KARAKI 34

Te Aeka N Amwarake Ae Boou

KO ATAIA bwa tera ae a rikorikoia aomata i aontano? Kaanga ai aron mwakorokoro n aiti. E mainaina ao e mmani ma ni kai uruaki. Ma bon tiaki te aiti, bwa bon te amwarake.

E a tibwa bane ngkai tao te namwakaina imwin kitanan Aikubita irouia tibun Iteraera. A a roko ngkai n te rereua ao e a karako te amwarake iai, mangaia are a ngurengure aomata ni kangai: ‘E raoiroi riki ngke e bon tiringira Iehova i Aikubita. Bwa e rangi ni bati kanara ikekei.’

Mangaia are e taku Iehova: ‘N na kabwakaa te amwarake mai karawa.’ Ao e boni karaoia Iehova. N te ingabong are imwina ngke a nora te bwai are mainaina are bwakabwaka arei tibun Iteraera, ao a a ititiraki irouia ni kangai: ‘Tera te baei?’

E taku Mote: ‘Aio te amwarake ae e anganingkami Iehova bwa kanami.’ A arana te baerei aomata bwa te MANNA. Kanakina kaanga ai aron kanakin te berena are e mmani are e renganaki ma aia karewe manibeeru.

E tuangia aomata Mote ni kangai: ‘Kam na rikorikoa are e bon tau ibukin kanami n tatabemaningkami nako.’ Mangaia are a kaakaraoa aei ni katoa ingabong. Ao ngkana e a moanna n riringa, ao e a ran naba nikirana are i aontano.

E taku naba Mote: ‘Akea ae e na kawakina te manna ni karokoa te bong are imwina.’ Ma iai aomata tabeman ake a aki ongo. Ko ataia bwa tera ae riki? N te ingabong are imwina ao e a ino ma ni mwaung te manna are a katikua arei!

Tii teuana te bong n te wiki ae e tuangia aomata Iehova bwa a kona iai n rikoa te manna ni kataboroa mwaitin are e tau ibukia n tebongina. Te bong anne bon te kaonoua ni bong. E tua Iehova bwa a kona ni kawakina nikiran kanaia ibukin te bong are imwina, ibukina bwa e na aki kabwakaa n te kaitua ni bong. Ngke a kawakina te manna ibukin te kaitua ni bong, ao e aki roko n te ino ao e aki naba mwaung! Aio bon te kakai naba teuana!

A kakamwarakeaki tibun Iteraera iroun Iehova n te manna ni kabanea aia ririki n tiku n te rereua.

Te Otinako 16:​1-36; Warekaia Iteraera 11:​7-9; Iotua 5:​10-12.