Karaoan Angakarea Ibukin Iehova ma Nanom ni Kabane
‘Ane kam karaoia ao karaoia ma nanomi ni kabane, kaanga ibukin Iehova.’—I-KOROTE 3:23.
KATAIA NI KAEKAI TITIRAKI AIKAI:
Ti na kanga ni karinea Iehova n ara mwakuri ni katoa bong?
Baikara angakarea aika ti karaoi n ara taromauri nakon te Atua?
Ti na kanga ni kona n angan Iehova ara bwai?
1-3. (a) E koaua bwa maten Iesu i aon te kai ni kammaraki e nanonaki iai bwa e aikoa tangiri ara angakarea Iehova? Kabwarabwaraa. (b) Baikara titiraki aika rio ni kaineti ma angakarea ni boong aikai?
N TE MOAN tienture C.E., ao e a kaotaraeaki kamaunaan te Tua Rinanoni Mote n ana karea ni kaboomwi Iesu iroun Iehova nakoia ana aomata. (I-Korote 2:13,14) A aikoa riai ni karaoaki ke ni manena angakarea nako ake a kakaraoi I-Iteraera i nanoni bubua ma bubua te ririki. E a tia ni kakororaoa ana mwakuri te Tua “ae ai aron te tia kairiia ataei ae kairira nakoni Kristo.”—I-Karatia 3:24.
2 E aki nanonaki n anne bwa a aikoa kan angakarea Kristian. Ni kaitaraan anne, e taekinna te abotoro Bauro bwa e kainnanoaki te “anga taiani karea n ana kairiri taamnein te Atua rinanon Iesu Kristo.” (1 Betero 2:5) Irarikin anne e a tia ni kamataataa te abotoro Bauro bwa e kona n iangoaki maiun te Kristian ni kabane bwa “te karea.”—I-Rom 12:1.
3 Mangaia are e angakarea te Kristian nakon Iehova ngkana e kareani bwaai tabeua ke e katoka kakaraoani mwakuri tabeua ibukin tangiran te Atua. Ti na kanga ni koaua raoi bwa a butimwaeaki iroun Iehova angakarea ni kabane ni boong aikai, n ataakin te bwai are a riai ni karaoia I-Iteraera?
ARA ANGAKAREA NI MAIURA NI KATOA BONG
4. Tera ae ti riai n ururingnga ibukin ara mwakuri ni katoa bong?
4 E kona ni kangaanga kairekerekean ara mwakuri ao ara angakarea ibukin Iehova ni baika ti kakaraoi ni katoa bong ni maiura. Ti kona n tarai bwa a aki rota ara iraorao ma te Atua ara mwakuri n aron tabera ni mwengara, ara bwai n reirei, te mwakuri ni kareketianti, ao kabooani baika ti kainnanoi. Ma ngkana ko a tia ni katabua maium nakon Iehova ke ko iangoa anne n taai aika imwaim, e kakawaki uringan ae e kona n rotakibuaka am iraorao ma te Atua n tabem ni katoabong. Ti riai ni kaotira bwa Kristian ngaira n taai nako. Ti riai n tou mwin booto n reirei man te Baibara n iterani maiura nako. Mangaia are e a kaumakira Bauro ni kangai: “Ane kam karaoia ao karaoia ma nanomi ao korakorami ni kabane, kaanga ibukin Iehova, ao tiaki ibukia aomata.”—Wareka I-Korote 3:18-24.
5, 6. Baikara baika ti riai n iaiangoi ni kaineti ma aroarora ao kunnikaira ni katoabong?
