KARAKI 33

A Rinanon Taari Ae Uraura

NORIA bwa tera ae riki! Anne boni Mote ma ana kai ae e aroria ni kaitaraa taari ae arana Taari ae Uraura. Aomata ake a mena n te itera are e tei iai, bon tibun Iteraera. Ma kaain ana taanga ni buaka ni kabane Barao, a a tabe ni bwabwa i taari. Ti na noria bwa e kanga n riki aei.

N aron ae ti ataia, e a tia Barao n tuangia tibun Iteraera bwa a na kitana Aikubita, imwin rokon te katebwina n rekenikai i aoia kaain Aikubita iroun te Atua. Tao 600,000 tibun Iteraera aika tii mwaane, n raonaki irouia aine ao ataei aika a mwaiti. Iai naba aomata aika bati ake a a manga onimakina Iehova, ao a iri nako naba ma tibun Iteraera. A bane ni kairiia aia tiibu ma aia kooti ao aia kao.

Imwain nakoia, ao a tuatua tibun Iteraera nakoia kaain Aikubita bwa a na anganaki kunnikai, ao bwaai aika karaoaki man te koora ao te tirewa. A rangi ni maaku kaain Aikubita ni kaineti ma te kabanea n rekenikai are e bwakariia. Mangaia are a angania tibun Iteraera bwaai nako ake a tuatua.

Imwin tabebong ao a a roko tibun Iteraera n Taari ae Uraura. A tabe ni motirawa ikekei. N te tai anne ao a a uringaba Barao ma ana aomata ngkai a a kanakoia tibun Iteraera. A taku: ‘Ti a kaawa bwa ti a tia ni kanakoia ara toro!’

Mangaia are e a manga bita naba ana iango Barao. E kawaekoaa ni katauraoa ana kaa ni buaka ao ana taanga n tautia. Imwina ao a a rimwia tibun Iteraera ma aia kaa ni buaka aika okoro aika 600 mwaitiia, ao aia kaa ni buaka tabeua riki ake a boni kakamanenai i Aikubita.

A rangi ni maaku tibun Iteraera ngke a a nora Barao ma ana taanga n tautia n rimwi. Ai bon akea te tabo ae e na reke birinakoia iai. E mena imwaia Taari ae Uraura ao a mena kaain Aikubita i akuia. Ma e katea te nang Iehova i marenaia ana aomata ma kaain Aikubita. Mangaia are a aikoa kona n reke tibun Iteraera irouia kaain Aikubita bwa a aikoa noraki.

N te tai anne ao e tuangaki Mote iroun Iehova bwa e na arora ana kai ni kaitaraa Taari ae Uraura. Ngke e aroria, ao e a karokoa naba te ang mainiku Iehova ae korakora. E a bwenaua iai taari, ao e a tiku n arona anne ni kauaitera.

Imwina ao a a moana aia mwaati tibun Iteraera rinanon taari n riaon te tano ae mwau. E kabanea te aoa ae bati bwa a na kona n rinanon taari, aomata aika mirion ma mirion mwaitiia ma aia man bwa a aonga n roko n te itera are teuana. N tokina ao a a manga kona n noriia tibun Iteraera kaain Aikubita. A a raroa nako riki aia toro aikai, mangaia are a a kawaekoaia n ruo nako taari bwa a na rimwia.

Ngke a a rinanon taari, ao e a koutii wiran aia kaa ni buaka te Atua ni kabwakai. A a rangi ni maaku kaain Aikubita ao a tatakarua ni kangai: ‘E buakanira Iehova ibukia tibun Iteraera. Ti a kitana ikai!’ Ma a a oimwi.

N aron ae ko noria n te taamnei, e tuangaki Mote iroun Iehova bwa e na arora ana kai ni kaitaraa Taari ae Uraura. Ao ngke e aroria, ao e a oki naba taari are bwenaua, ma n rabunia kaain Aikubita ma aia kaa ni buaka. N te tai aei ao a a bane kaain te taanga ni buaka, n rinanon taari ibukin rimwiakia tibun Iteraera. Ao bon akea naba temanna te I-Aikubita ae maiu!

Ai kukurei ra ana aomata te Atua bwa a a bane ni kamaiuaki! A anenea te kuna ni kakaaitau mwaane nakon Iehova ni kangai: ‘E tokanikai Iehova ao e bati n neboaki. E a tia ni kabwakaia aoti i taari ma taan toka i aoia.’ E anaa ana bwai ni katangitang mwanen Mote are Miriam, ao e a rimwiaki irouia aine nako ma aia bwai ni katangitang. A mwamwaie ma te kimwareirei ma n anenea are a aneneia naba mwaane ae kangai: ‘E tokanikai Iehova ao e bati n neboaki. E a tia ni kabwakaia aoti i taari ma taan toka i aoia.’

Te Otinako mwakoro 12 nakon 15.