Bon Tibwangau Iehova

“Bon tibangam ma kanga abam Ngai i buakoia tibun Iteraera.”​—WAREKAIA ITERAERA 18:20, BG.

1, 2. (a) Tera te bwai are riki nakoia tibun Rewi ni kaineti ma abaia? (b) Tera te karaunano are a anganaki tibun Rewi iroun Iehova?

IMWIN tokanikaia tibun Iteraera i aon angiin aaba ake n te Aba ni Berita, ao e a iangoia Iotua bwa e na tibwatibwaa te aba n te kaiwa. E karaoa te mwakuri aei ma te Ibonga are Rietata ae Ereata ao mataniwia baronga nako. (Warekaia Iteraera 34:13-29) Ma a aki karekea tibwangaia tibun Rewi n aron are a karekea baronga ake tabeua. (Iotua 14:1-5) E aera ngkai akea abaia tibun Rewi ke tibwangaia n te Aba ni Berita? A a mwanuokaki taekaia?

² Ti karekea te kaeka n te bwai are a tuangaki tibun Rewi iroun Iehova. E beritanna Iehova bwa e na aki kitania. E taku: “Bon tibangam ma kanga abam Ngai i buakoia tibun Iteraera.” (Warekaia Iteraera 18:20) E kakawaki te karaunano aei: “Bon tibangam . . . Ngai”! Tera am namakin ngke arona bwa e bon taekina anne Iehova nakoim? N te moantai tao ko na titiraki ni kangai: ‘E kona Iehova ni beritana anne nakon temanna ae ai arou?’ Tao ko na manga titiraki riki ni kangai: ‘E kona n riki Iehova bwa tibwangaia ni koaua Kristian aika aki kororaoi ni boong aikai?’ Iai irekereken titiraki akanne ma ngkoe ao ake ko tangiriia. Mangaia are ti na nenera ae nanonaki n ana taeka te Atua aikai. Ti na buokaki n anne n oota bwa e na kanga n riki Iehova bwa tibwangaia Kristian ni boong aikai. E katuruturuaki riki bwa e kona n riki bwa tibwangam, e ngae ngke ko kantaninga te nako karawa ke te maiu n te aonnaba ae bwaretaiti.

E Tabeakinia Raoi Tibun Rewi Iehova

3. Tera ae kaira te Atua bwa e na rineia tibun Rewi bwa a na beku irouna?

³ A beku bwa ibonga mataniwi n utu i buakoia aia utu nako imwain anganakia tibun Iteraera te Tua iroun Iehova. Ngke e anga te Tua Iehova nakoia tibun Iteraera, e rineia tabeman man te baronga ae Rewi bwa a na beku bwa ibonga ao taan ibuobuoki. E kanga n riki aio? E katabuia aia moan nati tibun Iteraera te Atua ni kaokoroia bwa ana bwai are a na beku ibukina, ngke e tiringia aia moan nati I-Aikubita. Imwina e a manga karaoa te bitaki ae kakawaki aei: “I a tia ni kaokoroia tibun Rewi . . . n onoi mwiia karimoa ni kabaneia . . . mai buakoia tibun Iteraera.” Kioina ngke e oti n te wareaomata bwa e mwaiti riki aia moan nati tibun Iteraera nakoia tibun Rewi, ao e a kabwakaaki te kaboomwi ibukini kakoroan te mwaiti. (Warekaia Iteraera 3:11-13, 41, 46, 47, BG.) Mangaia are a a kona ni waakina mwiokoaia tibun Rewi ni beku iroun Atuaia tibun Iteraera.

4, 5. (a) Tera ae nanonaki ibukia tibun Rewi ngkai e riki te Atua bwa tibwangaia? (b) E kanga te Atua n tabeakinia tibun Rewi?

