Ko Kaotiota Mimitongin Iehova?
“Ti . . kaotiota mimitongin Iehova n aron te tirotaam.” —2 I-KORINTO 3:18.
KO NA KANGA NI KAEKA?
Ti na kanga ni karaoiroa te Atua ngkai taani bure ngaira?
Ti na kanga ni buokaki ni kaotiota mimitongin te Atua n ara tataro, ao n rorokora ni bobotaki n te ekaretia?
Tera ae buokira bwa ti na teimatoa ni karaoiroa Iehova?
1, 2. E aera ngkai ti kona ni katotongi aroaron Iehova?
TI BANE ni katotongia ara karo n aaro aika kakaokoro. Mangaia are ti na aki kubanako ngkana ti ongo ana taeka temanna nakon te teinimwaane ae kangai, ‘Titeboo raoi ngkoe ma tamam.’ E kona naba temanna ni kangai nakon te teinnaine, ‘I a manga uringa tinam iroum.’ A aki toki naba ataei ni katotongi aroia aia karo. Ma tera arora iai? Ti kona ni katotonga Tamara are i karawa ae Iehova? E ngae ngke ti aki kona n noria, ma ti kona n atai aroarona aika kakawaki man reiakinan ana Taeka, matakuakinan ana karikibwai, ao kananoan ara iango i aoni baika ti wareki n te Baibara, ao e a moamoa riki ana taeka Natin te Atua ae Iesu Kristo ao ana mwakuri. (Ioane 1:18; I-Rom 1:20) Ti boni kona ni kaotiota mimitongin Iehova.
2 Imwaini karikani Atam ma Ewa iroun te Atua, e bon ataia bwa a kona n ira nanona ma ni kaotiotii aroarona ao ni karekea kamoamoaana. (Wareka Karikani Bwaai 1:26, 27.) Ti riai ni kaotiotii aroaron Teuare e karikira, ngkana ti kani maiuakina tangiran te Atua. Ni karaoan anne, ti a kakabwaiaaki n anganaki te mwioko ae kaotiotani mimitongin te Atua n aki ongei kateira, ara reirei, ao ara reeti. Bukin tera? Ibukina bwa “e aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.”—Mwakuri 10:34, 35.
3. Tera aia namakin Kristian ngkai a beku ibukin Iehova?
3 A kaotiota mimitongin Iehova Kristian aika kabiraki. Mangaia are e korea ae kangai te abotoro Bauro ae temanna mai buakoia: “Ao ngaira ni kabane ake akea rabunan ubura ake ti tabe ni kaotiota mimitongin Iehova n aron te tirotaam, ti onikaki nakoni katotongana man te mimitong teuana nakon teuana.” (2 I-Korinto 3:18) Ngke e ruo man te Maunga are Tinai te burabeti are Mote ma Tuua Ake Tebwina, ao e raneanea ubuna ibukina bwa e a tia n taetae ma Iehova. (Te Otinako 34:29, 30) E aki reke iroura aroni Mote, bwa a aki nora te raneanea i aon ubura aomata ngkana a taraira, ma ti moangare ma te kimwareirei ngkai ti kaongoia taekan aroaron Iehova, ao ana kantaninga ae tamaroa ibukia. N aroni kiraati aika biiti aika karaneaneaaki rimoa, a raneanea naba taani kabiraki ma raoia aika i aon te aba, ike a a kaotiota mimitongin Iehova ni maiuia ao n aia mwakuri ni minita. (2 I-Korinto 4:1) Ko kaotiota mimitongin Iehova n arom ni maiuakina ae e kukurei iai, ngkai ko katoatai n uarongorongoa te Tautaeka n Uea?
TI KANI KAOTIOTA MIMITONGIN IEHOVA
4, 5. (a) Tera ae ti riai ni buakanna n aroni Bauro? (b) Tera aron rotakira n te bure?
