REIREI 23
Te Berita Nakon Iehova
Tao uoua te namwakaina imwini kitanan Aikubita, ao a a roko tibun Iteraera n te Maunga ae Tinai ao a katei kaembwa iai. E wewetea Mote Iehova ao e a ararakea te maunga Mote, ao e taku Iehova: ‘I kamaiuia tibun Iteraera. Ngkana a ongeaba irou ma ni kawakin au tua, a na riki bwa au aomata aika okoro.’ E ruo rikaaki Mote ao e tuangia tibun Iteraera ana taeka Iehova. Tera aia kaeka? A taku: ‘Ti na karaoi bwaai nako ake e tuangira Iehova.’
E a manga ararakea naba te maunga Mote. Ao e taku Iehova nakoina ikanne: ‘N na taetae nakoim i nanon tenibong. Aanga te kauring nakoia aomata bwa a na aki kataia n ararakea te Maunga ae Tinai.’ E ruo rikaaki Mote ao e tuangia tibun Iteraera bwa a na katauraoiia bwa a na ongora iroun Iehova.
Tenibong imwina, ao tibun Iteraera a a nora te itirua ao te nang ae roo i aon te maunga. A ongo naba rebwetatan te baa ao tangin te buu ae te koro. Ao e a ruo Iehova nako aon te maunga n te ai. A rangi ni maaku tibun Iteraera ao a ruru. E a korakora mwaeiein te maunga ao e a buta n te bubu ao e a ririkirake karongoaan te buu are te koro. E taku ngkanne te Atua: ‘Bon Iehova ngai. Kam na tai taromaurii atua riki tabeman.’
E a manga oki Mote nakon te maunga ao Iehova e anganna tuua ibukia aomata ni kaineti ma aroia ae a riai n taromauria iai, ao aroaroia aika riai. E korei tuua aikai Mote ao e wareki nakoia tibun Iteraera. Ao a berita ni kangai: ‘Ti na karaoi bwaai nako ake e tuangira Iehova.’ Eng, a berita nakon te Atua. Ma a na kawakina aia berita?
“Ko riai n tangira Iehova ae Atuam ma nanom ni kabane, maium ni kabane, ao am iango ni kabane.”—Mataio 22:37