“Kakoroa Bukin Nakoam”

“Kakoroa bukin nakoam.”​—2 TIMOTEO 4:5, BK.

1, 2. E ngae ngkai taan tataekina te euangkerio Kristian ni kabane, ma tera ae e taekinaki n te Baibara ae riai ni karaoaki i rouia unimwaane?

TE TIA uarongorongoa te Tautaeka n Uea ngkoe? Ngkana ngaia anne, kaitaua Iehova ae te Atua ibukin te kakabwaia ae kakukurei aei. Te unimwaane ngkoe n te ekaretia? Anne bon karakaan riki te kakabwaia mairoun Iehova. Ma, ti aki riai ni mwanuokinna bwa akea te reirei ke te rabakau n anai nano, ae e kona ni karekea kariaiakara ni karaoa te mwakuri ni minita ke n tararuaa te ekaretia. Bon Iehova ae e kataubobongaira ni karaoa te mwakuri ni minita, ao ibukina bwa iai tabeman mwaane i buakora aika boraoi aroaroia ma ana kaetieti te Baibara, ai ngaia are a kakabwaiaki ngkai a beku bwa mataniwi n te ekaretia.​—2 I-Korinto 3:5, 6; 1 Timoteo 3:1-7.

² A karaoa te mwakuri n tataekina te euangkerio Kristian ni kabane, ma a kainnanoaki riki mataniwi ke unimwaane bwa a na kaotiota te banna ni katoto ae raoiroi n te mwakuri ni minita. A ataaki iroun te Atua ao Kristo unimwaane “akana kakorakoraia n tataekina ana taeka te Atua ma n reirei,” ao ai uana naba ma taani Kakoaua ibukin Iehova. (1 Timoteo 5:17; I-Ebeto 5:23; Ebera 6:10-​12) Ni katoai taai ake e anga reirei iai te unimwaane, e riai n taraia bwa a na karikirakeaki ni bwaai n taamnei, aomata ake a ongora n ana reirei, bwa e taekina ae kangai te abotoro Bauro nakon te mataniwi ae Timoteo: “E na roko te tai ae a na rawa iai aomata ni butimaea te reirei ae e koaua, ma a na iriri oin nanoia ma ni karekeia aia tia reirei aika a maiti, i bukin ingaingan nanoia ni kan ongora irouia. A na rawa n ongo taekan te koaua, ao a na tauraoi ni butimai karaki n ototo. Ngkoe, ko na taubang ni bai ni kabane, taotaona nanom n am tai ni maraki; karaoa am makuri ae kaotiotan te Euangkerio; kakoroa bukin nakoam.”​—2 Timoteo 4:3-5, BK.

3. Tera ae e riai ni karaoaki bwa e aonga n aki rotaki buaka marurungia kaain te ekaretia ni bwaai n taamnei, n reirei aika kairua?

³ Ngkana e na kakoauaa raoi te mataniwi n te ekaretia bwa e na aki rotaki buaka marurungia n taamnei kaain te ekaretia n reirei aika kairua, ao e riai n ongeaba nakon ana reirei Bauro aikai: “Taubang ni bai ni kabane, . . . kakoroa bukin nakoam.” (2 Timoteo 4:5, BK) Eng, e bon riai ni ‘kakoroa bukin nakoana’ te unimwaane. E riai ni karaoia ni katiaa raoi ma te nano ni kakaonimaki. Te unimwaane are e kakoroi raoi nanon mwiokoana n ana mwakuri ni minita, e tabeakin naba mwiokoana ni kabane, n aki katuka teuana mai iai ke e na aki tii katiaa iteran mwaitin tabena. Te aeka ni mwaane aei, e kakaonimaki naba nakon bwaai aika uarereke.​—Ruka 12:48; 16:10.

4. Tera ae e kona ni buokira ni kakororaoa mwiokoara n te mwakuri ni minita?

⁴ E aki kainnanoaki te tai ae abwabwaki ibukin kakororaoan ara mwakuri ni minita, ma te bwai ae kainnanoaki iai, boni kabonganan raoi te tai. A kona ni buokaki Kristian ni kabane ni kakororaoa nakoaia ni minita, ngkana a kateimatoaia iai ao ni kaakaraoia ni katoa tai. Ngkana e kani kabatiaa riki ana tai te unimwaane n te mwakuri ni minita, e kainnanoa karaoan te babaire ae riai ni kaineti ma ataakin bwaai aika e riai ni karaoi, mwakuri raa aika e riai n anga nako bwa a na karaoaki irouia tabeman ao aroni karaoaia. (Ebera 13:17) E karaoa naba tabena te unimwaane ae karineaki n aron naba are e karaoia Neemia, are e buoka te mwakuri ni manga katean oon Ierutarem. (Neemia 5:16) Ao a riai naba ana toro Iehova ni kabane ni katoa tai n ibuobuoki n uarongorongoa te Tautaeka n Uea.​—1 I-Korinto 9:16-​18.

