Bon Te Mwaane Ae Tatangira Mote

TERA TE TANGIRA?

E irekereke te tangira ma nanoangaaia aomata ae korakora. E oti ana namakin te aomata ae tatangira nakoia te koraki ake e tangiriia man ana taeka ao ana mwakuri, e ngae naba ngkana karaoan anne e kainnanoaki iai te anga boni ngaia.

E KANGA MOTE NI KAOTIOTA TE TANGIRA?

E kaotiota tangiran te Atua Mote. N te aro raa? Ti na kauringa ae taekinaki n 1 Ioane 5:3 ae kangai: “Bon aei tangiran te Atua, ae ti na kakairi n ana tua.” E boni maiuakina te boto n reirei anne Mote. E ongeaba ni bwaai ni kabane ake e tuangnga te Atua bwa e na karaoi, ni moa man te mwioko ae kakamaaku are e na kaitaraa Barao are korakora ni karokoa te mwioko ae taraa ni bebete n aron aroran ana kai i aon Taari ae Uraura. E tou mwin tuua nako Mote e ngae ngke a bebete ke a kangaanga karaoaia. ‘E karaoa aron are e tuangaki.’​—Te Otinako 40:​16, BG.

E kaotiota tangiraia raona n I-Iteraera Mote. A ataia bwa e kamanenaaki Mote iroun Iehova bwa e na kairiria ana aomata, ngaia are a a kawara Mote n tuangnga aia kangaanga aika kakaokoro. Ti wareka ae kangai: “A teitei aomata i rarikini Mote man te ingabong ni kabongnga.” (Te Otinako 18:​13-16, BG) Iangoa kuani Mote ngke e ongoraei aia kangaanga tibun Iteraera ni kabongnga! Ma e ngae n anne, e boni kukurei ni buokiia ake e tangiriia.

Irarikin ongoraean aia kangaanga, e tataro Mote ibukia ake e tangiriia. E tataro naba ibukia ake a ribuaka nakoina. N te katoto, e katuuaaeaki n te rebera mwaanena are Miriam ngke e ngurengure ibukini Mote. N oneani mwin are e na kimwareirei Mote ngke e katuuaaeaki neiei, e waekoa naba ngkekei n tataro n onnon ibukini mwaanena ni kangai: “Te Atua, I butiko ba ko na kamaiua.” (Warekaia Iteraera 12:​13, BG.) Bon tii te tangira are e kaira Mote bwa e na tataro ibukin neienne.

TERA REIREIARA?

Ti kona ni kakairi irouni Mote ngkana ti karikirakea tangiran te Atua ae korakora. Ao e na kairira te aeka n tangira anne bwa ti na ongeaba n ana tua ‘ma nanora ni koaua.’ (I-Rom 6:17) Ngkana ti ongeaba iroun Iehova ma nanora ni koaua, ti a kakukureia iai. (Taeka N Rabakau 27:11) Ti boni kakabwaiaaki naba iai. Ni koauana, ngkana ti beku ibukin te Atua ma nanora ni kabane, ti na aki tii karaoi baika eti ma ti na namakina naba te kukurei ngkai ti karaoi!​—Taian Areru 100:2.

Te anga riki teuana ae ti kona ni kakairi iai irouni Mote, boni mani karikirakean te nano ni kan anga ngaira ibukia aomata. Ngkana a tuangira raoraora ke kaain ara utu aia kangaanga, ti a kairaki n tangiraia bwa (1) ti na kakauongo raoi, (2) n uataboa rawawataia, (3) ni kaotia nakoia bwa ti tangiriia.

Ti kona ni katotonga Mote n tataro naba ibukia aika ti tangiriia. N tabetai, ti kona n namakina te bwarannano ngkana akea te bwai ae ti kona ni karaoia ni buoka aia kangaanga. Ti kona naba ni kaota nanokawakira ni kangai: “I rangi n nanokawaki bwa akea te bwai ae I kona ni karaoia ma tii te tataro.” Ma uringnga bwa, “e korakora makan ana tataro te aomata ae e raoiroi ngkana e botumaka iai.” (Iakobo 5:​16, BK) E bae ni kairaki Iehova n ara tataro bwa e na karaoa te bwai teuana nakon te aomata are E na bon aki ngkoa karaoa anne nakoina. Ni koauana, bon tii te tataro ae ti kona ni buokiia iai te koraki ake ti tangiriia.a

Ko aki ngkanne kakoauaa ae a rangi ni bati reireiara mairouni Mote? E ngae ngke bon titeboo arona ma ngaira, ma e a tia ni karaoa te banna ni katoto ae rianako ni kaineti ma te onimaki, te nanorinano ao te tatangira. Ngkana ti toua raoi mwin ana katoto, ti na bon rangi ni kakabwaiaaki iai ma aomata nako.​—I-Rom 15:4.