5 Bon tiaki kanoan ana mwakuri ae tabu te Kristian, ana mwakuri aika e kakaraoi man te bong teuana ma teuana. Ma e kairira te reirei are e kaumakira iai Bauro, bwa ti na ‘karaoia ma nanora ni kabane kaanga ibukin Iehova’ bwa ti na iangoi arora ni maiura ni kabane. Ma ti na kanga ni maiuakina aei? E koaua bwa ti karaoi ara mwakuri ao ni kunnikainira n te aro ae riai n taai nako? Ke ti maamaa ni kaotira ae Ana Tia Kakoaua Iehova ngaira ngkana ti karaoi tabera ni katoa bong tao ibukin aroarora ke kunnikaira? Ti riai n taraia bwa e na aki riki anne! A aki kani karaoa te bwai teuana ana aomata Iehova, ae tao e na kabuakakaa aran te Atua.—Itaia 43:10; 2 I-Korinto 6:3, 4, 9.
6 Ti na nenera ngkai aron rotakin iterani maiura aika kakaokoro n te ‘nano ni kani mwakuri ma nanora ni kabane, kaanga ibukin Iehova.’ Ni karaoan aei, ti riai n ururingnga are a riai ni moan te raoiroi mai buakon aia bwai aia angakarea ni kabane ngkoa I-Iteraera ake a angan Iehova.—Te Otinako 23:19.
ARON ROTAKINI MAIUM
7. Tera ae irekereke ma te katabu ni Kristian?
7 Ni katabuani maium nakon Iehova, ko karaoa iai am motinnano ma te nanououa ke ko aki? Ni koauana, ko taekinna bwa ko na moanibwaia nanon Iehova ni maium ni kabane. (Wareka I-Ebera 10:7.) Bon te motinnano ae tamaroa anne. Akea te nanououa bwa ko a tia n ataia ae e karekei uaa aika moan raraoi ukeran nanon Iehova n te aro teuana ao te kakorakora ni kaboraoa maium iai. (Itaia 48:17, 18) A itiaki ana aomata te Atua ao a kukukurei ibukina bwa a kaotiotii aroaron Teuare e kairiria.—Nakoaia Ibonga 11:44; 1 Timoteo 1:11.
8. Tera kakawakin ururingan ae e iaiangoi aia angakarea I-Iteraera rimoa Iehova bwa a tabu?
8 E iangoaki bwa a tabu aia angakarea I-Iteraera nakon Iehova. (Nakoaia Ibonga 6:25; 7:1) Te taeka n Ebera ae rairaki bwa “tabu” e nanona te bwai ae kaokoro ke te bwai ae tii teuana ke te bwai teuana ae katabuaki nakon te Atua. Ngkana ti tangiri ara angakarea bwa a na butimwaeaki iroun Iehova, a riai ni kaokoro mai buakon ara bwai ao n aki kabarekaaki n ana waaki te aonnaba. Ti aki kona n tangiri baika e ribai Iehova. (Wareka 1 Ioane 2:15-17.) E mataata n aei bwa ti riai n rarawa nakon aaro n iraorao ke n itoman ake e na iangoira iai te Atua bwa ti baareka. (Itaia 2:4; Te Kaotioti 18:4) E nanonaki naba iai ae ti na aki kariaia bwa ti na teimatoa n taraa te bwai ae kammaira ke aroaro aika aki riai ke ni kariaia bwa ti na teimatoa n iaiangoi baikanne.—I-Korote 3:5, 6.
9. Tera aroni kakawakin aroaron te Kristian nakoia aomata nako, ao bukin tera?
9 E kaumakia raao n onimaki Bauro ni kangai: “Tai mwamwaninga ni karaoa ae raoiroi ma n tituaraoi ni buokiia aomata tabemwaang n ami bwai, bwa e kukurei te Atua n aeka ni karea akanne.” (I-Ebera 13:16) Ngaia are ngkana ti kakaraoa ae raoiroi ao ni buokiia tabemwaang ni maiura, e na iangoi ngkanne ara mwakuri akanne Iehova bwa angakarea aika kakukureia. Boni kanikinaeaia Kristian ni koaua mwannanoaia aomata.—Ioane 13:34, 35; I-Korote 1:10.
ANGAKAREA N TE TAROMAURI
10, 11. E kanga Iehova n tarai ara mwakuri ni minita ao ara taromauri, ao tera uaana nakoira?
