Ko Kariaia Iehova Bwa e na Riki Bwa Tibwangam?
“Teimatoa n ukoukora moa ana tautaeka n uea te Atua ma ana raoiroi, ao a na karekeaki baikai nakoimi.”—MATAIO 6:33.
1, 2. (a) E tei ibukin antai “ana Iteraera te Atua” are e mwaneweaki n I-Karatia 6:16? (b) Antai ake a tei ibukini “barongan Iteraera aika tengauni ma uabaronga” ni Mataio 19:28?
TERA ae rio n am iango ngkana ko nora te ara ae Iteraera n te Baibara? Ko iangoa iai natin Itaaka ae Iakoba are e kabwakaaki arana nakon Iteraera? Ke ko iangoiia iai kanoana ae te botannaomata are Iteraera ngkoa? E taekinaki naba n te Baibara taekan te Iteraera n taamnei, ke “ana Iteraera te Atua.” Te koraki anne bon ake 144,000 mwaitiia aika kabiraki n te taamnei ae raoiroi, bwa a na riki bwa ueea ao ibonga i karawa. (I-Karatia 6:16; Te Kaotioti 7:4; 21:12) Ma iai riki te anga teuana ae okoro ae kamanenaaki iai te ara ae Iteraera. Ti na nora taekana ni Mataio 19:28.
2 E taku Iesu: “Ngkana a a kaboouaki bwaai ngkana e a tekateka Natin te aomata i aon ana kaintokanuea ae mimitong, ao ngkami aika kam irirai, kam na tekateka naba i aoni kaintokanuea aika tebwi ma uoua, ni motiki taekaia barongan Iteraera aika tengauni ma uabaronga.” N te kibu aei, “barongan Iteraera aika tengauni ma uabaronga” bon te koraki ake a na motikaki taekaia irouia taan rimwin Iesu aika kabiraki, ao a na karekea te maiu are akea tokina n te aonnaba ae te Bwaretaiti. A na boni kakabwaiaaki man aia mwakuri n ibonga te koraki ake 144,000.
3, 4. Tera te katoto ae raoiroi are a tia ni katei te koraki aika kabiraki aika kakaonimaki?
3 N aroia ibonga ao tibun Rewi ake ngkoa, a iangoa naba aia beku te koraki aika kabiraki ni bong aikai bwa e rangi ni kakawaki. (Warekaia Iteraera 18:20) A aki kantaningaia te koraki aika kabiraki bwa a na anganaki abaia ke aia tabo n te aonnaba. N oneani mwin anne, a kakantaninga rikia bwa ueea ao ibonga ma Iesu Kristo i karawa. A na teimatoa te koraki aika kabiraki ni beku iroun Iehova ni mwiokoaia anne, n aron ae ti wareka taekana n Te Kaotioti 4:10, 11 ni kaineti ma nakoaia i karawa.—Etekiera 44:28.
4 Ni menaia te koraki ake a kabiraki i aon te aba ao a boni maeka n te aro are a kakoauaaki iai bwa bon tibwangaia Iehova. E rangi ni kakawaki irouia aia beku ibukin te Atua. A kaotiota onimakinan ana karea ni kaboomwi Kristo ao n teimatoa n iriria ike a ‘kakoauaa raoi weteaia ma rineaia.’ (2 Betero 1:10) A kakaokoro baika a rinanona ni maiuia ao aia konabwai n tatabemania nako. Ma a aki karekea aonaia ibukini mamaaraia ni kauarerekea aia tai ni beku ibukin te Atua. Ni kaitaraan anne, e rangi ni kakawaki irouia moanibwaian aia beku ibukin te Atua ma ni kabanea aia kona iai. Ao a katea te banna ni katoto ae raoiroi ibukia te koraki ake a kantaningaa te maiu i aon te aonnaba ae te bwaretaiti.
