A KAOTIOTA MIMITONGIN IEHOVA KRISTIAN
“A a kabaia matami, ba a noraba; ao taningami, bwa a ongo.”—MATAIO 13:16.
1. Tera te titiraki ae rio n am iango ibukin aroia tibun Iteraera nakon Mote n te Maunga are Tinai?
IAI bukin bobotakiia tibun Iteraera n te Maunga are Tinai bwa a na kaaniaki riki ma Iehova. Bwa a a tia ni kainaaomataki mai Aikubita ni bain Iehova ae mwaaka. E tabeakin kainnanoia, e katauraoa te amwarake ma te ran n te rereua. Imwina e katokanikaiia i aoia ana taanga ni buaka tibun Amareka. (Te Otinako 14:26-31; 16:2–17:13) Ngke a tabe ni maeka tibun Iteraera n te rereua i rarikin te Maunga are Tinai, ao a rangi ni maaku n rebwetatan te baa ma te itirua n te aro are a ruru. A nora Mote imwin anne n ruo rikaaki man te Maunga are Tinai ao e kaotiotaki mimitongin Iehova n ubuna. Ma a bon aki kaatuua iangoan mimitongin Iehova ma ni kakaitau iai, ma a manga “maku ni kaania [Mote].” (Te Otinako 19:10-19; 34:30) Bukin tera bwa a rangi ni maaku n taraa mimitongin Iehova, e ngae ngke a bati bwaai ake e a tia ni karaoi ibukiia?
2. Tera bukina ae tao a a tia ni maaku iai tibun Iteraera n taraa mimitongin te Atua are e kaotiotia Mote?
2 Tao korakoran maakuia tibun Iteraera n te tai aei, iai rekerekena ma te bwai are e a tia n riki imwaina. E boaia Iehova n te tai are a a bon rawa iai n ongeaba irouna, ngke a karaoa te kao-te-tei ae te koora. (Te Otinako 32:4, 35) A mutiakina boaakiia iroun Iehova ao a kakaitau iai? Angiia, a aki. Ngke e a kakaan tokini maiun Mote ao e uringa te bwai are riki n irekereke ma te kao-te-tei ae te koora ao tabeua riki ni kaineti ma aki ongotaekaia tibun Iteraera. E taku nakoia aomata: “Kam rawa nakon ana taeka Iehova ae Atuami, ao kam aki ira nanona, ao kam aki kan ongo bwanana. Kam rarawa nakon Iehova man te bong are I moa n ataingkami iai.”—Te Tua-Kaua 9:15-24.
3. Tera ae e karaoia Mote ngke e rabuna matana?
3 Iangoa te bwai are e karaoia Mote ibukin maakuia tibun Iteraera. E taku te rongorongo: “Ngke a bane ana taeka Mote nakoia, ao e rabuna moana n te kunnikai. Aroaroni Mote i muin te tai arei, e kaki rabunani moana ngkana e rin [n te Umwa-n-rianna ae tabu] ba e na taetae ma Iawe. Ngkana e otinako, ao e kaongoia Iteraera bai ni kabane ake e tuangaki irouni Iawe. Ao a nora raneaneani moani Mote te koraki ni Iteraera. I muina, ao e manga rabuna moana ni karokoa ana tai ni manga taetae ma Iawe.” (Te Otinako 34:33-35, BK) Bukin tera ngke e rabuna matana Mote n taai tabetai? Tera reireiara mai iai? A kona ni buokira kaekan titiraki akanne bwa ti na tuoi raoi arora n iraorao ma Iehova.
Kabuaan te Kabwaia ae Uki Nakoia
4. Tera nanon kabonganakin te rabuna-ni-mata iroun Mote n aron are e kabwarabwara te abotoro Bauro?
4 E kabwarabwaraa te abotoro Bauro bwa e kabongana te rabuna-ni-mata Mote bwa iai irekerekena ma aroaron aia iango ao nanoia tibun Iteraera. E korea ae kangai Bauro: “A aki kona iai tibun Iteraera n tarataraa matani Mote i bukin raneanean moana; . . . ma a kamatoaki nanoia.” (2 I-Korinto 3:7, 14) Ai kananokawaki ra te aroaro anne! Tibun Iteraera bon ana aomata Iehova aika rineaki, ao e tangiria bwa a na kaania. (Te Otinako 19:4-6) Ma a bon rawa n taraa raneanean mimitongin te Atua ma nanoia ni koaua. E kaotaki n aia mwakuri bwa a boni katannako mairoun Iehova, n onean mwin are a na okiria ma nanoia ao aia iango ao n taromauria ni koaua.