10 Te anga teuana ae e otara raoi iai kakaraoan ae raoiroi nakoia aomata iroura ngaira aika Kristian, bon rinanoni ‘kaotiotan ara kantaninga.’ Ko kamanenai aanga nako n uarongorongo iai? E atonga te mwakuri ni Kristian ae kakawaki aei Bauro, bwa “te karea ni karaoiroi nakon te Atua ae nako mai wira aika kaotiota [aran te Atua] i mataia aomata.” (I-Ebera 10:23; 13:15; Otea 14:2) E bati ae kona n nanonaki ibukini mwaitin te tai n uarongorongo ao katamaroaan arora n tataekina te rongorongo ae raoiroi ibukin te Tautaeka n Uea, ao a bati naba tibwangara n Te Botaki Ibukin te Uarongorongo ake a kammwakuri ara iango i aon aei. Ngaia are ngkai ara mwakuri ni minita ao ara uarongorongo n te tai ae aki baireaki boni “karea ni karaoiroi” ao iteran naba ara taromauri, e riai ngkanne ni moan te raoiroi ara angakarea ae ti anga. E ngae ngke a kakaokoro baika riiriki nakoira, ma ti kaotiota ara kakaitau ibukini ara onimaki mani mwaitin te tai ae ti kabanea n tataekinan te rongorongo ae raoiroi.
11 A aki toki Kristian ni kabanea te tai ae bati n taromauria Iehova ni mwengaia ke n te ekaretia. Aio ae e tangira Iehova bwa ti na kakaraoia. Ni koauana, ti aikoa kabaeaki ni kawakinan te motirawa n te Bongi n Taabati ke ni mwamwananga nakon tooa i Ierutarem. Ma boongi n toa rimoa akanne bon iai katotongaia n te maiu ni Kristian. E teimatoa ni kantaningaira Iehova, bwa e na bon reke naba ara tai ibukin ara ukeuke n reirei i bon iroura n ana Taeka, n tataro, ao ni kakaaei bobotaki ni Kristian e ngae ngke a bati tabera aika akea uaaia. Ao a biririmoa atun utu ni Kristian ni kairi aia Taromauri n Utu ma kaaini bataia. (1 I-Tetaronike 5:17; I-Ebera 10:24, 25) Ni kaineti ngkanne ma ara mwakuri aika irekereke ma ara iraorao ma te Atua, ti wanawana ngkana ti titirakinira ni kangai: ‘I kona ni katamaroaa riki arou n taromauri?’
12. (a)E kona ni kabotauaki ma tera ni boong aikai, te taromauri rimoa ni kaineti ma te boi ae boiarara? (b) Tera aron rotakin ara tataro n te kabotau aei?
12 E anene ni kangai Tawita nakon Iehova: “E na kamenaaki au tataro i matam ba kaanga te karea ae boiarara.” (Taian Areru 141:2, BG) E raoiroi ngkana ti iaiangoa mwaitin ara tai n tataro ao baika ti tataroi. E katitebooaki “aia tataro te koraki aika itiaki” n te boki ae Te Kaotioti ma te boi ae boiarara ae kaanga a mwemwerake tataro akana butimwaeaki akanne n aron te boi ae boiarara ao ni kakukurei. (Te Kaotioti 5:8) I aon Iteraera rimoa, ao e riai ni katauraoaki raoi n te aro ae riai, te boi ae boiarara are a aki toki ni kareanna nakon Iehova. E na butimwaeaki iroun Iehova tii ngkana a angakarea ni kaineti ma kaetieti ake e a tia ni karaoi. (Te Otinako 30:34-37; Nakoaia Ibonga 10:1, 2) Ngkana ti tou mwin ana kaetieti n ara tataro ao n iangoi bwa a tabu, ti a kona iai ni kakoauaa bwa e na butimwaeaki iroun Iehova.
