KARAKI 30
E Urarake Te Aroka
E ROKOROKO Mote n te maunga are Oreba ni kakaaea te uteute iai ibukia ana tiibu. Ikai are e a nora iai te aroka ae e urarake ma e aki bue!
E iango Mote ni kangai: ‘Ai kamimi ra! Ngkai, N na nako ni kaania bwa I aonga n noria raoi.’ Ngke e a tabe ni kaania ao e a ongo naba te bwanaa man te aroka arei ae kangai: ‘Tai kaania ikai. Buuti am kau bwa ko a tei i aon te tabo ae tabu.’ Bon te anera are e taetae n tei ibukin te Atua, mangaia are e a karabaa matana Mote.
E taku te Atua: ‘I nora karawawatakia au aomata i Aikubita. Mangaia are N nang kainaaomataia, ao I rineiko bwa ko na kaotinakoia au aomata mai Aikubita.’ E na uotiia ana aomata Iehova nakon te aba ae rangi n tikiraoi ae Kanaan.
Ma e taku Mote: ‘Bon akea arou, ao N na kanga ngkanne ni karaoia? Ao ngkana arona bwa I nako, ao a na bae ni kangai nakoiu tibun Iteraera: “Antai ae kanakoko?” Tera ngkanne ae N na taekinna?’
E kaeka te Atua ao e taku: ‘Ko na kaekaia ni kangai: “IEHOVA ae Atuan Aberaam, Atuan Itaaka ao Atuan Iakoba, ae kanakoai nakoimi.”’ E a manga reitia riki ni kangai Iehova: ‘Arau aei n aki toki.’
E a manga kaeka Mote ni kangai: ‘Ma tera ngkana a aki kakoauai ae ko kanakoai.’
E titirakinna te Atua ni kangai: ‘Tera ane i baim?’
E kaeka Mote ao e taku: ‘Te kai.’
E taku te Atua: ‘Kare nako aontano.’ Ao ngke e kare nako Mote, ao e a riki naba n naeta te kai. Imwina e a manga kaota riki te kakai teuana Iehova nakon Mote. E taku: ‘Karina baim ni buan am kunnikai.’ E karaoa anne Mote, ao ngke e a buta baina, ao e a mainaina n riki bwa kaanga te tinoo! E a taraa n ae e rebera baina. Imwina e a anganaki Mote te kona ni karaoa te kakai are te katenua. N tokina ao e a taku: ‘Ngkana ko karaoi kakai aikai, ao a na kakoauako tibun Iteraera bwa I boni kanakoko.’
Imwin anne ao e a okira mwengana Mote ao e taku nakon Ietero: ‘Taiaoka ma kaokai nakoia au koraki i Aikubita, bwa N na noriia bwa a uara.’ Mangaia are e a kaboo Ietero nakon Mote, ao e a moana mwanangana Mote n okira Aikubita.