Ko Kukurei N Anganano Ibukin Te Tautaeka N Uea?

1. Baikara anganano ake a karaoi aomata aika bati ao bukin tera?

A KUKUREI aomata n anganano ibukini baika kakawaki i bon ibukia. A anga aia tai kaaro, aia mwane ao korakoraia bwa a aonga ni kakabwaiaaki natiia. Iai tabeman rooro n rikirake ake a takaakaro ma ni kakukureia ao tabeman tabonroroia ake a kan tei ibukin abaia n te kaboo n taian takaakaro n te Olympic, a kabanei aoa aika bati ni katoabong ni kakorakoraia ni kataneiai ao n reiakin aaro n takaakaro. E anganano naba Iesu ibukini baika kakawaki i bon ibukina. E bon aki ukoukora te kaubwai ao akea naba natina. Ma e rinea kaatuuan riki karikirakeani baika a irekereke ma te Tautaeka n Uea. (Mataio 4:17; Ruka 9:58) Anne naba aroia taan rimwina bwa a kitani baika bati ibukini boutokaan ana Tautaeka n Uea te Atua. E moanibwai ao ni kakawaki irouia boutokaani karikirakean te Tautaeka n Uea anne ao n anganano ni karaoa aia kabanea ni kona iai. (Mataio 4:​18-22; 19:27) Ngaia are ti kona n titirakinira ni kangai: ‘Tera ae kakawaki ni maiu?’

2. (a) Baikara anganano aika kakawaki irouia Kristian ni koaua ni kabane? (b) Baikara riki anganano ake a kona ni karaoi tabeman?

² A kakawaki tabeua anganano irouia Kristian ni koaua ni kabane ao a kainnanoaki ibukini karikirakean ao kateimatoaan ara reitaki ae kaani ma Iehova. A irekereke aeka n anganano akanne ma kabanean ara tai ao korakorara n tataro, ni wareware n te Baibara, te taromauri n utu, kakaaeani bobotaki ao te mwakuri ni minita.a (Iotua 1:8; Mataio 28:​19, 20; I-Ebera 10:​24, 25) Imwin ara kakorakora ao ana kakabwaia Iehova, e a rikirake te mwakuri n uarongorongo ao a bati ake a teimatoa n uarurung nakoni “maungani maneaban Iehova.” (Itaia 2:​2, BG) Ibukini boutokaani mwakuri ni kaineti ma te Tautaeka n Uea, a bati ake a anganano bwa a na beku n te Betaera, a ibuobuoki ni katean Taabo n Taromauri ao Taabo n Runga, bairean raoi bwabwaro ke ni mwakuri n ibuobuoki n taai ni kabuanibwai. A karaoaki mwakuri n anganano aika raka aikai tiaki ibukina bwa e na reke iai te maiu n aki toki iroura ma a rangi ni kakawaki ibukini boutokaani baika irekereke ma te Tautaeka n Uea.

3. (a) Ti na kanga ni kakabwaiaaki ngkana ti anganano ibukin te Tautaeka n Uea? (b) Baikara titiraki ake ti riai n iaiangoi?

³ E a korakora riki ngkai kainnanoani boutokaan te Tautaeka n Uea. E kakimwareirei noraia aika bati ake a tauraoi n anganano ibukin Iehova! (Wareka Taian Areru 54:6.) E karekea te kimwareirei ae bati nakoira te nano n tituaraoi anne ao ti kakabwaiaaki iai ngkai ti kantaningaa rokon ana Tautaeka n Uea te Atua. (Te Tua-Kaua 16:15; Mwakuri 20:35) Ngaia are ti riai ngaira ni kabane n tuoi raoi nanora. Iai aanga ake ti kona ni karakaa riki ara anganano ibukin te Tautaeka n Uea? Tera aroni kamanenaan ara tai, ara mwane, korakorara ao konabwaira? Baikara kauring aika ti riai n iaiangoi? Ti na rinanon te katoto teuana are ti kona iai ni kakairi ni karaoan angakarea akanne ma kukurein nanora ike e a karikirakeaki iai kimwareireira.