5, 6. (a) Tera te bwai ae titeboo irouia I-Iutaia n te moan tienture ao tibun Iteraera ake n ana bong Mote? (b) Tera te kaokoro i marenaia te koraki ake a ongora iroun Iesu ao ake a aki?
5 Ikai are ti a kunea iai te bwai ae titeboo ma are e riki n te moan tienture C.E. N ana tai Bauro n raira nanoia aomata nakon te waaki ni Kristian, ao e a tia n oneaki te berita n Tua nikawai n te berita nabangkai are te tia raoi iai bon Iesu Kristo, are Mote ae Kakannato. E kororaoi aron Iesu ni kaotiota mimitongin Iehova, n ana taeka ao n ana mwakuri. E kangai ana taeka Bauro ni kaineti ma Iesu imwin kautakina: ‘Are bon raneanean mimitongin te Atua, are boni katotongan arona ni koaua.’ (Ebera 1:3) Ai kabwaia ra iai I-Iutaia! A kona ni bon ongora taekan te maiu are aki toki, are e taekinna Natin te Atua! Ma e kananokawaki bwa a aki ongora angina i buakoia te koraki ake e uarongorongo nakoia Iesu. Ni kaineti ma aomata aikai, ao e mwanewea ana taetae ni burabeti Iehova Iesu rinanon Itaia ni kangai: “A riki ni manei nanoia aomata aikai, ao a ongo maaki n taningaia, ao a kamaki mataia; ba a kawa n noraba ni mataia n te bongina, ma n ongo n taningaia, ma n atatai n nanoia, ma n rairi nanoia, ma ni kamaiuaki i Rou.”—Mataio 13:15; Itaia 6:9, 10.
6 E kai noraki te kaokoro i marenaia I-Iutaia ao ana reirei Iesu ake e taekinia ni kangai Iesu: “A kabaia matami, ba a noraba; ao taningami, ba a ongo.” (Mataio 13:16) A ingainga nanoia Kristian ni koaua ni kan ataa Iehova ao ni beku irouna. A kukurei ni karaoan nanona are e kaotaki n te Baibara. Ibukin anne, a kaotiota mimitongin Iehova Kristian aika kabiraki, n aia mwakuri ni minita ae irekereke ma te berita nabangkai, ao a karaoa naba anne tiibu tabemwaang.—2 I-Korinto 3:6, 18.
Bukin Karabaan te Rongorongo ae Raoiroi
7. Bukin tera bwa e aki kamimi ngkai a rawa angiia aomata nakon te rongorongo ae raoiroi?
7 N aron ae ti a tia n noria, a rawa angiia tibun Iteraera ake n ana bong Mote, ni kabongana te kabwaia ae okoro ae uki nakoia. Anne naba ai aron ara bong aikai. A rawa angiia aomata nakon te rongorongo ae raoiroi are ti tataekinna nakoia. Ti aki riai ni mimi iai. E korea ae kangai Bauro: “Ngkana tao e raba ara Euangkerio, ao e raba ti i bukia akana a tabe ni bua. A aki onimaki kioina ba a karooaki nanoia iroun Tatan, ae atuan aonteaba aei.” (2 I-Korinto 4:3, 4, BK) Irarikin ana mwakuri Tatan ni karabaa te rongorongo ae raoiroi, ao a mwaiti aomata aika karabai ubuia ibukina bwa a aki tangiria n noraaba.
