KARAKI 35

E A Kateia Ana Tua Iehova

TAO uoua namwakaina imwin kitanan Aikubita, ao a a roko ngkai tibun Iteraera n te Maunga are Tinai are arana teuana Oreba. Aio bon te tabo are e taetae ngkoa iai Iehova nakon Mote man te aroka are e urarake. A tiku ni kaembwa ikai aomata i nanon tabeua te tai.

A tataninga aomata i nano, ngke e tamwarakea te maunga Mote. E tuangaki Mote iroun Iehova i aon taubukin te maunga bwa E tangiriia tibun Iteraera bwa a na ongeaba Irouna, ao n riki bwa ana aomata aika rianako okoroia. Ngke e a ruo Mote ao e a tuangia tibun Iteraera ana taeka Iehova. A kaeka aomata n taku bwa a na ongeaba iroun Iehova ibukina bwa a kan riki bwa ana aomata.

E a karaoa ngkai te bwai ae kamimi Iehova. E kabubua taubukin te maunga, ao e karebwea te baa ae korakora. E taetae naba nakoia aomata ni kangai: ‘Boni ngai Iehova ae Atuami are e kairingkami mai Aikubita.’ Imwina ao e a tua naba ni kangai: ‘Kam na aki taromauria te atua temanna bwa tii ngai.’

E angania tibun Iteraera te Atua ruaiwa riki te tua. A rangi ni maaku aomata n te tai aei, ngaia are a a tuanga Mote ni kangai: ‘Ko na taetae ngkoe ma ngaira, bwa ti kawa ni mate ngkana e taetae te Atua nakoira.’

Imwina ao e tuangaki Mote iroun Iehova ni kangai: ‘Tamwarake nakoiu nako aon te maunga. N na anganiko iai atibu aika baaba aika uoua ake I a tia ni korei tuua iai ae I tangiriia aomata bwa a na toui mwia.’ Mangaia are e a manga tamwarake naba Mote nako taubukin te maunga. E tiku iai 40 te bong ao te ngaina.

A rangi ni bati ana tua nako te Atua ibukia ana aomata. E bane ni korei tuua aikai Mote. E anganaki naba Mote atibu ake baaba ake uoua. E a tia ni korei tuua aika 10 te Atua i aon baaba aikai, ake e taekin ngkoa nakoia ana aomata ni kabane. A aranaki bwa Tuua Ake Tebwina.

Tuua Ake Tebwina bon tuua aika kakawaki. Ma a bati naba tuua aika a kakawaki ake e anga te Atua nakoia tibun Iteraera. E kangai teuana mai buakon tuua aikai: ‘Ko na tangira Iehova ae Atuam ma nanom ni kabanea, am iango ni kabanea, rabwatam ni kabanea ao korakoram ni kabanea.’ Ao e kangai are teuana: ‘Ko na tangira raom n ai aron tangiram i bon iroum.’ E taekinna rimwi riki Natin te Atua ae Iesu Kristo, bwa tuua aika uoua aikai, bon taiani kabanea ni kakawaki ake e anga Iehova nakoia tibun Iteraera. Ti na kabatiaa reiakinan taekan Natin te Atua aei ma ana reirei imwina riki.

Te Otinako 19:​1-25; 20:​1-21; 24:​12-18; 31:18; Te Tua-Kaua 6:​4-6; Nakoaia Ibonga 19:18; Mataio 22:​36-40.