AIA ANGAKAREA TIBUN ITERAERA RIMOA

4. Baikara aia angakarea tabeua tibun Iteraera rimoa?

⁴ A boto angakarea ake a karaoaki irouia tibun Iteraera rimoa i aoni karekeani kabwaraani buure. A kainnanoaki angakarea ibukia aomata bwa a na karekea akoaia mairoun Iehova. Tabeua mai buakon aikai bon tuua ao anganano. (Nakoaia Ibonga 23:​37, 38) Irarikina, a riai ni kabwaninaki karea ake a kabuekaki ao n riki bwa angakarea n anganano ke bwaintituaraoi nakon Iehova. Irarikin angakarea ake a nako man te nano, iai naba te karea ae te ninima are e na kabwaroaki ni kabane i aon te baonikarea bwa te “boi ae boiarara nakon Iehova.” (Warekaia Iteraera 15:​10, BG) Te katoto teuana ae rianako ibukin angakarea akanne, bon are e noraki n ana bong Toromon ae e irekereke ma katabuan te tembora.​—2 Rongorongo 7:​4-6.

5. Tera te tua are e karaoia Iehova nakoia naake a aki kaubwai?

⁵ E tatangira Iehova ao e ataia aomata ni kabane bwa a aki kona n anga te mwaiti ae boraoi, ao e tua bwa a kona n anga n aron aia kona n tatabemania nako. E kamatoaaki n ana tua Iehova bwa e riai ni kawawaeaki raraan te man are e na riki bwa “bannani baika raraoi aika a na roko” rinanon Natina ae Iesu. (I-Ebera 10:​1-4) Ma e ngae n anne, e aki tuamatoa Iehova ni kaineti ma kabonganaan te tua anne. N te katoto, e butimwaei karea aika turukon te Atua ngkana e kangaanga iroun te aomata anne karekean ana karea man te nanai ni kooti ke ni kao. Ibukin anne, a kona naake a aki kaubwai n angakarea nakon Iehova ma te kukurei. (Nakoaia Ibonga 1:​3, 10, 14; 5:7) E ngae ngke e butimwaei angakarea aika maan aika kakaokoro Iehova, ma iai bwaai aika uoua ake e tangiri mairouia aomata ni kabane ake a angakarea ma kukurein nanoia.

6. Tera te tua nakoia aomata ni kabane ake a angakarea, ao tera aroni kakawakin touani mwin tuua akanne?

⁶ Te moan, e riai te aomata anne n anga ana kabanea n tamaroa. A tuangaki tibun Iteraera iroun Iehova bwa a riai ni marurung raoi aia karea are a na anga bwa a aonga ni “mutiakinaki iroun te Atua.” (Nakoaia Ibonga 22:​18, 20, BG) Ngkana iai toabuakan te man, e na taraaki ngkanne bwa te angakarea ae na aki butimwaeaki iroun Iehova. Te kauoua, e riai n itiaki ao n aki kabarekaaki te aomata are e angakarea. Ngkana e aki itiaki aroaron te aomata anne, e riai ni karaoa te angakarea ni kabwarabure ke te angakarea ni kabooa mwin te bure ni kaoka iai akoana iroun Iehova imwaini karaoan ana angakarea ma kukurein nanona. (Nakoaia Ibonga 5:​5, 6, 15) E riai ni kakawaki karaoan aei. E kamatoaa n taekinna Iehova bwa ngkana e katoonga te karea are anga temanna ma kukurein nanona te aomata are e kamwara, e bon riai ngkanne n teweakinako mai buakoia ana aomata. (Nakoaia Ibonga 7:​20, 21) N iterana are teuana, ngkana e angakarea te aomata ae raoiroi mataniwin nanona i matan Iehova ao akea toabuakan ana karea, e na kimwareirei ao n rauaki iai.​—Wareka 1 Rongorongo 29:9.

ANGANANO NI BOONG AIKAI

7, 8. (a) Tera te kimwareirei ae a karekea aomata aika bati man aia anganano ibukin te Tautaeka n Uea? (b) Baikara bwaai aika iroura ake ti kona n anganano iai nakon Iehova?

