Karekean Akoara Iroun Te Atua E Kairira Nakon Te Maiu Are Aki Toki
“Ane Ko na kakabaia te aomata ae raoiroi; Iehova, Ko na otabaninia n te akoi n ai aron te otanga.”—TAIAN ARERU 5:12, BG.
1, 2. Tera ana bubutii Eria nakon ainen Tarebata are e a tia ni mate buuna, ao tera te karaunano are e anganaki neiei?
AKEA bwa e a rotaki n te baki te aine temanna ma natina te mwaane n ikotaki naba ma ana burabeti te Atua. Ngke e a kauraa te ai ibukini kanana ainen Tarebata ae e a tia ni mate buuna aei, ao e a bubutiaki naba iroun te burabeti ae Eria bwa e na anganna te ran ao te kariki. E kukurei neiei n anganna teutana te ran bwa e na nimma, ma kanana are irouna n te tai anne bon “ti te abutana te baraua i nanon te baketi, ao ti teutana te bwa ae te oriwa i nanon te batoro.” E ataia neiei ae akea te amwarake ae tau ae e na angan te burabeti, ai ngaia are e a karautaeka nakon te burabeti.—1 Uea 17:8-12, BG.
2 E bubutii ni kangai Eria nakon neiei, “Ko na karaoa moa te berena ae uarereke maiai ba kanau, ao ko na uotia mai nako iu, ao rimwi ko na karaoa kanam ma natim. Ba e kangai ana taeka Iehova ae Atuaia Iteraera, ‘Ane e na aki kenako kanoan te baketi ni baraua, ao e na aki bane naba kanoan te batoro ni bwa.’”—1 Uea 17:13, 14, BG.
3. Tera te titiraki ae kakawaki ae ti riai n titirakinira iai?
3 E karaoa ana rinerine ae kakawaki riki nakon are e na tii anga te amwarake ae tau are iai irouna te aine ae e a tia ni mate buuna aei. E na onimakina Iehova bwa e na kamaiua ma natina are te mwaane, ke e na moanibwai baike e kainnanoi ni maiuna nakoni karekean akoakina iroun te Atua ao ana iraorao ma ngaia? Ti riai n titirakinira naba te aeka n titiraki anne. Ti na kaatuua iangoakini karekean akoara iroun Iehova nakon ukoukorani baika ti kainnanoi ni maiura? Iai bukina aika bati ae ti na onimakina iai te Atua ao ni beku irouna. Ao iai naba mwaneka aika ti kona ni karaoi ibukin ukoukoran ao karekean akoara irouna.
‘Ko Riai n Taromauriaki’
4. Bukin tera bwa ti riai n taromauria Iehova?
4 Iai riain Iehova ni kantaningaia aomata bwa a na beku irouna n te aro ae na butimwaeaki irouna. A kamatoaa n taekina te koaua anne ana toro te Atua ake a botaki i karawa, ni kangai: “Ko riai n anganaki te neboaki ma te karineaki ma te mwaaka, ngkoe ae Iehova ae Atuara, bwa ko karikii bwaai ni kabane, ao ibukin nanom, ao a a riki baikai bwa ko karikii.” (Te Kaotioti 4:11) Ti bon riai n taromauria Iehova ibukina bwa e karikii bwaai ni kabane.
5. E aera ngkai e kairira ana tangira te Atua bwa ti na beku irouna?
5 Bukina riki teuana ae ti riai ni beku iai iroun Iehova, bon ana tangira ibukira ae akea kabotauana. E taekinaki n te Baibara ae kangai, “Ao te Atua E karika te aomata ba katotongana, E karikia ni katotonga arona; E karikiia ba te mwane ao te aine.” (Karikani Bwaai 1:27, BG) Iai inaomatan te aomata ae e anganaki iroun te Atua n iangoia bwa e na toro iroun te Atua ke e na aki, ao ni karaoi naba ana motinnano. E riki Iehova bwa Tamaia botannaomata ibukina bwa e anganira te maiu. (Ruka 3:38) N ai aron te karo ae raoiroi, e a tia ni katauraoi bwaai ni kabane aika a kainnanoaki irouia natina bwa a aonga ni maiu ni kukurei. “E kaotaa taai” ao “e kabwakaa te karau,” bwa n te aro are a na kona n rikirake amwarake aika bati n te Aonnaba aei ibukira n te otabwanin ae tamaroa.—Mataio 5:45.
