Ko Na Kaotiota Mimitongin Te Atua?

“Ti manga kaota mimitongin te Uea kaanga n ai aron te tirotam.”​—2 I-KORINTO 3:18.

1. Tera are e noria Mote ao tera ae riki imwina?

BON teuana mai buakon miitara aika kamimi, are e tuai man nonoria te aomata. E kariaiakaki ana bubutii ae okoro Mote ngke e mena n tii ngaia n te Maunga are Tinai. E kariaiakaki bwa e na nora te bwai ae e tuai man noria te aomata, ae taekan mimitongin Iehova. E bon aki nora Iehova ni koaua bwa e rangi ni mimitong taraakin te Atua, n te aro are akea te aomata ae e na kona ni maiu ngkana e nora te Atua. Ma e rabuna Mote te Atua ni ‘baina’ n otanganna iai ni karokoa e a tia n rirarikina, ao e karaoa anne rinanon te anera. Imwina e a kariaia Mote bwa e na nora raneanean mimitongina. E taetae naba Iehova ma Mote rinanon te anera. E kabwarabwaraki te bwai ae riki n te Baibara ni kangai: “Ao e ruo rikaki Mote man te maunga are Tinai, . . . ao e aki ataia ba e raneanea moana ba muin ana taetaenikawai ma Iawe.”​—Te Otinako 33:18–​34:7, 29, BK.

2. Tera are e taekinna te abotoro Bauro ibukin mimitongin te Atua are a kaotiotia Kristian?

² Iangoia bwa aongkoa ko mena i aon te maunga ma Mote. Ai kamaiu ra norakin raneanean mimitongin Teuare Moan te Mwaaka ao n ongora n ana taeka! Ai kamaiu ra te ruo rikaaki man te Maunga are Tinai ma Mote, are ngaia te tia raoi n te Tua! Ma ko ataia ae a kaotiota mimitongin te Atua Kristian ni koaua n aanga tabeua aika a raka riki nakon are e kaotiotia Mote? E kuneaki te koaua ane kaira te iango anne n te reta are e koreia te abotoro Bauro. E taekinna iai ae Kristian aika kabiraki a “manga kaota mimitongin te Uea kaanga n ai aron te tirotam.” (2 I-Korinto 3:7, 8, 18) N taraana, a kaotiota naba mimitongin te Atua Kristian ake a kaantaningaa te maiu n aki toki i aon te aba.

Aroia Kristian ni Kaotiota Mimitongin te Atua

3. Ti kanga n ataa Iehova n aanga ake e aki atai Mote?

³ Ti na kanga ni kona ni kaotiota mimitongin te Atua? Ti tuai nora ke n ongo bwanan Iehova n aron are e riki nakon Mote. Ma ti ataa Iehova n aanga ake e aki ataia iai Mote. E a tibwa kaoti Iesu bwa te Mesia tao 1,500 te ririki imwin maten Mote. Ibukin anne, e aki kona n ataia Mote bwa e kanga ni kakoroaki bukin te Tua iroun Iesu, are e anga maiuna ibukin kainaaomataia aomata man buakakan uaan te bure ao te mate. (I-Rom 5:20, 21; I-Karatia 3:19) Iai tian ana atatai Mote ni kaineti ma ataakin mimitongin ana kaantaninga Iehova are e a boboto i aon Ana Tautaeka n Uea iroun te Mesia, ao te Baretaiti i aon te aba are e na karokoa. Ti nora mimitongin Iehova tiaki ni matara ma ni matan ara onimaki ae boboto i aon reirei man te Baibara. Irarikina naba ti a tia n ongo bwanan Iehova, tiaki rinanon te anera, ma rinanon te Baibara, ao riki taian Euangkerio, ake a karauaki raoi ni kabwarabwaraa ana reirei ma ana mwakuri ni minita Iesu.

4. (a) A kanga Kristian aika kabiraki ni kaotiota mimitongin te Atua? (b) Baikara aanga ake a kona iai te koraki aika kaantaningaa te maiu i aon te aba, ni kaotiota mimitongin te Atua?