5. A na kanga Kristian ni kabane ni karika Iehova bwa tibwangaia ao e aera ngkai e kona ni kangaanga anne?
5 E ngae ngke ti kantaninga te maiu i karawa ke n te aonnaba, ma ti riai ni ‘kakeaira ao n tabeka ara kai ni kammaraki ma n teimatoa n irira Kristo.’ (Mataio 16:24) Mirion ma mirion aika kantaningaa te maiu i aon te aonnaba ae te Bwaretaiti aika a taromauria te Atua, ao ni kakairi n aroni Kristo anne. A bon aki rau nanoia ni karaoan aia mwakuri ae uarereke ngkai a ataia bwa a kona ni karaoa ae bati riki. A a bati aika a kairaki bwa a na kabebetei maiuia ao n riki bwa bwaiania. A kona ni bwaiania tabeman i nanon tabeua te namwakaina n te ririki. Ao a kakorakoraia tabeman n te mwakuri ni minita ngkai a aki kona ni bwaiania. Te korakina a katotonga Maria are e kabira Iesu n te bwaa ae boiarara. E taku: “E boni karaoa te mwakuri ae raoiroi nakoiu. . . . E karaoa ae e kona neiei.” (Mareko 14:6-8) Ti maeka n te aonnaba ae tautaekanaki iroun Tatan, ngaia are tao e kona ni kangaanga karaoan ara kabanea ni kona. Ti riai ni kakorakoraira ni mwakuri ao n onimakina Iehova. Ti na iangoi aanga aika aua ae ti kona iai ni karaoa anne.
Ukoukora Moa Ana Tautaeka n Uea te Atua
6. (a) A kanga aomata n te aonnaba aei ni kaotia bwa bon tii te maiu aei tibwangaia? (b) Bukin tera ngkai e tamaroa bwa ti na kakairi iroun Tawita?
6 E reireinia taan rimwina Iesu bwa a na ukoukora moa ana Tautaeka n Uea ao ana raoiroi te Atua. A teimatoa aomata n te aonnaba aei n ukoukori moa baika a tangiri nanoia n aroia “aomata aika ana bwai te aba, aika a reke tibangaia mai buakoni bwain te maiu aei.” (Wareka Taian Areru 17:1, 13-15, BG.) Bon akea tabeakinan Iehova irouia aomata aikai. A a bati aika a tii tabeakina karekeani kaubwaia, karikirakean aia utu, ao kabatiaani baika a na bwaibwai iai natiia. Bon tii te maiu aei tibwangaia. Ma e okoro Tawita bwa e kani ni karekea “te ara ae raoiroi” iroun Iehova. Imwina riki e taekinna natina are Toromon bwa ti riai naba ni karaoa anne. (Te Minita 7:1, BG) E noria Tawita bwa karekean te iraorao ma Iehova bon te bwai ae rangi ni kakawaki i nanoni maiuna ni kabane, n aron Ataba. E kukurei n nakonako ma te Atua. A a bati naba Kristian n ara tai aikai aika a tia ni kaotia bwa e kakawaki riki aia beku iroun Iehova nakon aia mwakuri ni kareketianti.
7. Tera te kakabwaia are e karekea te tari te mwaane temanna n ukoukoran moa Ana Tautaeka n Uea te Atua?
7 Iangoa Jean-Claude, are e maeka i Central African Republic. Bon te unimwaane n te ekaretia ae e a tia ni mare ao teniman natina. E rangi ni kangaanga reken te mwakuri ni kareketianti n te aba anne, ao angiia aomata iai a kabanei aia kona ni kateimatoa aia mwakuri. N te bong teuana, e a tuangaki Jean-Claude iroun te manatia bwa e na moana ana mwakuri n te tairiki ni moa man 6:30 p.m., i nanon itua te bong n te wiki. E kabwarabwaraa Jean-Claude bwa irarikini karekeani maiuia ana utu, e riai naba n tabeakina marurungia n te onimaki. E taekinna naba nakon te manatia bwa iai tabena ni kaineti ma buokaia kaain te ekaretia. Tera ana kaeka te manatia? “Ngkana ko kani kateimatoa am mwakuri, ko riai ni mwaninga bwaai ni kabane, n ikotaki ma buum, natim, ao am kangaanga. Akea te bwai ae ko riai ni kabanea am tai iai bwa tii am mwakuri. Rineia: E nga ae ko tangiria am Aro ke am mwakuri.” Tera ae ko na karaoia ngkoe? Eng, e ataia Jean-Claude bwa ngkana e kabuaa ana mwakuri ao e na bon tabeakinna te Atua. E bati ana mwakuri ae karaoia ibukin te Atua, ao e tabeakinaki kainnanoia ana utu iroun Iehova. Ngaia are e a kaea te botaki are imwina. Imwin anne, e a katauraoia bwa e na nako ni mwakuri ma e aki koaua raoi iai bwa e a kamotirawaaki ke aki. N te tai naba anne, e a tarebooniaki. E a kabaneaki te manatia ma e teimatoa tarira n te onimaki anne n ana mwakuri.