⁴ E kanga n riki Iehova bwa tibwangaia tibun Rewi ngke e rineia bwa a na beku irouna? N oneani mwin are a na anganaki abaia, e angania te bwai ae rangi ni manena ae te mwakuri ae rangi ni kakawaki bwa a na karaoia. Abaia ke tibwangaia bon rikia bwa ana “ibonga Iehova.” (Iotua 18:7, BG) E kaotaki ni kanoan te boki ae Warekaia Iteraera 18:20 bwa a na teimatoa ni karekei baika a kainnanoi ibukini maiuia. (Wareka Warekaia Iteraera 18:19, 21, 24, BG.) A na anganaki tibun Rewi “kabwiani bwaai ni kabane i buakoia Iteraera bwa . . . boon aia makuri.” E nanonaki iai bwa a na karekea te kabwianibwai ke te katebwina ni mwakoro man uaan abaia tibun Iteraera ao mai buakoia maan ngkana a a rikirake mwaitiia. Ngkanne a na manga anga te katebwina ni mwakoro tibun Rewi “mai buakoni bai aika moan te raoiroi” man are a karekea, ibukini boutokaia ibonga.a (Warekaia Iteraera 18:25-29, BK) A anganaki naba ibonga “karea n tabekaki rake aika bwaai aika tabuaki” ake a uotii tibun Iteraera nakon te Atua n te tabo are taromauriaki iai. Ai ngaia are e riai ibukia ibonga bwa a na onimakina ae e bon tabeakini kainnanoia Iehova.

⁵ A kakoauaa tabeman bwa a anga aia kauoua ni kabwianibwai tibun Iteraera. Ma a kabongana ibukin te amwarake, te moi, ao te bukamaru n taiani botaki aika tabu ni katoa ririki. (Te Tua-Kaua 14:22-27) Ma iai riki te anga teuana ae kamanenaaki iai te kabwianibwai aei. A bukamarua te bong n Taabati tibun Iteraera ni katoa itua te ririki. N tokin te katenua ao te kaonoua n ririki n te tai ae itua te ririki, ao a kabongana te kabwianibwai aei tibun Iteraera ni buokia iai kainnano ao tibun Rewi naba. Bukin tera ngkai a warekaki tibun Rewi n te tua aei? Ibukina bwa ‘akea tibwangaia ma abaia’ i aon Iteraera.​—Te Tua-Kaua 14:28, 29, BG.

6. A na maeka n te tabo raa tibun Rewi ngkai akea tibwangan aia baronga?

⁶ Ko bae n iangoia bwa ‘a na maeka ia tibun Rewi ngkai akea tibwangaia?’ E tabeakinia te Atua. E angania 48 kaawa n ikotaki ma aaba ake i rarikia. A warekaki naba iai kaawa ni kamaiu aika onoua. (Warekaia Iteraera 35:6-8) Ngaia are bon iai aia tabo ni maeka tibun Rewi ngkana a aki karaoa aia beku ibukin te Atua n te umwa ae tabu. A bati baika e katauraoi Iehova ibukia te koraki ake a anga ngaiia bwa a na beku ibukina. E teretere raoi bwa a kona ni kaotia tibun Rewi bwa bon tibwangaia Iehova n onimakinan ae e tauraoi ao iai mwaakana ni katauraoi baika a kainnanoi.

7. Tera ae kainnanoaki mairouia tibun Rewi bwa e aonga n riki Iehova bwa tibwangaia?

⁷ Akea te Tua ae a na katuuaaeaki tibun Iteraera ake a aki anga aia kabwianibwai. Ngkana a aki kakaonimaki aomata n anga aia kabwianibwai, ao a rotakibuaka iai ibonga ao tibun Rewi. E riki anne n ana bong Neemia. Ibukin anne, a riai ni mwakuri tibun Rewi n aia tawaana ike aikoa mutiakina iai aia mwakuri ni minita. (Wareka Neemia 13:10.) A kona tibun Rewi n teimatoa ni karekei baika kainnanoi ibukini maiuia, tii ngkana a ongeaba te natannaomata nakon ana Tua Iehova. Irarikin anne, a riai ibonga ao tibun Rewi n onimakina Iehova ao arona n tabeakini baika a kainnanoi.

