REIREI 21
Te Katebwina n Rekenikai
E berita Mote nakoni Barao bwa e na aki manga kataia ni kaoti i matana. Ma imwain nakona, e tuanga Barao aei: ‘N nukanibong, ao a na bane ni mate aia karimoa kaain Aikubita mairoun natini Barao ni karokoa natiia tooro.’
E tuangia tibun Iteraera Iehova bwa a na karaoa te amwarake ae okoro. E taku: ‘Tiringa te tiibu mwaane ke te kooti ae teuana ana ririki, ao kabiri ami mataroa n raraana. Umuna irikona, ao kanna ma bwerena aika aki karikaki. Karin ami kunnikai ao kanim ami kau ao tauraoi ni mwananga. N nang kainaomataingkami n te tairiki aei.’ Ko kona n iangoa korakoran ingaingan nanoia tibun Iteraera?
Ngke e a nukanibong ao e a kawari auti ni kabane i Aikubita, ana anera Iehova. A mate karimoa n auti ake a aki kanikinaeaki mataroaia n te raraa. Ma e riaoi auti ake a kanikinaeaki n te raraa te anera. A bane ni mate karimoa n utu nako ake i Aikubita aika kaubwai ma aika maiu ni kainnano. Ma akea mai buakoia tibun Iteraera ae e mate natina.
E mate naba natini Barao ae te mwaane. E a aikoa konaa moan aei Barao. E aki tabwara ma e a tuanga naba Mote ma Aaron ni kangai: ‘Teirake ao naako mai ikai. Naako taromauria Atuami. Kairiianako ami man ao naako!’
Ngke e a tabwanin namwakaina, a a mwananga n otinako mai Aikubita tibun Iteraera, ao a baireaki raoi n aia utu ma aia baronga nako. Bon 600,000 mwaitiia mwaane ao a bati naba aine ma ataei. A bati aomata ake a iriia bwa a aonga naba n taromauria Iehova. A a kainaomataaki raoi tibun Iteraera!
Ibukin ururingan aron Iehova ni kamaiuia, a riai ni kakaraoa te amwarake ae okoro ae aekan anne ni katoa ririki. E aranaki te botaki anne bwa te Toa ae te Riao.
“Aio bukina ae I kariaia iai bwa ko na teimatoa ni maiu: bwa I aonga ni kaota mwaakau iroum ao bwa e na tataekinaki arau i aonnaba ni bane.”—I-Rom 9:17