5. Tera ae ti riai n iangoia ibukin te mwakuri ni minita?

⁵ Ai kakukurei ra mwiokoara aei, ngkai ti a riki bwa taan tataekina rongorongon te Tautaeka n Uea are e a tei ngkai i karawa! Ni koauana, e rangi ni kakawaki iroura tibwangara ae buokan tataekinan te rongorongo ae raoiroi i aonnaba ni kabane, imwain rokon te toki. (Mataio 24:14) E ngae ngkai ti aki kororaoi, ma a kona ni kaungaki nanora n ana taeka Bauro aika kangai: “Iai i roura te bwai ae kakawaki aei [ae te mwakuri ni minita] i nanoni maangko aika taano, ba e aonga n ataki te mwaka ae moan te korakora ba mwakan te Atua, ao tiaki mwakara.” (2 I-Korinto 4:7) Eng, ti kona ni karaoi mwakuri aika ti tangiri, ma tii ngkana e anganira te korakora ma te wanawana te Atua.​—1 I-Korinto 1:26-​31.

Kaotiotan Mimitongin te Atua

6. Tera te kaokoro are e riki i marenan te botannaomata are Iteraera ma te Iteraera n taamnei?

⁶ Ni kaineti ma Kristian aika kabiraki, e taekinna Bauro bwa e a tia te Atua ni “katauira naba ba tan reirei n te berita nabangkai.” Te abotoro aei, e kaota okoron te berita ae boou are e kaineti ma te Iteraera n taamnei rinanon Iesu Kristo, ma te Tua ae rimoa ae karaoaki ma te botannaomata ae Iteraera rinanon Mote. E reitia Bauro ao e taekinna bwa e rangi ni katekemata raneanean ubun Mote ngke e ruo man te Maunga are Tinai ma baaba ake a mwakoro i aoia Tuua ake Tebwina, n te aro are a aki kona ni katurua taraana kaain Iteraera. Ma imwin tabeua te tai, e a riki te bwai ae e a rangi ni buakaka riki bwa “a kamatoaki nanoia” ao e a rabunaki nanoia n te rabuna-ni-mata. Ma ngkana iai te rairannano ni koaua nakon Iehova, ao e a kona ngkanne ni kanakoaki te rabuna-ni-mata anne. E taekina ae kangai Bauro ni kaineti ma te mwakuri ni minita ibukia te koraki ake a mena i aan te berita ae boou: “Ao ngaira ni bane, ma matara aika aki rabunaki, ti manga kaota mimitongin te Uea kaanga n ai aron te tirotam.” (2 I-Korinto 3:6-8, 14-18; Te Otinako 34:29-​35) A mwiokoaki naba ana “tiibu tabemang” Iesu aika ni boong aikai, bwa a na kaotiota mimitongin Iehova.​—Ioane 10:16.

7. A kanga aomata ni kona ni kaotiota mimitongin te Atua?

⁷ A na kanga aomata aika taani bure ni kaotiota mimitongin te Atua, ngkai akea te aomata ae e kona n nora matan Iehova ma ni maiu? (Te Otinako 33:20) Irarikin te koaua are Iehova bon te aomata ae mimitong, ao bon iai naba ana kaantaninga ae mimitong ibukin kaotan riaina ni kairiri rinanon ana Tautaeka n Uea. Koaua aika irekereke ma te Tautaeka n Uea, boni kanoan naba “ana makuri te Atua aika kamimi,” ake a moa n taekinaki irouia te koraki ake a kabiraki n te taamnei ae raoiroi ni Bentekota 33 C.E. (Mwakuri 2:11) A kona te koraki aei ni kakororaoa te tibwanga are a a tia n anganaki man ana kairiri te taamnei are raoiroi.​—Mwakuri 1:8.