8, 9. N te aro raa ae ti kona ni katotongia ibonga ao tibun Rewi ni karika Iehova bwa tibwangara?
8 A a tia tabeman n rinanon te waaki aei ike e a tara ni bua aia mwakuri ao n iango ni kangai: ‘N na kanga ni kakororaoa mwiokoau ni katauraoani baika a kainnanoia au utu?’ (1 Timoteo 5:8) Ma e ngae ngke e riki anne nakoim ke e aki, ko ataia raoi man te baere ko rinanona bwa e bon aki kona te Atua ni karawawataia te koraki ake a karikia bwa tibwangaia, ao ni moanibwaia ana mwakuri ni maiuia. Ngke e tuangia taan rimwina Iesu bwa a na teimatoa n ukoukora moa ana tautaeka n uea te Atua, ao e karau nanoia ni kangai: “A na karekeaki baikai nakoimi” n aron te amwarake, te moi ke karabaami.—Mataio 6:33.
9 Iangoi aroia tibun Rewi ake a aki karekea abaia. E ngae ngke aia mwakuri boni kairaia te natannaomata nakon te taromauri ae itiaki, ma a riai n onimakina Iehova bwa tibwangaia, ao e na bon tabeakini kainnanoia ibukini maiuia. (Warekaia Iteraera 18:20) E ngae ngke ti aki mwakuri n te tembora ni koaua n aroia ibonga ao tibun Rewi, ma ti kona naba n onimakina Iehova. Ngkai ti a tabe ni kaania te toki, e tabe naba n rikirake kakawakin ae ti na onimakina te Atua bwa e na bon tabeakinira.—Te Kaotioti 13:17.
Ukoukora Moa Ana Raoiroi te Atua
10, 11. A kanga tabeman n onimakina Iehova ni kaineti ma aia mwakuri ni kareketianti? Aanga te katoto.
10 E kaumakia naba taan rimwina Iesu bwa a na ‘teimatoa n ukoukora moa ana raoiroi te Atua.’ (Mataio 6:33) E nanonaki n aei bwa ti na kakairi n te bae e iangoia te Atua ae eti ao ae e kairua ma tiaki aia iango aomata. (Wareka Itaia 55:8, 9.) Tao ko kona n uringnga are n taai aika nako ao a bati aomata aika a irekereke ma unikan taiani kaibaakee, a kaboonakoi, a reiakinia tabemwaang te buaka ke ni karaoi ao ni kaboonakoi bwaai ni buaka. Ma imwin reiakinan te koaua irouia, a bati aika rineia bwa a na bita aia mwakuri ao n tau nakon te bwabetito.—Itaia 2:4; 2 I-Korinto 7:1; I-Karatia 5:14.
11 Bon te banna ni katoto ibukira ae raoiroi Andrew are e karaoa anne. Ngke e reiakina taekan Iehova Andrew ma buuna, a a motinnanoia bwa a na beku irouna. E korakora tangiran ana mwakuri Andrew ma e boni kitanna. Bukin tera? Ibukina bwa e irekereke ana mwakuri ma te buaka ao e tangiria ni karaoa te bae e taekinna Iehova ae eti. Ngke e kitana te mwakuri anne ao bon iai natina uoman ao e bon tau ana mwane ibukin tabeua te namwakaina. E taraa n ae akea abana n aroia tibun Rewi. E onimakina te Atua ao e kakaaea ana mwakuri. Ngkana e ururing rikaaki, e kona ni kamatoaa n taekinna ma ana utu bwa e aki kimototo bain Iehova. (Itaia 59:1) Ibukina bwa a kateimatoa maiuia ae bebete Andrew ma buuna, a a kona iai ni bwaiania. E taekinna bwa a kona n raraoma n tabetai ni kaineti ma te mwane, te auti, marurungia, ao iangoan are a rikirake ni kara. Ma e buokia Iehova n taai nako. A kona n taekinna n akea te nanououa bwa te beku iroun Iehova bon te kakabwaia ao te mwioko ae rangi n rine are e kona ni karekea temanna.—Te Minita 12:13.
