KAANIKO MA TE ATUA
Kakororaoani Baera Iroun te Atua
KO A TIA n iaiangoia bwa ‘tera manenan te maiu aei?’ E aki anganira Iehova, tii te kona n titiraki ma e anganira naba kainnanoan ataakini kaekaana. Ti rangi ni kakaitau bwa e aki katikuira Atuara ae tatangira n te rotongitong. E mena te kaeka are ti rangi ni kainnanoia n ana Taeka ae te Baibara. Iangoi ana taeka te Uea are Toromon ake n Te Minita 12:13, BK.
A rangi n okoro baike a riki nakon Toromon. E kona n taekina raoi aroni karekean te kukurei ao manenan te maiu aei. E kakabwaiaaki bwa e anganaki te wanawanana ae rianako, kaubwaina ae rangi ni bati, ao mwaakana n uea, ike e a kona iai ni karaoa ana kakaae raoi i aoni baike a ukoukori aomata, n ikotaki naba ma uaiakinan te kaubwai ao te kakannato. (Te Minita 2:4-9; 4:4) Imwina, e a kairaki iroun te Atua bwa e na taekina mwin ana kakaae ni kangai: “Au kabanea n taeka: i aoni bai ni kabane ao ko na maka te Atua ma ni kawakin ana tua, bon anne baeia aomata nako.” A kateretereaki n taeka akanne, te bwai ae a na karaoia aomata ae moan te kakawaki ao n tangiraki.
“Maka te Atua.” E taraa n aki anainano n te moantai te koaua ae maakan te Atua. Ma e boni karekea te kakukurei. Ti kona n iangoa iai te teei ae ingainga ni kani kakukureia tamana ae tatangira, ma tiaki te kaaunga ae maaku ni kauna ana toka ae rangi n unun. E taekinaki n te boki teuana bwa maakan te Atua bon “aroaroia Ana aomata ni karinerine Nakoina, ibukina bwa a tangiria ao ni karinea mwaakana ma kakannatona.” E kairira naba te aroaro anne bwa ti na kakaraoa nanon te Atua ibukina bwa ti tangiria ao e tangirira naba. Bon tiaki tii te namakin te maaku aei ae irianaki ma te karinerine, ma e boni kaotiotaki n taiani mwakuri. N te aro raa?
“Kawakin ana tua.” E kairira maakan te Atua bwa ti na ongeaba irouna. Ti bon riai n ongeaba iroun Iehova. Kioina ngkai te tia Karaoira, e bon ataa ae moan te tamaroa ibukini maiura, n aron naba te tia karaobwai ae e ataa naba ae moan te tamaroa ni kamanenaan ana bwai. Irarikin anne, ti bon riai ni moanibwaia Iehova i nanora. E tangirira bwa ti na kukurei, ao a karaoaki ana kaetieti ibukini karikirakeani marurungira. (Itaia 48:17) E taekinna n te aro aei te abotoro Bauro: “Bon aei tangiran te Atua, ae ti na kakairi n ana tua, ao a aki rawawata ana tua.” (1 Ioane 5:3) E kaotaki tangiran te Atua n ongeabara, ao e kaotiotaki ana tangira ibukira n ana tua nako.
“Bon anne baeia aomata nako.” E katuruturuaki n taeka aikai kakawakini maakan te Atua ao te ongeaba irouna. Boni baera ao tabera karaoan anne. Kioina ngkai bon ara tia Karikiriki Iehova, boni ngaia mwiokoni maiura. (Taian Areru 36:9) Iai baera bwa ti na ongeaba irouna. Ti kakororaoa baera ngkana ti maiu n aron are e tangiria.
Tera ngkanne manenan te maiu? Ti na taekinna ni kangai: Ti maiu ibukini karaoan nanon te Atua. Akea te anga teuana ae raoiroi riki ae e na rangi ni manena iai maium. E aera bwa ko aki reiakina riki nanon Iehova ao arom ni kona ni kaboraoa maium ma ngaia? A na kukurei Ana Tia Kakoaua Iehova ni buokiko.