8. Ni kaineti ma te nakoa aei, tera are e kananomwaakaa Bauro ni karaoia?

⁸ E korakora nanon Bauro n aki kariaia te bwai teuana bwa e na tukia man kakororaoan nakoana ni minita. E korea ae kangai: “Ngkai ara bwai te nakoa aei, n ai aron nanoangakira, ao a aki bara nanora; ma ti kaki baika raba aika e maamaa te aba iai, n aki nakonako n te nanowanawana ae buakaka, ma n aki kabwaoua ana taeka te Atua; ma ti kaotioti arora aika raraoi, ni kaotiotan te koaua, nakoni mataniwin nanoia aomata ni kabaneia i matan te Atua.” (2 I-Korinto 4:1, 2) Man aron Bauro n taekina “te nakoa aei” ao e a kaotiotaki iai te koaua ao e a kabutaki nako ni karababaki te oota n taamnei.

9, 10. Ti na kanga ni kona ni kaotiota mimitongin Iehova?

⁹ Ni kaineti ma Nibwan te oota ibukin bwaai n rabwata ao n taamnei, e korea ae kangai Bauro: “Bon te Atua, are kangai, E na oota te oota mai buakon te ro, are oota i nanora, ba E na kaota ootan atakini mimitongin te Atua i matan Iesu Kristo.” (2 I-Korinto 4:6; Karikani Bwaai 1:2-5) Kioina ngkai ti a tia n anganaki kakabwaia aika mwaiti ngkai ti a riki bwa ana minita te Atua, ti bia kateimatoaa itiakira bwa ti aonga n riki n ai aron te tirotaam ni kaotiota mimitongin Iehova.

¹⁰ A aki kona n nora mimitongin Iehova aomata aika a mena n te rotongitong n taamnei ke n nora ootana are e kaotiotaki mairoun Iesu Kristo, are Mote ae Kakannato. Ma ngkai ana toro Iehova ngaira, ti karekea te oota ae kakukurei aei man te Baibara ao ti a manga kaotiotia nakoia aomata nako. A kainnanoa te oota mairoun te Atua te koraki ake a mena n te rotongitong n taamnei, ngkana a tangira kamaiuakia man te kamaunanakoaki. Ti kukurei ao a ingainga nanora n ongeaba i aan ana kairiri te Atua, ni kaotaa nako mimitongin Iehova n taabo ake a rotongitong.

Kaotiota Am Oota n Am Tai n Reirei n te Baibara ma Aomata ni Mwengaia

11. Tera are e taekinna Iesu ibukin kaotiotan ara oota, ao tera te anga teuana ae ti kona ni karaoa aei iai n ara mwakuri ni minita?

¹¹ E taku Iesu nakoia taan rimwina: “Ootan te aba ngkami. E aki konaki ni karabaki te kawa ngkana e mena i aon te maunga. Ao a aki kaura te bwae aomata, ni kaki i aan te baketi, ma a kaki i aoni nena; ao e ura nakoia aomata ni kabaneia ake n te auti. Kam na kaoti ami ota i mataia aomata n ai aron aikai, ba a na nori ami makuri aika raraoi, ao a na neboa Tamami are i karawa iai.” (Mataio 5:14-​16) A kona ni kairaki aomata bwa a na neboa te Atua, man aroarora aika raraoi. (1 Betero 2:12) Ao kakaokoron nako ara mwakuri n tataekina te euangkerio, a karekea ara tai ae bati ibukin kaotiotan ara oota. Teuana mai buakon tiara aika kakawaki, bon kaotiotan te oota n taamnei man ana Taeka te Atua rinanon kairan reirei aika manena man te Baibara. Aei te anga teuana ae rangi ni kakawaki ibukin kakororaoan nakoara ni minita. Baikara kaetieti aika kona ni buokira ni kairi reirei man te Baibara aika a na riingaki iai nanoia te koraki ake a ukoukora te koaua?

12. E a kanga n reitaki te tataro ma kairan reirei man te Baibara ma aomata ni mwengaia?

¹² Te tataro nakon Iehova ibukin karekeaia aomata aika ti na reirei ma ngaiia n te Baibara, e kaota ingaingan nanora ni kani kairi reirei man te Baibara. E kaotaki naba iai bwa ti ataa kakawakin buokaia aomata bwa a na karekea ataakin te Atua. (Etekiera 33:7-9) E na bon kaekai ara tataro Iehova ao e na kakabwaiaa ara kekeiaki mwaaka ni karaoan ara mwakuri ni minita. (1 Ioane 5:14, 15) Ma tiaki nanona bwa ti na tii tataro bwa e aonga n reke te aomata ae ti na reirei ma ngaia n te Baibara. Ngkana ti a tia ni moana ara reirei ma te aomata anne, te tataro ao kananoan ara iango ni kaineti ma baika a rangi ni kainnanoaki riki iroun te aomata anne, e na buokira bwa ti na kona ni kaira te reirei n te aro ae uaana.​—I-Rom 12:12.