E Riki Iehova Bwa Tibwangaia Tibun Rewi n Tatabemania Nako

8. Kabwarabwaraa te kangaanga are kaitaraa Ataba ae te I-Rewi.

⁸ E riki Iehova bwa tibwangan te baronga ae tibun Rewi. Ma a kabongana naba te taeka ae “bon tibangau Iehova” tabeman tibun Rewi n tatabemania nako n tataekinan aia iraorao ma te Atua ao n onimakinna. (Baebaeti 3:24, BG) N te katoto, e taekinaki n te Baibara taekan te tia anene ao te tia ototo ae tibun Rewi are e taekina Iehova bwa tibwangana. Ti kona n taekinna bwa Ataba, e ngae ngke ngaia kaaini batan Ataba ae te I-Rewi are e kairiia taan anene n ana bong te Uea ae Tawita. (1 Rongorongo 6:31-43) Ti warekia n Taian Areru 73 bwa e a moanna ni bakantang Ataba irouia aomata aika buakaka ao e aki kona n ota ngkai a maiuraoi. E taekina naba ae kangai: “E boni matebuaka kaitiakan nanou i rou, Ma tebokani baiu n aki bure.” E kakoauaaki bwa e kakeaa kakabwaiaana n ana beku ao e a aki kakaitau ngkai Iehova bon tibwangana. E rotaki ana onimaki n te kangaanga “ni karokoa [rinna] n uman te Atua ae tabu.”​—Taian Areru 73:2, 3, 12, 13, 17, BG.

9, 10. Bukin tera ngkai e kona n taekinna Ataba bwa bon ‘tibwangana te Atua n aki toki’?

⁹ Ngke e mena n te tabo ae tabu Ataba, ao e a moanna n iangoi bwaai n aron are e iangoi te Atua. E kona n riki naba anne nakoim. Tao ko a tia ni kakeaa mwiokoam mairoun te Atua ae reke man am onimaki n te tai teuana, ao ko a kaatuua iangoani baika ko kona ni karekei. Ma ko kona n manga moana iangoani bwaai n aron iangoaia iroun Iehova n reiakinan Ana Taeka te Atua, ao ni kakaaei bobotaki ni Kristian. E atai baika a na riki nakoia aomata aika buakaka Ataba. E iaiangoi baike a raoiroi ake e a tia ni karekei ao e a ataia bwa bon Iehova ae na taua ataina ao ni kairiria. E kona ngkanne n taekina ae kangai Ataba nakon Iehova: “Akea temanna i aonaba ae I tangiria i rarikim.” (Taian Areru 73:23, 25, BG) E taekinna ngkanne bwa te Atua bon tibwangana. (Wareka Taian Areru 73:26, BG.) E ngae ngke ‘e mamaara irikon ma n toki nanon’ te tia areru, ma e riki te Atua bwa ‘tibwangana n aki toki.’ E kakoauaa raoi te tia areru bwa e na uringnga Iehova bwa kanga raoraona. E na aki mwanuokaki kakaonimakina n ana mwakuri. (Te Minita 7:1) Ai karaunanora aei iroun Ataba! E anene ni kangai: “E raoiroi i rou te kaania te Atua: I rinea te Uea ae Iehova ba neu ni kamaiu.”​—Taian Areru 73:28, BG.

¹⁰ E bati riki ae nanonaki iroun Ataba ni karikan Iehova bwa tibwangana nakoni baike e karekei ibukini maiuna ngkai ngaia tibun Rewi. Te bae taekinna boni kakabwaiaana n ana beku, ao ana iraorao ma Iehova ae te iraorao are e karikirakea ma Teuare Moan te Rietata. (Iakobo 2:21, 23) E na kakorakoraa kakoauaan Iehova ao ana onimaki te tia areru ngkana e kawakina te iraorao anne. E riai ni kakoauaa raoi Ataba bwa n tokini maiuna, e na reke kaniwangana ngkana e maiuakin ana kaetieti te Atua. Ko bae ni kakoauaa raoi bwa e na karaoa naba anne Teuare Moan te Mwaaka nakoim.