4 Ngkai ana toro Iehova ngaira, ti boni kani karinea ao ni kamoamoaa ara tia Karikiriki ni bwaai nako aika ti karaoi. Ma n angiin te tai ti karaoa ae buakaka, e ngae ngke ti kani karaoa ae raoiroi. E riki naba anne nakoni Bauro. (Wareka I-Rom 7:21-25.) E kabwarabwaraa bukin ara kakorakora Bauro ni kangai: “A bane ni bure aomata ao a bane ni kabwaka ni kaotiotii aroaron te Atua aika moanibaa n raraoi.” (I-Rom 3:23) Eng, ibukin rikiara ae te bure mairoun Atam, ti a tautoronaki iai iroun ‘Uean te Bure’ ae ribuaka.—I-Rom 5:12; 6:12.
5 Tera te bure? Boni kaitaraan raoi aroaron Iehova, baike e tatangiri, ao baike e tangiri mai mairoura. E uruaki ana iraorao temanna ma te Atua n te bure. E kona te bwai teuana n tuka te baere e maaireia te tia katebe, n aron naba anne e kona n tukira te bure mani kaotiotani mimitongin te Atua. Ti kona n tibanako ke bon nanora ni kani karaoa ae bure. (Warekaia Iteraera 15:27-31) E korakora ana kariri te bure nakoira bwa e karaureira ma ara tia Karikiriki. (Taian Areru 51:5; Itaia 59:2; I-Korote 1:21) Mangaia are a maiuakina ae moan te kaokoro ma Iehova aomata, ao a a kabuaa mwiokoaia ae rangi ni kakawaki ae kaotiotan mimitongin te Atua. Akea te nanououa bwa a rangi ni karawawataaki aomata n te bure.
6. Ti na kanga ni kaotiota mimitongin te Atua ngkai taani bure ngaira?
6 E ngae ngke taani bure ngaira ma e a tia Iehova ni kaotia bwa bon “te Atua are e anganga te kantaninga.” (I-Rom 15:13) E a tia ni karekea angani kamaunaan te bure man ana karea ni kaboomwi Iesu Kristo. Ngkana ti kaotiota onimakinan te karea anne, ti aikoa “toronaki n te bure,” ma ti a kona ni kaotiota mimitongin Iehova. (I-Rom 5:19; 6:6; Ioane 3:16) Ni kateimatoaan ara iraorao ma te Atua, ti a kakoauaa iai bwa e na kakabwaiaira ngkai ao n taai aika imwaira naba, ike ti nang kororaoi ao ni maiu n aki toki iai. E ngae ngke taani bure ngaira, ma ti rangi ni kakabwaiaaki ngkai e iangoira te Atua bwa ti kona ni kaotiota mimitongina!
KAOTIOTANI MIMITONGIN TE ATUA
7. Tera ae ti riai n ataia bwa ti aonga ni kaotiota mimitongin te Atua?
7 Ngkana ti kani kaotiota mimitongin te Atua, ti riai n atai raoi aroarora aika bure. (2 Rongorongo 6:36) Ti riai n atai kabwakara ao ni buakani bwa ti aonga n rikirake, n te aro are ti kaotiota iai mimitongin te Atua ma nanora ni koaua. N te katoto, ngkana ti kabwaka n aroni matakuakinan te bwaitingako, ti riai ni kakoauaa te iango ae ti kainnanoa buokan ara onimaki ao ni bubutii buokara. (Iakobo 5:14, 15) Aio te moani bwai ae ti riai ni karaoia ngkana ti kani kaotiota raoi mimitongin te Atua. Ti riai n teimatoa n tuoira bwa ti aonga ni motinnanoia bwa ti na kakaraoa ae boraoi ma ana kaetieti aika raraoi Iehova, ngkai taan taromauria ngaira. (Taeka N Rabakau 28:18; 1 I-Korinto 10:12) N aki ongei aroarora aika bure, ti riai n teimatoa ni buakani bwa ti aonga ni kona ni kaotiota mimitongin te Atua.