13. Tera ae e na kona ni buokira ni kairi reirei aika uaana man te Baibara?

¹³ Ti riai ni katauraoi raoi imwain karaoan ara reirei ni katoa tai, ngkana ti tangiria bwa e na uaana ara reirei ma aomata man te Baibara. Ngkana ti namakina kabwakara iai, e na kona n reke buokara ngkana ti matakuakina raoi aron te mataniwi n te Reirei n te Boki n te Ekaretia, ni kaira te reirei n te wiki koraki. N taai tabetai, ti kona n airi ma taan uarongorongoa te Tautaeka n Uea ake a a tia n uaana aia angareirei nakoia aomata n te Baibara. Ni koauana, aroaron Iesu Kristo ao arona n angareirei, boni bwaai aika ti riai n iaiangoi raoi.

14. Ti na kanga ni kona n riinga nanon te aomata ae ti reirei ma ngaia n te Baibara?

¹⁴ E kimwareirei Iesu ni karaoa nanon Tamana are i karawa ao n taetae ma aomata ibukin te Atua. (Taian Areru 40:8) E nimamannei ao e tokanikai n riing nanoia te koraki ake a ongora irouna. (Mataio 11:28-​30) Ti bia kakorakoraira naba n riing nanoia aomata aika ti reirei ma ngaiia n te Baibara. Ngkana ti kani karekea aei iroura, ti riai ni katauraoi imwain ara reirei nako ao n uringi naba aroaron nako te aomata anne n ara iango. N te katoto, ngkana tao e nako te aomata anne man te utu ae a aki kakoauaa te Baibara, ti kona ngkanne ni kaota koauan te Baibara nakoina. Ngkana ti karaoa anne, ao ti na wareki kiibu aika bati ao ni kabwarabwarai naba.

Buokiia Aomata ake Ko Reirei ma Ngaiia bwa A na Ataa Nanon te Kabotau

15, 16. (a) Ti na kanga ni buoka te aomata ae reirei n te Baibara are e aki ataa nanon te kabotau ae kabonganaki n te Baibara? (b) Tera ae ti kona ni karaoia ngkana teuana mai buakon ara boki, e kabongana te kabotau ae kangaanga ataakin nanona iroun te aomata ae reirei n te Baibara?

¹⁵ Tao e tuai taneiai te aomata ae reirei n te Baibara, ma te kabotau teuana are e kabonganaki n te Baibara. N te katoto, e kona n aki ataa nanon ana taeka Iesu ngke e taekina katokaan te taura i aon te kai-n-taura. (Mareko 4:21, 22) E nanona ikai Iesu te taura n taai ake rimoa ae iai wikina ao e bwaanaki n te oera. E katokaaki te taura aei i aon te kai ae kateaki bwa e aonga n oota nanon ma tinanikun te auti iai. E kainnanoaki karaoan te ukeuke i aon te taeka ae “Lamp” ao “Lampstand” n te boki teuana n aron te Insight on the Scriptures bwa e aonga n ataaki nanon ana kabotau Iesu.a Ma ai te kakabwaia tera ngkana ko a karaoa te reirei ma te aomata man te Baibara ao n anga am kabwarabwara ae ota raoi ao ni kakukureia nanon te aomata ae e reirei!

¹⁶ E kona te boki teuana ae buoka aron reiakinan te Baibara, ni kabongana te kabotau ae kangaanga iai otan te aomata ae reirei n te Baibara. Karekea am tai ni kabwarabwaraa, ke ni kabongana te kabotau teuana ae e na ota riki iai te bwai ae nanonaki iai. Tao e katereterea te boki teuana, ae te rao ni mare ae raoiroi arona ao te kaai n ibuobuoki, boni bwaai aika kakawaki n te mare. Ibukin kabwarabwarana, e kona n taekinaki te mwaane ae tienako man te kai ae rangi n rietata ao e kaaki baina mai iai ao e onimakina raona n tiaka bwa e na raweia. Ao n te aro riki teuana, e kona ni kabotauaki kainnanoan te rao ni mare ae raoiroi arona ao te uaia n ibuobuoki ma aroia taani mwakuri n ibuobuoki ni bwatini bwaoki mairoun temanna nakon temanna n aia tai n tabe kaako n te kaibuke.