⁴ E ngae ngke a aki kaotiota mimitongin te Atua Kristian rinanon ootan ubuia, ma ai aron ae a oota ubuia n aroia n tataekina raoiroin aroaron Iehova ao ana kaantaninga. Ni kaineti ma ara bong aikai, ao e a kaman taetae ni burabetinna Itaia bwa a na ‘tataekina neboakin Iehova i buakoia botannaomata,’ ana aomata te Atua. (Itaia 66:19) Irarikin anne ti wareka naba aei n te 2 I-Korinto 4:1, 2: “Ngkai ara bwai te nakoa aei, . . .  ti kaki baika raba aika e maamaa te aba iai, n aki nakonako n te nanowanawana ae buakaka, ma n aki kabwaoua ana taeka te Atua; ma ti kaotioti arora aika raraoi, ni kaotiotan te koaua, nakoni mataniwin nanoia aomata ni kabaneia i matan te Atua.” E nanona ikai Bauro taekaia Kristian aika kabiraki, aika “tan reirei n te berita nabangkai.” (2 I-Korinto 3:6) Ma a a tia n rotaki nanoia aomata aika mwaiti kurikuri n aia mwakuri ni minita Kristian aika kabiraki, ao a a tia aomata aikai ni karekea te kaantaninga ibukin te maiu n aki toki i aon te aonnaba. E irekereke aia mwakuri ni minita koraki aika uoua aikai, ma kaotiotan mimitongin Iehova, tiaki tii ni baike a reiakin nakoia aomata, ma n aroaron naba maiuiia. Bon tabera ao mwiokoara bwa ti na kaotiota mimitongin te Atua ae Moan te Mwaaka!

5. Tera ae e kakoauaki man mweeraoira ni kaineti ma te onimaki?

⁵ E a tataekinaki ngkai te rongorongo ae raoiroi ibukin Ana Tautaeka n Uea te Atua, n aaba nako, n aron are e a kaman taekinna Iesu. (Mataio 24:14) Aomata aika kaain reeti nako, baronga, botannaomata, ma taian taetae, a ingainga nanoia ni butimwaea te rongorongo ae raoiroi ao a a tia ni bita maiuiia bwa a aonga ni karaoa nanon te Atua. (I-Rom 12:2; Te Kaotioti 7:9) A aki kona ni katoka tataekinan baike a a tia n nori ao n ongo, n aroia naba Kristian ake rimoa. (Mwakuri 4:20) E raka i aon onoua te mirion mwaitiia aomata ake a kaotiota ngkai mimitongin te Atua, ae te mwaiti ae e a riaon are ngkoa. Ko mena i buakoia? Mweeraoia ana aomata te Atua ni kaineti ma te onimaki, e kaota koauan ana kakabwaia Iehova ao ana kamanomano. E kakoauaki bwa e boni mena taamnein Iehova i aora, ibukina bwa ti kona ni kaaitarai kairiribai aika bubuaka aika korakora riki nakoira. Ti nang noria bwa bukin tera ngkai e a riki anne.

A na Aki Kainabwabu Ana Aomata te Atua

6. Bukin tera bwa e kainnanoaki te onimaki ao te ninikoria, bwa ti aonga n tei ibukin Iehova?

⁶ Iangoia bwa aongkoa ko a weteaki bwa ko na kakoaua n te boowi ni kaitaraa te tia bure ae rangi n iowawa. Ko ataia bwa iai ana botaki ae korakora te tia bure anne ao e nang kabanea korakorana ni kabonganai nako ana anga n tukiko man kaotan ana kairua. Ko na kainnanoa te ninikoria ibukin kaotan ana kairua te tia bure anne, ao ni kakoauaa raoi bwa a na kona ni kamanoko kaain te tautaeka. Anne naba arora ngkai. Ngkai ti tataekina te koaua ibukin Iehova ao ana kaantaninga, ti kaotaraea iai Tatan te Riaboro, ni kaotia bwa ngaia te tia tiritiri ao te tia kewe are e a mwamwanaia kaain aonnaba ni kabane. (Ioane 8:44; Te Kaotioti 12:9) E kainnanoaki te onimaki ao te ninikoria ngkana ko na kamatoako n tei ibukin Iehova ao ni kaitaraa te Riaboro.

7. Tera aron korakoran ana waaki Tatan, ao tera are e kataia ni karaoia?

⁷ Ni koauana bon Teuare moan te Rietata Iehova. Akea tian korakoran mwaakana ni kabotauaki ma Tatan. Ti kona ni kakoauaa bwa e aki tii kona ni kamanoira Iehova, ma e ingainga naba nanona ni karaoia, ngkai ti toro irouna ma te kakaonimaki. (2 Rongorongo 16:9) Ma, Tatan boni ngaia te tia tautaeka i aoia taimonio ao i aoia aomata ake a kaokoroia mairoun te Atua. (Mataio 12:24, 26; Ioane 14:30) E karenakoaki nakon te aonnaba ao e rangi n “unun,” ai ngaia are e a kaaitaraia ana toro Iehova ao ni kabonganaia kaain te aonnaba ae taua taekana aei, bwa a na kataia ni kain wiia ni kabane te koraki ake a tataekina te rongorongo ae raoiroi. (Te Kaotioti 12:7-9, 12, 17) E a kanga ni karaoa aei? N aanga aika a aki kee i aan tenua.