8. Tera ae ti riai ni karaoia n aki ongea aki kororaoira?
8 Bon tii Iesu te aomata ae e a tia ni maiu i aon te aba ao ni mate, ae e kakaraoa ae e kukurei iai te Atua ao ni kaotiota mimitongina. Ti kaokoro ma Iesu bwa ti aki kororaoi. Ma ti boni kona, ao ti riai ni kakairi n ana katoto. (1 Betero 2:21) E nori ara kakorakora ao rikirakera ibukini karekeani kamoamoaan Iehova ao e kakabwaiai ara kekeiaki.
9. Tera buokaia Kristian ake a kani kaboraoi maiuia ma ana tua te Atua ake n te Baibara?
9 Ti kona ni buokaki n ana Taeka Iehova bwa ti na atai arora ni kanakoraoa riki kaotiotani mimitongin te Atua. E rangi ni kakawaki reiakinan te Baibara ao kananoan ara iango ni baika taekinaki iai. (Taian Areru 1:1-3) Ti na buokaki ni kanakoraoi riki maiura ni warekan te Baibara ni katoabong. (Wareka Iakobo 1:22-25.) Bon aan ara onimaki ara atatai man te Baibara ao e kona ni kamatoaaki ara motinnano, are ti na rarawa nakon te bure ae kakaiaki ao ti na kakukureia Iehova.—Taian Areru 119:11, 47, 48.
10. E na kanga ni buokira te tataro bwa ti na beku ibukin Iehova ma nanora ni kabane?
10 Ngkana ti kani kaotiota mimitongin te Atua, ti riai ni “botumwaaka n tataro.” (I-Rom 12:12) Ti kona ao n riai n tataroa buokara mairoun Iehova bwa ti aonga ni beku ibukina n te aro ae e kukurei iai. Ti kona ni butiia taamneina ae raoiroi bwa e na karikirakea ara onimaki, e na kakorakoraira n rarawa nakon te kaririaki, ao ni kona ni “kabwarabwaraa taekan te koaua n te aro ae eti.” (2 Timoteo 2:15; Mataio 6:13; Ruka 11:13; 17:5) N aron te ataei ae e onimakina tamana, ti riai naba n onimakina Tamara are i karawa, ae Iehova. Ngkana ti butiia bwa e na buokira ni beku ibukina ma nanora ni kabane, ti a kona n onimakinna bwa e na boni karaoia. Ti bia aki iaiangoia bwa e na un n ara tataro! Ma n oneani mwin anne, ti bia karaoiroia, kaitaua, ukoukora ana kairiri riki ngkana ti kataaki, ao ni butiia bwa e na buokira bwa ti na beku ibukina n aaro aika karekea karaoiroan arana ae tabu.—Taian Areru 86:12; Iakobo 1:5-7.
11. Ti na kanga ni buokaki ni bobotaki n te ekaretia ni kaotiota iai mimitongin te Atua?
11 E a tia te Atua ni mwiokoa “te toro ae kakaonimaki ma ni wanawana” bwa e na tararuaia ana tiibu aika kakawaki. (Mataio 24:45-47; Taian Areru 100:3) E rangi n tabeakin aroia raao n te onimaki ni kaotiota mimitongin Iehova te toro ae kakaonimaki. A kanakoraoaki taraakira ngkai minita ngaira aika Kristian, n ara tai ni bobotaki n aron naba te tia itutu, ae kanakoraoa ara kunnikai bwa ti aonga ni kan iai. (I-Ebera 10:24, 25) Ngaia are ti bia roko i aon te tai, bwa ngkana ti taneiai n ririmwi, ti aki kona ni karikirakei ara onimaki ibukini ‘kanakoraoan’ taraakira ngkai ana toro Iehova ngaira.