8. Tera te anga are a kamatakiaki iai aomata aika mwaiti n te bangabwai, ao ti na kanga ni kararoaira man rotakira iai?
8 A kamatakiaki mataia aomata n te aki-atatai raoi n ana taeka te Atua. E taekinaki n te Baibara taekaia te natannaomata ake “a ro nanoia, ao a raroa ma te maiu ae mairoun te Atua, ba a bangabai.” (I-Ebeto 4:18, BK) Imwain rikin Bauro bwa te Kristian, ae te aomata ae rabakau n te tua, ao e kamatakiaki nanona n te bangabwai ae korakora n te aro are e a bwainikirina iai ana ekaretia te Atua. (1 I-Korinto 15:9) Ma e kaota te koaua nakoina Iehova. E kabwarabwaraa n taku Bauro: “Moaia ngai ni bure: ma I nanoangaki i bukin aei, ba E na kaota kabanean taotaonan nanona Iesu Kristo i rou moa, ba aia bwai ni kakairi akana nang onimakinna ni karekea te maiu are aki toki.” (1 Timoteo 1:16) N aron Bauro, a mwaiti aika a kakaaitaraa ana koaua te Atua ngkoa ae a beku Irouna ngkai. Aei bukina ae e raoiroi iai te teimatoa ni kaotiota taekana nakoia te koraki ake a kakaaitaraira. Ngkai ti katoatai n nenera Ana Taeka te Atua ao ni kaotaira iai, ti a kamanoaki iai man karaoan mwakuri aika boto i aon te bangabwai are e aki kukurei iai Iehova.
9, 10. (a) A kanga I-Iutaia ake n te moan tienture ni kaotiia bwa a aki kona n reireiaki, ao a matoatoa n aia kaantaninga? (b) Iai te bwai ae titeboo irouia Aaro aika aongkoa Kristian ngaiia ni boong aikai? Kabwarabwaraa.
9 A mwaiti aomata aika aki kona ni mataata ni bwaai n taamnei, ibukina bwa a rawa n reireiaki ao a matoatoa n aia kaantaninga. A mwaiti I-Iutaia aika rawa nakon Iesu ma ana reirei, ibukina bwa a nimta riki te Tua Rinanon Mote. Ma tiaki aomata ni kabane ake a karaoa anne. N te katoto, “a bati ibonga ake a ira nanon te onimaki” imwin kautakin Iesu. (Mwakuri 6:7) Ma e ngae n anne, e korea ae kangai Bauro ni kaineti ma angiia I-Iutaia: “E mena naba te rabuna ni mata i aon nanoia, ni karokoa te bong aei.” (2 I-Korinto 3:15) E bae n ataa Bauro taekan te bwai are e taekinna Iesu nakoia mataniwin Aaro n Iutaia, ae kangai: “Kam ukeuke n te Baibara; ba kam taku ba e reke te maiu are aki toki i roumi mai iai: ao boni ngaia are kaotioti i bukiu.” (Ioane 5:39) Te Baibara are a karaua raoi n neneria, e riai ni buokiia bwa a na ataia ae Iesu bon te Mesia. Ma a bon uota oin nanoia I-Iutaia, ao a aki naba anaaki nanoia nakon te koaua ni kakai ake e karaoi Natin te Atua.
10 Tii te arona anne ma kaain Aaro aika aongkoa Kristian ngaiia, ni boong aikai. N aroia I-Iutaia ake n te moan tienture, ao a “kaotiotiia ba bon iai tangiran te Atua ae korakora i rouia, ma tiaki aron te atatai.” (I-Rom 10:2) E ngae ngke iai tabeman aika nenera te Baibara, ma a aki kani kakoauaa are e taekinaki iai. A rawa ni kariaia ae e reireinia ana aomata Iehova rinanon te toro ae kakaonimaki ae wanawana, ae tei ibukia Kristian aika kabiraki. (Mataio 24:45) Ma e ngae n anne, ti ataia bwa e reireinia ana aomata Iehova, ao e tabe n ririkirake teutana imwin teutana ataakin ana koaua. (Taeka N Rabakau 4:18) Ngkana ti kariaia reiakinara iroun Iehova, ti a kakabwaiaki ngkanne n ataakin nanona ao ana kaantaninga.