8, 9. E a kanga Tatan ni kabongana te tangira ae aki-riai, ao bukin tera bwa ti riai n rineia raoi te koraki ake ti na iraorao ma ngaiia?

⁸ Te anga are e kataia Tatan ni katabetabeira iai, bon rinanon bwaikorakin te maiu aei. Aomata ni boong aika kaitira aikai bon taan tangira te mwane, taan tangiriia i bon irouia, ao taan tangira riki te kakukurei. A aki tangira te Atua. (2 Timoteo 3:1-4) A kaonaki aia iango angiia aomata ni bwaikorakin te maiu, ao a ‘aki muti’ nakon te rongorongo ae raoiroi are ti taekinna nakoia. Bon akea nanoia ni kan reiakina te koaua man te Baibara. (Mataio 24:37-​39) E kona n ewewe te aeka n nano aei, ma ni kamwaneira bwa e na kerikaki ungan nanora ni kaineti ma te onimaki. Ngkana ti kariaia karikirakean tangiran te bwaikoraki ao te kakukurei, ane e na tabe ngkanne ni kerikaki tangiran te Atua iroura.​—Mataio 24:12.

⁹ Aei bukina are a karauia raoi Kristian n rineia bwa antai te koraki ake a na iraorao ma ngaiia. E korea aei te Uea are Toromon: “Ko na nakonako ma aomata aika rabakau, ao ko na rabakau iai: Ma e na maraki te aomata ngkana e raonia akana nanobaba.” (Taeka N Rabakau 13:20) Ti bia “nakonako” ma te koraki ake a kaotiota mimitongin te Atua. Ai kakukurei ra karaoan anne! Ngkai ti ikotaki ma tarira ao mwanera n te onimaki n ara bobotaki ao n taai tabeua riki, ti kaungaki n aia tangira, aia onimaki, kimwareireia ao rabakauia. Te aeka n iraorao aei e kakorakoraa nanora ni botumwaaka n ara mwakuri ni minita.

10. Baikara aanga ake e a tia iai Tatan ni kakanikoia te koraki ake a kaotiota mimitongin te Atua?

¹⁰ Te anga ae te kauoua are e a kataia iai Tatan ni katokiia ni kabane Kristian man kaotiotan mimitongin te Atua, bon rinanon te kakaniko. Ti aki riai ni mimi iai. N ana tai Iesu Kristo ni karaoa ana mwakuri ni minita i aon te aba ao e kakanikoaki, e ngareakinaki, e taraaki ma te mata ni kairiribai, e bwainingareaki, ao e karaoaki ae aki-riai nakoina ma ni bawareaki naba. (Mareko 5:40; Ruka 16:14; 18:32) A riki naba Kristian ake rimoa bwa bwaai ni kakaniko. (Mwakuri 2:13; 17:32) A kaaitara naba ma aekan anne ana toro Iehova ni boong aikai. A aranaki bwa “burabeti ni kewe” n aron are e koreia te abotoro Betero. E a kaman taekinna te abotoro Betero ni kangai: “A na roko ni boong aika kaitira taani kakaniko ni kakaniko, aika nang toua mwin oin aia kaibabaru, ao ane a na kangai, E nga rokona ae taekinaki? Ba . . . ai uana nako naba bwaai ni kabane ma ngke a moa ni karikaki aonaba.” (2 Betero 3:3, 4) A kakanikoaki ana aomata te Atua n aranaki bwa tiaki oi n aomata. A iangoaki ana kaetieti te Baibara ibukin te aroaro ni maiu ae riai bwa a a bane taia. A iangoia aomata aika bati, bwa bon te bwai ae akea raoiroina te rongorongo ae ti tataekinna. (1 I-Korinto 1:18, 19) Ti kona ngaira aika Kristian ni kakanikoaki n ara tabo n reirei, ara tabo ni mwakuri, ao n taai tabetai bon mairouia ara utu. Ma ti teimatoa ni kaotiota mimitongin te Atua rinanon ara uarongorongo, n ataakin are e ataia naba Iesu, ae Ana Taeka te Atua bon te koaua.​—Ioane 17:17.

