KARAKI 31

A Kawara Barao Mote Ao Aaron

NGKE e a okira Aikubita Mote, ao e a kaongoa tarina are Aaron taekan kakai akekei. Ao ngke a tuangia tibun Iteraera taekan kakai aikai Mote ma Aaron, ao a kakoauaki irouia aomata ni kabane are e mena Iehova irouia.

Imwina ao a a nako Mote ao Aaron ni kawara Barao, ma n tuangnga ni kangai: ‘E kangai Iehova ae Atuaia Iteraera, “Kanakoia au aomata tenibong bwa a na taromauriai n te rereua.”’ Ma e kaeka ni kangai Barao: ‘I aki kakoauaa Iehova. Ao N na aki kanakoia tibun Iteraera.’

E un Barao ibukina bwa a kani motirawa aomata man aia mwakuri, ibukin taromaurian Iehova. Mangaia are e a kairoroia bwa a na karaoi mwakuri aika rawawata riki. A bukina Mote tibun Iteraera ibukin karawawatakia arei, ao e a rotaki n te nanokawaki iai Mote. Ma e tuangnga Iehova bwa e na aki raraoma. E taku Iehova: ‘N na kaira nanon Barao bwa e na kanakoia au aomata.’

A a manga mwananga naba Mote ma Aaron ni kawara Barao. N te tai aei ao a a karaoa te kakai. E karenakoa ana kai Aaron ao e a riki naba bwa te naeta ae bubura. Ma a karenakoi naba aia kai ana tia rabakau Barao, ao a riki naba n naeta. Ma noria! A kabwautaki aia naeta iroun ana naeta Aaron. Ma e bon aki naba kanakoia tibun Iteraera Barao.

Mangaia are e a roko te tai are e nang katuuaeaki iai Barao iroun Iehova. Ko ataia bwa e kanga ni karaoa anne? Ni karokoan rekenikai ake 10 i aon Aikubita.

Imwin rokon rekenikai aika bati, ao e a kananako Barao wetean Mote ao e taku nakoina: ‘Katoka te rekenikai, ao I a kanakoia naba tibun Iteraera.’ Ma ngke e a toki te rekenikai, ao e a manga bita ana iango Barao. E a manga aki kanakoia tibun Iteraera. Ma imwin te ka-10 n rekenikai, ao e a kanakoia tibun Iteraera Barao.

Ko ataia bwa baikara rekenikai ake 10 n aekaia nako? Rairia nakon te iteraniba are imwina bwa ti na rinanoi.

Te Otinako 4:​27-31; 5:​1-23; 6:​1-13, 26-30; 7:​1-13.