11. Tera te titiraki are e tabekia Ieremia ao e kanga ni kaekaaki?

¹¹ Bon te I-Rewi naba te burabeti ae Ieremia are e kakoauaa bwa Iehova bon tibwangana. Ti na iangoa te bae e nanonna ni kabonganaan te taeka anne. E maeka Ieremia i Anatota n aia kaawa tibun Rewi ae uakaan ma Ierutarem. (Ieremia 1:1) N te tai teuana ao e titirakinaki naba Iehova iroun Ieremia ibukia aomata aika buakaka ngkai a maiu raoi ma aomata aika raoiroi a a karawawataaki. (Ieremia 12:1, BG) Imwini matakuakinan te baere riki i Ierutarem ma Iuta, e a kairaki iai bwa e na “ngurengure.” E ataia Ieremia bwa e raoiroi Iehova. E kairaki Ieremia iroun Iehova rinanon taamneina bwa e na taetae ni burabeti ao arona ni kakororaoi taetae ni burabeti akanne, a a karekea te kaeka ae matoatoa nakon ana titiraki te burabeti. A na kamaiuaki te koraki ake a ongeaba iroun Iehova, ma a na mate te koraki aika buakaka aika aki mutiakina te kauring.​—Ieremia 21:9.

12, 13. (a) Tera ae kaira Ieremia bwa e na taekinna ae “bon tibangau Iehova,” ao tera aroarona iai? (b) Bukin tera ngkai e riai te baronga ae Iteraera ni karikirakea aia kantaninga?

¹² E namakinna Ieremia bwa kaanga e nakonako n te roo imwin tarataraan abana ae e urubekebeke. Ai aron ae e a tia Iehova ni kariaia Ieremia bwa e na tekateka “n ai aroia akana a kamani mate.” (Baebaeti 1:1, 16; 3:6, BG) E a tia Ieremia n tuangia tibun Iteraera ake a aki ongeaba bwa a na okira Tamaia ae i Karawa, ma e korakora aia buakaka ike e a kariaia te Atua bwa e na uruakaki Ierutarem ao Iuta. E riki anne bwa karawawataan Ieremia, e ngae ngke e karaoa ae eti. E taekina ae kangai Ieremia i buakon rawawatana: “Ti aki kamaunaaki.” Ni koauana, e katoabong ana nanoanga Iehova! Ai ngaia are e a taekina ae kangai Ieremia: “Bon tibangau Iehova.” E teimatoa ni kakabwaiaaki n ana beku iroun Iehova bwa te burabeti.​—Wareka Baebaeti 3:22-24, BG.

¹³ I nanon 70 te ririki, e a kamaroaeaki ao n uruakaki abaia tibun Iteraera. (Ieremia 25:11) Ma e kaota onimakinan ana nanoanga te Atua Ieremia n ana taeka ae “bon tibangau Iehova,” ao e a karekea ana tai ni kaota bukin ana ‘kantaninga.’ E a tia te baronga ae Iteraera ni kakeaa tibwangana, ai ngaia are e kainnanoa naba karikirakean te aroaro are e kaotiotia te burabeti. Bon tii Iehova aia kantaninga. Imwin 70 te ririki, a a okira abaia ana aomata te Atua, ao a manga kakabwaiaaki ni beku irouna.​—2 Rongorongo 36:20-23.

A Kona Tabemwaang ni Karika Iehova Bwa Tibwangaia

14, 15. Antai are e kariaia bwa e na riki Iehova bwa tibwangana i rarikia tibun Rewi ao bukin tera?

¹⁴ Boni kaain te baronga ae Rewi Ataba ao Ieremia, ma tii tibun Rewi are a kona ni kakabwaiaaki ni beku iroun Iehova? Ni koauana, tiaki! E taekina te Atua bwa ‘tibwangana i abaia akana maiu’ te roro n rikirake ae Tawita are e na riki bwa uean Iteraera. (Wareka Taian Areru 142:1, 5, BG.) E aki mena n te baareti ke n te auti Tawita n te tai are e otea iai te areru aei. E boni karabaa n te nangananga mairouia aiana. E karabaa Tawita n taian nangananga irarikin Aruram ao n rereuan Enkeri i nanon taai aika uoua. E bae n otea Taian Areru 142 i nanon te nangananga teuana.

