KARAKI 28
Kamaiuan Te Merimeri Ae Mote
NORA te merimeri ae tang aei, ae taua tabonibain te ateiaine. Aio boni Mote. Ko ataia bwa antai te ateiaine ae botonnaine aei? Bon te nati n uea ae te I-Aikubita, bwa natin Barao.
E kakarabaaki Mote iroun tinana ni karokoa koron tenua ana namwakaina, ibukina bwa e aki tangira natina bwa e na kamateaki irouia kaain Aikubita. Ma e ataia neiei bwa e na boni bae ni kuneaki Mote, ngaia are e a karaoa aei ibukin kani kamaiuana.
E anaa te bwaene ao e karaoia bwa e na aki kona n rin te ran iai. Imwina e karina Mote i nanona, ao e kabeta te bwaene n te Karaanga are te Naire i buakon uteute ake a abwabwaki. E tararuaki Mote iroun mwanena ae Miriam, bwa e tuangaki bwa e na tataraa te bwai are e na riki nakon Mote.
E aki rangi ni maan ao e a ruo naba natin Barao te aine bwa e na tebotebo n te karaanga are te Naire. E a karina naba n nora te bwaene i buakon uteute aika ririeta. E takarua nakon ana toro te aine temanna ni kangai: ‘Naako anaa te bwaene arei.’ Ngke e a kauka te bwaene te uea-n-aine aei, ao e a nora te merimeri ae rangi n tikiraoi i nanona! E bon tabe n tang Mote, ai ngaia are e a nanoangaia te uea-n-aine aei. E aki tangiria neiei bwa e na tiringaki te merimeri aei.
Imwina ao e a roko Miriam. Ko kona n noria n te taamnei. E titirakina natin Barao aei Miriam ni kangai: ‘I a nako ni wetea ainen Iteraera bwa e na tobwaia ibukim?’
E kaeka te uea-n-aine aei ni kangai: ‘Eng taiaoka.’
Mangaia are e a kabirimwaakaa Miriam n nako n tuanga tinana. Ngke e a roko tinan Mote, ao e taku te uea-n-aine nakoina: ‘Anaa te merimeri aei ao tobwaia ibukiu, bwa N na kaboko iai.’
Mangaia are e a uota rikaaki natina neie tinan Mote aei ma ni kawakinna. Rimwi riki ngke e a moanna n ikawai Mote, ao e a uotia nakon natin Barao, are e a tabekia bwa natina. Anne bukina are e a riki n ikawai iai Mote n ana auti Barao.