TI RIAI NI KATOTONGA ARON TE ATUA
12. Ti na kanga ni katotonga aron te Atua?
12 Ti riai n “[riki] bwa taani katotonga aron te Atua,” ngkana ti na kaotiota mimitongina. (I-Ebeto 5:1) Te anga teuana ae ti kona ni katotonga iai Iehova, boni mani katotongan arona n iango ni kaineti bwaai nako. Ngkana ti kataia ni karaoi bwaai n oin nanora, ti a aki karinea ao ti a uotira nakon te kabuanibwai. Ti riai ni kakorakoraira n ribai baike e ribai Iehova ao n tangiri baike e tangiri, ngkai ti a mena n te aonnaba ae mena i aani mwaakan teuare e buakaka ae Tatan te Riaboro. (Taian Areru 97:10; 1 Ioane 5:19) Ti riai ni kakoauaa i nanora bwa karaoani bwaai ni kabane ibukini kamoamoaan te Atua, bon te beku ae riai ibukina.—Wareka 1 I-Korinto 10:31.
13. E aera bwa ti riai n ribaa te bure, ao tera ae e kaungaira bwa ti na karaoia?
13 E ribaa te bure Iehova ao ti riai naba n ribaia. Ni koauana, ti riai ni kararoaira mani karaoan te bure n aron ae ti kona, ao n taraira bwa ti na aki rotaki iai. N te katoto, ti riai ni kawakinira mairouia taan tannako man te koaua, bwa bon te bure ae na kairira bwa ti na aki tau ni kamoamoaa te Atua. (Te Tua-Kaua 13:6-9) Ti bia rarawa nakoia akana tannako man te koaua, ke ane e taku bwa te tari ma e aki karinea te Atua. E riai naba ni karaoaki aei e ngae ngke kaain ara utu. (1 I-Korinto 5:11) Akea kakabwaiaara ngkana ti kataia ni kaota kairuaia taan tannako man te koaua ke te koraki ake a kabuakakaa ana botaki Iehova ae baireaki raoi bwa e kairua. Ni koauana, e karuanikaia ara onimaki ao ti aki riai n neneri aia rongorongo ake a koreaki n aia boki ke n te Internet.—Wareka Itaia 5:20; Mataio 7:6.
14. Tera te aroaro ae ti riai ni kaotiotia ngkana ti na kakorakoraira ni kaotiota mimitongin te Atua, ao bukin tera?
14 Te anga teuana ae rianako ngkana ti na kakairi iroun Tamara are i karawa, boni kaotiotan te tangira. Eng ti riai ni kakairi n arona n tatangira. (1 Ioane 4:16-19) Ni koauana, ti kaotaki bwa taan rimwin Iesu ao ana toro Iehova n ara itangitangiri i marenara. (Ioane 13:34, 35) Ibukin aki kororaoira, e kona ni kangaanga n tabetai bwainan te tangira, ma ti riai ni kataia ni kaotiotia n taai nako. E kona ni buokira karikirakean te tangira ao aroaro aika e karineaki iai te Atua, bwa ti na kararoai mwakuri n ribuaka ma aika bure.—2 Betero 1:5-7.
15. Tera arora nakoia aomata ngkana iai tangiraia iroura?
15 Ti kairaki n te tangira bwa ti na kani karaoi mwakuri aika raraoi ibukia aomata. (I-Rom 13:8-10) N te katoto, ngkana a tangiriia taanga ni mare, e na teimatoa itiakin aia mare man aia kakaonimaki. Ti buokaki bwa ti na ongeaba ao n aantaeka naba nakon aia kariri unimwaane n te ekaretia, ngkana iai tangiraia ao aia mwakuri iroura. A tangiriia aia karo ataei ake a ongeaba, a karineia, ao a aki taekini baika bubuaka ibukia. Ngkana ti tangiriia raora n aomata, ti na aki iangoia bwa a mangori ke n taetae nakoia ma te aki karinerine. (Iakobo 3:9) Ao unimwaane aika tangiriia ana tiibu te Atua, a na tararuaia ma te akoi.—Mwakuri 20:28, 29.
