E Na Roko N Ningai Te Buaka Ae Aremaketon?

“I a noriia te koraki ae uanao, ae akea temanna ae kona ni warekiia. A nako mai buakoia botannaomata ma baronga ma natannaomata, ma taian taetae . . . A nako te koraki aikai mai buakon te rawawata ae korakora.”—TE KAOTIOTI 7:9, 14.

E A RANGI ni kaan te buaka ae Aremaketon. N te aro raa?

E a kaman tei te botaki ni katobibia te aonnaba ae kaainaki irouia aomata aika beku ibukin Iehova, ake a moanibwaia ao ni maiuakini kaetieti ibukin te aroaro ni maiu ae riai aika n te Baibara. A ikoikotiia aomata aika mirion ma mirion mani baronga, taetae, ao natannaomata nako ake a katea te botaki n itaritari ae tatangira man ana boutoka te Atua. E noraki te botaki n itaritari anne i buakoia Ana Tia Kakoaua Iehova.—Ioane 13:35.

N te tai ae waekoa, e na botiia ana taanga Tatan ao ni moana ana buaka ae te kabanea ni korakora i aoia aika rau man taraa n akea kamanoaia. (Etekiera 38:8-12; Te Kaotioti 16:13, 14, 16) Ko na kanga ni kakoauaa te iango anne? A kabwarabwaraaki n te Baibara baika koaua ake a na buokira n ataa te tai ae na roko iai Aremaketon. A a kamani koro bukini baika bati aika riiriki ake a kaotaki iai.

Baika Riiriki Aika Ko Nori Kakoroani Bukia

A titirakina Iesu taan rimwina bwa a na kanga aomata n ataa te tai are e moanaki iai “tokin te waaki ae ngkai i aon te aba.” (Mataio 24:3) E kaekaia Iesu n tuangia te tai ni kangai: “E na teirake te botannaomata teuana ni buakana te botannaomata teuana, ao te tautaeka teuana ni buakana te tautaeka teuana, ao a na roko roongo ma mwaeiein te aba n te tabo teuana ma teuana.” E manga taku riki: “Baikai ni kabane boni moan rikini kangaanga, kaanga ai aron te ariri imwain te bung.” (Mataio 24:7, 8) E kabwarabwaraa te tai naba anne te abotoro Bauro bwa “kabaneani boong,” ngke e taekinna bwa “taai aika okoro aika karuanikai” boong akanne. (2 Timoteo 3:1) N taraana iroum, a kabwarabwarai baika riki ni boong aikai taetae ni burabeti akanne?

E aera bwa e a korakora te kangaanga n te tai aei? E a kaota bukina te abotoro Ioane. E a kaman taekinna bwa e na “kimototo te tai” are a na karaoi iai aia mwakuri Tatan ma ana taimonio, tii i aon te aba. E taekinaki iai Tatan bwa e a “korakora unna” n te tai aei. (Te Kaotioti 12:7-12) Ko namakinna bwa iai irouia aomata ni boong aikai te nano ni kan un ao n iowawa, tiaki tii n te tabo teuana ma ni katobibia te aonnaba?

E taekinna naba Iesu bwa e na kakororaoaki te mwakuri ae rianako, n te tai ae e a korakora iai te kangaanga aei. E taku: “E na tataekinaki te rongorongo ae raoiroi aei ae taekan [ana tautaeka n uea te Atua], n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.” (Mataio 24:14) Ni boong aikai, e raka i aon 235 aaba ake a tataekina iai te rongorongo ae raoiroi ibukin te Tautaeka n Uea, Ana Tia Kakoaua Iehova n taetae aika 500 tabun. Iai uoua maekatin aika aanaki man te Baibara aika boreetiaki n aron te Te Taua-n-Tantani ao te Awake!, aika a rangi ni butanako n te aonnaba. A a tia naba taani Kakoaua n rairi Baibara n taetae aika tao 100 mwaitiia. A karaoaki mwakuri akanne irouia taan anganano aika aki kabooaki ao e mwanenaki ni bwaintangira aika rereke. E koaua bwa te mwakuri n uarongorongo ae okoro ae kamimi aei, boni kakoroani bukin ana taetae ni burabeti Iesu?

E kateretereaki n te Baibara baika riiriki ake a na kairiri nakon te buaka i marenan Iehova ae te Atua ma te koraki ake a kaitaraa. Iangoi taetae ni burabeti aika tenua ake ko na nori kakoroani bukia.

Baika Riiriki Ake Ko na Waekoa n Nori

Te Taetae ni Burabeti 1. E kabwarabwaraaki n te Baibara bwa a na tataekina te katanoata ae kakawaki ibukin ‘te rau ao te mweraoi’ taan tautaeka n te aonnaba. A kona n iangoia bwa a nang roko n tokia kangaanga aika kakaiaki. Ma bon akea te rau ni baika a na riki imwin te katanoata anne.—1 I-Tetaronike 5:1-3.

Te Taetae ni Burabeti 2. Imwin anne, a na iangoia tautaeka bwa a na buakani botaki n Aro n te aonnaba. A kaikonakaki tautaeka aikai n te Baibara bwa te man ae tiritiri, ao te aine ae tekateka i aona bwa Aaro aika kewe n te aonnaba. (Te Kaotioti 17:3, 15-18) E na karaoa ae tangiria te Atua te man ni kaikonaki aei, ni kamaunai Aaro aika kewe ake a taku bwa aongkoa a tei ibukin te Atua n akea ataakina irouna.

E kabwarabwaraa te kaotioti anne te abotoro Ioane ni kaikonaki akanne ni kangai: “A na ribaa te kabekaau, kooro ake tengaun ake ko nori ma te man ae tiritiri, ao a na kuribwaia ma ni buuta karabaana, ao a na kana irikona ao a na kabuekia ni kabanea n te ai. Bwa e kaaki i nanoia te Atua te kani kakoroa bukin ana iango.”—Te Kaotioti 17:16, 17.

Te Taetae ni Burabeti 3. Imwin te tokanikai ni buakanakia Aaro aika kewe akanne, e na botiia natannaomata Tatan bwa a na buakania te koraki ake a taromauria Iehova ae te Atua.—Te Kaotioti 7:14; Mataio 24:21.

E na Tera Aron Rotakim Iai?

Ngkana e tuai reke am tai n reiakina raoi te Baibara, e na bae ni kangaanga iroum kakoauaan ae a na riki baika a kabwarabwaraaki mai eta. Ma iai bukina ngkai e kakoauaaki bwa a na bane ni koro bukini baike a kabwarabwaraaki ao a na bon riki n te tai ae kaan ae imwaira. A reke raun nanora man norani koroni bukin taetae ni burabeti aika bati n te Baibara.a

E aera bwa ko aki kamwawaa am tai ni kakaaea bukini kakoauaan ae e a kaan “ana bong te Atua ae Moan te Mwaaka” irouia ana Tia Kakoaua Iehova, ao e aera ngkai ko riai n aki maaku? Kariaia maroroakinan te bae ko riai ni karaoia ae taekinaki n te Baibara, bwa ko aonga ni mena i buakoia aomata ake e na kamanoia Iehova ae te Atua. (Te Kaotioti 16:14) E kona ni bita am iango baika ko reiakin ibukin taai aika imwaim.

[Kabwarabwara mai nano]

[Taamnei n iteraniba 8]

Boni kakoroani bukin taetae ni burabeti n te Baibara aia mwakuri Ana Tia Kakoaua Iehova?