¹⁵ E korea te areru aei Tawita i nanon te nangananga ibukina bwa e karabaa mairoun te Uea ae Tauro. E tangiria Tauro bwa e na tiringa Tawita, ai ngaia are e a birinako nakon te nangananga are kangaanga te roko iai. (1 Tamuera 22:1, 4) E taraa n ae ai akea raoraon Tawita ae na kamanoa n te tabo ae raroanako aei. (Taian Areru 142:4) Aio te tai are e a bubutiia iai te Atua buokana Tawita.

16, 17. (a) Baikara bukina ngke e namakinna Tawita bwa ai akea ae kona ni buokia? (b) Antai are e kona ni kawaria Tawita ibukini buokana?

¹⁶ Imwaini korean te Areru 142 iroun Tawita, e bae n tia n ongo te baere riki nakon te Ibonga are Rietata ae Aimereka. E a tia ni buokaki Tawita iroun Aimereka are e aki ataia bwa e bi­r­ina­ko mairoun Tauro. E bakantang te Uea ae Tauro ao e tua tiringan Aimereka ma ana utu. (1 Tamuera 22:11, 18, 19) E namakinna Tawita bwa e irekereke ni mateia naakai. Ai aron ae e bon tiringa te ibonga are e a tia ni buokia. Ko ­namakina naba anne ngke arona bwa e riki nakoim aron are riki nakon Tawita? E a kauaataoaki riki rawawatan Tawita ngkai e aki momotirawa ibukina bwa e teimatoa ni birinako mairoun Tauro.

¹⁷ N te tai ae aki maan, e a mate te burabeti ae Tamuera are e kabira Tawita bwa e na uea. (1 Tamuera 25:1) Ibukin anne e a namakina te maroaa Tawita bwa ai akea ae kona ni buokia. Ma e ataia bwa e na boni buokia Iehova. E aki karekea kakabwaiaana n ana beku n aroia tibun Rewi ma e kabiraki bwa e na karaoa te mwakuri teuana ae okoro. E na riki bwa te tia tautaeka i aoia ana aomata te Atua. (1 Tamuera 16:1, 13) Ai ngaia are e a bunra nanona Tawita nakon Iehova ao e teimatoa ni kantaningaa ana kaetieti te Atua. Ko kona naba ngkoe ni karika Iehova bwa tibwangam ao nnem ni katantan, ngkai ko kakorakorako ni beku irouna.

18. A kanga ni kaotia bwa bon tibwangaia Iehova te koraki ake ti maroroakin taekaia n te kaongora aei?

¹⁸ A iangoaki te koraki ake a tia ni karika Iehova bwa tibwangaia bwa a karekea mwiokoaia ae te beku irouna. A bon onimakina te Atua ibukini baike a kainnanoi ngkai a beku irouna. A karika te Atua bwa tibwangaia tibun Rewi ao kaain te baronga n Iteraera ake tabeua n aron Tawita. Ko na kanga ni karika Iehova bwa tibwangam n aron anne? Ti na maroroakina anne n te kaongora ae imwina.

[Kabwarabwara ae nano]

Ko na Kanga ni Kaeka?

• N te aro raa are e a riki iai Iehova bwa tibwangaia tibun Rewi?

• Tera are a karaoia Ataba, Ieremia ao Tawita are a a kaotia iai bwa bon tibwangaia Iehova?

• Tera te aroaro ae ko kainnanoia ngkana ko na karika Iehova bwa tibwangam?

[Kabwarabwaraan n iteraniba 11]

E aki reke abaia tibun Rewi are a na maeka iai. N oneani mwin anne, bon tibwangaia Iehova bwa iai kakabwaiaaia ae rangi ni kakawaki ae te beku irouna

[Taamnei n iteraniba 10]

E kanga n riki Iehova bwa tibwangaia ibonga ao tibun Rewi?

[Taamnei n iteraniba 12]

Tera are buoka Ataba bwa e na teimatoa n karika Iehova bwa tibwangana?