16. Ti na kanga ni buokaki n ara mwakuri ni minita mani kaotiotan te tangira?
16 E riai naba ni kaotiotaki te aroaro ae te tangira n ara mwakuri ni minita. Kioina ngkai e korakora tangiran Iehova iroura, ti na aki kariaia bwaran nanora irouia aomata tabeman ake ti kawariia n aroia n aki bwerengaki n ara rongorongo ke n aia kaeka aika aki raraoi. Ma ti na teimatoa n tataekina te rongorongo ae raoiroi. Ti kairaki n te tangira bwa ti na katauraoi raoi, ao ni kakorakoraira bwa ti na mwaatai n te mwakuri ni minita. Ngkana ti tangira te Atua ao aomata nako ma nanora ni koaua, ti na karaoa te mwakuri n uarongorongo ibukin te Tautaeka n Uea ma te kukurei, ao tiaki ibukina bwa ti tuangaki.—Mataio 10:7.
TEIMATOA NI KARAOIROA IEHOVA
17. Tera ae ti riai ni karaoia n ataakin ae e tukira te bure mani kaotiotani mimitongin te Atua?
17 A aki tabe ma kakaiakin te bure kaain te aonnaba ma ngaira ti tabeaianga iai. Ti ataia man aei bwa ti riai ni buakana nanora ae tangira te bure. Man ataakin ae taani bure ngaira, ti a ataia ae ti riai ni kataneia mataniwin nanora bwa e na buokira ni karaoa ae riai, ngkana e a moanna n rikirake tangiran te bure n ara iango ao i nanora. (I-Rom 7:22, 23) Ni koauana, ti kona ni mamaara ma e kona ni kakorakoraira te Atua bwa ti na karaoa ae raoiroi n taai nako.—2 I-Korinto 12:10.
18, 19. (a) Tera ae e na buokira n tokanikai i aon Tatan ma ana taimonio? (b) Tera ae ti riai ni motinnanoia?
18 Ti riai ni buakana Tatan ma ana taimonio ngkana ti na karaoiroa Iehova. Ti kona n tokanikai ni karaoan aei man ara bwai ni buaka n taamnei ake mairoun te Atua. (I-Ebeto 6:11-13) Akea tokin Tatan ni kataia n anaa karaoiroan Iehova ae te bwai ae e tau n anganaki n tii Ngaia. E teimatoa naba te Riaboro ni kabanea korakorana n urua ara iraorao ma Iehova. Ma ai boni korakorara konaakin Tatan ni kateimatoaani kakaonimakira ma te nano ae eti ma mwaane, aine ao ataei ake aki kororaoi aika mirion ma mirion mwaitiia, ao ni karaoiroa te Atua! Ngaia are ti bia teimatoa ni karaoiroa Iehova, n aroia kaaini karawa ake a tatakarua ni kangai: “Ko riai n anganaki te neboaki ma te karineaki ma te mwaaka, ngkoe ae Iehova ae Atuara, bwa ko karikii bwaai ni kabane, ao ibukin nanom, ao a a riki baikai bwa ko karikii.”—Te Kaotioti 4:11.
19 Ti bia motinnanoia bwa ti na teimatoa ni karaoiroa Iehova, n aki ongei baika ti kaaitarai. E boni kimwareirei ngkai a a rangi ni bati aika kakaonimaki, ake a kabanei korakoraia ni kakairi irouna ao ni kaotiota mimitongina. (Taeka N Rabakau 27:11) Ti bia inanoi ma ana anene Tawita ae kangai: “N na karaoiroiko, te Uea ae Atuau, n nanou ni kabanea; Ao N na neboa aram n aki toki.” (Taian Areru 86:12, BG) Ai ingaingara nanora ni kariariaa te bong are ti na kaotiota iai mimitongin Iehova, n te aro ae kororaoi ao ni kona naba n neboia n aki toki! A na namakina te kimwareirei aomata aika ongeaba. Ko kaotiota mimitongin Iehova ae te Atua ngkai, ao n iangoia bwa ko na karaoa anne n aki totoki?
[Taamnei n iteraniba 31]
Ko kaotiota mimitongin Iehova n aaro aikai?