6, 7. (a) Baikara kangaanga aika a a riki mairoun Atam aika a turaki iai kanoana ni kabane? (b) Tera ae e na karaoia ana karea Kristo nakoia te koraki ake a ukoukora akoaia iroun te Atua?
6 E a tia naba ni kamaiuira Iehova mani kangaanga aika kakamaaku ake a reke man te bure. Man ana bure Atam, e a riki iai bwa ai aron te tia kemboro are e iraei bwaai man ana utu ibukini birina ni kemboro. Ngke e karitei Atam nakon Iehova, e a anaa iai te kantaninga mairouia natina ae te kukurei are akea tokina. A tautoronaki botannaomata n te aki kororaoi imwin ana bangaomata Atam. Mangaia are a bane n rotaki aomata n te aoraki, te nanokawaki, ao tokia te mate. E kainnanoaki te kaboomwi ibukini kainaomataakin te toro, ao e a karaoa anne Iehova ibukira bwa e na kainaomataira mani kangaanga aika karuanikai. (Wareka I-Rom 5:21.) Ni maiuakinan ae boraoi ma nanon Tamana, e a anga “maiuna [Iesu Kristo] bwa te kaboomwi ibukia aomata aika bati.” (Mataio 20:28) Imwin teutana te tai, a nang karekei kakabwaiaaia aika bati te koraki ake a karekea akoaia iroun te Atua man te karea ni kaboomwi anne.
7 E a tia ni karaoi baika bati riki nakoia aomata nako ara tia Karikiriki ae Iehova, bwa e na anganira te maiu ae kakukurei ma ni manena. Ti na nora aron ana mwakuri ni kaoki mwin taian urubwai nakoia botannaomata ngkana ti karekea akoara irouna. E na teimatoa Iehova ni kaotiotia nakoira n tatabemanira nako arona n riki bwa te tia “karekei kaniwangaia te koraki ake a kakorakoraia n ukoukoria.”—Ebera 11:6.
“A Kan Anga Ngaiia Am Aomata”
8. Tera reireiara ae reke man rongorongon Itaia ibukin te beku iroun te Atua?
8 E irekereke karekean akoara iroun te Atua ma kamanenaan inaomatara n te aro ae riai. E riki aei ibukina bwa e aki kairoroia aomata Iehova bwa a na beku ibukina. Ngke e kakaaea temanna Iehova n ana bong Itaia bwa e na karaoa te mwakuri teuana, ao E taku: “Antai ae N na kanakoa, ao ai antai ae na nako i bukira?” E kaota karinean te burabeti aei Iehova ni kariaiakan ana iango ni karaoan ana rinerine. Iangoa raun nanon Itaia ngke e kaeka ni kangai: “Aio ngai; kanakoai.”—Itaia 6:8, BG.
9, 10. (a) Tera te aroaro ae ti riai ni bwainna ngkana ti na beku ibukin te Atua? (b) E aera ngkai e bon riai bwa ti na beku iroun Iehova ma nanora ni kabane?
9 A inaomata aomata ni beku iroun te Atua ke a na aki. E tangirira Iehova bwa ti na kukurei ni beku irouna. (Wareka Iotua 24:15.) A aki kona ni kakukureia te Atua te koraki ake a ribaa taromauriana, ao e aki naba butimwaei aia taromauri te koraki ake a karaoia tii ibukini kakukureiaia aomata. (I-Korote 3:22) Ngkana ti “waeremwe” ni karaoa ara beku ae tabu n arora ni kariaia anaakin nanora ni bwain aon te aba bwa e na uruana ara taromauri, ti na bon aki karekea akoara iroun te Atua. (Te Otinako 22:29, BG) E ataia Iehova bwa e raoiroi ibukira ngkana ti toro irouna ma nanora ni kabane. E kaungaia tibun Iteraera Mote bwa a na rinea te maiu ‘n aroia n tangira Iehova ae Atuaia, ma ni kan ongo bwanaana ao n nimtia.’—Te Tua-Kaua 30:19, 20, BG.
10 E anene nakon Iehova Uean Iteraera rimoa are Tawita ni kangai: “A kan anga ngaiia am aomata ni bongini mwakam, n tamaroan te raoiroi: Bon iai aoin am bong n ataei mai nanoni biroton te karangaina.” (Taian Areru 110:3, BG) A mwaiti aomata ni boong aikai ake a moanibwaia riki te kaubwai ae a na mweraoi iai ao te kaakibotu. Ma te koraki ake a tangira Iehova a moanibwaia riki aia beku ae tabu nakoni bwaai ni kabane. E kakoauaaki te bwai ae a moanibwaia n ingaingan nanoia n tataekina te rongorongo ae raoiroi. A onimakina raoi rabakaun Iehova ibukini katauraoani baika a kainnanoi ni katoabong.—Mataio. 6:33, 34.
