Ukoukorani Kaekaan Titiraki Ibukin Iesu

“A kuri ni bane n toa aomata ma aia koaua ibukin [Iesu]. N aki ongea kakaokoron ara onimaki ke nanououara, ti bae n titirakinira ni kangai: ‘Antai teuaei?’”—TE TIA KOREA TE BOKI AE STAN GUTHRIE.

A RANGI ni kiriuriu nanoia aomata ni kan ataa taekan Iesu. A bati booki ibukin rongorongona ake a a butanako irouia aomata. E rangi n tanoata taekana n taiani birim ake a karaoaki ao ni kabooaki nako. Ma e bon teimatoa naba te tititiraki ibukin Iesu. A bati ake a kakaokoro aia iango bwa antai raoi Iesu.

Tabeua te ririki n nako ao a kaoia aomata taani koro rongorongo rinanon te Internet bwa a na kaekaa te titiraki ae “Antai Iesu?” Aikai aia kaeka:

● “Boni ngaia te Rabi (ae te tia reirei) are e katea te katoto ibukin te nanoanga ni maiuna.”

● “Bon te aomata n ai arora ae rianako anuani maiuna.”

● “Akea te bwai ni kakoaua ibukini maiun Iesu i aon te aba.”

● “Iesu bon natin te Atua ae bungiaki, e mate ao e mangauti ibukini kamaiuara man ara bure. E maiu ngkai, ao E na manga oki nako aon te aba.”

● “I kakoauaa bwa Iesu Kristo bon tii natin te Atua ae te aomata, ao te Atua ni koaua naba.”

● “Rongorongon Iesu bon te karaki ae karioaki ibukia ataei.”

E teretere raoi bwa a aki bane n eti iango aika kakaokoro aikai. Ma iai te boki ae e kona n onimakinaki, ibukin te rongorongo are e na kona n anganira te kaeka ae eti nakon ara titiraki ibukin Iesu? A kakoauaa taani boreetia te kaongora aei bwa te Baibara, bon ana Taeka te Atua ao bon tii ngaia ae kona n taekina raoi te koaua ibukin Iesu.a—2 Timoteo 3:16.

N te kaongora ae imwina, ti na rinanoa ana kaeka te Baibara ibukin titiraki tabeua aika taabangaki ni kaineti ma Iesu. E taekinna Iesu bwa e uki te kawai nakon te kamaiuaki nakoia te koraki ‘ake a onimakinna.’ (Ioane 3:16) Ti kaungako bwa ko na neneri raoi kaekaaia ao ni motinnanoa ae e riai bwa ko na reiakina ae bati riki ibukin Iesu ao arom ni kaotiota onimakinana.

[Kabwarabwara mai nano]