17. Tera reireiara man ana kabotau Iesu?

¹⁷ E kona ni kainnanoaki te kaman katauraoi ibukin kabonganan te kabotau riki teuana. Boni ngaia aio aron kaotan nanora n tabeakina te aomata are ti reirei ma ngaia n te Baibara. E kamanenai kabotau aika bebete Iesu ibukin kamatataan reirei aika kangaanga. E anga katoton aei n ana Kabwarabwara i aon te Maunga, ao e kaotaki n te Baibara bwa a riingaki nanoia taan ongora n ana reirei. (Mataio 5:1–​7:29) E taotaona nanona Iesu ao e kabwarabwarai ana reirei kioina ngkai iai nanona n tabeakinia aomata.​—Mataio 16:5-​12.

18. Tera ae ti kaungaaki bwa ti na karaoia ni kaineti ma kiibu aika kaotaki n ara boki nako?

¹⁸ Tabeakinaia aomata iroura, e kona n kairira bwa ti na ‘kabwarabwarai raoi nanon kibun nako te Baibara.’ (Mwakuri 17:2, 3) E kainnanoaki iai te reirei ae e irianaki n te tataro ao kamanenan booki aika katauraoaki rinanon “te touati ae kakaonimaki ae wanawana.” (Ruka 12:42-​44) N te katoto, iai kiibu aika mwaiti aika kaotaki n te boki ae te Knowledge That Leads to Everlasting Life.b Kioina ngkai e uarereke te boki aei, tii tabeua ngkanne kiibu aika kaotaki iai. N tain te reirei n te Baibara, e rangi ni kakawaki warekan ao kabwarabwaran kiibu tabeua mai buakon kiibu akana a kaotaki. Bwa ni koauana, ti bon riai ni kabotoi ara reirei i aon ana Taeka te Atua, kioina ngkai e korakora mwaakana. (Ebera 4:12) Okiokira te Baibara i nanon am tai n reirei ma aomata, ao tai toki ni kamanenai kiibu akana kaotaki ni barakirabe. Buoka te aomata ane ko reirei ma ngaia bwa e na kona n nora ae taekinaki n te Baibara ibukin te reirei teuana ke te aroaro ni maiu teuana. Kakorakorako ni kaota nakoina arona ni kona ni karekei kakabwaiakina man te ongeaba iroun te Atua.​—Itaia 48:17, 18.

Tabeki Titiraki Aika Kammwakura te Iango

19, 20. (a) Bukin tera bwa ti riai ni kamanenai titiraki aika a na kona ni kaira te aomata bwa e na kaota nanona, i nanon ara tai n reirei ma ngaia n te Baibara? (b) Tera ae e kona ni karaoaki ngkana e a kainnanoaki riki te kamataata i aon te reirei teuana?

¹⁹ A buokaki aomata bwa a na iaiangoi raoi reireiaia man aron mwaatain Iesu ni kakabonganai titiraki. (Mataio 17:24-​27) Ngkana ti tabeki titiraki aika a na kaira te aomata bwa e na kaota nanona, aika titiraki aika e aki maamaa iai te aomata are ti reirei ma ngaia n te Baibara, ao ana kaeka ngkanne a kona ni kaota raoi te bwai ae e iangoia ibukin te bwai teuana ae e kan ataia. Ti kona ni kunea man aei bwa e teimatoa naba ngkai ni kakoauai iango aika akea koauaia n te Baibara. N te katoto, tao e kona ni kakoauaa te Temanna-n-teniman. N te mwakoro 3, n te boki ae te Knowledge, ao e taekinaki iai bwa akea n te Baibara te taeka ae “Temanna-n-teniman.” A kaotaki ao a mwaneweaki kiibu n te boki aei, aika kaotia bwa Iehova ao Iesu bon aomata aika kaokoro, ao te taamnei ae raoiroi boni mwaakan te Atua ao tiaki te aomata. Tao e kona ni kakoauaki anne man warekan ao maroroakinan kibun te Baibara aikai. Ma tera ae e na karaoaki ngkana e kainnanoaki riki te kamataata i aona? Tao imwin te reirei n te tai ae e na roko, e kona ni karekeaki te tai ibukin maroroakinan te reirei aei n te boroutia ae E Riai Bwa Ko na Kakoauaa te Temanna-n-teniman?, ae aia boki naba Ana tia Kakoaua Iehova. Imwin anne, ti kona ni manga reita nako te reirei n te boki ae te Knowledge.