12. Tera te aroaro ae ti kainnanoia bwa ti aonga n ukoukora moa ana raoiroi te Atua? Taekini katoto n am kaawa.
12 E tuangia taan rimwina Iesu ni kangai: “Ngkana iai ami onimaki ae uarerekeni koraan te matitati, ao kam kangai nakon te maunga aei, ‘Mwemwenako maikai nako ikekei,’ ao e a mwemwenako naba, ao akea te bwai ae kam na aki kona ni karaoia.” (Mataio 17:20) Ko kona ni moanibwaia ana kaetieti te Atua ngkana ko na reke n te kangaanga iai? Ngkana ko nanououa ni karaoan te bwai teuana, ao maroroakinna ma tabeman kaain te ekaretia. E na boni kakorakoraaki am onimaki n rongorongon ana ibuobuoki Iehova ni baike a riki nakoia.
Kaitaua Iehova Ibukin te Bae E Karaoia
13. Tera ae ti kona ni kariaa ibukini buokan ara onimaki ngkana ti kakorakoraira n ana mwakuri Iehova?
13 Ko kona ni kakoauaa bwa e na karekei baika ko kainnanoi Iehova n aron are e karaoia naba nakoia tibun Rewi, ngkana e rangi ni kakawaki iroum mwiokoam are te beku irouna. Iangoa taekan Tawita. E ngae ngke e mena i nanon te nangananga ma e boni kakoauaa raoi bwa e na katauraoi baika e kainnanoi te Atua. Ti kona naba ngaira n onimakina Iehova ngkana akea ara kona. Ko uringa Ataba ngke e rin n “uman te Atua ae tabu,” e boni karekea otana i aon te baere e karekea rawawatana. (Taian Areru 73:17, BG) N aron anne, ti riai n onimakina Iehova bwa e na boni karekei baika ti kainnanoi ibukini kateimatoaan ara iraorao ma ngaia. E kaotaki n aei bwa e kakawaki iroura mwiokoara ae te beku iroun Iehova n aki ongei baika riiriki nakoira. Ibukin anne, ti a karika iai Iehova bwa tibwangara.
14, 15. Tera arora ae ti riai ni karaoia ngkana iai te rikirake, ao Bukin tera?
14 Tera arom ngkana e kaota “ana bwai . . . aika nano” n te Baibara Iehova ae Nibwani kakorakoraan te onimaki? (1 I-Korinto 2:10-13) Te banna ni katoto ae rangi n raoiroi te abotoro Betero are e karaoa anne. A tuangaki I-Iutaia iroun Iesu ni kangai: “Ngkana kam aki kana irikon Natin te aomata ao n nima raraana, ao akea te maiu i nanomi.” A a bati taan rimwini Kristo aika iangoia bwa e taekina irikona ma raraana ni koaua Iesu ao a taku: “E rangi ni kamatauninga te taetaenikawai aei, ai antai ae nang kan ongora iai?” A a “bati taan rimwina ake a a kitanna ni manga okiri aroia rimoa.” Ma e taku Betero: “Te Uea, ti na nakon antai? A mena iroum taeka aika kairiri nakon te maiu are aki toki.”—Ioane 6:53, 60, 66, 68.
15 E aki ota raoi Betero n te baere e taekinna Iesu ibukini kanakin irikona ma raraana. Ma e onimaki te abotoro aei bwa Iehova e kamanena Iesu bwa e na buokia aomata n ota n te koaua. Ngkana e a rikirake te ota ni bwaai tabeua, ko kataia n atai baika a nanonaki n te Baibara ibukini karaoani bitaki? (Taeka N Rabakau 4:18) A butimwaea te taeka “ma te ingaingannano ae korakora, ao a ukeuke n te Koroboki ae Tabu n te bong ae koraki” kaaini Beroia n te moan tienture. (Mwakuri 17:11) E na kona ni korakora nanom ni kakaitau ibukini mwiokoam are te beku iroun Iehova ngkana ko kakairi irouia.