11. E a kanga n tia Tatan ni kabongana te bwainikirinaki ni kataia ni kain iai wiia Kristian?

¹¹ Te katenua ni bwai are e kabongana Tatan ibukin kainan wiira, bon rinanon te kakaaitaraki ao te bwainikirinaki. E taku Iesu nakoia taan rimwina: “Ane a na anga ngkami ba kam na karawawataki, ao ane a na kamateingkami: ao ane kam na ribaki irouia botanaomata ni kabaneia i bukin arau.” (Mataio 24:9) Ni koauana, ngkai Ana tia Kakoaua Iehova ngaira, ti a kaaitara ma te bwainikirinaki ae kakamaaku n aaba aika bati n te aonnaba. Ti ataia bwa e a kaman taekinna Iehova mangkekei taekan te riribai ke te kairiribai, are e na rikirake i marenaia te koraki ake a beku iroun te Atua ao te koraki ake a beku iroun Tatan te Riaboro. (Karikani Bwaai 3:15) Ti ataia naba bwa ngkana ti teimatoa ni kakaonimaki i aan kataakira, ao ti boutokaa riain Iehova n tautaeka i aon bwaai ni kabane. E kona ni kakorakoraira ataakin aei bwa ti na tokanikai naba i aon aroaro aika karuanikai. Bon akea te bwainikirinaki ae e na teimatoa ni kain wiira ngkana ti kateimatoaa nanora ni kaotiota mimitongin te Atua.

12. Bukin tera bwa ti riai ni kimwareirei ngkai ti teimatoa ni kakaonimaki ni kaitaraa ana waaki ni kakaaitara Tatan?

¹² Ko rarawa nakon ana waaki n anainano te aonnaba aei ao ni kaotia bwa ko kakaonimaki n aki ongei waaki ni kakaniko ao ni kakaaitara? Iai ngkanne bukina ae ko riai ni kimwareirei iai. E karau nanoia te koraki ake a na iria Iesu ni kangai: “Kam a kabaia, ngkana a taetaebuakaingkami aomata, ma ni bainikiriningkami, ma n atonga te taetae ae buakaka ni kabanea, n uaraoingkami, i bukiu. Kam na kakatonga, ao kimwareirei: ba a bati ami bwai i karawa: ba ai aron naba bainikirinaia burabeti ake i mwaimi i rouia.” (Mataio 5:11, 12) E kakoauaki n nanomwaakam bwa e mena i aom taamnein Iehova ae mwaaka, ni kakorakorako bwa ko na kaotiota mimitongina.​—2 I-Korinto 12:9.

E Reke te Nanomwaaka Mairoun Iehova

13. Tera bukina ae kakawaki ae ti nanomwaaka iai n ara mwakuri ni minita?

¹³ Oin bukin nanomwaakara n ara mwakuri ni minita, boni kaotan tangiran Iehova ao kukureira ni kaotiota mimitongina. Aomata a kai katotongia te koraki ake a tangiriia ao ni karineia, ma akea riki ae e tau ni katotongaki i rarikin Iehova ae te Atua. Ibukin korakoran ana tangira, ao e a kanakoa Natina nako aon te aba bwa e na tataekina te koaua ao n anga maiuna ibukin kamaiuaia aomata aika ongeaba. (Ioane 3:16; 18:37) Ti katotonga te Atua n tangiriia aomata n aekaia nako bwa a na rairi nanoia ma ni kamaiuaki; ao anne bukin ae ti uarongorongo nakoia. (2 Betero 3:9) Te nano aei ae irianaki ma nanomatoara ni katotonga te Atua, e a kairira bwa ti na botumwaaka ni kaotiota mimitongina n ara mwakuri ni minita.

14. E kanga Iehova ni kakorakoraira bwa ti na nanomwaaka n ara mwakuri ni minita?

¹⁴ Ni koauana, e reke nanomwaakara n ara mwakuri ni minita mairoun Iehova. E kateimatoaira ao e kakorakoraira rinanon taamneina, ana botaki, ao ana Taeka ae te Baibara. E anga “te nanomwaka” Iehova nakoia te koraki ake a kani kaotiota mimitongina. E kaekai ara tataro ao e anganira te rabakau ni kaaitarai kataakira. (I-Rom 15:5, BK; Iakobo 1:5) Irarikin anne e aki kariaia Iehova bwa ti na rinanon te kataaki ae e a riaon ara konaa. Onimakinan Iehova, e na buokira bwa ti aonga n teimatoa ni kaotiota mimitongina.​—1 I-Korinto 10:13.

