Te Aroka ae Urarake

E maeka Mote i Mirian i nanon 40 te ririki. E karekea buuna ao a a riki natiia. N te bong teuana ngke e tabe n tararuaiia ana tiibu i rarikin te Maunga ae Tinai, ao e a nora te bwai ae kamimi. E urarake te aroka ma e aki bue! E kaania bwa e na taraia raoi bwa tera, ao e a ongo naba te bwanaa mai iai ae kangai: ‘Mote! Tai kaaniko riki. Buutii am kau bwa e tabu te tabo ane ko tei iai.’ Bon Iehova are taetae rinanon te anera.

E maaku Mote ngaia are e a karabaa matana. E kangai te bwanaa anne: ‘I nori rawawataia tibun Iteraera. Ao N na kamaiuia mai nanoni baia kaain Aikubita ao ni kairiia nakon te aba ae raoiroi. Boni ngkoe ae ko na kaotinakoia au aomata mai Aikubita.’ Tiaki bwa e boni bae ni mimi iai Mote?

E titiraki Mote ni kangai: ‘Tera ae N na taekinna ngkana a titirakinai aomata bwa antai ae kanakoai?’ E taku te Atua: ‘Tuangia bwa e kanakoko Iehova ae Atuan Aberaam, Atuan Itaaka, ao Atuan Iakoba.’ Ao e taku Mote: ‘Tera ae N na karaoia ngkana a aki ongo irou?’ E anga Iehova te bwai ni kakoaua nakoni Mote bwa E na boni buokia. E tuanga Mote bwa e na karenakoa okona i aontano. Ao e a riki naba te oko bwa te naeta! Ma ngke e taua bukin te naeta anne Mote, e a manga riki bwa te oko. E taku Iehova: ‘Ngkana ko karaoa aei ao ane a na kakoauaa ae I kanakoko.’

E taku Mote: ‘I babanga n taetae.’ E berita nakoina Iehova ni kangai: ‘N na tuangko am taeka, ao N na tuanga tarim are Aaron bwa e na buokiko.’ Ngke e a ataia Mote bwa e memena irouna Iehova, e a kaira buuna ma natina mwaane ao e a nako Aikubita.