TE ANGANGA AO TE ANGANGANAKI
13, 14. (a) Tera are a karaoia Ebaberorito ma kaain te ekaretia are i Biribi nakoni Bauro, ao tera ana iango te abotoro iai? (b) Ti na kanga ni kakairi n ana katoto Ebaberorito ao kaaini Biribi?
13 E kabotauaki te mwane are ti a anganga ibukini boutokaan te mwakuri n tataekina te rongorongo ni katobibia te aonnaba, bwa te angakarea, e ngae naba ngkana ti anga ae bati ke ae karako. (Mareko 12:41-44) N te moan tienture C.E., ao e kanakoaki man te ekaretia are i Biribi Ebaberorito bwa e na nako Rom ma baike e kainnanoi Bauro ibukini maiuna. E uota aia bwaintangira kaain te ekaretia te mwane te tia uarongorongo mai Biribi aei. Tiaki aia moan tai aei kaaini Biribi ni kaota nanoia n tituaraoi nakoni Bauro. A iangoia naakai bwa a na tituaraoi nakoni Bauro, bwa e aonga n aki tabeaianga ibukini baika e kainnanoi ibukini maiuna, ike e a kona iai ni kabanea ana tai ae bati riki n te mwakuri ni minita. Tera ana iango Bauro n te bwaintituaraoi aei? E atongnga bwa “te karea ae boiarara ae butimwaeaki, ao e kakukureia nanon te Atua.” (Wareka I-Biribi 4:15-19.) E boni kakaitau Bauro n aia mwakuri n akoi kaaini Biribi ao ai uana naba ma Iehova.
14 N aron anne, e rang ni kakaitau naba Iehova n ara bwaintangira ibukini boutokaan te mwakuri n uarongorongo ni katobibia te aonnaba ni boong aikai. Irarikin anne, e berita bwa ngkana ti teimatoa ni moanibwaia te Tautaeka n Uea ni maiura, e na bon anganira baika ti kainnanoi ibukini maiura, ara onimaki ao marurungira.—Mataio 6:33; Ruka 6:38.
KAOTA AM KAKAITAU
15. Baikara bwaai tabeua aika ko rangi ni kakaitaua iai Iehova?
15 A bati bukina ae ti riai ni kakaitau iai nakon Iehova. Ti bon riai ni kaitaua ni katoa bong ibukin ana bwaintituaraoi ae te maiu. E anganira bwaai ni kabane aika ti kainnanoi ibukini kateimatoaani maiura n aron te amwarake, te kunnikai, mwengara ao ai te ea ae ti ikeikenna. Irarikin anne ti karekea te kantaninga man ara onimaki ae boto i aon te atatai ae eti. E bon eti ngkanne ae ti riai n taromauria Iehova, ao n anga ara karea ni karaoiroi ibukina bwa bon Atuara, ao ibukin naba baike e a tia ni karaoi ibukira.—Wareka Te Kaotioti 4:11.
16. Tera arora ae riai ibukin ana karea ni kaboomwi Kristo?
16 N aron ae ti a tia n noria n te kaongora ae imwain aei, ana bwaintituaraoi te Atua ae rangi ni kakawaki riki nakoia aomata nako bon ana karea ni kaboomwi Kristo. Bon aei kaotiotan tangirakira ae rangi n rianako iroun te Atua. (1 Ioane 4:10) Tera te namakin ae riai n reke mai iai? E taku Bauro: “E kairoroira ana tangira te Kristo, ibukina bwa aei ae ti a tia ni motikia, bwa e mate te aomata ae tii temanna ibukia aomata ni kabane, . . . ao e mate ibukia ni kabaneia, bwa a aonga n aki manga maiu akana maiu i bon ibukia, ma a na maiu ibukin teuare mate ibukia, are e a tia ni kautaki.” (2 I-Korinto 5:14, 15) N etina, e taekinna Bauro bwa ngkana iai nanora ni kakaitau ibukin ana akoi te Atua ae rianako, ti na kamanenai maiura ni karinea ma Natina. E kaotaki ara tangira ma nanora ni kakaitau nakon te Atua ao Kristo n ongeabara, ma ingaingan nanora n uarongorongo ao karekeaia taan rimwini Kristo.—1 Timoteo 2:3, 4; 1 Ioane 5:3.