11. E kanga n raba te koaua irouia aomata aika a onimakina ae a kan onimakinna?
11 A kamatakiaki tabemwaang n oin nanoia ni kan onimakina are a kan onimakinna. E taetae ni burabetinaki bwa iai tabeman aika a na kakanikoia ana aomata te Atua ao te rongorongo are a tataekinna ni kaineti ma menan Iesu i rarikiia aomata. E korea ae kangai te abotoro Betero: “E raba aei i rouia, ngkai a aki kan ataia,” ae taekan karokoan te ieka iroun te Atua nakoia aomata ake n ana tai Noa. (2 Betero 3:3-6) N aron naba anne, a mwaiti aomata aika arania bwa Kristian ake a a kaman ataia ae e nananoanga Iehova, e akoi, ao e kabwarai buure, ma a baka n aki ataa anne ke a rawa nakon te koaua are e aki kona ni mwanuokina katuuaean te aomata Iehova. (Te Otinako 34:6, 7) A kakorakoraia Kristian ni koaua n ota n te bwai are e reireinia te Baibara.
12. A a kanga n tia aomata ni kamatakiaki n te katei?
12 A mwaiti aomata aika katoatai n tataromauri ae a kamatakiaki n te katei nikawai. E taku Iesu nakoia mataniwin Aaro ake n ana tai: “Kam urua ana taeka te Atua iai i bukin ami taeka nikawai.” (Mataio 15:6) A ingainga nanoia I-Iutaia ni kaoka te taromauri ni koaua imwin kaokakiia man tautoronakia i Baburon, ma a manga boni kainikatonga ibonga ao ni kamoamoaia i bon irouia n taku bwa a rangi n raoiroi. A kairekerekeaki bukamaru n Aro ma katei nikawai, ae akea iai te karinerine ni koaua ibukin te Atua. (Maraki 1:6-8) N ana tai Iesu, a manga karin riki katei aika mwaiti Tarukaio ao Baritaio i buakon te Tua Rinanon Mote. E kaotaraeia mwaane aikai Iesu n taku bwa taani mwamwana-te-aba, ibukina bwa e a tia ni bua aia atatai ni kaetieti ake e a kabotoaki i aona te Tua. (Mataio 23:23, 24) A riai Kristian ni koaua n taratara raoi bwa a na aki kariaia katei-n-aomata mairouia kaain Aaro, bwa a na atika aia iango man te taromauri ae itiaki.
“E Nora te Atua ae E Aki Nonoraki”
13. Baikara aanga aika uoua ake e nora iai mimitongin te Atua Mote?
13 E bubutii Mote bwa e kan nora mimitongin te Atua i aon te maunga, ao e bon nora raneanean mimitongin Iehova. E aki kabongana te rabuna-ni-mata ngke e rin n te umwa-n-rianna ae tabu. Mote bon te mwaane ae korakora ana onimaki, ae e korakora tangiran karaoan nanon te Atua irouna. E ngae ngke e kakabwaiaki n anganaki ana tai ni miitaraea mimitongin Iehova teutana, ma ai aron ae e a tia ni kaman nora te Atua ni matana n onimaki. E taku te Baibara bwa “e teimatoa n ana iango, n ai aron te aomata ae e nora te Atua ae e aki nonoraki.” (Ebera 11:27, BK; Te Otinako 34:5-7) Ao e a manga kaotiota mimitongin te Atua tiaki tii rinanon ootan raneanean ubuna i nanon tabeua te tai, ma rinanon naba ana mwakuri ni buokiia tibun Iteraera bwa a na ataa Iehova ao ni beku irouna.
14. E kanga Iesu n nora mimitongin te Atua, ao tera ae e kukurei iai?
14 Ngke e mena i karawa Iesu, e bon nora raoi mimitongin te Atua i nanon te tai ae rangi ni maan, imwain naba karikan bwaai ni kabane. (Taeka N Rabakau 8:22, 30) N taai akanne, e rikirake te tangira ae korakora ao te itoman ae kaan i marenaia. E kaotiota te tangira ae moan te raoiroi Iehova ae te Atua, ao te itoman ae kaan ma ana moani karikibwai. E manga kaota te aeka n tangira ane korakora anne Iesu, nakon te Atua are e a tia n anganna te maiu. (Ioane 14:31; 17:24) Bon te tangira ae kororaoi aia tangira are e a riki i marenan te Karo ma Natina. E kukurei Iesu n aron naba Mote ni kaotiota mimitongin Iehova ni bwaai ni kabane ake e reiakinaki iai.