Karea Ake A Mutiakinaki Iroun te Atua
11. Tera te kakabwaia ae a kantaningaia tibun Iteraera bwa a na karekea man aia angakarea nakon Iehova?
11 I aan te Tua ao a anga aia karea aika a na butimwaeaki ana aomata te Atua bwa a aonga ni karekea akoaia irouna. E taekinaki ae kangai n Nakoaia Ibonga 19:5, BG: “Ngkana kam anga te karea, aika angabwai ni kan raoi, nakon Iehova, ao kam na anga ba kam aonga ni mutiakinaki.” Ni bokin naba te Baibara anne ao ti wareka iai ae kangai: “Ngkana kam kareana te karea ni kani katituaraoi nakon Iehova, ao kam na kareanna ba e aonga ni mutiakinaki.” (Nakoaia Ibonga 22:29, BG) Ngkana a anga aia karea aika a na butimwaeaki tibun Iteraera ae te man ae moan te raoiroi i aoni baonikarean Iehova, ao e waerake bubuna n ai aron “te boi ae boiarara” nakon te Atua ae koaua. (Nakoaia Ibonga 1:9, 13, BG) E namakina te raunnano ao te kabebeteaki ngkana a kaotiota te tangira ana aomata. (Karikani Bwaai 8:21.) E reke te boto n reirei man te Tua aei, ae ti a kona iai ni kamanena n ara bong aikai. A karekea akoaia iroun Iehova te koraki ake a anga aia karea aika a na butimwaeaki irouna. Baikara karea aika e butimwaei? Ti na iangoi ngkai iterani maiura aika uoua, ae aroarora ao ara taetaenikawai.
12. Baikara mwakuri aika kakaraoaki ake a kamatauninga te Atua ngkana ‘ti anga rabwatara bwa te karea’?
12 E korea ae kangai te abotoro Bauro n ana reta nakoia kaain Rom: “Kam na anga rabwatami bwa te karea ae maiu ae itiaki, ae butimwaeaki iroun te Atua, ae te beku ibukin te Atua ma wanawanami.” (I-Rom 12:1) Karekean akoara iroun te Atua e kainnanoaki iai kawakinan itiakin rabwatara n te aro ae e na butimwaeaki iroun te Atua. E na bon akea manenan ana angakarea te aomata ae e kabarekaa rabwatana n te baakee, te betel nut, taian drug aika tabuaki i aan te tua, ke nimakin te kamanging n te aro ae riaon ae riai. (2 I-Korinto 7:1) Irarikin anne, ane e “kakaraoa te wene ni bure, ao e bure nakon oin rabwatana,” ae aekan nako te aroaro ae kammaira ae e karaoia, nanona bwa e kamatauninga te Atua n ana angakarea. (1 I-Korinto 6:18) E riai n ‘itiaki te aomata n aroarona ni kabane’ ibukini kakukureian te Atua.—1 Betero 1:14-16.
13. Bukin tera ngkai e riai bwa ti na kamoamoaa Iehova?
13 Te angakarea riki teuana ae e kimwareirei iai Iehova e irekereke ma arora n taetaenikawai. Te koraki ake a tangira Iehova a aki toki n tataekinna i mataia aomata ao ngkana tii ngaiia ni mwengaia. (Wareka Taian Areru 34:1-3.) Wareka Taian Areru 148-150, ao nori iai okiokin areru aika tenua aikai ni kaungaira bwa ti na kamoamoa Iehova. Ni koauana, “e riai te karaoiroi irouia akana a eti aroia.” (Taian Areru 33:1, BG) E katerea kakawakini kamoamoaan te Atua, Teuare ara banna ni katoto ae Iesu Kristo n arona n tataekina te rongorongo ae raoiroi.—Ruka 4:18, 43, 44.
14, 15. Aekakira karea aika e kaumakiia iai tibun Iteraera Otea bwa a na anga, ao e na kanga Iehova ni butimwaei?
