiia Iehova bwa e na kabwarai aia bure.

E kabwarai aia bure Iehova naake a kukurei n ongeaba irouna. Ko nora kakawakin ae a riai n ongeaba tibun Iteraera n ana kairiri Mote?