⁷ Ni boong aikai, a bati ake a kukurei naba ni mwakuri korakora ibukin Iehova. E boni kimwareirei iai Iehova. E karekea naba te kimwareirei te mwakuri ibukia tarira n te onimaki. E taekinna te tari te mwaane are uataboa katean Taabo n Taromauri ao ni buokiia te koraki ake a rotaki imwini kabuanibwai aika karina, bwa e kangaanga aroni kabwarabwaraan raun nanona n ana beku n itera aikai. E taku: “A materaoi mwakuri ao kakorakora ni kabane n noran te kimwareirei ao te kakaitau irouia taari n te ekaretia, imwini bobotakia n aia Tabo n Taromauri ae boou ke ni karekean te ibuobuoki imwini rikini kabuanibwai aika karina.”

⁸ E a tia ana botaki Iehova ni boong aikai ni kakaaei aanga ni kaineti ma boutokaan te mwakuri ibukina. N 1904 ao e korea ae kangai Brother C. T. Russell: “A riai aomata nako n iangoia bwa a rineaki iroun te Uea bwa a na karaoa aia kabanea n tamaroa ni kamanena aia tai, mwaakaia, aia mwane ao a a bati riki, ngaia are a riai n ukera aroni kamanenaan tarena aikai n tatabemania nako ibukin neboan te Toka.” E ngae ngke ti karekei kakabwaia aika bati, ma e na bati riki baika ti na karaoi ni kaineti ma ara anganano ibukin Iehova. (2 Tamuera 24:​21-24) Ti kona ni kamanenai n te aro ae raoiroi riki baika iroura ibukin ara anganano nakon Iehova?

9. Tera te boto n reirei n ana tua Iesu n Ruka 10:​2-4 ae ti kona ni maiuakinna ibukini kabonganaan raoi ara tai?

⁹ Ara Tai. E kainnanoaki te tai ae rangi ni bati ao te kakorakora ibukin rairan ao boreetian ara boki aika aanaki man te Baibara, katean taabo n taromauri, bairean raoi taiani bwabwaro, te ibuobuoki nakoia ake a rotaki ni kabuanibwai aika karina ao karaoani mwakuri riki tabeua aika kakawaki. Ti kona ni karaoi baike a tia ni baireaki tii i nanon 24 te aoa ni katoabong. E anga te boto n reirei teuana Iesu ae kona n ibuobuoki ibukini kabonganaan ara tai ma te wanawana. Ngke e kanakoia taan rimwina bwa a na uarongorongo, e tuangia bwa a na aki “kabanetai n inga ma aomata i aoni [kawaia].” (Ruka 10:​2-4) Bukin tera ngke e anga kaetieti akanne Iesu? E kamataata temanna te tia rabakau i aon te Baibara ni kangai: “A aki kakaraoaki aeka ni kamauri akanne n ara bong aikai n aron are a kakaraoia kaain Atia Mainiku ae te bobaraaki ni karinerine ke kaenakoani baim ni kamauri, ma a boni bati naba aika irabwati ao ni bobaraaki naba nako aontano. A kabanea te tai ae bati aeka ni mwakuri aikai.” E aki kaungaia taan rimwina Iesu bwa a na aki karinerine. Ma e buokiia bwa a aonga n ataia bwa e uarereke te tai ibukini karaoan anne ao a riai ni karaoa ae bati ibukini baika kakawaki riki. (I-Ebeto 5:16) Ti kona ni maiuakina te boto n reirei aei bwa e aonga ni bati riki ara ibuobuoki ibukin te Tautaeka n Uea?

10, 11. (a) Baikara aroni kabonganaan ara bwaintangira tabeua ibukin te mwakuri ni katobibia te aonnaba? (b) Tera te boto n reirei n 1 I-Korinto 16:​1, 2 ae kona ni buokira?