14 Ti kaota koauan ara tangira ao nanora ni karekea akoara iroun Iehova rinanon tataekinan te rongorongo ma te ingaingannano. N te katoto, iangoa aron te burabeti are Otea ni kaumakiia I-Iteraera ake a karaoi taromauri aika kairua ao a a kabuaa iai ana akoi te Atua. (Otea 13:1-3) E tuangia Otea bwa a na bubutii ni kangai: “Ko na uoti nako buakaka ni kabane [Iehova], ao mwanea ae raoiroi: ao ti na anga aia [karea] matanriara, ba kaanga kao-mwaane.”—Otea 14:1, 2, BG.
15 Bon te man ae e boo buaka te kao mwaane are a kona ni kareanna Iteraera nakon Iehova. Mangaia are “aia [karea] matanriara, ba kaanga kao-mwaane” e nanonaki iai taeka aika nako mai nanora, aika iangoaki raoi ma n atoatongaki ni kamoamoaan te Atua ae koaua. Tera aron Iehova ni butimwaeia te koraki ake a karaoi aeka ni karea akanne? E taku: “N na tangiriia ni boni kan tangiriia.” (Otea 14:4, BG) E na kabwarai aia bure Iehova, a na akoaki irouna ao e na iraorao ma te koraki ake a anga aeka ni karea ni kamoamoa akanne.
16, 17. E kanga Iehova ni butimwaea kamoamoaana iroun te aomata ae e kairaki n onimakinan te Atua bwa e na tataekina te rongorongo ae raoiroi?
16 E teretere kamoamoan Iehova i mataia aomata bwa iteran te taromauri ae koaua ae kakawaki. Ibukina bwa e rangi ni kakawaki iroun te tia areru kamoamoaan te Atua ae koaua, e bubutii ni kangai: “Iehova, I butiko ba Ko na mwanea angabwaini wiu.” (Taian Areru 119:108, BG) Tera ae riki ni boong aikai? E taetae ni burabetina ae kangai Itaia ni kaineti ma ara taetaenikawai ma aomata aika bati n ara bong aikai: “A na ua rongorongo aika raraoi aika kamoamoan Iehova. . . . A na aerake ma te tangiraki [aia bwai n tituaraoi] nako aoni [baonikarean te Atua].” (Itaia 60:6, 7, BG) Ni kakoroani bukin anne, mirion ma mirion aomata aika a ‘anga te karea ni karaoiroi nakon te Atua, ae nako mai wiia aika kaotiota arana i mataia aomata.’—I-Ebera 13:15.
17 Ma tera ngkoe arom? Ko angan te Atua karea aika e na butimwaei? Ngkana ko tuai, e koaua bwa ko na karaoi bitaki aika kainnanoaki iai ao ni moana kamoamoaan Iehova i mataia aomata? Ngkana ko kairaki n am onimaki bwa ko na moana tataekinan te rongorongo ae raoiroi, “e na tangiraki riki iroun Iehova [am karea anne] nakon te kao-mwane.” (Wareka Taian Areru 69:30, 31.) Karaua nanom bwa e na roko iroun Iehova “booi aika boiarara” n am angakarea ni kamoamoaa, ao n te aro anne e na reke akoam irouna. (Etekiera 20:41, BG) E na akea ngkanne kabotauan te kimwareirei ae ko nang namakinna.
‘E na Kakabwaiaa te Aomata ae Raoiroi Iehova’
18, 19. (a) Tera ae a iangoia aomata aika bati ni boong aikai ni kaineti ma te beku iroun te Atua? (b) E kairiri nakon tera buan akoara iroun te Atua?
18 A mwaiti aomata ni boong aikai ake a kakaraoi naba aia mwakuri aomata tabeman ake n ana bong Maraki: “Akea manen te toro iroun te Atua: ao tera bongana ngkai ti kakawakina ana tua?” (Maraki 3:14, BG) A kairaki nanoia n tangirani bwaikorakin te maiu aei, ao a iangoa ana kantaninga te Atua bwa e aki kona ni koro bukina ao ana tua bwa a aikoa manga kabonganaaki. E kabanetai irouia tataekinan te rongorongo ae raoiroi ao e riki bwa kaunaia.
