KARAKI 41

Te Naeta Ae Te Buraati

E TARAA n ae bon te naeta raoi ae minominotaki n te boua aei? Tiaki, bwa anne e karaoaki man te buraati. E tuangaki Mote iroun Iehova bwa e na katokaa i aon te boua n te aro bwa a na kona n noria aomata ao n teimatoa ni maiu iai. Ma bon naeta raoi akana i aontano. A a tia n tenaia aomata ao a kaaorakiia. Ko ataia bwa bukin tera?

Ibukina bwa a karitei I-Iteraera nakon te Atua ao Mote. A ngurengure ni kangai: ‘E aera ngkai kam kairira nako mai Aikubita? Ti aonga ni mate n te rereua? Akea te amwarake ao te mooi ikai. Ao ti a aki konaa moan kanakin te manna.’

Ma bon te amwarake ae raoiroi te manna. A anganaki iroun Iehova n te kakai. Ao e angania naba te ran n te kakai. Ma a aki kakaitau aomata n tabeakinaia iroun te Atua. Mangaia are e a kanakoia naeta aika tiritiri Iehova bwa katuuaeaia tibun Iteraera. A tenaki irouia naeta ao a bati mai buakoia aika a mate.

N tokina ao a a kawara Mote aomata ma n taku nakoina: ‘Ti bure ibukina bwa ti karitei nakon Iehova ao nakoim. Tataro nakon Iehova bwa e na uotiia nako naeta aikai.’

Mangaia are e a tataro Mote ibukia aomata. Ao Iehova e a tuanga Mote bwa e na karaoa te naeta ae te buraati. E taku bwa e na katokaaki i aon te boua, ao te koraki ake a tenaki a riai n taraia. E karaoa te bwai are e tuangaki Mote iroun te Atua. Ao aomata ake a tenaki a taraa te naeta are te buraati ao a a manga marurung.

Iai te reirei ae reke mai iai. Kaanga ai aron ae ti bane naba ngaira n tenaki n te naeta n aroia tibun Iteraera. Bwa ti bane ni maiu n te aro ae kakaiaki arona. Taratara nako ao noriia aomata bwa a tabe ni kara, a tabe n aoraki, ao ni mate. E riki aei mairouia moan aomata ake Atam ma Nei Ewa, ake a tannako mairoun Iehova, bwa ngaira ni kabane bon natiia. Ma e a tia Iehova ni karekea te anga are ti na kona ni karekea iai te maiu are aki toki.

E kanakoa Natina Iehova nako aon te aba ae Iesu Kristo. E tauraki Iesu i aon te kai, ibukina bwa a taku aomata aika mwaiti bwa e buakaka. Ma e anga Iesu Iehova bwa kamaiuara. Ngkana ti onimakinna ma n ririmwina, ao e na kona n reke iai iroura te maiu are aki toki. Ti na reiakina taekan aei rimwi riki.

Warekaia Iteraera 21:​4-9; Ioane 3:​14, 15.