15. Tera te anga are a iaiangoa iai mimitongin te Atua Kristian?
15 Taani Kakoaua ibukin Iehova ni boong aikai i aon te aba, a katotonga naba Mote ao Iesu, n ingainga nanoia n iaiangoa mimitongin Iehova. A aki rawa nakon te rongorongo ae raoiroi. E korea ae kangai te abotoro Bauro: “Ngkana a rairaki nakon te Uea [ae Iehova ni karaoa nanona], ao e na uotaki nako te rabuna ni mata.” (2 I-Korinto 3:16) Ti nenera te Baibara ibukina bwa ti tangiria ni karaoa nanon te Atua. E korakora tangiran te mimitong are e kaotiotaki ni matan Natin Iehova are ana Uea ae kabiraki ae Iesu Kristo, ao ti kakairi n ana katoto. Ti a tia naba ni kakabwaiaki n aron Mote ao Iesu, ni mwiokoaki n te mwakuri ni minita, ae reireinaia aomata taekan mimitongin te Atua are ti taromauria.
16. Bukin tera bwa ti kakabwaiaki ngkai ti ataa te koaua?
16 E tataro ni kangai Iesu: “I karaoiroiko, Tamau, . . . ba Ko karaba baikai nakoia akana rabakau ma akana wanawana, ao Ko kaotioti nakoia merimeri.” (Mataio 11:25) E anga te atatai Iehova ibukin ana kaantaninga ma aroarona, nakoia te koraki ake a bwabwaina te koaua i nanoia ao a nanorinano. (1 I-Korinto 1:26-28) Ti a mena i aan ana tararua ao e reireinira arora ae ti na kabwaia iai, ni karaoan ae manena ni maiura. Ti bia kamanenai raoi taai aika angaraoi iroura ibukin kaaniakin Iehova, ma ni kakaitau iai ibukin baika bati ake e katauraoi ibukira, bwa ti aonga ni kinaa riki iai.
17. Ti na kanga ni kona n ataa riki aroaron Iehova?
17 E koroboki Bauro nakoia Kristian aika kabiraki ni kangai: “Ngaira ni bane, ma matara aika aki rabunaki, ti manga kaota mimitongin te Uea [Iehova] kaanga n ai aron te tirotam, ao ti kume n onikaki n riki n ai arona, man te mimitong teuana nakon te mimitong teuana.” (2 I-Korinto 3:18) E ngae ngke ti kaantaningaa te nako karawa ke te mena n te aonnaba, ma ngkana ti a rikirake riki n ataa Iehova ma anuana ao aroarona ake a kaotaki n te Baibara, ao ti na kona riki ni katotongnga. Ngkana ti karauira raoi n iaiangoa maiun Iesu Kristo, ana mwakuri ni minita ma ana reirei, ti na kaotiota riki iai ngkanne aroaron Iehova. Ai kimwareirei ra ngaira n ataakin ae ti neboa Atuara are ti tabe ni kaotiota mimitongina!
Ko Uringnga?
• Bukin tera bwa a maaku tibun Iteraera n taraa mimitongin te Atua are e kaotiotia Mote?
• Baikara aanga ake e a ‘rabunaki’ iai te rongorongo ae raoiroi n te moan tienture? ao n ara bong aikai?
• Ti kanga ni kaotiota mimitongin te Atua?
[Taamnei n iteraniba 13]
A aki kona n taraa moan Mote tibun Iteraera
[Taamnei n iteraniba 15]
N aron Bauro, a bati ake a a tia ngkoa ni kakaaitaraa ana koaua te Atua ae a beku ngkai Irouna
[Taamnei n iteraniba 17]
A kukurei ana toro Iehova ni kaotiota mimitongin te Atua