19 A bane n riki aeka n iango akanne man te onnaroka are Eten. Bon Tatan are e mwamwanaa Ewa bwa e na kakeaa bongan te maiu ae tamaroa ae e anganaki iroun Iehova ao e a katinanikua akoana Mairouna. Ni boong aikai, e kataia naba n anai nanoia aomata Tatan bwa a na kakoauaa ae akea te bwai ae kona n reke irouia ngkana a kakaraoa nanon te Atua. Ma a kunea Atam ma Ewa imwina bwa buan akoaia iroun te Atua e nanonaki naba iai buani maiuia. A kona naba ni kabuaa akoaia iroun te Atua ao maiuia naba te koraki ake a kakairi n aia katoto naakai ae buakaka.—Karikani Bwaai 3:1-7, 17-19.
20, 21. (a) Tera are e karaoia ainen Tarebata are e a tia ni mate buuna, ao tera te bwai are e riki imwina nakon neiei? (b) Ti na kanga ni kakairi iroun ainen Tarebata ae e a tia ni mate buuna aei, ao bukin tera bwa e riai anne?
20 Iangoa te kaokoro imwin rongorongoia ae kananokawaki Atam ma Ewa ao imwin rongorongoia Eria ma ainen Tarebata are e a tia ni mate buuna are a a kaman taekinaki. Imwin ongoraean ana taeka ae kaunganano Eria iroun te aine aei, e a kuukana te amwarake ao n angani moa te burabeti aei kanana teutana. Ai ngaia are e a kakoroa bukin ana berita Iehova rinanon Eria. E taekinaki ae kangai n te rongorongo: “Neierei, ma teuarei, ma kaain ana auti neierei, a amamarake ni bong aika bati. E aki kenako kanoan te baketi ni baraua, ao e aki bane naba kanoan te batoro ni bwa, n ai aron ana taeka Iehova, are E atongnga iroun Eria.”—1 Uea 17:15, 16, BG.
21 E karaoa te bwai teuana ainen Tarebata aei ae te bwai ae a aki kani karaoia naba angiia mai buakoia aomata aika birioni ma birioni mwaitiia ni boong aikai. E onimakina te Atua ae te tia kakamaiu neiei ma nanona ni kabane, ao e bon aki kitanaki n te tai are e kainnano iai. E kaotaki raoi n rongorongon te Baibara aei ao ake tabeua riki bwa e bon tau n onimakinaki Iehova. (Wareka Iotua 21:43-45; 23:14.) A katauraoaki kakoaua ibukin Iehova ae e na bon aki kitania te koraki ake a karekea akoaia irouna, ni maiuia Taani Kakoauaa ni boong aikai.—Taian Areru 34:6, 7, 17-19.a
22. E aera ngkai ti kaumakaki bwa ti na aki baenikai n ukoukora akoara iroun te Atua?
22 E a uakaan ana bong ni motikitaeka te Atua “i aoia ake a maeka i aon te aba ni kabutaa.” (Ruka 21:34, 35) Bon akea ae e kona ni birinako mai iai. Akea te kaubwai ke bwaikoraki riki tabeua ake a kona ni kakawaki riki nakon ongoraeakinan ana tia Moti te Atua ae rineaki irouna ngke e kangai: “Nakomai ngkami aika kam kakabwaiaaki iroun Tamau, kam na karekea tibwangami n te tautaeka n uea ae katauraoaki ibukimi.” (Mataio 25:34) Eng, ‘E na kakabwaiaa te aomata ae raoiroi; Iehova, E na otabwaninia n te akoi n ai aron te otanga.’ (Taian Areru 5:12, BG) Ti aki riai ngkanne n ukoukora akoara iroun Iehova?
[Kabwarabwara ae nano]
a Nora Te Taua-n-Tantani, Eberi 1, 2005, iteraniba 22, barakirabe 15; Aokati 1, 1997, iteraniba 20-25.
Ko Uringnga?
• Bukin tera bwa e bon riai bwa ti na taromauria Iehova ma nanora ni koaua?
• Baikara angakarea aika a butimwaeaki iroun Iehova ni boong aikai?
• Tera ae e nanonaki n te taeka ae “aia [karea] matanriara, ba kaanga kao-mwaane” ao bukin tera bwa ti riai n angan Iehova karea akanne?
• Bukin tera bwa ti riai n ukoukora akoara iroun te Atua?
[Taamnei n iteraniba 18]
Tera te motinnano are e tuangaki te tina are e kainnano ma ni baki iroun ana burabeti te Atua, bwa e na karaoia?
[Taamnei n iteraniba 20]
Baikara kakabwaia aika ti karekei rinanon te angakarea ni kamoamoaa Iehova?
[Taamnei n iteraniba 22]
E na aki kona n uruaki nanora ngkana ti onimakina Iehova