¹⁰ Ara mwane. E kainnanoaki te mwane ae bati ni kaineti ma boutokaani mwakuri ibukin te Tautaeka n Uea. Ni katoa ririki ao e bane te mwane ae mirion ma mirion te taara ibukini kaitaraan te kabanemwane irouia mataniwi aika mwamwananga, special bwaiania ao mitinare. Man 1999 ni karokoa ngkai ao a a tia ni kateaki Taabo n Taromauri aika 24,500 n aaba ake a karako kaubwaia. E ngae n anne, e kaania ngkai 6,400 mwaitin Taabo n Taromauri ake a tangiraki riki kateaia. Ni katoa namwakaina, a boreetiaki 100 tabun te mirion katoton te Taua-n-Tantani ao te Awake! A bane ni boutokaaki baikai man ami bwaintangira aika aki tebonaki.

¹¹ E korea te boto n reirei teuana te abotoro Bauro ae riai n touaki mwina ni kaineti ma taiani bwaintangira. (Wareka 1 I-Korinto 16:​1, 2.) E kaungaia tarina ake i aoni Korinto rinanoni kairana n te taamnei ae raoiroi, bwa na aki tataninga ni karokoa banen te wiki ibukin tuoan nikiran aia mwane, ma a riai ni kaokoroa teutana ni moan te wiki anne n te aro ae boraoi ma are a kona n anga. N aron ae karaoaki n te moan tienture, a moantaai naba ni babaire tarira ao mwaanera n ara bong aikai bwa a aonga n anga aia bwaintangira ni kaineti ma aia konabwai. (Ruka 21:​1-4; Mwakuri 4:​32-35) E rangi ni kakawaki iroun Iehova te aeka n nano anne.

12, 13. Baikara tabeaianga ake a kona ni kerikaaki iai tabeman man aia anganano ni kaineti ma korakoraia ao aia konabwai, ma e na kanga Iehova ni buokiia?

¹² Korakorara ao ara konabwai. E boutoka ara mwakuri Iehova ngkana ti kabongana korakorara ao ara konabwai ibukin te Tautaeka n Uea. E berita bwa e na buokira ngkana ti kua. (Itaia 40:​29-31) Ti namakinna bwa a aki tau rabakaura ibukini buokan te mwakuri? Ti iangoia bwa a bati aika a mwaatai riki nakoira? Uringnga bwa e kona Iehova ni karikirakea aia konabwai aomata nako n aron are e karaoia nakon Betarera ao Ooriaba.​—Te Otinako 31:​1-6; nora te taamnei ni moan te kaongora aei.

¹³ E kaungaira Iehova bwa ti na anga ara kabanea n tamaroa ao n aki kerikaaki. (Taeka N Rabakau 3:27) A tuangaki te baronga ae Iuta ake i Ierutarem iroun Iehova ni manga katean te tembora bwa a na kananoi aia iango n te baere a karaoia ibukin te mwakuri ni kateitei. (Akai 1:​2-5, BG) A a tia ni katabetabeaki ao a aikoa moanibwaia te beku ibukin Iehova. Ti wanawana ngkana ti iangoi baike ti moanibwai ni maiura bwa a na boraoi ma baika a kakawaki iroun Iehova. Ti kona n ‘iaiangoi aroarora’ bwa ti aonga ni kabatiaa riki boutokaan te Tautaeka n Uea ni kabaneani boong aikai?

ANGANANO NI BAIKA IROURA

14, 15. (a) Ti kanga ni kaungaaki n aia katoto tarira ake a karako kaubwaia? (b) Tera ae ti riai ni kani karaoia?

¹⁴ A bati aika maeka n taabo ake e taabangaki iai te kangaanga ke te maiu ni kainnano. E kakorakoraa ara botaki ni ‘buoka’ kainnanoia tarira ake a maeka n taabo akanne. (2 I-Korinto 8:14) E ngae n anne, a a tia tabeman taari ake aki rangi ni kaubwai n nora kakawakini kakimwareirein te anganga. E boni kukurei Iehova ngkana a anga ma kukurein nanoia te koraki ake a maiu ni kainnano.​—2 I-Korinto 9:7.

