Iesu—Te Tabo Are E Roko Mai Iai

E TABEKAKI te titiraki anne iroun te Kowana n Rom ae Bontio Birato ngke e baireaki taekani kamatean Iesu. E ataa te tabo Birato are e roko mai iai Iesu i aon Iteraera. (Ruka 23:6, 7) E ataia naba bwa Iesu bon tiaki te aomata n ai arora. E koaua bwa e nanokokoraki Birato bwa e a tia ngkoa ni maiu Iesu? E bon tauraoi ni butimwaea ao ni mwakuria te koaua te tia tautaeka ae te beekan aio? N aki ongeia bwa tera are e riki, e aki kaeka Iesu, ao e waekoa n teretere bwa e bane riki nanoni Birato n nakoana nakon te koaua ao te kaetitaeka ae riai.​—Mataio 27:11-26.

Ti karabwarabwa bwa e kai ataaki te tabo are e roko mai iai Iesu irouia te koraki ake a kan ataia. E kaotaki raoi n te Baibara moan rikin Iesu Kristo. Iangoa aei.

Te tabo ae e bungiaki iai

E kaotaki n te warebwai ni boong aikai bwa e bungiaki Iesu n te tabo ae mangori ni kaawan Iuta ae Betereem ni moan te ririki ae e a ataaki ngkai bwa 2 B.C.E. E kanakoa te moti ibukin te karin ara te Kaitara ae Aukutito, are e a kaumakaki iai tinan Iesu ae Maria are e a “kaani bung” ao buuna ae Ioteba bwa a na mwananga nako Betereem are abaia ana bakatibu Ioteba. Ngke e a aki kona n reke nneia n te auti n iruwa n te kaawa ae e ibetutu kaaina, a a riai taanga aikai ni kabongana aia tabo maan, ike e a bungiaki iai Iesu ni nneni kanaia maan.​—Ruka 2:1-7.

N tienture ake imwaina, e taetae ni burabetinaki n te Baibara te tabo are e na bungiaki iai Iesu ni kangai: “Ngkoe, ae Betereem ae Eberata, ae ko mangori ni mena i buakoia ngaan Iuta, E na oti nako temanna mai roum nako Iu ae na riki ba te tia tau-taeka i buakoia Iteraera.”a (Mika 5:2, BG) E bae ni mangori Betereem n te aro are e a aki warekaki i buakoni kaawan Iuta. Ma e ngae n anne, iai karinean te kaawa ae mangori aei ae onoti. E na otinako mai Betereem te Mesia ke te Kristo are e beritanaki.​—Mataio 2:3-6; Ioane 7:40-42.

Te tabo are e kaikawaaki iai

Imwin tikuia i Aikubita i nanon tabeua te tai, a a manga okira Natareta ana utu Iesu ae te kaawa teuana i Kariraia ae tao 96 te kiromita i meangin Ierutarem. E tuai koro tenua ana ririki Iesu n te tai anne. A karaoi aia mwakuri taan ribana, taani kawakintiibu ao taan akawa n te tabo ae rangi n tamaroa aio, are e a ikawairake iai Iesu n te utu ae bubura, ae e aki rangi ni kaubwai.​—Mataio 13:55, 56.

N tienture ake imwain anne, e taetae ni burabetinaki n te Baibara bwa te Mesia anne boni “kaain Natareta.” E taekinna te tia korea te Euangkerio ae Mataio bwa a maeka ana utu Iesu i “Natareta, bwa e na kakoroaki iai bukin aia taeka burabeti ae kangai: ‘E na atongaki bwa kaain Natareta.’” (Mataio 2:19-23) E taraa n irekereke te ara ae Natareta ma te taetae n Ebera ae “bwebwe.” E teretere bwa Mataio e taekina ana taetae ni burabeti Itaia are e taekina te Mesia bwa e na “bwebwe” mairoun Iete, ae nanonaki iai bwa te Mesia boni kanoan Iete are taman te Uea ae Tawita. (Itaia 11:1, BG) Ni koauana, Iesu boni kanoan Iete mairoun Tawita.​—Mataio 1:6, 16; Ruka 3:23, 31, 32.

Te tabo are e moan roko mai iai

E reiakinaki n te Baibara bwa e a kamani maiu Iesu imwaini bungiana n aia tabo maan i Betereem. N ana taetae ni burabeti Mika are mai eta ao e reitia n taekinna bwa “ma ngkoangkoa otinakona mani boong ake akea moaia.” (Mika 5:2, BG) Kioina ngkai te moan nati Iesu iroun te Atua, bon te taamnei ngaia i karawa imwain rikina n aomata i aon te aba. E taekina ae kangai Iesu ibukina: “I ruo mai karawa.” (Ioane 6:38; 8:23) E kanga n riki aei?

E karaoa te kakai Iehova ae te Atua rinanon te taamnei ae raoiroi ni kamwaingani maiun Natina i karawa nakoni biroton te teinnaine ae te I-Iutaia ae Maria, bwa e na bungiaki bwa te aomata ae kororaoi.b E kai riki te kakai anne mani korakoran te Atua ae Moan te Mwaaka. E kaota aei te anera nakoni Maria ngke e kabwarabwaraa ni kangai: “Akea te taeka teuana mairoun te Atua ae e na aki kakoroaki bukina.”​—Ruka 1:30-35, 37.

E bati riki ae taekinaki n te Baibara nakon tii tuangakira te tabo are e roko mai iai Iesu. Ti tuangaki baika bati n aroni maiun Iesu n Euangkerio aika aua aika Mataio, Mareko, Ruka ao Ioane.