KARAKI 27
Uean Aikubita Ae Buakaka
A KAIROROIA aomata bwa a na mwakuri mwaane aikai. Nora te mwaane ae e kataerea teuae mwakuri aei n te kai ni kataere! Taani mwakuri aikai bon ana utu Iakoba, ao a aranaki bwa tibun Iteraera. Ao mwaane ake a kairoroia bwa a na mwakuri boni kaain Aikubita. A a tautoronaki ngkai tibun Iteraera irouia kaain Aikubita. E kanga n riki aei?
A a tia ni maeka ma te rau ana utu Iakoba i nanon ririki aika bati i Aikubita. E tararuaiia Ioteba are te aomata are e rangi ni kakannato i Aikubita, bwa te kauoman i aan Barao are te uea. Ma imwina riki ao e a mate Ioteba. E a manga uea Barao ae boou i Aikubita, ao e a riribaiia tibun Iteraera.
Mangaia are Barao ae buakaka aei, e a karikiia tibun Iteraera bwa tooro. Ao e rineiia mwaane aika bangaaomata ma n iowawa bwa a na mataniwina aia mwakuri. A kairoroia tibun Iteraera bwa a na mwakuri korakora ni katei kaawa ibukin Barao. Ma e teimatoa naba n ririkirake mwaitiia tibun Iteraera. Imwin tabeua te tai ao a a maaku kaain Aikubita, i aan te kaantaninga are a kona n rangi ni bati tibun Iteraera ma ni korakora riki nakoia.
Ko ataia bwa tera ae e karaoia Barao? E tuangia aine ake taani kabungia ainen Iteraera ni kangai: ‘Kam riai n tiringia ataei aika mwaane aika a bungiaki.’ Ma a raoiroi aine aikai, ao a aki tiringia ataei.
Mangaia are e a tua Barao nakoia ana aomata ni kabane ni kangai: ‘Anai aia merimeri Iteraera aika mwaane ao tiringia. Ma tii kamaiuia merimeri aika aine.’ E aki kakaiaki ngkanne buakakan te mwakuri anne? Ti na noria bwa e kanga n reke maiun temanna te merimeri ae te mwaane.