KARAKI 36
Te Kao Te Tei Ae Te Koora
AKEA OO! Tera ae a a tabe ni karaoia aomata aikai? A tataro nakon te kao te tei! Bwa e aera ngkai a karaoa aei?
Ngke e a rangi ni maan n tiku n te maunga Mote, ao a a taku naba aomata: ‘Ti a aki ataa te bwai ae riki nakon Mote. Mangaia are ti na karaoa atuara bwa e na kairira rake man te aba aei.’
E kariaia tarin Mote are Aaron ni kangai, ‘Ngaia ngaia. Buuti taabiami aika koora, ao uoti mai nakoiu.’ Ngke a karaoa anne aomata, ao e kaburoi baikai Aaron ni karaoi bwa a na ran, ao e a karaoa naba te kao te tei ae te kora iai. Ao a taku aomata: ‘Aio atuara, are e kaotinakoira mai Aikubita!’ Imwina ao a a karaoa te bukamaru ae buburakaei tibun Iteraera, ao a taromauria te kao te tei ae te koora.
Ngke e nora arei Iehova ao e rangi n un. Ngaia are e a kangai nakon Mote: ‘Kawaekoako ruo. A a karaoa te mwakuri ae rangi ni buakaka aomata. A a mwaninga taekan au tua ao a a bobaraki nakon te kao te tei ae te koora.’
E kawaekoaa Mote n ruo man te maunga. Ma ngke e a uakaan, ao aio te bwai ae e noria. A anene aomata ao a mwamwaie ni katomimia te kao te tei ae te koora! E rangi n un Mote n te aro are e a tii karenakoi naba atibu ake uoua ake baaba ake iai tuua iai, ao a a marikiriki. Imwina e anaa te kao te tei ae te koora, ao e kabuekia bwa e aonga n ran. Imwina ao e a ikikia ni karikia ni bwauta.
A a tia aomata ni karaoa te mwakuri ae rangi ni buakaka. Ngaia are e a tuangia tabeman mwaane Mote bwa a na anai aia kabaang man taku: ‘A riai ni mate te koraki ake a taromauria te kao te tei ae te koora.’ Mangaia are a a kamateaki 3,000 aomata! Tiaki e kaotaki n aei bwa ti riai n taratara raoi bwa ti na taromauria Iehova n tii ngaia, ao tiaki atua ni kewe?