KARAKI 32

Rekenikai Ake 10

NORI taamnei aikai. Bon taamnein taian rekenikai n aekaia nako ake e karokoi Iehova i aon Aikubita. N te moan taamnei ao ko kona n nora iai Aaron n orea te Karaanga are te Naire n ana kai. Ngke e karaoa anne, ao e a boni bitaki naba te ran nakon te raraa. A mate iika, ao e a mwaung te karaanga.

Imwina e a manga kaerakeia biraoki Iehova man te Karaanga are te Naire. A uamae nakon taabo nako, i nanon aai n umum, bwaata n umum, aia tabo ni matu aomata, ao taabo nako. Ngke a a manga mate biraoki ao a kauataoaki irouia kaain Aikubita n te aro are e a bwarietakaei, ao e a mwaung aon te aba iai.

Imwina e a orea aontano Aaron n ana kai, ao e a bitaki bubun aontano nakon taiani manibeti. Baikai, a uarereke ao a kibakiba ma n tenatena. Taiani manibeti bon te katenua n rekenikai nakon te aba ae Aikubita.

Rekenikai ake nikirana, a karawawataia tii I-Aikubita, ao a aki rotaki iai tibun Iteraera. Te kaaua n rekenikai bon taian tangkoraa aika bubura ake a a uu i nanon aia auti kaain Aikubita. Te kanimaua n rekenikai e kaineti nakoia maan. A bati aia kao, aia tiibu ao aia kooti kaain Aikubita ake a mate.

Are imwina, a anai taiani mannang Mote ma Aaron ma ni kaaurakei nako eta. E a riki mai iai te kinaka ae buakaka i aoia aomata ao maan. Aio bon te kaonoua n rekenikai.

Imwin anne ao e a tabeki rake baina nako karawa Mote, ao e a karokoa te iti ma te baa Iehova ao te karau ae te aiti. E a bon rangi n riao bwakan te karau ae te aiti aei, bwa e irianaki n te bongi buaka ae e tuai n nonoraki i aon Aikubita ma ngkoa.

Te kawanua n rekenikai bon te taanga n rokati ae mwaiti kurikuri. E tuai n nonoraki mai mwaina aroni mwaitin te rokati ae aekakin aei. A a boni kang naba bwaai ni kabane ake a tiku imwin te karau are te aiti.

Te karuaiwa n rekenikai bon te rotongitong. E a bon rabuna nako naba te aba te rotongitong i nanon tenibong, ma e ota te tabo are a maeka iai tibun Iteraera.

Te kabanea, e tuangia aomata te Atua bwa a na katimwa raraan te kooti te tei ke te tiibu te tei i aon bouan aia mataroa. Imwina e na riaon Aikubita ana anera te Atua. Ma ngkana e nora te raraa te anera, ao e na aki tiringa temanna n te auti anne. Ma e tiringia karimoa ake a mena n auti nako ake a aki kabiraki n te raraa bouan mataroaia, n ikotaki ma aia karimoa maan. Aio bon te ka-10 n rekenikai.

Imwin te rekenikai aei, e a tuangia tibun Iteraera Barao bwa a nangi nako. A a bane n tauraoi ana aomata te Atua nakon te mwananga, ao n te tairiki raoi anne a a moana aia mwaati n otinako mai Aikubita.

Te Otinako mwakoro 7 nakon 12.