17, 18. N aaro raa ake a a tia iai tabeman ni kabatiai riki aia tai ibukin te angakarea ni karaoiroi nakon Iehova? Taekina te katoto.
17 Ko kona ni kanakoraoa am karea ni karaoiroi ae ko angan te Atua? Imwin iaiangoan ana mwakuri aika raraoi Iehova ibukira, a bati aika a kaungaaki bwa a na bairei raoi aia tai, ao aia mwakuri bwa a aonga ni kabatiai riki aia tai n uataboa te mwakuri n uarongorongo ibukin te Tautaeka n Uea, ke mwakuri riki tabeua n te ekaretia. Ma a tia tabeman ni karaoa te mwakuri n auxiliary bwaiania i nanon teuana te namwakaina ke e nako riki ni katoa ririki, ao ake tabeman a a tia ni karaoa te mwakuri n regular bwaiania. Ao tabeman riki a karaoa te mwakuri ni kateitei ibukini boutokaan te Tautaeka n Uea. Bon aikai aanga aika rangi n raraoi ibukini kaotan te nano ni kakaitau. Ngkana a karaoaki ma te nano ae eti ibukini kaotan te kakaitau ao te kakatonga, a a boni butimwaeaki iai iroun te Atua mwakuri aika tabu aikai.
18 A bati Kristian aika a namakinna bwa a riai ni kakaitau nakon Iehova ao a kaungaaki iai. Te aomata temanna ae e namakina aei bon Morena. E kakaaei kaekaan titiraki ni kaineti ma ana onimaki n te Aro ni Katorika, are e kaikawaaki iai, ao karioiango i aon Atia. Ma e aki reke te kaeka ae karaua nanona n taabo aikai. E a tibwa reke raun nanona n ana onimaki ngke e a moana ana reirei n te Baibara ma Ana Tia Kakoaua Iehova. E rangi ni kaitaua Morena ibukini baike e a tia n reiakin man te Baibara, bwa e a karekea te kakukurei ni maiuna ike e nang kaota iai ana kakaitau nakon Iehova ni kamanenaani korakorana ni kabane ni beku ibukina. E moana ana auxillary bwaiania ni katoa namwakaina imwini bwabetitoana, ao e a riki bwa te regular bwaiania ngke e angaraoi karaoana irouna. E riki anne 30 te ririki n nako ao e bon teimatoa naba ngkai Morena ni kabwanina ana tai n te mwakuri ni minita.
19. Ko na kanga ni kabatiaa riki am tai ibukin am angakarea nakon Iehova?
19 Ni koauana, a bati ana toro Iehova aika kakaonimaki ake aki kona ni karaoa te mwakuri ni bwaiania ibukin baika riiriki ni maiuia. N aki ongeia bwa tera ae ti kona ni karaoia n ara beku ibukin Iehova, ma ti kona ngaira ni kabane n anga ara karea aika a na butimwaeaki irouna. Ti riai ni maiuakina ana boto n reirei te Baibara n aroarora, ao n uringnga naba ae ti tei ibukin Iehova n taai nako. Ti riai ni kakoauaa raoi kakoroani bukin ana kantaninga nako te Atua rinanon ara onimaki. Ti buoka kabutanakoan te rongorongo ae raoiroi n ara mwakuri aika raraoi. Kioina ngkai a onrake nanora ni kani kakaitau ibukin baika e a tia ni karaoi ibukira Iehova, ti bia teimatoa n angakarea ma nanora ni kabane nakon Iehova.
[Taamnei n iteraniba 25]
Ko kamanenai aanga nako n uarongorongo iai?
[Reirei ae kakawaki n iteraniba 27]
E kaungaaki nanom man ana mwakuri Iehova aika raraoi bwa ko na katamaroaa riki am angakarea ni karaoiroi nakon Iehova?