Maare Tii i Nanon te Uea
16. E na kanga n riki te Atua bwa tibwangara ni kaineti ma te tua are n 1 I-Korinto 7:39?
16 Te anga riki teuana ae a kainnanoia Kristian bwa aonga n teimatoa n ururinga ana kantaninga te Atua, boni maiuakinan te kaetieti n te Baibara are te mare “tii i nanon te Uea.” (1 I-Korinto 7:39) A a bati aika a rineia bwa a na tiku n aki mare n oneani mwin are a na kakeaa bongan ana reirei ni kairiri te Atua aei. E bon tabeakinia koraki aikai te Atua. Tera are e karaoia Tawita ngke e maroaa ao n taraa n akea ae na buokia? E taku: “I nurakina tangu i [matan te Atua]; I kaota rawawatau i matana. Ngke e nimamate tamneiu i nanou.” (Taian Areru 142:1-3, BG) E beku Ieremia iroun te Atua ma te kakaonimaki i nanon ririki aika bati ngke akea buuna. E namakina naba te maroaa.
17. Tera are e karaoia te tari te aine temanna ngke e namakina te maroaa?
17 E taekinna te tari te aine ae maeka i United States bwa e tuai ni motika ana iango bwa e na tiku n aki mare. E tangiria ni mare ma te mwaane ae tau ibukina. E aki tabe tinana are tiaki te tia Kakoaua bwa antai are e na mare ma ngaia bwa e bon tii tangira natina bwa e na mare. E tuanga tinana te tari te aine aei bwa e na bukintaeka ngkana e aki nakoraoi tekatekana. Ma ngke e noria te tina aei bwa e a reke ana mwakuri ae tamaroa natina, are e maiuraoi iai, ao ni kukurei ao e a toki naba n taetae nakon natina ibukin te mare. N tabetai e namakina te maroaa te tari te aine aei. E taku: “I kataia n onimakina Iehova ma e aki mwanuoka taekau.” Tera are e buoka neiei bwa e na onimakina Iehova? “E buokai te tataro bwa N na iangoia ae e boni mena i rarikiu te Atua ao I a aki namakina te maroaa. E kakauongo irou Teuare Moan te Rietata i aoni bwaai ni kabane, ao e aera bwa N na aki namakina tabeakinau ao kukureiu irouna?” E onimakina te bae e taekinaki n Baibara ae kangai: “E kakukurei riki te anga nakon te anganaki.” Ngaia are e a kataia ni buokia aomata n akea kantaningaan kabooana iai. E reitia n taku: “Ngkana I iangoia bwa ‘tera ae N na karaoia ibukini buokan te aomata aei?’ ao I kukurei iai.” (Mwakuri 20:35) Eng, e boni karika Iehova bwa tibwangana ao e kukurei ni mwiokoana ae te beku ibukina.
18. N te aro raa ae e kona iai Iehova ni karikiko bwa tibwangana?
18 Ko kona ni karika te Atua bwa tibwangam n aki ongei baika riiriki nakoim. Ni karaoan anne, ko na warekaki iai i buakoia ana aomata aika kukukurei. (2 I-Korinto 6:16, 17) E riki anne ibukina bwa ko karika Iehova bwa tibwangam, n aron are a kakoauaa tabemwaang ngkoa. (Wareka Te Tua-Kaua 32:9, 10.) E kona n rineiko te Atua bwa ko na riki bwa tibwangana ao e na bon tabeakiniko n aroia tibun Iteraera are e riki te Atua bwa tibwangaia i buakoia natannaomata.—Taian Areru 17:8.
Ko na Kanga ni Kaeka?
Ko na kanga ni karika Iehova bwa tibwangam
• rinanon ukoukoran moa Ana Tautaeka n Uea te Atua ma ana raoiroi?
• rinanoni kaotiotan te kakaitau ibukin te amwarake n taamnei?
• rinanon iaiangoan ana tua te Atua are te mare tii i nanon te Uea?
[Kabwarabwaraan n iteraniba 16]
E riki Iehova bwa tibwangara ngkana ti moanibwaia riki ana mwakuri
[Taamnei n iteraniba 18]
E kaunganano ana katoto Ieremia