15. Tera ae e buokira bwa ti nanomwaaka?

¹⁵ Te nanomwaaka n ara mwakuri ni minita, e kaotia bwa e mena taamnein te Atua iroura. Ni kabwarabwarana: Aongkoa e tuangko temanna bwa ko na tibwatibwaa te aeka ni kariki teuana nakon auti nako, n akea boona. Ko tuangaki bwa ko na karaoa aei n oin am kabanemwane ao ni bon reken am tai iai. E aki maan ao ko a ataia bwa tii tabeman aomata aika a tangira raoi am kariki, ma a na totokoa am mwakuri anne tabeman. N am iango ko na teimatoa ni karaoia ni katoa namwakaina, ao ni katoa ririki? Tao ko na bon aki. Ma e ngae n anne, ko a bae naba n tia ni kakorakorako n tataekina te rongorongo ae raoiroi n oin am tai ma am kabanemwane i nanon ririki aika bati ke tebwi tabun te ririki. Bukin tera? Tiaki ibukina bwa ko tangira Iehova ao e a tia ni kakabwaiaa am mwakuri rinanon taamneina ni buokiko bwa ko na nanomwaaka? Boni ngaia anne!

Te Mwakuri ae E na Uringaki

16. Tera bukina ngkai e kakawaki ibukira ao ibukia te koraki ake a ongora iroura, bwa ti na nanomwaaka n ara mwakuri ni minita?

¹⁶ Te berita nabangkai bon te kabwaia ae moan te rangi ni kakawaki. (2 I-Korinto 4:7) N aron naba anne, e kakawaki aia mwakuri ni minita tiibu tabemwaang ae a karaoia ni katobibia te aonnaba. Ngkai ko teimatoa n nanomwaaka n am mwakuri ni minita, ko kona ni “kamaiuko iai ma ake a ongo i roum,” n aron are e koreia Bauro nakon Timoteo. (1 Timoteo 4:16) Iangoa nanon anne. Te rongorongo ae raoiroi are ko tataekinna, e karekea angaia aomata bwa a na maiu n aki toki. Ko kona iai ni karekea te iraorao ae nene ma te koraki ake ko kani buokiia n te aro n taamnei. Ai boni kakukurei ra te maiu n aki toki n te Baretaiti ma te koraki ake ko a tia ni buokiia n reiakina taekan te Atua! Ni koauana a na bon aki mwanuokina am mwakuri ni buokiia. Aei bon nibwan te raunnano.

17. Bukin tera bwa ara tai aikai, bon taai aika okoro?

¹⁷ Ko a maiu n te tai ae okoro ni maiuiia aomata. E nang aki manga tataekinaki te rongorongo ae raoiroi i buakoia te koraki ake a kaokoroia mairoun te Atua. E maiu i buakoia aeka n aomata akanne Noa ao e nora kamaunakiia. E bae ni kimwareirei n ataakin ae e kakaonimaki ni karaoa nanon te Atua ni kabaa te ake, are e a kamaiuaki iai ma ana utu! (Ebera 11:7) Ko kona naba ni kimwareirei n aron anne. Iangoa aron am namakin n te aonnaba ae boou, ngkana ko a tanrikaaki n tarai mwin am mwakuri ni boong aika kaitira aikai, ao ko ataia bwa ko a tia ni boutokaa ana Tautaeka n Uea te Atua.

18. Tera te karaunano ao te kaunganano are e anga Iehova nakoia ana toro?

¹⁸ Ti bia ngkanne teimatoa ni kaotiota mimitongin te Atua. Karaoan anne bon te bwai ae e na aki toki n ururingaki. E uringi naba ara mwakuri Iehova. Aei te kaunganano ae reke man te Baibara: “Ba E aki ribuaka te Atua ni manuoki ami makuri ma ami tangira are kam kaotia nako arana, ngke kam akoiia ake a itiaki, ao ngkai kam boni kume naba n akoiia. Ao ti bati n tangiringkami ba kam na bane ni kaota te kakorakoraingkami anne nakon atakin raoi ami kaantaninga ni karokoa te toki: ba kam na aki taningaroti, ma kam na kakairi irouia ake a kareke mwin taeka n akoi n te onimaki ma te taotaonaki n nano.”​—Ebera 6:10-​12.

Ko Kona ni Kabwarabwaraa?

• A kanga Kristian ni kaotiota mimitongin te Atua?

• Baikara ana waaki n nanowanawana Tatan ake e kabonganai ibukin kataakin kainan wiia ana aomata te Atua?

• Tera kakoauaan ae e mena taamnein te Atua i aora?

[Taamnei n iteraniba 9]

E kaotiotaki mimitongin te Atua ni moan Mote

[Taamnei n iteraniba 10]

Ti kaotiota mimitongin te Atua n ara mwakuri ni minita