²⁰ Iangoia bwa aongkoa e kamimi ao e kauniko kaekan am titiraki iroun te aomata are ko reirei ma ngaia n te Baibara. Ti kona n iangoia bwa ti na reita nako te reirei ao ni maroroakina taekan te moko ke waaki riki tabeua aika e na maneang iai, n te tai teuana imwina riki. Ngkana ti ataia bwa e boni momoko naba ngkai te aomata ae ti reirei ma ngaia, ti kona ni kaungaki bwa ti na ukoukori rongorongo aika a tia ni boretiaki aika a na kona ni buoka rikiraken te aomata anne ni bwaai n taamnei. Ngkai ti botumwaaka ni kan rota nanon te aomata anne, ti kona n tataro nakon Iehova bwa e na buokia bwa e na rikirake n te itera n taamnei.

21. Tera ae e kona n riki ngkana ti kaangaraoa ara waaki n angareirei bwa e na kaineti raoi ma kainnanon te aomata are ti reirei ma ngaia n te Baibara?

²¹ Ngkana ti katauraoira raoi ao n raonaki naba n ana ibuobuoki Iehova, bon akea te nanououa bwa ti na boni kona ni kaangaraoi ara waaki n angareirei, bwa e na kaineti raoi ma kainnanon te aomata are ti reirei n te Baibara ma ngaia. Ngkana e a maan ara tai n reirei ma ngaia, ti kona ngkanne ni buokia bwa e na rikirake tangiran te Atua ae korakora irouna. Ti kona naba n tokanikai ni karikirakea irouna te nano ni karinerine ao ni kakaitau nakon ana botaki Iehova. Ao ai karaunano ra ngkana a taekinna aomata aika reirei n te Baibara ae ‘E boni mena te Atua iroura’! (1 I-Korinto 14:24, 25) Mangaia are ti bia kairi reirei aika uaana man te Baibara ao ni kabanei korakorara ni kan buokiia aomata bwa a na riki bwa taan rimwin Iesu.

Te Bwai ae Kakawaki

22, 23. Tera ae e kainnanoaki ngkana ti kan kakororaoa ara mwakuri ni minita?

²² Ti riai n onimakina korakorara mairoun te Atua ngkana ti kan kakororaoa raoi ara mwakuri ni minita. Ni kaineti ma te mwakuri ni minita aei, ao e korea ae kangai Bauro nakoia raona aika Kristian aika kabiraki: “Iai i roura te bwai ae kakawaki aei i nanoni maangko aika taano, ba e aonga n ataki te mwaka ae moan te korakora ba mwakan te Atua, ao tiaki mwakara.”​—2 I-Korinto 4:7.

²³ Titeboo ngaira ma mwangko aika taano aika mamaara, e ngae ngke tao taani kabiraki ngaira ke “tiibu tabemang.” (Ioane 10:16) Ma e kona Iehova n anganira te korakora ae ti kainnanoia ibukin kakororaoan mwiokoara, n aki ongei kangaanga aika ti kaaitara ma ngaai. (Ioane 16:13; I-Biribi 4:13) Mangaia are ti bia onimakina Iehova ma nanora ni kabane, ti bia kakaonimaki ni kaakaraoa nanon mwiokoara ae kakawaki ao ni kakororaoa ara mwakuri ni minita.

[Kabwarabwara ae nano]

Ko na Kanga ni Kaeka?

• Tera ae a kona ni karaoia unimwaane ibukin kakororaoan aia mwakuri ni minita?

• Ti na kanga ni kona ni kanakoraoa riki arora n angareirei nakoia aomata ake ti reirei ma ngaiia n te Baibara?

• Tera ae ti kona ni karaoia ngkana e aki mataata n te kaikonaki teuana, te aomata ae ti reirei ma ngaia n te Baibara, ke e kainnanoa kamatataana riki i aon te reirei teuana?

[Taamnei n iteraniba 14]

A angareirei n te ekaretia Kristian aika unimwaane ao a ibuobuoki naba ni kataneiaia raoia n onimaki aron karaoan te mwakuri ni minita

[Taamnei n iteraniba 16]

Kairan reirei aika uaana man te Baibara bon te anga teuana ae ti kona ni kaotaa nako iai ara oota