KARAKI 29
Bukin Birinakon Mote
NORA Mote ngkae e birinako mai Aikubita. Ko noriia mwaane ake a kaea? Ko ataia bwa bukin tera ngkai a kani kamatea Mote? Ti na noria bwa ti kona n ataia ke ti aki.
E ikawairake Mote n ana auti Barao, are te tia tautaeka i Aikubita. E a riki bwa te aomata ae rangi ni wanawana ao e kakannato naba. E ataia Mote ae tiaki ngaia kaain Aikubita, bwa oin ana karo bon tooro bwa kaain naba te baronga are tibun Iteraera.
N te bong teuana ngke e a koro 40 ana ririki Mote, ao e a baireia bwa e na noriia ana aomata bwa a uara. E rangi ni kakaiaki aron tautoronakiia. E nora te I-Aikubita bwa e batiboa temanna te toro ae kaain Iteraera. E taratara nako Mote ao ngke e noria bwa akea te aomata, ao e a orea naba te I-Aikubita arei ni kamatea. Imwina ao e a karabaa naba rabwatan teuarei Mote n taunna n te tano.
N te bong are imwina ao e a manga nako naba Mote n noriia ana aomata. E iangoia bwa e na kona ni buokiia bwa e aonga n toki tautoronakia. Ma ngke e noriia tibun Iteraera uoman aika a un, ao e taku Mote nakon teuare bure: ‘E aera ngkai ko a manga bon orea tarim?’
E taku te mwaane arei: ‘Antai ae karikiko bwa ara tia tautaeka ma ara tia moti? Ko nang manga tiringai naba n aron te I-Aikubita are ko tiringnga?’
E a moanna ngkai ni maaku Mote. E a ataia bwa bon iai ae ataa ana mwakuri are e karaoia nakon te I-Aikubita. E ongo naba Barao, ao e a kanakoia mwaane bwa a na tiringa Mote. Anne bukina are e riai ni birinako iai Mote mai Aikubita.
Ngke e a kitana Aikubita Mote, ao e a nakon te aba ae Mirian ae rangi n raroa nako. E kaitiboo iai ma ana utu Ietero, ao e a mare ma natina temanna ae arana Tibora. E a riki Mote imwina bwa te tia kawakin tiibu, n tararuaia ana tiibu Ietero. E maeka n te aba ae Mirian i nanon 40 te ririki. E a koro ngkai 80 ana ririki. Ma n te taina, ngke e tabe Mote ni kawakinia ana nanai n tiibu Ietero, ao e a riki naba te bwai ae kamimi are e a boni bita naba maiun Mote. Rairia nakon te iteraniba are imwina bwa ti na noria bwa tera te bwai ane kamimi anne.
Te Otinako 2:11-25; Mwakuri 7:22-29.