¹⁵ A kaokoroa te mwaake teuana ae uarereke n aia onnaroka taari tabeman n te tabo teuana ae korakora iai te maiu ni kainnano i Aberika ao ni kabongana te mwane mani bwaai ake a kaboonakoaki mai iai ni boutokaa mwakurian te Tautaeka n Uea. N te aba naba anne, e karaoaki te kaetieti ibukin te mwakuri ni kateitei ae rangi ni kainnanoaki ibukin te Tabo n Taromauri. A tangiria taari mwaane ao aine n te aba anne bwa a na ibuobuoki. E ngae n anne, e na waakinaki te kateitei anne i nukan aia tai n ununiki. Ibukini korakoran nanoia ni kan ibuobuoki, a a uataboa katean te Tabo n Taromauri n te ngaina ao a ununiki n aia tawaana n te tairiki. Ai boni kaungananora aroia ni kan anga boni ngaiia! Ti a kauringaki iai aroia taari ake i Maketonia n te moan tienture. E ngae ngke e “rangi ni karako aia bwai” ma a onnon bwa a na kariaiakaki n anga ngaiia ibukini buokan te mwakuri ni kateitei are e nang waakinaki. (2 I-Korinto 8:​1-4) Ti bia bane n ‘angabwai n te aro ae ti kona n ai aroni kakabwaiaara are e anganira Iehova.’​—Wareka Te Tua-Kaua 16:​17, BG.

16. Ti na kanga ni kakoauaa raoi bwa a butimwaeaki ara anganano iroun Iehova?

¹⁶ E ngae n anne, e kainnanoaki te taeka ni kauring. N aron ae noraki irouia tibun Iteraera rimoa, ti riai naba n taraa raoi ara anganano ma kukurein nanora bwa a na butimwaeaki iroun te Atua. E riai n teimatoa ni boraoi kakawakin ara beku ake a irekereke ma ara utu ao taromaurian Iehova. A na bon aki “butimwaeaki riki” ara anganano n anga ara tai ao kaubwaira ibukia tabemwaang, ngkana e kairira nakoni kakeaani bongan ara onimaki ke marurungia kaain ara utu. Ma e ngae n anne, e aki kantaningaira Iehova bwa ti na anganano ni baika akea iroura n aron ara tai, korakorara ao bwaai riki tabeua. (Wareka 2 I-Korinto 8:12.) Irarikin anne, ti riai ni kateimatoa reitakira ma Iehova. (1 I-Korinto 9:​26, 27) Ngaia are ti kona ni kakoauaa raoi bwa ngkana ti maiuakini kaetieti man te Baibara, e na reke iroura te kimwareirei ae rangi ni bati ao te raunnano man ara anganano ake a “butimwaeaki riki” iroun Iehova.

A RANGI NI KAKAWAKI ARA ANGANANO

17, 18. Tera aron ara namakin ibukia aomata nako ake a anganano ibukin te Tautaeka n Uea, ao tera ae ti riai ni bane n iaiangoia?

¹⁷ A bati tarira ao mwaanera ake a “kabwaroaki n ai aron te karea ae te wain” rinanoni boutokaani mwakuri aika kainnanoaki ibukin te Tautaeka n Uea. (I-Biribi 2:17) Ti rangi ni kakaitau nakoia te koraki ake a tia ni kaotiota te nano ni kan anga anne. A riai naba ni kamoamoaaki buu aine ao natiia taari ake a kaira te mwakuri ibukin te Tautaeka n Uea ibukin nanoia n tituaraoi ao n anga boni ngaiia.

¹⁸ E rangi ni kainnanoaki te mwakuri korakora ibukini boutokaan te Tautaeka n Uea. Ti bia tataro ao ni kaatuui ara iango n tatabemanira nako bwa tera arora n uataboa ae bati riki nakon Iehova n aron ara kabanea ni kona. Ni karaoan anne, ti na karekei kakabwaia aika bati ngkai ao aika bati riki “n te waaki ae na roko i aon te aba.”​—Mareko 10:​28-30.